1. a) Bilg-y so-toak ning a Zonas sẽn segd n maanã. b) A tagsg ra yaa bõe ne zĩig ning a sẽn dabdã?

A ZONAS na n paama sẽk n bʋgs sõma. Bala a segd n toga sor n maan sẽn ta kilo 800. So-kãngã wã, a na n kẽna nao n maan kiuug bɩ sẽn yɩɩd rẽ. Yẽ n na n yãk a sẽn na n dɩk sor ninga. A yam t’a tũ so-koɛɛga, wall a tũ sor sẽn yaa woko, tɩ bi-bees ka be ye. La sẽn yaa sor ning fãa, yaa lond la tãense. Tõe t’a na n pãrga Siiri rasempʋɩɩgã, n tɩ pasg Efrat kʋɩl-kãsengã bɩ kʋɩls a taaba, n bao gãag zĩis tẽn-bõones la tẽn-bɛd sẽn be Siiri bɩ Mezopotami wall Asiiri. A sɩd rɩka sore, tɩ beoog ne a noor fãa bɩ a tagsd so-toakã sẽn kolgd weoogo, t’a yam yaool n pa be tẽng ning a sẽn dabdẽ wã. Yaa Niniiv.

2. A Zeova maana wãn t’a Zonas bãng t’a pa tõe n zãgs a tʋʋmdã n zoe?

² Bũmb a Zonas sẽn mi bal yaa t’a pa tõe n zãgs tʋʋmdã n zoe ye. A ra maka rẽ pĩndã. La wa d sẽn yã sak ning sẽn loogã, ne sũ-mare, a Zeova sõng-a lame t’a rɩk yam. A kɩtame tɩ sebg yik mogrã zugu, la a maan tɩ zĩm-pataabr vel-a t’a pa ki ye. Zĩifã sẽn tɩ wʋk-a koomã noor rasem a tãab poorã, a maana rabeem wʋsgo, la a lebg sakd n yɩɩd pĩndã.—Zonas sak a 1 ne a 2.

3. A Zonas kɩɩsgã pʋgẽ, a Zeova manesem yɩɩ wãna, la baasgo sok-bʋg n kete?

³ A Zeova sẽn wa n yeel a Zonas naoor a yiib-n-soab t’a kẽng Niniivã,  no-rɛɛsã sakame n dɩk sore, n tees yaanga. (Karm-y Zonas 3:1-3.) La rẽ yĩnga a bʋgsa kiblgã zug neere, tɩ sõng-a t’a tek fasɩ bɩ? Yellã pʋgẽ, a Zeova zoee a nimbãaneg n fãag-a t’a pa ki koomẽ wã, n pa sɩbg-a a kɩɩsgã yĩnga, la a pʋd n kõ-a sor t’a tõe n le tʋm tʋʋmdã a sẽn da kõ-a wã. La woto fãa kɩtame t’a Zonas bãng t’a segd n zoee a taabã nimbãaneg bɩ? Nong n yaa toog ne ninsaalbã sẽn pa zems zãngã tɩ b zoe b taabã nimbãanega. Bɩ d ges d sẽn tõe n dɩk yam ning a Zonas kibarã pʋgẽ.

4, 5. Bõe yĩng t’a Zeova yeel tɩ Niniiv yaa “tẽn-kãsenga,” la rẽ sõngda tõnd tɩ d bãng bõe a Zeova zugu?

⁴ A Zonas tagsg sẽn da yaa a soab ne Niniivã ra pa a yembr ne a Zeova ye. A Zeova nifẽ, Niniiv ra yaa tẽn-kãsenga. A Zonas sebrã pʋgẽ, yaa naoor a tãab fãa la a Zeova bool Niniiv tɩ “tẽn-kãsenga.” (Zon. 1:2; 3:2; 4:11) Bõe yĩng tɩ ra yaa tẽn-kãseng a Zeova nifẽ?

 ⁵ Niniiv ra yaa tẽn-kʋdre. A naaga tẽns nins a Nimrood sẽn lugl sa-kãsengã poorã. Ra yaa tẽn-kẽenga, n so tẽn-bɛd la tẽn-bõones wʋsgo, t’a nebã waoogẽ. A yalmã taa rasem a tãab kẽnde. (Sɩng. 10:11; Zon. 3:3) Tẽngã ra yaa neere, n tar lal-bɛda, wẽnd-do-kãsems la ro-bɛd a taaba. La pa bõn-kãensã baa a ye n da kɩt tɩ tẽngã yaa kãseng Wẽnnaam a Zeova nifẽ wã ye. Yaa nin-buiidã. Wakat kãng tɩ Niniiv nebã sõor da yɩɩda dũniyã tẽns a taabã. Baa ne tẽngã nebã sẽn da yaa nin-wẽnsã, a Zeova ra baooda b neere. A nonga ned buud fãa, n dat t’a tek yam n maan sẽn yaa tɩrga.

6. a) A Zonas sẽn ta Niniivã, tõe tɩ bõe n maneg n paas a rabeemã? (Ges-y vẽnegrã sẽn be tẽngrã.) b) A Zonas sẽn moon koɛɛgã wilgda tõnd bõe yẽ mengã zugu?

⁶ A Zonas sẽn ta wã, nebã sõor tog n kɩtame t’a rabeemã paase. Niniiv nebã sõor yɩɩda 120000. * A Zonas kẽna daar a ye tõre, n ta tẽngã nebã sẽn beẽ wʋsgã. Tõe tɩ yaa sẽn na n bao zĩig sẽn wõnd zemsa ne koe-moonego, n paam t’a koɛɛgã yelg tao-tao. La a na n maana wãn tɩ nebã wʋm a sẽn na n yeelã? A ra mii Asiiri buud-gomdã bɩ? A Zeova maana yel-solemd t’a tõog n gom b buud-gomdã bɩ? D pa mi ye. Tõe t’a Zonas ra gomda hebre sẽn yaa a buud-gomdã, tɩ ned lebgdẽ tɩ Niniiv nebã kelgdẽ. Sẽn yaa a soab fãa, a goamã yaa vẽenega. Ra pa koɛɛg sẽn na n kɩt tɩ b pẽg-a ye. A ra yeta woto: “Keta rasem pis-naas tɩ Niniiv sãame.” (Zon. 3:4) A zẽka a koɛɛgã n gom ne yẽesem, n yɩlme. A sẽn maan woto wã, a wilgame t’a tara raood la tẽebo. Rũndã-rũndã, yaa tɩlae ne kiris-nebã tɩ b tall raood la tẽeb n yɩɩd pĩndã.

7, 8. a) Niniiv nebã sẽn wʋm a Zonas koɛɛgã, b maana bõe? b) Rĩmã sẽn wʋm a Zonas koɛɛgã, bõe la a maan-yã?

⁷ Niniiv nebã wʋsg kelga a Zonas koɛɛgã. Yaa vẽeneg t’a ra ninga a yamẽ tɩ b pa na n kelg-a, la tɩ b na n nams-a lame  menga. La yaa a sẽn da pa tẽedã n yɩ. Nebã kelgame la b sake! A koɛɛgã yelga tao-tao wa weoog sẽn kok bugum. Pa yã n kaoos la b gomd a koɛɛgã yell zĩig zãng ye. (Karm-y Zonas 3:5.) Niniiv nebã fãa teka yam. Kambã la kãsembã, ra-kã-rãmbã la naong rãmbã, pãens rãmbã la nimbãan-dãmbã. B fãa loee noore. Tao-tao bala, rĩmã wʋmame tɩ tẽngã neb fãa teka yam.

⁸ Rĩmã me teka yam. A zoee Wẽnnaam, n sig a naam geerã zugu, n yees a naamã fut la a yeelg bot wa a nin-buiidã, n “zĩnd tom-pɛglem pʋgẽ.” Yẽ ne a “nanambsã,” rat n yeel t’a kug-zĩidbã yiisa noor n yeel tɩ tẽngã ned fãa segd n loee noore. A yeelame tɩ b fãa segd n yeelga boto, baa rũmsã menga. * Ne sik-m-menga, a sak n deegame t’a nin-buiidã tʋma tʋʋm-wẽns la nen-kɛglem, n beeg Wẽnnaam. A wilgame me tɩ b sã n tek yam, tõe tɩ Wẽnnaam zoe b nimbãanega. Rĩmã yeelame: “Daar ninga, Wẽnnaam tõe n teka yam tɩ b sũurã sig tɩ d ka sãam ye.”—Zon. 3:6-9.

9. Bãngdb kẽer maanda sãmbs ne bõe, la bõe yĩng tɩ d mi tɩ b tudgame?

⁹ Bãngdb kẽer maanda sãmbse, n yetẽ tɩ Niniiv nebã pa tõe n tiig n tek yam woto ye. La Biibl mitb wilgame tɩ Niniiv nebã sẽn da tar tẽeb ziri la b yaa neb yam sẽn yuusdã yĩnga, d tõe n tẽeme tɩ b sɩd maana woto. Sẽn paase, d miime tɩ sẽn yet-b tɩ pa sɩdã tudgame, bala kaoosg zugẽ, a Zezi Kirist meng goma Niniiv nebã tekrã yelle. (Karm-y Matɩe 12:41.) A Zezi gomdã yaa sɩda, bala a zĩnda saasẽ n yã sẽn yɩ to-to. (Zã 8:57,  58) D bãng bal tɩ baa neb wẽnem sẽn ta zĩig ninga, d pa segd n tags tɩ b pa tol n tõe n tek ye. A Zeova bal n mi sẽn be ned sũurẽ.

10, 11. a) Niniiv nebã sẽn tek yamã, bõe la a Zeova maan-yã? b) Bõe yĩng tɩ d tõe n kɩs sɩd t’a Zeova sẽn da yeel t’a na n sãam-b lame wã pa tudgri?

¹⁰ Niniiv nebã sẽn tek yamã, bõe la a Zeova maan-yã?  A Zonas yeela a sebrã pʋgẽ woto: “Wẽnnaam yãa bãmb sẽn maan bũmb ning n bas b manesem wẽngã. La woto, Wẽnnaam me teka yam n ka sɩbg bãmb wa b sẽn da yeelã ye.”—Zon. 3:10.

¹¹ La rat n yeelame tɩ Wẽnnaam sẽn da yeel t’a na n sãam-b lame wã yaa tudgr bɩ? Ayo! Biiblã wilgdame t’a Zeova tɩrlmã pʋgẽ, kɛgr baa bilf kae ye. (Karm-y Tõod 32:4.) A Zeova sũurã sigame. A sẽn yã tɩ Niniiv nebã sɩd teka yamã, a gesame tɩ ka le zems t’a sɩbg-b ye. A yãka yam n na n wilg-b a nimbãan-zoeere.

12, 13. a) Wãn to la a Zeova wilg t’a yaa wʋmd la nimbãan-zoɛta? b) Bõe yĩng tɩ bʋ-kaoorã koɛɛg a Zonas sẽn taasã pa yɩ ziri?

¹² A Zeova pa Wẽnnaam sẽn yaa dem-deme, wẽnem soaba, n ka mi nimbãan-zoeer wala tũudmã taoor dãmb goamã sẽn kɩt tɩ nebã tẽedã ye. Yaa Wẽnnaam sẽn yaa wʋmd la nimbãan-zoɛta. A sã n yãk yam n na n sãam nin-wẽnsã, a rengd n kɩtame t’a tʋm-tʋmdbã keoog-ba. Bala a raab la nin-wẽnsã tek yam n bas b tʋʋm-wẽnsã wa Niniiv nebã. (Eze. 33:11) A Zeova ra yeela a no-rɛɛs a Zeremi woto: “Mam sã n yeel tɩ m na n yiisa soolem ne a neb n dig-b tɩ b menem, tɩ b tek yam n bas b yel-wẽnã, ma-me na n teka yam n ka maan wa m sẽn da yeelã ye.”—Zer. 18:7, 8.

¹³ Woto rat n yeelame tɩ bʋ-kaoorã koɛɛg a Zonas sẽn taasã yɩɩ ziri bɩ? Ayo! Yɩɩ keoogre. Yaa Niniiv nebã tʋʋm-wẽnsã yĩng la a sẽn keoog-bã, la b teka yam. B sã n le tʋm tʋʋm-wẽnse, Wẽnnaam a Zeova na n sɩbg-b-la wa a sẽn yeelã. Sɩd me, yɩɩ woto kaoosg zugẽ.—Sof. 2:13-15.

14. A Zeova sẽn ka sãam Niniiv nebã, a Zonas manesem yɩɩ wãna?

¹⁴ A Zeova sẽn ka sãam Niniiv nebã wa a Zonas sẽn da tẽedã, a manesem yɩɩ wãna? Kibarã yetame: “Yõ wã ka yɩ a Zonas sũur noog baa bilf ye, a sũurã yikame.” (Zon. 4:1) A pʋd n pʋʋsa Wẽnnaam, tɩ wõnd a goamã wilgdame tɩ Sẽn-tõe-a-fãa wã maana sẽn pa zemse. A wilgame t’a sẽn da paad yir n são. A yeelame t’a sɩng n miime t’a Zeova pa na n sãam Niniiv nebã, la tɩ yaa rẽ yĩng la a sẽn da tõdg n zoe n tees Tarsisã. A yeelame meng tɩ Wẽnnaam kʋ-a tɩ rẽ n são.—Karm-y Zonas 4:2, 3.

15. a) Tõe tɩ yaa bõe n kɩt t’a Zonas sũurã yik wʋsgã? b) A Zonas sẽn yik a sũurã, a Zeova manesem yɩɩ wãn ne-a?

¹⁵ Bõe n da sãamd a Zonas sũurã wʋsgo? D pa mi sẽn da  be a yamẽ ye. D sẽn mi bal yaa t’a yeela Niniiv nebã fãa taoor tɩ Wẽnnaam na n sãam-b lame, hal tɩ b tẽ-a. La ad wɛ, Wẽnnaam pa sãam-b ye! A Zonas ra zoeta b na n wa yaal-a, bɩ n yeel t’a yaa ziri no-rɛɛs bɩ? Sẽn yaa a soab me, a sũur pa yɩ noog nebã sẽn tek yamã, a sũur pa yɩ noog a Zeova sẽn zoe b nimbãanegã me ye. Wõnda a sũurã yika wʋsg t’a lebg sũ-to-neda, n tagsd yẽ mengã sẽn yã naong ningã, la a yʋʋrã sẽn na n sãamã. Baa ne a Zonas sẽn yik a sũurã, a Wẽnnaamã sẽn yaa nimbãan-zoɛtã pa ges rẽ ye. A ra tõe n sɩbga a Zonas t’a paooga yẽ, la a pa sɩbg-a ye. A pʋd n maaga a yĩng n sok-a yaa: “Fo sũurã sẽn yikd woto wã, fo tara bʋʋm sɩda?” (Zon. 4:4) A Zonas leokame bɩ? Kibarã pa togs rẽ ye.

16. Bõe la neb kẽer mi n yetẽ, tɩ wilgd tɩ b tagsdame tɩ bũmb Wẽnnaam sẽn maan pa zemse, la bõe la a Zonas kibarã tẽegd tõndo?

¹⁶ Nina yɩta tao-tao n ning a Zonas taale. La yaa sõma tɩ d tẽeg tɩ wakat ninga, ninsaalbã sẽn pa zems zãngã tõe n tagsame tɩ Wẽnnaam sẽn maan pa zems ye. Yel-beed sasa, neb kẽer tagsdame tɩ Wẽnnaam ra tog n maana bũmb n gɩdg yellã. Kẽer me tẽedame tɩ ned sã n maan a to wẽnga, Wẽnnaam tog n sãam-a-la zĩig pʋgẽ. Sãnda tagsdame t’a ra tog n sãama dũni-kãngã hal daar zãra. A Zonas kibarã tẽegda tõnd tɩ sẽn yaa wakat ning fãa la d tagsd tɩ bũmb a Zeova sẽn maan pa zemse, yaa tõnd n segd n dems d tagsgã, pa Wẽnnaam ye.

17, 18. a) A Zonas sẽn yi Niniivã a maana bõe? b) A Zeova sẽn kɩt tɩ kũsg yi la a le kɩt t’a ki wã, maana a Zonas bõe?

¹⁷ No-rɛɛsã yii Niniiv ne sũ-sãang n teesdẽ. A pa kuiis ye. A teesa yaanga, zĩig tãens sẽn beẽ, t’a sã n be be bɩ a ne tẽngã tõre. A taame n ti zãn-bila, n zĩ n gũud Niniiv sãoongã. Tõeeme t’a ra ket n tẽedame t’a Zeova na n sãama tẽngã, t’a gese. Bõe la a Zeova na n maan n sõng nin-kãngã sẽn ka mi sugrã t’a bãng nimbãan-zoeere?

¹⁸ Yʋng a ye bala, a Zeova kɩtame tɩ kũsg yi n bɩ. A Zonas sẽn wa n neke, a yãa kũsgã sẽn yaa gũmm, t’a vãadã yaa yalemse, t’a maasmã lim zãndã. A “Zonas sũur yɩɩ noog wʋsg ne kũsgã.” Tõe t’a tagsame tɩ yaa Wẽnnaam n maan yel-solemd kãngã n na n ning-a barka, la a wilg t’a sũur nooma ne-a. La pa sẽn na n sigs a Zonas sũuri, bɩ sẽn na yɩl tɩ tʋʋlgã  ra wʋm-a yĩng bal la a Zeova maan woto ye. A ra baood n na n wilga a Zonas bũmb hal tɩ kẽ-a sõma. Rẽ n so t’a maan yel-soalem a taaba. A kɩtame tɩ zũnzũur wa kẽ tɩɩgã t’a ki. Rẽ poore, a kɩtame tɩ “sob-tʋʋlg yik yaanga,” hal t’a Zonas ‘rat n sobge.’ A sũurã sãama wʋsgo, t’a le yeel tɩ Wẽnnaam bas t’a ki tɩ rẽ n são.—Zon. 4:6-8.

19, 20. A Zeova tũnuga ne kũsgã n sõng a Zonas t’a bãng bõe?

¹⁹ A Zeova le soka a Zonas n gese, tɩɩgã sẽn ki tɩ yẽ sũurã yikã, a tara bʋʋm bɩ? La a Zonas pa yeel t’a kongame la t’a kota sugr ye. A pʋd n yeela woto: “Baa mam sũur sã n yik hal tɩ m dat n ki, mam tara bʋʋm.” Rẽ masã la a Zeova na n tolg n togs-a bũmb ning a sẽn dat t’a bãngã vẽenega.—Zon. 4:9.

²⁰ Wẽnnaam kɩtame t’a Zonas tagse. A yeel-a lame t’a zoee tɩɩgã sẽn yi yʋn-yɛngã nimbãanega, tɩ yaool n pa yẽ n sel-a, pa yẽ n kɩt t’a bɩ me ye. Rẽ poore, Wẽnnaam yeel-a-la woto: “Sẽn yɩɩda, mam tog n zoee Niniiv sẽn yaa tẽn-kãseng n tar neb tus  koabg la pisi sẽn ka mi b nensã ne b rũmsã sẽn yaa wʋsgã nimbãanega.”—Zon. 4:10, 11. *

21. a) Bõe la a Zeova maan n sõng a Zonas t’a bãng nimbãan-zoeere? b) Wãn to la a Zonas kibarã sõngd tõnd tɩ d fees d meng ne pʋ-peelem?

²¹ Yãmb nee a Zeova sẽn da rat t’a Zonas bãng bũmb ningã bɩ? A Zonas pa sel tɩɩgã, a pa zãgs-a koom. A pʋd n pa maan baa fʋɩ tɩɩgã yĩng ye. Yaool n yaa a Zeova n kõ Niniiv nebã fãa yõore, leb n yaa yẽ n zãad b vɩɩmã, n get b yell wa a sẽn get bõn-vɩɩsã fãa yellã. La maana wãn t’a Zonas zoe tɩɩg a ye tãa nimbãanega, n yaool n pa zoe neb 120000 wã ne b rũmsã nimbãanega? Rẽ yĩnga, pa a sẽn da tagsd a meng yell tɩ loogã yĩng sɩda? Tɩɩgã kũum sẽn sãam a sũurã yaa a maasmã sẽn da nafd yẽ wã yĩng bala. A Zeova sẽn pa sãam Niniiv nebã t’a Zonas yik a sũurã, rẽ me pa yɩ a mengã yell sẽn da pak-a n yɩɩda, t’a ra tagsd a yʋʋrã sẽn na n sãamã sɩda? A Zonas kibarã tõe n sõng-d lame tɩ d maneg n fees d meng ne pʋ-peelem. Ãnd n tõe n yeel t’a zɩ n tags a meng yell tɩ loog noore? D segd n wilga a Zeova d mi-beoogo, a sẽn maand sũ-mar n sõngd tõnd tɩ d tõogd n pa tagsd d mengã yell bala, n zoet d taabã nimbãaneg la d kõt-b sugr wa yẽ wã.

22. a) Bõe n wilgd t’a Zeova sẽn sõng a Zonasã, a sɩd rɩka yam? b) Segdame tɩ tõnd ned kam fãa bãng bõe?

²² La sokr n kete: A Zonas rɩka yam yel-kãngã fãa pʋgẽ bɩ? A sebrã baasgẽ, d pa yãt a sẽn leok ye. Tõe tɩ neb kẽer na n yeelame t’a pa tol n leok ye. A yaool n leokame. Yaa sebrã meng la leoorã. D mii vẽeneg tɩ yaa a Zonas n gʋls a sebrã. Tags-y n ges-y no-rɛɛsã sẽn lebg n kul a ba-yirã ne laafɩ, n wa tɩ zĩ n gʋlsd kibarã. Mams-y y yamẽ n ges ra-kãngã sẽn lebg nin-kẽema. Nin-kẽem sẽn tar yam la sẽn yaa sik-m-meng soaba, n zĩ n gird a zug la a gʋlsd a meng sẽn maane, n togsd a kongrã, a kɩɩsgã, la a sẽn da zãgs t’a kõn zoe a taab nimbãanegã. Hakɩka, a Zeova tõog n sõnga a Zonas t’a bãng bũmb sẽn tar yõod wʋsgo. A bãnga nimbãan-zoeere. La yãmb yẽ?—Karm-y Matɩe 5:7.