1. Bõe n sãam a Pɩɛɛr sũuri, hal tɩ wõnd yell kae sẽn nams-a a vɩɩmã pʋgẽ n ta yel-kãnga?

A PƖƐƐR kõn tol n yĩm yẽ ne a Zezi ninã sẽn seg taabã ye. Yɩɩ sũ-sãang wakate! Rẽ yĩnga, a tagsame t’a Zezi sẽn ges-a to-to wã wilgdame t’a sũur sãama ne-a, wall a maana sẽn pa segd bɩ? D pa tõe n yeel rẽ ye. Kibarã wilgame bal tɩ “Zu-soabã wẽnegame n ges a Pɩɛɛre.” (Luk 22:61) La a Zezi sẽn ges-a wã bala, a Pɩɛɛr bãngame t’a konga wʋsgo. A tẽegame t’a sẽn maanã yaa bũmb ning a Zezi sẽn da pĩnd n yeelã. A Pɩɛɛr yaool n da yeelame n yɩlem t’a kõn saag a buud ye. La kaeto, rẽ la a sẽn maanã! A kɩɩsame t’a pa mi a Zu-soabã a sẽn nong wʋsgã ye. Wõnda yell kae sẽn nams a Pɩɛɛr a vɩɩmã pʋgẽ n ta yel-kãngã ye.

2. Bõe la a Pɩɛɛr ra tog n zãmse, la wãn to la a kibarã tõe n naf-do?

² Woto pa rat n yeel tɩ tɩɩm le kae ye. A Pɩɛɛr ra yaa ned tẽeb sẽn tar pãnga. A ra ket n tõe n wilgame t’a teka yam, n paam tɩ yellã manege. Rẽ pʋgẽ me, a na n paama segb n bãng bũmb sẽn tar yõod wʋsg a Zezi sẽn da zãmsd nebã. Yaa sugrã kũuni. Yɩta sõma tɩ tõnd ned kam fãa bãng sugr kũuni. Bɩ d ges sẽn yɩ to-to t’a Pɩɛɛr bãng rẽ.

3, 4. a) Bõe la a Pɩɛɛr sok a Zezi, la tõe t’a ra tagsda bõe? b) Wãn to la a Zezi wilg t’a Pɩɛɛr ra tagsda wa a wakatẽ neb wʋsgo?

³ Na maan kiis a yoobe, a Zezi sẽn da wa n be Kapɛrnaum sẽn yaa a Pɩɛɛr ba-yirã, a Pɩɛɛr kolg-a lame n sok woto: “Zu-soaba, naoor a wãn la mam ba-biig na n beeg maam tɩ m kõ-a sugri? Hal tɩ ta naoor a yopoe bɩ?” Wõnda a Pɩɛɛr ra tẽedame tɩ naoor a yopoe wã wilgdame t’a kõta sugr wʋsgo. Sɩd me, tũudmã taoor dãmb ra yetame tɩ b segd n kõo sugr naoor a tãab bala. La a Zezi leok-a-la woto: “M pa yet tɩ naoor a yopoe bal ye, yaa naoor pisopoe la a yopoe.”—Mat. 18:21, 22, Sebr Sõngo.

⁴ Rẽ yĩnga, a Zezi ra rat n yeelame t’a Pɩɛɛr sã n kõ ned sugr  fãa, a segd n sõdame bɩ? Ayo. A sẽn wẽnemd a Pɩɛɛr gomdã, n yeel tɩ pa naoor a 7 bal la yaa naoor 77 wã rat n yeelame tɩ nonglem kɩtdame tɩ d kõt sugr n pa sõt ye. (1 Kor. 13:4, 5) A Zezi gomdã wilgdame t’a Pɩɛɛr ra tagsda wa a wakatẽ neb wʋsgo. B ra yaa sũ-kɛglem dãmb la neb sẽn pa kõt sugri. La neb nins sẽn dat n dɩk Wẽnnaam togs-n-taarã tog n kõta sugr wʋsg n pa bakdẽ ye.—Karm-y 1 Zã 1:7-9.

5. Wakat bʋg la d wae n bãngd sugrã kũun yõodo?

⁵ A Pɩɛɛr pa kɩɩs a Zezi gomdã ye. La rẽ yĩnga, kẽe a sũurã bɩ? Wakat ninga, yaa d sã n wa rat ne d sũur fãa tɩ b kõ-d sugr la d bãngd sugrã kũun yõodo. Bɩ d lebg n tẽeg yɛl nins sẽn maan nand tɩ b wa yõk a Zezi wã. Sasa kãnga, a Pɩɛɛr tudga naoor wʋsg t’a Zu-soabã kõ-a sugri.

6. A Zezi sẽn wa n dat n waas a tʋm-tʋmdbã naoã, bõe la a Pɩɛɛr yeel-yã, la a Zezi manesem yɩɩ wãna?

⁶ Yʋng ning b sẽn yõk a Zezi wã, yɛl n maan hal tɩ tʋm-tʋmdbã pa tõe n yĩm ye. Bũmb wʋsg la a Zezi ra ket n dat n zãms-ba, wala makre sik-m-mengã. Sẽn na yɩl n kõ-b mak-sõng rẽ wɛɛngẽ, a waasa b naoã. Yaa yamb ning b sẽn pa nand n yɩɩdã n da tʋmd tʋʋm-kãngã. A Pɩɛɛr reng n soka a Zezi a sã n sɩd rat n waasa yẽ naoã. Rẽ poore a zãgsame, la a wa n baas n yeelame t’a Zezi waas yẽ nusã la a zugã me, la a ra waas yẽ naoã bal ye. A Zezi kell n tõoga a sũuri, n maag a yĩng n wilg a sẽn maandã võor la a yõodã.—Zã 13:1-17.

7, 8. a) Bõe la a Pɩɛɛr le maane, t’a Zezi le tall sũ-mar ne-a? b) Wãn to la a Zezi wilg t’a nin-sõmblmã la a sugrã yaa wʋsgo?

⁷ Rẽ poor bilfu, a Pɩɛɛr maana bũmb t’a Zezi le tall sũ-mar ne-a. Tʋm-tʋmdbã wẽe no-koeemd n dat n bãng sẽn yaa-a kãseng n yɩɩd bãmb sʋka, la yaa vẽeneg t’a Pɩɛɛr me naaga no-koeem-kãng sẽn wilgd ninsaal wuk-m-mengã. Baa ne rẽ, a Zezi bʋka a meng n sagl-ba, la a pʋd n pẽg-ba, b sẽn yɩ sɩd rãmb n kell n pa ne yẽ sẽn yaa b Zu-soabã. La a yeel-b lame tɩ b fãa na n wa zoe n basa yẽ. A Pɩɛɛr kɩɩsame n yeel tɩ baa sã na n tũ ne a yõore, yẽ kõn bas a Zezi ye. La a Zezi yeelame tɩ yʋn-kãng bala, nand tɩ no-raoog kelem naoor a yiibu, a na n kɩɩsa yẽ naoor a tãabo. A Zezi sẽn yeel dẽ, a Pɩɛɛr le kɩɩsame, la a pʋd n wuk a meng n yeel tɩ baa tʋm-tʋmdb a taabã bas a Zezi, yẽ kõn bas-a ye.—Mat. 26:31-35; Mark 14:27-31; Luk 22:24-28; Zã 13:36-38.

⁸ La rẽ yĩnga, a Zezi na n kell n maana sũ-mar ne a Pɩɛɛr bɩ? Baa ne sẽn yɩ toog wakatã, a Zezi kell n gesa a tʋm-tʋmdbã  zʋg-sõma wã n yɩɩda. A ra miime t’a Pɩɛɛr na n wa basa yẽ. La ne rẽ fãa, a yeel-a-la woto: “Mam pʋʋsa fo yĩng tɩ f tẽebã ra tol n paoog ye. La fo sũurã sã n wa lebge, bɩ f sõng f ba-biisã tɩ b paam pãnga.” (Luk 22:32) Dẽnd a Zezi kɩsa sɩd t’a Pɩɛɛr tudgrã poore, a na n teka yam n le tũ Wẽnnaam sõma. Ad a Zezi nin-sõmblmã la a sugrã waooga!

9, 10. a) Gɛtsemane tɩ-sulẽ wã, wãn to la a Zezi rems a Pɩɛɛre? b) A Pɩɛɛr sẽn kong naoor wʋsgã tẽegda tõnd bõe?

⁹ B sẽn wa n kẽng Gɛtsemane tɩ-sulẽ wã me, a Zezi remsa a Pɩɛɛr naoor wʋsgo. A Zezi yeela yẽ ne a Zak la a Zã tɩ b gũ t’a tɩ pʋʋs la a wa. A sũurã ra sãama hal wʋsgo. A ra rata raood kengr me. La a sã n lebg n wa fãa, a mikdame t’a Pɩɛɛr dãmb gõeeme. A yeela bũmb sẽn wilg t’a pa ning-b taal ye. A yeelame: “Sɩɩgã ratame, la yĩngã ka tar pãng ye.”—Mark 14:32-41.

¹⁰ Sẽn pa yã n kaoose, neb kʋʋng n wa b sẽn beẽ wã, n zãad bug-vɩlens la sʋʋs ne ra-saba. Lebga tɩlae tɩ b gũusi, la b tall yam. La a Pɩɛɛr yɩɩ tao-tao n maan bũmb n pa yals n tags ye. A fooga a sʋʋgã n fiuug maan-kʋʋdb kãsmã tʋm-tʋmd a ye tʋbre. A yʋʋr la a Malkus. A Zezi kell n tõoga a sũur n dems a Pɩɛɛre, la a maan tɩ raoã tʋbr leb a zĩigẽ. Rẽ poore, a wilga bũmb ning sẽn kɩt tɩ kiris-nebã pa segd n zabã. (Mat. 26:47-55; Luk 22:47-51; Zã 18:10, 11) A Pɩɛɛr ra zoe n tudga naoor wʋsgo, t’a Zu-soabã kõ-a sugri. Woto tẽegda tõnd tɩ d fãa kongda wʋsgo. (Karm-y Zak 3:2.) Tõnd ned kam fãa ratame tɩ Wẽnnaam kõ-a sugr daar ne a to fãa. La yʋn-kãng bala, a Pɩɛɛr na n maana yell wẽnem sẽn yɩɩda.

11, 12. a) B sẽn yõk a Zezi wã, bõe la a Pɩɛɛr maan tɩ wilgdẽ t’a tara raood bilfu? b) Bõe n wilgd t’a Pɩɛɛr raoodã pa ta yẽ mengã sẽn da yetã?

¹¹ A Zezi yeela kʋʋngã tɩ sã n yaa yẽ la b baooda, bɩ b bas a tʋm-tʋmdbã tɩ b looge. A Pɩɛɛr yas n getame tɩ b sẽbd a Zezi, n pa tar a sẽn maand ye. Yẽ ne tʋm-tʋmdb a taabã fãa zoeeme.

¹² La a Pɩɛɛr ne a Zã wa n tek n yalsame. Tõe tɩ yaa maan-kʋʋdb kãsem a Ann zakã sɛɛga. Yɩɩ be la b reng n tall a Zezi n kẽng tɩ b na n bʋ-a. B sẽn wa n tall-a n yi be n loogdẽ wã, a Pɩɛɛr ne a Zã ra pʋgda “yɩɩga.” (Mat. 26:58; Zã 18:12, 13) A Pɩɛɛr ra tara raoodo, sã n pa rẽ a ra pa na n pʋg ye. Kʋʋngã ra zãada zab-teedo. A Pɩɛɛr yaool n da zoe n pogla b nin-yɛng menga. La baasgo, a raoodã pa ta yẽ mengã sẽn da yeel pĩndã ye. A ra yeelame t’a nonga a Zu-soabã, n pa na n tol n bas-a, baa na tũ ne a yõore.—Mark 14:31.

13. D sã n dat n tũ Kiristã tɩ ta a yam, yaa tɩlae tɩ d tũ-a wãn to?

 ¹³ Rũndã-rũndã me, neb wʋsg n dat n pʋgd Kiristã “yɩɩga,” rat n yeel tɩ n tũud-a tɩ ned baa a ye pa miẽ ye. La wa a Pɩɛɛr meng sẽn gʋls kaoosg zugẽ wã, tõnd sã n dat n tũ Kiristã tɩ ta a yam, d segd n pelga d pʋg n tũ-a vẽeneg-vẽenega, n dɩk a togs-n-taar bũmb fãa pʋgẽ, baa rẽ sẽn tõe n wa ne yɛl ninsã.—Karm-y 1 Pɩɛɛr 2:21.

14. B sẽn wa n kaood a Zezi bʋʋdã ne yʋngã t’a Pɩɛɛr maanda bõe?

¹⁴ A Pɩɛɛr soos n pʋgame, n ta Zerizalɛm zag-kẽeng a yembr noore. Yaa maan-kʋʋdb kãsem a Kayif zaka. A yaa nin-kãsenga, t’a nugã zãada. Naoor wʋsgo, zags a woto buudã tara saman-kẽenga, tɩ kʋɩleng be noorẽ wã. A Pɩɛɛr sẽn ta wã, b zãgsame t’a kõn kẽ ye. A Zã sẽn da mi maan-kʋʋdb kãsmã ra zoe n kẽeme. Yẽ n wa n bõos sẽn gũud-a kʋɩlengã t’a Pɩɛɛr paam n kẽ. La wõnda a Pɩɛɛr pa kell n pʋg a Zã, a pa bao me n na n kẽ roogã pʋgẽ n yals ne a Zu-soabã ye. A kell n paa samandã pʋgẽ ne yembsã la maan-kʋʋdb kãsmã tʋm-tʋmdb kẽer sẽn da yõgen bugum n wootẽ, la b get ziri kaset dãmbã sẽn kẽed n dõt a Zezi la b yitã.—Mark 14:54-57; Zã 18:15, 16, 18.

15, 16. Wilg-y a Zezi sẽn da yeel t’a Pɩɛɛr na n kɩɩsa naoor a tã t’a pa mi yẽ wã sẽn pids to-to.

¹⁵ Bugmã vẽenem kɩtame tɩ pag ning sẽn bas a Pɩɛɛr t’a kẽ wã yã-a n bãng-a. A yeel-a-la woto: “Yãmb me ra bee ne Galile rao a Zezi!” Zĩig pʋgẽ wã a kɩɩsame, n yeel t’a pa wʋmd pagã gomdã võor ye. A tɩ yalsa zakã noor n maan wa bũmb kae ye. La pag a to n yã-a n yeel yaa: “Dao kãngã me ra bee ne a Zezi sẽn yi Nazarɛtã.” A Pɩɛɛr wẽename tɩ: “Mam ka mi rao kãng ye!” (Mat. 26:69-72; Mark 14:66-68) Tõeeme tɩ yaa a sẽn wa n yeel naoor a yiib-n-soab t’a pa mi a Zezi wã poor la a wʋm no-raoog sẽn kelme, la a pa maan gũusgu, tɩ rẽ kɩt t’a pa tol n tẽeg a Zezi sẽn da yeel sẽn zems lɛɛr a wãnã ye.

¹⁶ Nan pa sa ye. A Pɩɛɛr ket n modgda sẽn na yɩl tɩ b ra bãng-a ye. La sẽn pa yã n kaoose, neb sull sẽn da yas samandẽ wã wa n yalsa a sɛɛgẽ. B nin-yɛng n da yaa a Malkus roagda, rao ning a Pɩɛɛr sẽn da fiuug a tʋbrã. A soka a Pɩɛɛr woto: “Mam ka yã foo tɩ-sulẽ wã ne bãmb sɩda?” Zĩig pʋgẽ wã a Pɩɛɛr gesame tɩ yaa tɩlae t’a togs bũmb sẽn na n kɩt tɩ b sak n deeg tɩ b tudgame. Rẽ n so t’a wẽene, tɩ wõnd a yeelame meng tɩ yẽ sã n yagdame bɩ kãab-wẽng zĩnd a zugu. Woto n tõkd naoor a tãab a Pɩɛɛr sẽn kɩɩs t’a pa mi a Zezi ye. A pa gom n sa la no-raoog kelem ye. Yaa kɛleng a yiib-n-soab a Pɩɛɛr sẽn wʋm yʋn-kãnga.—Zã 18:26, 27; Mark 14:71, 72.

17, 18. a) A Pɩɛɛr sẽn bãng t’a sẽn maanã yaa wẽng wʋsgã, a maana wãna? b) Tõe t’a Pɩɛɛr tagsame tɩ bõe?

 ¹⁷ Kell n zemsa b sẽn yiis a Zezi t’a yas bʋʋdã roog sẽn be yĩngrã noore. Wakat kãng la a sẽn wẽnemd tɩ yẽ ne a Pɩɛɛr ninã seg taab wa d sẽn deng n togsã. A Pɩɛɛr bãngame t’a sẽn maanã yaa wẽng wʋsgo. A yii ne sũ-sãan-kãsenga, n kẽnd sorã zug ne ki-peelgã, n yãbd t’a nintãmã sodgdẽ, hal n pa mi a sẽn maand ye. A sɩd yãba ne sũ-sãang wʋsgo.—Mark 14:72; Luk 22:61, 62.

¹⁸ Ned sã n maan yel-wẽnd a woto buudu, a tõe n tagsame t’a yel-wẽndã sẽn yaa kãseng to-to wã, a pa tol n tõe n paam sugr ye. Tõe t’a Pɩɛɛr me tagsame t’a Zezi kõn tol n kõ-a sugr ye. La sɩd yɩɩ woto bɩ?

19. A Pɩɛɛr tagsg tog n yɩɩ wãn ne a kongrã, la baasgo bõe n wilgd t’a pa bas tɩ koms a raood zãnga?

¹⁹ Zĩigã sẽn wa n yẽeg t’a Pɩɛɛr bãng bũmb nins sẽn maan a Zezi wã, a sũ-sãangã paasame hal tɩ d pa tõe n bãng n bilg ye. A sẽn bãng tɩ baraarã b namsa a Zezi la b ka-a t’a wa baas n ki wã, a tog n ninga a meng taal hal wʋsgo. A sã n tags t’a sẽn maan bũmb ningã paasa a Zu-soabã toogo, la tɩ yɩɩ raar-n-kãng me la b sẽn kʋ-a wã, manegd n sãama a sũurã. A Pɩɛɛr sũ-sãangã ra waoogame, la a pa bas tɩ koms a raood zãng ye. Bũmb ning sẽn wilgd rẽ yaa tɩ pa kaoos la a le tɩ tigim ne a tẽed-n-taasã. (Luk 24:33) Hakɩka, tʋm-tʋmdbã fãa maana b bãngẽ b sẽn maan bũmb ning a Zezi yõkrã sasa wã, la b keng taab raoodo.

20. A Pɩɛɛr sẽn maan bũmb ning a kongrã poorã zãmsda tõnd bõe?

²⁰ D tõe n yeelame t’a Pɩɛɛr sẽn maanã yaa yam bũmbu. Ned sẽn tũud Wẽnnaam sã n maan yel-wẽnde, pa yel-wẽndã wẽnem sẽn ta zĩig ningã n pak n yɩɩd ye. Yaa a modg n tall raoodo, n maneg yellã, n le wɩng ne a Zeova tũubu. (Karm-y Yelbũn 24:16.) A Pɩɛɛr sẽn tigim ne a tẽed-n-taasã baa ne a sũ-sãangã wilgdame t’a tẽebã ra yaa hakɩka. Ned sũur sã n sãame, wall a sã n maand a bãngẽ ne bũmbu, naoor wʋsgo, a yam pa be a bao nebã zĩigẽ ye. La rẽ wata ne yelle. (Yel. 18:1) Sẽn segd yaa a soab sẽn na n kell n pẽneg a tẽed-n-taasã, n paam raood kengr n le wɩng ne Wẽnnaam tũubu.—Heb. 10:24, 25.

21. Koe-bʋg la a Pɩɛɛr me wʋm-yã, a sẽn da tigim ne a tẽed-n-taasã yĩnga?

²¹ A Pɩɛɛr sẽn da tigim ne karen-biisã yĩnga, b sẽn wa n na n  togs t’a Zezi kũumã pa ket yaoogẽ wã, yẽ me wʋmame. A Pɩɛɛr ne a Zã zoeeme n na n tɩ gese. A Zã n deng a Pɩɛɛre, bala wõnda a Pɩɛɛr n da kẽeme. B sẽn da mum a Zezi n sa wã, b paga yaoogã noore. A Zã sẽn ta wã, a mikame tɩ yaoogã noor pakame, la a pa bao n na n kẽ ye. A Pɩɛɛr sẽn ta wã a ra sesdame, la baasgo a kẽeme. Yaoogã sɩd yaa vɩʋʋgo!—Zã 20:3-9.

22. Bõe n wa n kɩt t’a Pɩɛɛr sũ-sãamsã la a sãmbsã fãa sa fasɩ?

²² Rẽ yĩnga a Pɩɛɛr tẽeme tɩ yaa a Zezi sẽn vʋʋg bɩ? Sɩngrẽ wã a pa tẽ, baa ne pagb sẽn yaa wẽn-sakdb sẽn da wa n togs tɩ malɛgs n yeel-b t’a Zezi vʋʋgame wã. (Luk 23:55–24:11) La wĩndgã ne a kẽ wã t’a Pɩɛɛr sũ-sãamsã la a sãmbsã fãa saa fasɩ. B bãngame t’a Zezi vʋʋgame, tɩ masã a lebga malɛk sẽn tar pãn-kẽenga. A vẽnega a meng t’a tʋm-tʋmdbã fãa yã-a. La sẽn deng rẽ, a vẽnega a meng ne b nin-yɛnga. Bala baraarã, tʋm-tʋmdbã yeela woto: “Hakɩka, Zu-soabã vʋʋgame, la bãmb vẽnega b meng ne a Sɩmo.” (Luk 24:34) Kaoosg zugẽ, tʋm-tʋmd a Poll goma raar-n-kãng yelle, n wilg tɩ baraarã, a Zezi “vẽnega b meng ne a Sefas n yaool n vẽneg b meng ne piig la a yiibã.” (1 Kor. 15:5) Sefasã ne Sɩmo wã yaa a Pɩɛɛr yʋy a taaba. Dẽnd a Zezi sɩd vẽnega a meng ne a Pɩɛɛr baraarã, la yaa vẽeneg t’a ra yaa a ye.

23. Kiris-ned sã n maan yel-wẽnde, bõe yĩng t’a segd n tẽeg a Pɩɛɛr kibarã?

²³ Biiblã pa togs a Zezi ne a Pɩɛɛr sẽn gom bũmb ning yell ye. Yaa bãmb n mi. La tags-y n ges-y a Pɩɛɛr sũur sẽn yɩ noog to-to, a sẽn yã a Zu-soabã a sẽn nong wʋsgã sẽn da ki wã, la a paam segb n na n wilg t’a kongrã sãama a sũuri, la a kos sugrã. Sɩd me, a Pɩɛɛr sẽn da rat n yɩɩd yaa b kõ-a sugri. La sãmbg kae t’a Zezi sɩd kõ-a-la sugr ye. Rũndã-rũndã, kiris-ned sã n maan yel-wẽnde, a segd n tẽega a Pɩɛɛr kibarã. D ra tags tɩ d pa tol n tõe n le paam tɩ Wẽnnaam kõ-d sugr ye. A Zezi rɩka a Ba wã sẽn yaa “Wẽnnaam sẽn kõt sugr wʋsgã” togs-n-taar kɛpɩ.—Ezai 55:7.

24, 25. a) A Pɩɛɛr sẽn wa n be Galile mogrã zug ne yʋngã, bõe yell la a ra tẽegda, la bõe n maane? b) Zĩ-yẽegrã sasa a Zezi sẽn maan yel-solemdã, a Pɩɛɛr manesem yɩɩ wãna?

²⁴ A Zezi ra yeela a tʋm-tʋmdbã tɩ b kẽng Galile t’a na n puka a meng ne-b beenẽ. B sẽn ta wã, a Pɩɛɛr yãka yam n na n kẽng mogrẽ wã n tɩ yõg zĩm. Tʋm-tʋmdbã kẽer tũ-a lame. A Pɩɛɛr tẽegda a kʋdemde, bala beenẽ la a tʋm yʋʋm wʋsg nand t’a lebg a Zezi tʋm-tʋmda. Koglgã bʋʋrã, ko-wiisã rãamdã, la a sẽn paam n le sɩɩs gãmbrã fãa tẽegd-a-la a sẽn da minim n maandẽ, hal tɩ ra noom-a. Yʋn-kãngã, b pa tol n paam zĩm ye.—Mat. 26:32; Zã 21:1-3.

 ²⁵ La zĩigã sẽn wa n yẽegdẽ, b wʋma ned sẽn pa mogrã noor n yeel-b tɩ b lob b gãmbrã koglgã kɩreng a to wã. B sɩd lobame n paam zĩm 153! A Pɩɛɛr bãnga sẽn yaa ned ninga. A yɩk n lʋɩɩ koomẽ wã n dug n ta kʋɩl-koakã. A Zezi zo-rãmbã sẽn yi wã, a kõ-b-la zĩm a sẽn sẽ bug-saal zugu. La yaa ne a Pɩɛɛr la a gom n yɩɩda.—Zã 21:4-14.

26, 27. a) A Zezi soka a Pɩɛɛr sogsg tɩ rẽ kɩt t’a yeel bõe naoor a tãabo? b) Bõe la a Zezi maan n wilg t’a sɩd kõo a Pɩɛɛr sugri?

²⁶ A Zezi soka a Pɩɛɛr n ges a sã n nonga yẽ sẽn yaa a Zu-soabã  “n yɩɩd bãmba.” * (Zã 21:15, Sebr Sõngo) Rẽ t’a tog n teesda zĩmã b sẽn yõg n zamã. Rẽ yĩnga a Pɩɛɛr na n nonga zĩmã yõgb n yɩɩd a sẽn nong a Zezi to-to wã bɩ? Wa a Pɩɛɛr sẽn kɩɩs naoor a tãab t’a pa mi a Zezi wã, a Zezi me sok-a-la sogsgo, t’a yeel naoor a tãab a tẽed-n-taasã taoor t’a nonga yẽ. Rẽ poore, a Zezi togs-a-la a sẽn na n maan to-to n wilg t’a nonga yẽ. A wilgame tɩ masã tɛka, a tog n lʋɩɩsa Wẽnnaam tʋʋmdã taoore, n sõng a tẽed-n-taasã tɩ b bãng Wẽnnaam sẽn datã, n keng b raood la a ges b yelle.—Luk 22:32; Zã 21:15-17.

²⁷ A Zezi sẽn maan woto wã, a wilgame tɩ yẽ ne a Ba wã ket n nanda a Pɩɛɛre. Sɩd me, a Zezi na n kɩtame t’a Pɩɛɛr tʋm tʋʋm-kãsems tigingã pʋgẽ. Hakɩka, yaa kaset t’a Zezi sɩd kõo a Pɩɛɛr sugri! Yaa vẽeneg t’a Pɩɛɛr sũur yɩɩ noog a sẽn paam sugrã, t’a rɩk yam.

28. Bõe la a Pɩɛɛr maan tɩ wilgd t’a sɩd saka a yʋʋre?

²⁸ A Pɩɛɛr tʋma tʋʋmdã b sẽn bobl-a wã ne a sũur fãa yʋʋm wʋsgo. Wa a Zezi sẽn da yeel-a a kũumã ket tɩ beoogã, a sɩd kenga a tẽed-n-taasã raoodo. A Pɩɛɛr gesa a tẽed-n-taasã yell ne sũ-mar la nimbãan-zoeere, n sõng-b tɩ b bãng Wẽnnaam daabã. Rao ning b sẽn da boond t’a Sɩmo wã sɩd wa n lebga ned sẽn tar yẽesem t’a tẽebã vigl sõma n pa vigsdẽ, la sẽn kengd a taabã tẽebo. Ad a sɩd saka yʋʋr ning a Zezi sẽn kõ-a wã, sẽn yaa Pɩɛɛr bɩ pĩigã. Kaset sẽn wilgd rẽ yaa goam nins yẽ meng sẽn gʋls n tool kiris-nebã, tɩ be Biiblã pʋgẽ wã. A goamã tara pãnga, tɩ b kareng be yamleoogo. B goamã leb n wilgdame t’a Pɩɛɛr pa tol n yĩm sugrã kũun a sẽn zãms a Zu-soabã nengẽ wã ye.—Karm-y 1 Pɩɛɛr 3:8, 9; 4:8.

29. Bõe la d tõe n maan n tall a Pɩɛɛr tẽebã buudu, la d yɩ sugr kõat wa a Zu-soabã?

²⁹ Bɩ tõnd me zãms sugr kũun wa a Pɩɛɛre. Rẽ yĩnga beoog ne a noor fãa, d kota Wẽnnaam t’a kõ-d sugr d kongr fãa yĩng bɩ? Rẽ poore, d sakd n deegame tɩ Wẽnnaam kõ-d-la sugri, la d sɩd tẽ tɩ rẽ yẽesda d kongrã bɩ? D sakd n kõta d taabã sugr bɩ? D sã n maan woto, d na n tõog n talla a Pɩɛɛr tẽebã buudu, la d yɩ sugr kõat wa a Zu-soabã.