1, 2. Mak-bʋg n wilgd tɩ d segd n paama tikr zĩiga, n welg no-koɛɛmã tũudmã wɛɛngẽ?

 WÃN to la d tõe n bãng Wẽnnaam? Yaa tɩlɛ tɩ d bao n bãng tũudum toɛy-toɛyã sẽn yetã fãa bɩ? Rẽ pa tõe ye. Baa d sã n da tõe me, bũmb nins b sẽn zãmsd nebã sʋka, wãn to la d na n bãng sẽn zems-a kɛpɩ wã?

² Nebã tagsa sẽn yaa toɛy-toɛy Wẽnnaam wɛɛngẽ wã, d segd n paama tikr nebã fãa sẽn tõe n sake, n tik rẽ n bãng sẽn yaa sɩdã. D rɩk makr wala ned sẽn na n kẽng raagẽ n na n tɩ ra peende, tɩ peendã woglem wa ne no-koeemde. Koaasã sã n yet tɩ peendã yaa metr a tãabo, tɩ sẽn dat n da-a peendã tagsdẽ tɩ pa ta woto, wãn to la b tõe n welg yellã? Yaa b sẽn na n dɩk metr n mak peendã.

3. B gʋlsa Biiblã bõe yĩnga?

³ Rẽ yĩnga, tikr bɩ noor beeme, n tõe n sõng-d tɩ d yãk tũudum bɩ? N-ye, yaa Biiblã. Wẽnnaam kɩtame tɩ b gʋls Biiblã sẽn na yɩl tɩ zĩig fãa bɩ nebã tõog n bãng sɩdã yẽ zugu. Biibl-dãmb tus ka tɛk la b yiis-yã. B lebga Biiblã tõr bɩ a pʋɩ-sʋkã sẽn yɩɩd buud-goam 2100 pʋsẽ. Ned fãa la bal tõe n karem n bãnga sɩdã Wẽnnaam zugu, a meng buud-gomdã pʋgẽ.

4. Yaa bõe n be Biiblã pʋgẽ?

⁴ Biiblã yaa kũun sẽn tar yõod wʋsg Wẽnnaam sẽn kõ-do. A wilgda yɛl d  sẽn da pa tõe n bãng ye. A gomda Wẽnnaam ne malɛgsã yelle. A wilgda Wẽnnaam sẽn yaa a soaba, a tagsgo, la a raabã. A wilgda Wẽnnaam manesem sẽn yɩ to-to ne nebã yʋʋm tusa wã sẽn loogã pʋgẽ. A gomda yɛl sẽn na n zĩnd beoog-daar yelle, la a wilgd d sẽn tõe n yã sor ning sẽn tar n dabd vɩɩm sẽn pa satã zĩigẽ to-to.

5. Mak-bʋg n wilgd tɩ siãnsã sẽn yetã zemsa ne Biiblã?

⁵ Bũmb wʋsg n kɩt tɩ d tõe n tẽ tɩ Biiblã sɩd yaa Wẽnnaam Gomde. Bũmb a yembr yaa Biiblã sẽn zems ne siãnsã. Pĩnd wẽndẽ wã, dũniyã gill zugu, nebã ra tagsdame tɩ tẽngã roga bũmb zugu. Wala makre, Afirikdeluwɛste, nebã ra tẽedame tɩ tẽngã zaoo wobd a naas sẽn yas kur sẽn yaa bed-kẽeng zugu. Na maan yʋʋm 3500 sẽn looge, Biibl-gʋlsd a ye yeela bũmb sẽn zems ne siãnsã sẽn yetã. A yeelame tɩ Wẽnnaam kɩtame tɩ “tẽngã yag vɩʋʋgẽ.”—Zoob 26:7.

6. Bõe n wilgd n tɩ yɩɩd tɩ Biiblã yaa Wẽnnaam sebre?

⁶ Bũmb ning sẽn wilgd n tɩ yɩɩd tɩ Biiblã sɩd yaa Wẽnnaam sebre, yaa a sẽn pĩnd n togs beoog yɛlã tɩ pids kɛpɩ wã. Wẽnnaam sɩd mii sẽn wat beoogo, la pa woto ne ninsaalb nins sẽn togsd beoog yɛlã ye. A sẽn yet fãa sɩd pidsda wakat fãa.

7. Biiblã bãngr-goam a wãn n pids pĩndã?

⁷ Biiblã bãngr-goam kobs n pids pĩnd wẽndẽ. Wala makre, yʋʋm 700 sẽn deng a Zeezi rogmã, Biiblã togsame t’a na n doga Betlehɛm, tɩ sɩd yɩ woto kɛpɩ. (Mise 5:2; Matiye 2:3-9) Rẽ sẽn yãk a toogo, b ra pĩnd n togsame me tɩ yaa pa-kul sẽn pa mi rao n na n dog-a, la tɩ b na n wa zãmb-a-la ne wanzuri ligd-koeems 30. Rẽ me pidsame. Sɩd-sɩda, ninsaal baa a ye ra pa tõe n deng n togs bõn-kãensã tɩ wa pids ye!—Ezayi 7:14; Zakari 11:12, 13; Matiye 1:22, 23; 27:3-5.

8. Biiblã bãngr-gom-bʋs n pidsd rũndã-rũndã, la bõe la rẽ wilgda?

⁸ Biiblã bãngr-goam wʋsg n pidsd rũndã-rũndã. Ad bãmb b wãna:

•    “Buud na n yika zabr ne buud a to, tɩ rĩung me yik zabr ne rĩung a to. Tẽn-digimd-kãsems na n zĩndame, tɩ kom la bã-longds me zĩnd zĩig-zĩiga.” —Luk 21:10, 11.

•   ‘Noyã kɩɩsg na n tara paasgo.’—Matiye 24:12.

•   “Yaoolem wakatã, . . . nebã na n yɩɩ beed dãmba, neb sẽn nong ligdi, . . . ba-rãmb la ma-rãmb kɩɩsdba, . . . neb sẽn pa tar yõk-m-menga, nen-kɛglem dãmba, neb sẽn kis sẽn sõmbe, . . . neb sẽn pid ne wuk-m-menga, neb sẽn nong yõ-noogr n pa nong Wẽnnaam ye.”—2 Tɩmote 3:1-5.

 Yãmb pa sak n deeg tɩ bõn-kãensã bee rũndã-rũndã sɩda? Biiblã bãngr-goam sẽn yaa sɩd la b zems kɛpɩ wã wilgdame tɩ Biiblã pa seb-zaalg ye. Yaa Wẽnnaam vʋʋsem sõngã n vẽneg tɩ b gʋls-a!—2 Tɩmote 3:16.

9, 10. Bõe n wilgd tɩ Wẽnnaam pa bas tɩ ninsaalb toeem Biiblã?

⁹ Makre, yãmb sã n yaa lozĩnd taoor soaba, n gʋls noy y tʋm-tʋmdbã yĩng n tabl tɩ bɛ toeem yãmb sẽn gʋlsã, bõe la y na n maane? Y pa na n dems a sẽn toeemã sɩda? Woto me, Wẽnnaam pa basd tɩ nebã toeem sɩd ning sẽn be Biiblã sẽn yaa a Gomdã pʋgẽ wã ye.

¹⁰ Neb nins sẽn mak n na n toeem Wẽnnaam Gomdã sẽn yetã pa tõog ye. D sã n dɩk Biibl ning d sẽn tar rũndã wã n mak ne pĩnd wẽndẽ Biibl-dãmbã, d mikdame tɩ yaa yembre. Rẽ wilgdame tɩ hal n tãag masã, Biiblã pa toeem ye.