1. Bõe yĩng tɩ Silo tẽngã fãa be sũ-sãang pʋgẽ?

A SÃMWƐLL nee Silo nin-buiidã sũ-sãangã, tɩ sãamd a sũur wʋsgo. Ne wa yaa tẽngã neb fãa n yãbda. Zags wʋsg pʋgẽ, pagbã ne kambã tara wiisg bala. B yãbda b sẽn pa na n le yã b sɩdba, b ba rãmba, b kom-dibli la b saam-biisi. Israyɛll sodaas 30000 la Filisti sodaasã le kʋ zabrẽ. Sẽn pa kaoose, b ra kʋʋ bãmb 4000.—1 Sãm. 4:1, 2, 10.

2, 3. Bõe yel-beed n paam Silo tɩ yaa yãnd la paoogr menga?

² La ka yel-beedã fãa la woto meng ye. Maan-kʋʋdb kãsem a Eli kom-yood a yiibã, a Hofni ne a Fineyas ra talla kãabg-koglgã n yi Silo n kẽng zabrã zĩigẽ. Yaa sɛk-roogã sẽn yaa fu-roogã pʋgẽ la b ra bĩngd-a, zĩig ning b sẽn boond tɩ zĩ-sõng sẽn yɩɩdã, tɩ makd a Zeova sẽn be be. Israyɛll nebã belga b mens n tẽed tɩ kãabg-koglgã yaa wa tɩɩm buudu, la t’a sã n be zabrã zĩigẽ b na n tõogame. La Filisti nebã reega kãabg-koglgã, la b kʋ a Hofni ne a Fineyas.—1 Sãm. 4:3-11.

³ Yaa sẽn na maan yʋʋm kobs la kãabg-koglgã be sɛk-roogẽ wã Silo, tɩ sɩd yaa bark tɛkẽ. La kaeto, b reeg-a lame! Nin-kẽem a Eli sẽn tar yʋʋm 98 wã sẽn wʋm rẽ, a yii a goeelã zug n lʋɩ n ki. A bi-pag a ye me sẽn lebg pʋg-kõor baraarã yika rogem, la a rogmã poor bala a kiime. Nand t’a ki, a yeela woto: “Waoogr loogame n bas Israyɛll.” Sɩd me, Silo tẽngã kõn tol n le yɩ wa pĩndã ye.—1 Sãm. 4:12-22.

4. Bõe yell la d na n gom sag-kãngã pʋgẽ?

⁴ A Sãmwɛll na n maana wãn ne yel-kãensã fãa sẽn sãamd sũur wʋsgã? Rẽ yĩnga, a tẽebã na n talla pãng t’a kell n sõng nin-buiidã sẽn sãam a Zeova sũur t’a pa le kogend-bã bɩ? Rũndã-rũndã me, d ned kam fãa mi n tara zu-loees bɩ yell ning tɩ sãamd a sũuri, hal n tõe n sãam a tẽebã. Woto yĩnga, bɩ d ges d sẽn tõe n dɩk yam ning a Sãmwɛll kibarã pʋgẽ.

5, 6. Yʋʋm pisi pʋgẽ, b basa a Sãmwɛll yell goam n da gomd bõe yelle, la bõe la a ra maand wakat kãngã?

⁵ Kibarã pʋgẽ, b wa n basa a Sãmwɛll yell goama, n gom Wẽnnaam kãabg-koglgã yelle, n wilg tɩ Filisti nebã namsa wʋsg b sẽn deeg-a wã, tɩ yɩ tɩlae tɩ b lebs-a. B sẽn wa n na n le gom a Sãmwɛll yell tɩ yʋʋm 20 loogame. (1 Sãm. 7:2) La bõe la a ra maand yʋʋm kãensã fãa pʋgẽ? Rẽ bãngr pa toog ye.

⁶ Biiblã yeelame t’a “Sãmwɛll yɩɩ Israyɛll bʋ-kaood a yõor tɛka.” (1 Sãm. 7:15-17) Kibarã wilgdame tɩ yʋʋm 20 wã poore, Israyɛll tẽns a tãab pʋgẽ la a Sãmwɛll ra minim n kẽnd yʋʋmd fãa, n welgd nebã yɛl la b mo-yõsã, t’a sã n sa bɩ a lebg n kuil a ba-yirã Rama. Dẽnd yaa vẽeneg tɩ yʋʋm 20 wã pʋgẽ, a Sãmwɛll kell n tʋma wʋsgo.

7, 8. a) A Sãmwɛll sẽn modg n sõng nin-buiidã yʋʋm pisi wã poore, a yeel-b lame tɩ bõe? b) A Sãmwɛll gomdã kɩtame tɩ nin-buiidã maan bõe?

⁷ A Eli kom-dibli wã yoobã la b tʋʋm-kɛgã yĩnga, nin-buiidã ra pa le wɩngd ne Wẽnnaam tũub ye. Wõnda wʋsg ra basa Wẽnnaam n pʋʋsd bõn-naandse. La a Sãmwɛll sẽn maan a sẽn tõe fãa n sõng-b yʋʋm pisi wã poore, a yeel-b-la woto: “Yãmb sã n dat n le tũ Zu-soabã ne y sũyã fãa, bɩ y yiis bu-zẽmsã wẽnnaam dãmbã ne b wẽnnaam poak a Astarte yãmb sʋka. La y keng y sũy n bao Zu-soabã n tũ bãmb bala, la bãmb na n fãaga yãmb Filisti nebã nusẽ.”—1 Sãm. 7:3.

⁸ Israyɛll nebã namsa wʋsg “Filisti nebã nusẽ.” B sẽn tõog n halk Israyɛll sodaasã, b tagsame tɩ b tõe n namsa Wẽnnaam nin-buiidã wa b sẽn dat tɩ bũmb ka yɩ ye. La a Sãmwɛll yeela nin-buiidã vẽeneg tɩ b sã n da sakẽ n na n le tũ a Zeova, yɛlã na n toeemame. B sakame bɩ? N-ye, hal t’a Sãmwɛll sũur yɩ noogo. B sãama b bõn-naandsã, n sɩng n na n le “tũ Zu-soabã bala.” A Sãmwɛll tigma nebã fãa Mizpa, tẽng sẽn be Zerizalɛm nug-rɩtgã sẽn pid ne tãensã. Nebã sɩd tigmame, n loe noor la b kos sugr b sẽn da pʋʋsd bõn-naandsã yĩnga.—Karm-y 1 Sãmwɛll 7:4-6.

9. Israyɛll sẽn tigim Mizpa wã, Filisti nebã tagsame tɩ bõe, la Wẽnnaam nin-buiidã sẽn bãng tɩ yell n watã, b maana bõe?

⁹ Filisti nebã wʋmame tɩ Israyɛll nebã tigma Mizpa, tɩ b  tags tɩ yaa segb b sẽn paame. B tʋma b sodaasã tɩ b na n tɩ kʋ nin-kãensã sẽn tũud a Zeova wã. Israyɛll nebã bãngame tɩ yell n wate. Rabeem kãseng yõk-b lame, tɩ b kos a Sãmwɛll t’a pʋʋs b yĩnga. A Sãmwɛll sɩd pʋʋsame la a maan maoongo. Maoongã sasa tɩ Filisti sodaasã taa Mizpa. Wakat kãnga, a Zeova reega a Sãmwɛll pʋʋsgã, n wilg a sũ-puugr ne Filisti nebã. A kɩtame tɩ saagã tãsd n maand bʋr-kẽenga, tɩ Filisti rãmbã sãeege.—1 Sãm. 7:7-10.

10, 11. a) Bõe yĩng tɩ d tõe n yeel tɩ Filisti sodaasã ra zɩ n wʋm sa-tãs nins b sẽn wʋm baraarã? b) Zabrã sẽn sɩng Mizpa wã baasa wãna?

¹⁰ La rẽ yĩnga, d tog n tagsame tɩ Filisti nebã yaa wa kom-bõonese, tɩ b sã n wʋm sa-tãs bɩ b na n zoe n tɩ soond b ma rãmb poorẽ bɩ? Ayo! Ra yaa gãndaado, neb sẽn mi zabr sõma. Dẽnd tog n yɩɩ sa-tãs b sẽn zɩ n wʋme. La yaa bʋrgã sẽn da yaa wʋsgã n yɛɛs-b bɩ? Bɩ sa-tãsã tiig n sɩngame tɩ saagã pa kʋɩ, wall yɩɩ wa bʋrgã yita tãensẽ wã? Sẽn yaa a soab fãa, rabeem kãseng n kẽ Filisti nebã. Zĩig pʋgẽ, gãndaadã lebga rabɛɛmb n baood b mense. Israyɛll nebã kaoogame n yi Mizpa, n kʋ Filisti nebã la b rig-ba, hal n tãag Zerizalɛm nug-goabg sẽnese.—1 Sãm. 7:11.

¹¹ Wẽnnaam nin-buiidã sẽn tõog zabrã yɩɩ bõn-kãseng menga, bala rẽ tɛk n tãag a Sãmwɛll kũum, Filisti nebã pa le wa Israyɛll nebã soolmẽ ye. Wẽnnaam nin-buiidã wa n tõog n deega tẽns nins bãmb sẽn da so wã fãa.—1 Sãm. 7:13, 14.

12. B sẽn yeel t’a Sãmwɛll ‘maana tɩrgã’ võor yaa bõe, la a zʋg-sõma bʋs n kɩt t’a tʋʋmdã yãk nenga?

¹² Yʋʋm kobs loogr poore, tʋm-tʋmd a Poll sõdga a Sãmwɛll n naag no-rɛɛsdb la bʋ-kaoodb nins sẽn kell n sak a Zeova la b ‘maan tɩrgã.’ (Heb. 11:32, 33) Sɩd me, a Sãmwɛll maana sẽn yaa sõma la tɩrg Wẽnnaam nifẽ, la a sõng nebã sẽn na yɩl tɩ b maan woto. A talla sũ-mar n gũ a Zeova, n kell n pids a tʋʋmdã baa ne yɛl kẽer sẽn da sãamd sũurã. Rẽ kɩtame t’a sõngrã yãk nenga. Sẽn paase, a talla mi-beoogo. B sẽn tõog zabrã Mizpa wã poore, a Sãmwɛll kɩtame tɩ b vigl kugri, sẽn na yɩl tɩ b tẽegd a Zeova sẽn sõng a nin-buiidã to-to wã.—1 Sãm. 7:12.

13. a) Yɩl n dɩk a Sãmwɛll togs-n-taare, zʋg bʋs n yaa tɩlae? b) Ned vɩɩm pʋgẽ, wakat bʋg la sõma n yɩɩd t’a modg n paam zʋgd nins a Sãmwɛll sẽn da tarã?

 ¹³ Yãmb me ratame n “maan tɩrg” bɩ? Sã n yaa rẽ, yɩta sõma tɩ y rɩk a Sãmwɛll togs-n-taare, n tall sũ-mar ne sik-m-meng la mi-beoogo. (Karm-y 1 Pɩɛɛr 5:6.) Ned kae n pa rat zʋg-sõma a woto ye. A Sãmwɛll sẽn paam zʋg-kãensã hal a yãadmẽ wã naf-a lame, bala kaoosg zugẽ a yãa yɛl sẽn sãamd sũur n yɩɩda.

14, 15. a) A Sãmwɛll sẽn wa n “lebg nin-kẽem-kʋdrã,” yel-bʋg sẽn sãamd sũur n yɩɩd la a yã-yã? b) Bõe yĩng tɩ d tõe n yeel t’a Sãmwɛll ra pa tar taal wa a Eli?

¹⁴ B sẽn wa n na n le gom a Sãmwɛll yell t’a ‘lebga nin-kẽem-kʋdre.’ Rẽ t’a tara kom-dibli a yiib sẽn yaa kãsemba. A Zoɛll ne a Abiza. A ra kɩtame tɩ b sõngd-a n kaood bʋʋdã. La bʋko, b pa tʋm tʋʋmdã wa b ba wã sẽn da ratã ye. A Sãmwɛll da yaa pʋ-peelem soab la nin-tɩrga, la a kambã yẽ ra baooda b mens nafre, n kaood bʋʋdã kɛg n deegd kũuni.—1 Sãm. 8:1-3.

¹⁵ Daar a yembre, Israyɛll kãsem-dãmbã waa n yeela  no-rɛɛsã sẽn lebg nin-kẽemã yaa: “Y kambã tʋʋm ka wẽnd yãmb dẽndã ye.” (1 Sãm. 8:4, 5) A Sãmwɛll ra mii yellã bɩ? Kibarã pa wilg rẽ ye. Sẽn yaa a soab me, a Sãmwɛll ra pa tar taal wa a Eli ye. A Zeova sũur yika ne a Eli t’a sɩbg-a a sẽn pa kibl a kambã b tʋʋm-kɛgã yĩngã, la a sẽn waoog-b n yɩɩd yẽ wã yĩnga. (1 Sãm. 2:27-29) La a zɩ n yeel t’a Sãmwɛll maana woto ye.

16. Biig sã n yaa tõata, wãn to la namsd a roagdbã, la wãn to la a Sãmwɛll makrã tõe n bels-b la sõng-ba?

¹⁶ Kibarã pa wilg a Sãmwɛll sũ-sãangã, a yɩɩrã la a sẽn yã yãnd ninga, a sẽn wʋm t’a kambã maanda sẽn pa segdã ye. La roagdb wʋsg wʋmda yellã sẽn nams-a to-to wã. Yaoolem wakat kãensã, neb wʋsg sũy sãamda kambã sẽn kɩɩsd b roagdbã la b pa sakd kiblgã yĩnga. (Karm-y 2 Tɩmote 3:1-5.) A Sãmwɛll makrã tõe n belsa roagdb nins yel-kãngã sẽn namsdã, la sõng-b wʋsgo. A Sãmwɛll kambã ra tʋmda tʋʋm-kɛga, la a pa bas tɩ rẽ sãam a tẽebã baa bilf ye. Tẽeg-y tɩ baa y goamã la y kiblgã pa kẽ y kambã sũyẽ, y mengã mak-sõngã ket n tõe n sõng-b-la wʋsgo. Sẽn yaa a soab me, roagdbã tõe n kell n nooga Wẽnnaam a Zeova sẽn yaa b Ba wã sũur wa a Sãmwɛll.

17. Bõe la Israyɛll kãsem-dãmbã kos a Sãmwɛlle, la rẽ maan-a-la bõe?

¹⁷ A Sãmwɛll kambã pa tags b yão-beedã la b rat-m-yembrã biis wẽnem sẽn da tõe n ta zĩig ningã ye. Israyɛll kãsem-dãmbã tɩ yeela a Sãmwɛll woto: “Bɩ y bao rĩm n kõ tõnd t’a soog-d wa buud a taabã sẽn tarã.” Rẽ yĩnga, a Sãmwɛll tagsame tɩ yaa yẽ la b ka le rat bɩ? Yʋʋm wʋsg la woto a sẽn kaood nin-kãensã bʋʋd a Zeova yʋʋr yĩnga. La masã b pa le rat no-rɛɛs ye. Yaa rĩm la b rat t’a yɩ b bʋ-kaooda. Tẽn-yagsã ra tara rĩm-dãmba, tɩ Israyɛll nebã me rata. Woto maana a Sãmwɛll bõe? Kibarã yeelame t’a “Sãmwɛll sũur ka yɩ noog ye.”—1 Sãm. 8:5, 6.

18. Bõe la a Zeova yeel tɩ bels a Sãmwɛll la wilg tɩ Israyɛll nebã sẽn maanã yaa yel-wẽn-kãsenga?

¹⁸ A Sãmwɛll pʋʋsa a Zeova n togs-a yellã. Ges-y a Zeova sẽn leok to-to. A yeelame: “Maan bũmb nins fãa bãmb sẽn yeel foomã. Tɩ bõe, ka foom la b kɩɩsẽ ye. Yaa maam la b ka le rat tɩ m leb n yɩ b rĩma.” A Zeova gomdã belsa a Sãmwɛll wʋsgo. Baasgo, wilgame tɩ yaa Wẽnnaam sẽn tõe fãa wã la b paoog hal tɩ loog noore. A Zeova yeela a no-rɛɛsã t’a wilg Israyɛll nebã b yam-yãkrã sẽn na n wa ne zu-loees ninsã. Baa a Sãmwɛll sẽn keoog-bã, b kell n yeela woto: “Tõnd rata rĩm bala.” Wa  raasenkamã, a Sãmwɛll kell n saka Wẽnnaam a Zeova n tɩ zae ned ning a sẽn yãk t’a na n yɩ b rĩmã.—1 Sãm. 8:7-19.

19, 20. a) Bõe n wilg t’a Sãmwɛll sẽn sak n tɩ zae a Sayullã pa yɩ rok-m-zugẽ bɩ ne sũ-toogo? b) Wãn to la a Sãmwɛll kell n sõng a Zeova nin-buiidã?

¹⁹ La a Sãmwɛll sakrã yɩɩ rok-m-zugẽ, bɩ ne sũ-toog bɩ? Rẽ yĩnga, a basame tɩ yellã sẽn sãam a sũurã kɩt t’a lebg mo-be-ned bɩ sũ-kẽk soab bɩ? Woto la neb wʋsg ra na n maane, la a Sãmwɛll yẽ pa maan woto ye. A tɩ ninga a Sayull zugã kaam t’a lebg rĩma, la a wilg meng tɩ yaa a Zeova n yãk-a. A moka a Sayulli, tɩ wilg t’a beenda rĩmã, la t’a na n sak-a lame. A yeela nin-buiidã woto: “Ad ned ninga Zu-soabã sẽn yãkã. Tõnd ned a to ka le be sẽn ta-a ye.”—1 Sãm. 10:1, 24.

²⁰ A Sãmwɛll gesa a Zeova sẽn yãk a soabã zʋg-sõma wã n yɩɩda. A pa ges a sẽn yaa koangdã ye. Sẽn da pak yẽ mengã yaa a sak a Zeova wa a sẽn sɩng n maand yʋʋm ka tɛkã, pa a paam tɩ nin-buiidã yam sẽn yuusd wakat fãa wã nong-a ye. (1 Sãm. 12:1-4) Sẽn paase, a tʋma a tʋʋmdã ne a sũur fãa, n keoog Wẽnnaam nin-buiidã ne bũmb nins sẽn tõe n sãam b tẽebã, la a keng b raood sẽn na yɩl tɩ b kell n sak a Zeova. A saglsã kẽe nin-buiidã sũyẽ, hal tɩ b kos-a t’a pʋʋs b yĩnga. A Sãmwɛll sẽn leok-b to-to wã sɩd bee yamleoogo. A yeela woto: “Bɩ Zu-soabã ra bas tɩ m kong ne bãmb n bas n ka le pʋʋs yãmb yĩng ye. Mam na n zãmsa yãmb sor sẽn yaa sõma la tɩrga.”—1 Sãm. 12:21-24.

21. B sã n wa bobl ned tʋʋmd sẽn zẽkd zug tɩ pa yɩ yãmb noogo, wãn to la a Sãmwɛll makrã tõe n sõng-yã?

²¹ Rẽ yĩnga, b zoe n bobla ned tʋʋmd sẽn zẽkd zug tɩ yãmb sũur pa yɩ noog bɩ? A Sãmwɛll makrã tẽegda tõnd tɩ sã n wa yaa woto, d pa segd n maan sũ-kiir bɩ sũ-kẽk ye. (Karm-y Yelbũn 14:30.) Wẽnnaam tara tʋʋm wʋsg sẽn be barka, neb nins fãa sẽn sakd-a wã yĩnga.

22. Bõe yĩng t’a Sãmwɛll ra be bʋʋm, a sẽn ges bũmb nins sẽn sek pẽgr a Sayull nengẽ wã balã?

²² A Sãmwɛll ra bee bʋʋm la a sẽn ges bũmb nins sẽn sek pẽgr a Sayull nengẽ wã balã. A Sayull sɩd ra ka to ye. A ra yaa  woko, n yaa rasãnga, n tar raood la yam. Sɩngrẽ wã, a ra yaa sik-m-meng soab me. (1 Sãm. 10:22, 23, 27) Woto fãa sẽn yãk a toogo, yẽ me ra tara tõog ning Wẽnnaam sẽn kõ nebã fãa wã, n tõe n yãk a toorẽ yam. (Tõo. 30:19) La rẽ yĩnga, a kell n yãka yam-sõma bɩ?

23. A Sayull basa a zʋg-sõng bʋgo, la bõe n wilg t’a zẽk-m-mengã talla paasgo?

²³ Bʋko, ned sã n paam ziir la naam, naoor wʋsgo, yaa a sik-m-mengã n dengd n menem. Pa yã n kaoos la a Sayull lebg zẽk-m-meng soab ye. A yãka yam n kɩɩs noy nins a Zeova sẽn kɩt t’a Sãmwɛll taas-a wã. Vugri, a Sayull yɩɩ yãg-yãg n maan maoong n pa gũ a Sãmwɛlle, tɩ yaool n yaa a Sãmwɛll n da yãk yam n na n maan maoongã. Yɩɩ tɩlae t’a Sãmwɛll kibl-a, la a yeel-a tɩ b na n deega naamã n bas a roogã rãmba. Baa ne b sẽn kibl-a wã, a pa rɩk yam ye. A sẽn maan bũmb nins rẽ poorã wẽnem n pʋd n yɩɩda.—1 Sãm. 13:8, 9, 13, 14.

24. a) Bõe la a Sayull maan n beeg a Zeova, a sẽn wa n tɩ zab ne Amalɛk rãmbã? b) B sẽn kibl a Sayullã a leokame tɩ bõe, la bõe la a Zeova yãk yam n na n maane?

²⁴ Daar a yembre, a Zeova kɩtame t’a Sãmwɛll yeel a Sayull t’a tɩ zab ne Amalɛk rãmbã. A Zeova wilga a sẽn segd n maanã, n yeel-a vẽeneg t’a kʋ Amalɛk rĩm a Agaag. La a Sayull pa kʋ-a ye. A basa rũm-sõma me n pa kʋ ye. A Sãmwɛll sẽn wilg a Sayull t’a sẽn maanã pa segdã, a sẽn leok to-to wã wilgame t’a sɩd toeemame. A pa sak n deeg ne sik-m-meng t’a kongame ye. A baoo pademse, n na n wilg t’a sẽn maanã segdame, la a pʋd n dɩk yellã n dogl nin-buiidã. A Sayull sẽn bao bʋʋm n kõ a menga, n yeel tɩ rũm-sõma wã yaa sẽn na n maan maand n kõ a Zeova wã, a Sãmwɛll leok-a-la woto: “Gese, sakr yɩɩda maando, la kelgr yɩɩda pe-raad kaam.” Ne raoodo, a Sãmwɛll kibla a Sayull la a wilg-a t’a Zeova na n sãama a naamã, n dɩk n kõ ned a to sẽn são yẽ. *—1 Sãm. 15:1-33.

25, 26. a) Bõe yĩng t’a Sãmwɛll yãb a Sayull yĩnga, la bõe la a Zeova wa n baas n yeel-a? b) A Sãmwɛll sẽn ta a Zese yirã, bõe la a Zeova tẽeg-a?

 ²⁵ A Sãmwɛll sũur sãama wʋsg ne a Sayull sẽn maanã. A yãba ne a Zeova yʋng tõr rẽ yĩnga. A pʋd n da yãbda a Sayull yĩng n pa satẽ ye. A Sãmwɛll ra nanda a Sayull wʋsgo, n tagsdẽ t’a na n yɩɩ rĩm-sõngo, la kaeto, pa yãk neng ye. A Sayull toeema fasɩ, n pa le tar zʋg-sõma ye. A lebga wẽn-kɩɩsa. A Sãmwɛll pa le rat n yã a Sayull meng ye. A Zeova wa n baas n yeel-a-la woto: “Dabʋr la fo na n bas yãbr a Sayull yĩnga? Mam zãgsame n yeel t’a kõn le yɩ rĩm ye. Sui kaam f yɩɩllã pʋgẽ n kẽnge. Mam tʋmda foom Betlehɛm a Isai [bɩ a Zese] yiri. Tɩ bala, mam yãka a biig a yembr t’a lebg rĩma.”—1 Sãm. 15:34, 35; 16:1.

²⁶ Ninsaalbã sẽn pa zems zãnga, n mi n wa bas n pa le sakd a Zeova wã pa gɩdgd a raabã pidsg ye. A sã n yãk neda, t’a soab wa lebg wẽn-kɩɩsa, a baooda ned a to. A Sãmwɛll pa le yãb a Sayull yĩng ye. A sɩd kẽnga a Zese yirã Betlehɛm wa a Zeova sẽn yeelã, n tɩ mik a kom-dibli, hal tɩ kẽer yaa rasãmba. A sẽn ta n yãk a yamã sẽn kẽ a soabã, a Zeova tẽeg-a lame t’a ra ges rasãndlmã bal ye. (Karm-y 1 Sãmwɛll 16:7.) B wa n talla a Davɩɩd sẽn yaa b fãa yao-zʋʋgã n wa. Yẽ la a Zeova yãk-yã.

27. a) Bõe n kɩt t’a Sãmwɛll tẽebã pãng ra tar paasgo? b) Yãmb tagsda bõe ne mak-sõng ning a Sãmwɛll sẽn basã?

²⁷ A Sãmwɛll paam n bãnga vẽeneg t’a Zeova sẽn kɩt t’a Davɩɩd ledg a Sayullã sɩd zemsame. A Sayull ra lebga sũ-ki-ned n baood a Davɩɩd n na n kʋ, la wẽn-kɩɩs menga. La a Davɩɩd yẽ ra yaa ned sẽn tar tẽeb la raoodo, n yaa nin-tɩrg la sɩd soaba. A Sãmwɛll kʋʋlmã wakate, a tẽebã pãng maneg n paasame. A yãame tɩ baa yell sẽn sãam ned sũur to-to fãa, a Zeova tõe n bels-a lame la a welg yellã, bɩ a kɩt meng tɩ baas ne sũ-noogo. A Sãmwɛll sẽn wa n na n ki wã t’a tũ a Zeova sẽn kolg yʋʋm koabga. Israyɛll nebã yãba nin-tɩrg a Sãmwɛll kũumã. La b bee bʋʋm. Ned sẽn tũud a Zeova rũndã-rũndã segd n soka a meng woto: ‘M na n modg n talla a Sãmwɛll tẽebã buud bɩ?’