Biiblã yetame tɩ yaa a Sʋɩtãan n “belgd dũniyã fãa.” (Wilgri 12:9) Yẽ ne zĩn-dãmbã pa rat tɩ tõnd tẽ Wẽnnaam goamã sẽn be Biiblã pʋgẽ wã ye. B maanda b sẽn tõe fãa sẽn na yɩl tɩ nebã tẽ tɩ zĩig n be tɩ sẽn ki-bã tɩ vɩ be. Bɩ d ges b sẽn maand to-to.

Tũudum wʋsg pʋgẽ, b yetame tɩ bũmb n be ninsaal yĩngẽ wã n ket n vɩ a kũumã poore. Kẽer boonda rẽ tɩ sɩɩga. B yetame tɩ ned kũum poore, sɩɩgã yitame n kẽng zĩig ning sẽn ki-bã sẽn beẽ wã. B yetame tɩ yĩngã kiidame la sɩɩgã yẽ pa tol n tõe n ki ye.

La Wẽnnaam Gomdã pa yet woto ye. Wala makre, Biiblã wilgda Wẽnnaam sẽn naan d yaab a Ãdem to-to. B yeela woto: ‘Zu-soab a Wẽnnaam yãka tẽngã tom n naan ninsaala, n fʋʋs b vɩɩm vʋʋsem a yõ-bogdẽ wã, la ninsaal lebga nin-vɩɩga.’ (Sɩngre 2:7) Dẽnd Wẽnnaam pa ning bũmb a Ãdem yĩngẽ wã, tɩ bõn-kãng tõe n kell n vɩɩmd a kũum poor ye.

Wẽnnaam naanã rũmsã me ne tẽngã tom.—Sɩngre 2:19.

Biiblã wilgdame tɩ yaa nedã  meng la sɩɩgã. Ned sã n ki, bũmb ka yit a yĩngẽ wã n tɩ vɩ zĩig a to ye. A pa le tar vɩɩm vʋʋsem ye. Lebga tẽng tom bala. A pa le tõe n maan wẽng bɩ sõmb ye. Ad vɛrse kẽer sẽn yete:

• “Mam sã n sig yaoogẽ, wubsg na pʋʋs yãmb bark sɩda? Wubsg na kɩs yãmb sɩdã kaseto?”—Yɩɩl Sõamyã 30:10.

• “Ka kũum n pẽgd Zu-soabã ye, la ka neb nins sẽn sigd zĩig sẽn yaa sɩddd pʋgẽ wã n pẽgd bãmb ye.”—Yɩɩl Sõamyã 115:17.

• “Bãmb na n maana yõore, n leb n leb tẽngã tomẽ. Baraar bala bãmb tagsg na n sɛɛme.”—Yɩɩl Sõamyã 146:4.

Biiblã vɛrse rãmb a taab n wilgd tɩ ninsaal kũum ne rũng kũum fãa yaa a ye. (Koɛɛg Soaba 3:19, 20) Biiblã yetame me tɩ sẽn ki-bã pa le mi baa fʋɩ. (Koɛɛg Soaba 9:5, 10) Dẽnd ned sã n ki, bũmb pa yit a yĩngẽ wã n ket n vɩ ye.

Y sã n karem Biiblã zãnga, y pa na n yã zĩig b sẽn yeel tɩ ninsaal tara sɩɩg sẽn pa kiid ye. Nebã sẽn boond a soab tɩ sɩɩgã pa bũmb sẽn vɩ wa malɛka, tɩ tõnd pa tõe n yã-a ye. B sẽn  tẽed tɩ ninsaal tara sɩɩg sẽn pa kiidã pa be Biiblã pʋgẽ ye. Yaa a Sʋɩtãan ne a zĩn-dãmbã n kɩt tɩ nebã tẽed woto. A Zeova kisa ziri nins fãa tũudmã sẽn zãmsd nebã.—Yelbũna 6:16-19; 1 Tɩmote 4:1, 2.

Bũmb a to a Sʋɩtãan sẽn tũnugd ne n paamd nebã yaa bagrã la kinkir-bagrã. Kinkir-bagbã yetame tɩ bãmb tõe n goma ne kɩɩmsã, la b rɩk b sẽn yetã n taas nebã. B tẽedame tɩ yaa sẽn ki-bã n gomd ne-ba. Neb wʋsg me tẽeda woto. La wa d sẽn yã Biiblã pʋgẽ wã, sẽn ki-bã pa le tõe n gom bɩ n maan bũmb ye.—Koɛɛg Soaba 9:5, 6, 10.

La yaa ãnd dãmb la sẽn gomd ne bagbã la kinkir-bagbã? Yaa zĩn-dãmbã. Ned sã n vɩ, zĩn-dãmbã tõe n gũus n bãnga a sẽn gomd to-to la a sẽn maande. B tõe n bãnga a sẽn wõnd a soaba, la a sẽn mi. Dẽnd ned sã n ki, yaa nana ne-b tɩ b rɩk a soabã wõnego, n maan tɩ yaa wa sɩd yaa yẽ.—1 Sãmwɛll 28:3-19.

A Sʋɩtãan leb n tũnugda ne kibay sẽn yaa ziri n paamd  nebã. Naoor wʋsgo, kiba-kãens kɩtdame tɩ nebã pa le tẽed Biiblã sẽn yetã ye.—2 Tɩmote 4:4.

Afirik soalem wʋsg pʋsẽ, b yetame tɩ neb n yã neb sẽn da ki. Naoor wʋsgo b yãt-b-la zĩig sẽn zãr ne b sẽn da beẽ wã. La sok-y y meng woto: ‘Ned sẽn ki sã n da tõe n lebg n wa, a na n tɩ bee zĩig sẽn zãr ne a zakã rãmb la a zo-rãmbã sɩda? Rẽ yĩnga woto sakdame?’

Sẽn paase, bõe n wilgd tɩ ka ned sẽn wõnd sẽn ki-a wã? Wala makre, a Zeova Kaset rãmb a yiib n da tũud taab n moond koɛɛgã. B wa n mikame tɩ nin-kẽem n sɩng n pʋgd-b na maan lɛɛr a wãna. B sẽn sok nin-kẽemã n na n bãng a sẽn pʋgd-bã võorã, a yeelame tɩ b nin-yend n yaa yẽ yao sẽn ki na maan yʋʋma. A sẽn da yetã pa sɩd ye. La a pa sak n deeg ye. Tags-y n ges-y nin-kẽemã sẽn na n tɩ yeel a zo-rãmbã la a yagsã bũmb ningã.

Tõe tɩ yãmb zoe n wʋmame tɩ neb yetẽ tɩ b yãa ned sẽn ki, bɩ tɩ b wʋma a sẽn gom ne-ba, tɩ kẽer me yetẽ tɩ yɩɩ zãmsd pʋgẽ. Naoor wʋsgo, yel-solemd a woto kẽesda bãmb mengã rabeem. A Marein  sẽn da vɩ Afirik tẽng a ye pʋgẽ wã yeelame tɩ yʋng fãa, a ra wʋmda a yaab-poak sẽn boond-a. A yaab-poakã yaool n da kiime. Rabeemã kɩtdame t’a Marein kelme, hal tɩ zakã neb fãa neke. Tarẽ-n-tarẽ, a zugã wa n lebgame.

Tags-y n ges-y! Sã n da yaa sɩd tɩ sẽn ki-bã ket n vɩɩme, rẽ yĩnga b na wẽneg n namsd b zakã rãmb sɩda? Ayo. Bɩ y bãng tɩ yaa zĩn-dãmbã n maand bõn-kãensã sẽn namsd nebã.

La b sẽn mi n maan tɩ yaa wa b sõngda nebã? Wala makre, a Gbassay sẽn yit Sieraleonnã ra bẽedame. A wa n zãmsame n yã a baaba. A ba wã yaool n da kiime. Zãmsdã pʋgẽ, a ba wã wilg-a-la tɩɩga, n yeel t’a tɩ yãk a vãadã n ning koom pʋg n yũ. A yeel-a lame t’a sã n wa rabd n na n tɩ maan tɩɩmã, a pa segd n gom ne ned ye. A Gbassay sɩd maana woto t’a bãagã sɛ.

Pag a ye me yeelame tɩ daar a ye yʋngo, a yãa a sɩdã sẽn da ki wã. A paasame t’a ra lebga rasãnga, n ning fu-neeba.

Woto fãa wõnda bũmb sẽn yaa sõma, sẽn sõngd nebã. La rẽ yĩnga yaa Wẽnnaam tʋʋm bɩ? Ayo. Bala Biiblã yetame t’a Zeova yaa “Wẽnnaam sẽn so  sɩda.” (Yɩɩl Sõamyã 31:6) Dẽnd a pa na n sak n belg tõnd bɩ n tudg-d ye. Yaa zĩn-dãmbã n maand woto.

La rẽ yĩnga zĩn-sõma beeme bɩ? Abada! Baa sã n wõnd wakat ninga b sõngda nebã, d bãng tɩ zĩn-sõng kae ye. A Sʋɩtãan sẽn wa n gomd ne a Hawa wã, a maana wa a rata a neere. (Sɩngre 3:1) La a Hawa sẽn kelg-a la a sak n maan a sẽn yeelã, baasa wãna? A kiime.

Yãmb meng miime tɩ naoor wʋsgo, nin-wẽng sã n dat n paam n belg ned bɩ n zãmb-a, a maanda wa a rata a neere. A tõe n laada mog-mog ne-a, mik a na n yõog-a-la bugum. Wẽnnaam Gomdã pʋd n yetame tɩ “Sʋɩtãanã toeemda a meng n lebgd vẽenem malɛka.”—2 Korẽnt dãmba 11:14.

Wẽnnaam pa tũnugd ne zãmsdo, yel-soalma, malɛgs bɩ kɩɩms n gomd ne nebã rũndã-rũndã ye. Yaa ne Biiblã maasem la Wẽnnaam wilgd tõnd a sẽn dat tɩ d bãngã fãa, tɩ “Wẽnnaam ned tõe n bɩ la a maan tʋʋm-sõma fãa.”—2 Tɩmote 3:17.

Rẽ n so t’a Zeova keoogd tõnd tɩ d gũus d mens ne Sʋɩtãanã. A sẽn keoogd tõndã yaa a sẽn nong-dã. A miime tɩ zĩn-dãmbã yaa d bɛɛba, n pa rat tõnd neer ye.