Bõe yĩng t’a Sʋɩtãan ne a zĩn-dãmbã modgd b pãng fãa n belgd nebã? Bala b ratame tɩ tõnd me lebg wẽn-kɩɩsdb wa bãmba. B baoodame tɩ d bas Wẽnnaam sakre, n maan bãmb raabo. B sẽn dat yaa d tẽ b ziri wã, n maan yɛl kẽer a Zeova sẽn kisi. Wala makre, rog-n-migs la yel-maandɩ kẽer nebã sẽn maand sẽn ki-bã yĩngã pa noom a Zeova ye.

Ned tõnd sẽn nong sã n maan kaalem, namsd-d-la wʋsgo. Rẽ kɩtame tɩ d tar bʋʋm n na n wilg d sũ-sãanga. A Zezi zoa a Lazaar kũumẽ wã, “a Zezi yãbame.”—Zã 11:35.

Dũniyã gill zugu, rog-n-migs la yel-maandɩ la nebã maand sẽn ki-bã yĩnga, baa b sẽn maandã sã n pa wõnd taaba. Rog-n-migs la yel-maandɩ kẽer pa kɩɩsd Biiblã sẽn yetã ye. La sãnda yẽ tika b sẽn tẽed tɩ sẽn ki-bã tɩ bee zĩig a to, n tõe n yã sẽn vɩ-bã. Wala makre, kʋɩ-bɛdã b sẽn maand kũumã daarã, yãbd n wiisdẽ hal tɩ loog noorã, la reem kʋ-yir n vẽeg beoogã fãa yaa nebã sẽn tẽed tɩ b sã n pa maan woto, kiidã sũur na n sãama ne-bã. La sẽn mik tɩ sẽn ki-bã pa le ‘mi bũmbã,’ sẽn maand-b woto  wã kõta a Sʋɩtãan ziri wã pãnga.—Koɛɛg Soaba 9:5.

Rog-n-migs la yel-maandɩ kẽer nebã sẽn maand yaa b sẽn tẽed tɩ sẽn ki-bã ratame tɩ sẽn vɩ-bã sõng-bã, la tɩ b sã n pa maan dẽ n sigs sẽn ki-bã sũyã, b na n maan-b-la wẽngã. Tẽns sãnda, rasem 40 bɩ yʋʋmd ned kũum poore, b maanda kibs wall b kʋ maando. B yetame tɩ yaa sẽn na yɩl n sõng kiidã t’a ta sẽn ki-bã sẽn beẽ wã. Neb kẽer me nong n kõta sẽn ki-bã rɩɩbo, rãam bɩ koom.

Woto fãa pa sõma ye. Bala kɩtdame tɩ ziri wã a Sʋɩtãan sẽn yelgd kũumã wɛɛngẽ wã paamd pãnga. Tõnd sã n naag n maan bũmb sẽn teend ziri nins zĩn-dãmbã sẽn yelgdã, rẽ yĩnga a Zeova sũur na yɩ noog ne-d sɩda? Abada!—2 Korẽnt dãmba 6:14-18.

Sẽn tũud-b a Zeova wã pa naagd n maan bũmb nins sẽn kõt a Sʋɩtãan ziri wã pãngã, baa yaa bilf meng ye. B pʋd n modgdame n sõngd sẽn ket n vɩ-bã la b  belsd-ba. B miime tɩ ned sã n maan kaalem, a Zeova bal n tõe n le sõng nin-kãngã.—Mark 10:27.

Neb n be n gomd ne zĩn-dãmbã b toore, wall b tũnugd ne bagbã la kinkir-bagbã n gomd ne-ba. Wala makre, sõobã, sẽn maand-b vodu wã, sẽn togsd-b beoog yɛla, sẽn gomd-b ne kɩɩmse, la sẽn dɩt-b tɩt n maand yel-soalmã fãa tʋmda ne zĩn-dãmba.

Wẽnnaam gɩdga bõn-kãensã. Ad Biiblã sẽn yete: “Bɩ yãmb ned baa a ye ra yɩ kinkir-baga, walla ned sẽn togsd beoog yelle, walla baga, walla tɩɩm-soaba, walla ned sẽn gomd ne zĩn-dãmba, walla ned sẽn boond kɩɩms ye. Wẽnnaam ka nong neb nins fãa sẽn maand woto wã ye.”—Tõodo 18:10-12.

Bõe yĩng t’a Zeova keoogd tõnd tɩ d ra kẽ zĩn-dãmbã yɛlẽ baa bilfu?

 A sẽn keoogd tõndã yaa d sõngr yĩnga. A nonga ninsaalbã, n dat b neere. A miime tɩ neb nins sẽn kẽed zĩn-dãmb yɛlẽ wã pa tõe n pa wa nams ye.

Wala makre, a Nilda yaa pag sẽn vɩ Berzɩll. A ra yaa kinkir-baga. Zĩn-dãmbã ra kɩtame t’a vɩɩmã lebg nimbãanega. A yeelame: “Zĩn-dãmbã ra soo maam, n kɩtdẽ tɩ m maand bãmb sẽn date. Wakat ninga, m da mii m nenga, la wakat ning me, m da pa mi m sẽn maandã ye. M da bee gãeems logtor-yiri, m sẽn da lebg wa gãeengã yĩnga. Zĩn-dãmbã sẽn nams maam to-to wã kɩtame tɩ m lʋɩ bãaga. M da venda tɩt rẽ yĩnga, la m yũud rãam ne sɩgaar wakat fãa. Maana woto yʋʋm wʋsgo.”

La ne a Zeova la a Kaset rãmbã sõngre, a Nilda wa n paama a meng ne zĩn-dãmbã. Masã a vɩɩmã yaa sõma, t’a tar sũ-noogo. A yeela woto: “M sagenda nebã fãa tɩ b modg n da kẽ zĩn-dãmbã yɛlẽ baa yaa bilf ye.”