SAK A 3
Sẽn vɩ-b tɩ tõnd pa ne-bã yaa ãnd dãmba?
1. Wãn to la b mak rog-n-mik tũudmã ne tãnga?
B MAKA Afirik rog-n-mik tũudmã neb sẽn tẽed bũmb ningã ne tãnga. Wẽnnaam sẽn yaa pãn-kãseng soabã n be zugẽ wã. Kɩremsẽ wã, yaa wẽn-bi wã bɩ malɛgsã sẽn yaa Wẽnnaam tʋm-tʋmdbã n be be. Yaab-rãmbã me bee tãngã kɩremsẽ, n tẽegd b zakã neb sẽn be tẽng zugã yelle, la b get b yell neere. Tẽngrã yaa b rãmb nins pãng sẽn pa ta-bã n be beenẽ: tɩtã rãmba, bag-bʋgdbã la sõobã.
2. Wãn to la gomd b sẽn nong n yet Afirik wilgd tɩ rog-n-mik yɛlã tẽeb bee tũudum wʋsg pʋsẽ?
2 Yɛl a woto rog-n-mikã rãmb sẽn tẽedã kẽe Afirik tũudum wʋsg pʋsẽ. Afiriki, b nong n yetame yaa: “Kirist tũudmã bɩ lislaamdã pa gɩdgd tõnd tɩ d ra tũ d yaab-rãmbã wẽnnaam-dãmb ye.”
3. Yɛ la d tõe n bãng sɩdã sẽn vɩ-b tɩ tõnd pa ne-bã wɛɛngẽ?
3 Afirik rog-n-mikã rãmb sẽn tẽed yɛl ninsã yaa sɩd bɩ? Biiblã sõngda tõnd tɩ d bãng sɩdã sẽn vɩ-b tɩ tõnd pa ne-bã wɛɛngẽ.
Wẽnnaam sɩd-sɩd a Zeova
4. Bõe la Afirik tũudum-kãsemsã neb sak n deege?
4 Afirik tũudum-kãsems a tãabã neb sak n deegame tɩ Wẽnnaam beeme, la t’a yɩɩda bũmb fãa. Biiblã yetame t’a yaa “wẽnnaam-dãmb Wẽnnaam la zu-sobend-dãmb Zu-soaba, Wẽnnaam ning sẽn yaa kãsengã, n tar pãnga, tɩ nebã segd n zoe-a la b waoog-a.” (Tõodo 10:17) Moeembã me tẽeda Wẽnnaam-yɛng sẽn ka to. Afirik rog-n-mik tũudmã wɛɛngẽ, Porfesɛɛr a Geoffrey Parrinder yeelame: “Afirik neb wʋsg tẽeda Wẽnnaam sẽn ka to sẽn yaa wẽnnaam-dãmbã la ninsaalbã ba, n yaa ãndũniyã Naanda.”
5. Yʋy kẽer b sẽn pʋd Wẽnnaam la bʋse?
5 La baa ne neb wʋsg sẽn tẽed Wẽnnaamã, b tagsg sẽn yaa to-to Wẽnnaam zugã pa vẽeneg ye. Sẽn na yɩl n bãng neda, d segd n deng n bãnga a yʋʋre. Wẽnnaam yʋʋrã wɛɛngẽ, tũudum toɛy-toɛyã neb sẽn yetã kɩɩsda taaba. Kiris-neb ne yʋʋrã nong n boond-a lame tɩ Wẽnnaam, sẽn yaa naam yʋʋr sẽn dat n yeel tɩ “Pãng Soaba.” Sã n yaa ne Moeembã, yaa a Alla. La rog-n-mik tũudmã neb sẽn boond Wẽnnaam ning sẽn ka to wã ne yʋʋr ningã toeemda buud-gomd ne a to pʋgẽ. A John Mbiti sebr a yembr (Concepts de Dieu en Afrique, ne ãngilindi) pʋgẽ, a sõdga yʋy la naam yʋy buud toor-toor bãmb 500 b sẽn pʋd Wẽnnaam, Afiriki. Wala makre, Yorb-rãmbã (Nizeriya) boonda Wẽnnaam tɩ Olodumare, sã n yaa ne Kikuyu (Kenya), yaa Ngai, la sã n yaa ne Zulu-rãmbã (Afirikdisiid), yaa Unkulunkulu.
6, 7. Wẽnnaam yʋʋr la a bõe, la bõe n kɩt tɩ d mi rẽ?
6 Bõe la Wẽnnaam yet a mengã wɛɛngẽ? Wẽnnaam sẽn wa n kõ a Moyiiz noor t’a tɩ yiis Israyɛll nebã Ezɩptã, a Moyiiz sokame: “La mam sã n kẽng Israyɛll nebã nengẽ n tɩ yeel-ba: ‘Yãmb yaab-rãmbã Wẽnnaam n tʋm maam yãmb nengẽ,’ tɩ b sok maam yaa: ‘Yẽ yʋʋr la a bõe?’ Mam na n leok-b lame tɩ bõe?”—Yikri 3:13.
7 Wẽnnaam leoka a Moyiiz yaa: “Ad fo sẽn segd n tɩ yeel Israyɛll nebã bũmb ninga: ‘A Zeova sẽn yaa yãmb yaab-rãmbã Wẽnnaamã, . . . n tʋm maam yãmb nengẽ.’ Yãoã na n yɩɩ mam yʋʋr wakat fãa, la yaa yʋʋr b sẽn na n tẽegd zãmaan woo zãmaana.” (Yikri 3:15) Wẽnnaam yʋ-kãng bee Biiblã pʋgẽ sẽn yɩɩd naoor 7000, baa ne Biiblã lɛbgdb kẽer sẽn ledg-a ne “Wẽnnaam,” “Zu-soaba,” bɩ “Sẽn-Ka-Saab” sẽn yaa naam yʋyã.
8. A Zeova yaa wãn to, la d sã n dat n ta a yam, bõe la d segd n maane?
8 A Zeova yaa wãn-wãna? Tõnd nif pa tõe n yã-a, a tõee bũmb fãa, a tara ziiri. A yɩɩda bũmba fãa, a ka mak-n-taag ye. (Tõodo 6:4; Ezayi 44:6) A Zeova yeela a Moyiiz yaa: “Maam a Zeova sẽn yaa yãmb Wẽnnaamã yaa Wẽnnaam sẽn dat tɩ b waoog yẽ a ye tãa.” Woto wilgdame tɩ d sã n dat n ta a Zeova yam, d segd n tũu yẽ a yembr bala. A pa rat tɩ tõnd tũ bũmb a to bɩ ned a to ye.—Yikri 20:3-5.
A Zeezi Kirist yaa Wẽnnaam Rĩungã Rĩma
9. Bõe yĩng tɩ d tõe n yeel t’a Zeezi pa zem a Zeova?
9 Rũndã-rũndã, nebã tagsa wã yaa toor-toor a Zeezi sẽn yaa a soabã wɛɛngẽ. Kiris-neb ne yʋʋrã tẽedame t’a Zeezi bee tãablem sõng pʋgẽ. La Biiblã pa wilgd tɩ Wẽnnaam yaa mens a tãab ye. Biiblã leb n pa yet t’a Zeezi zema a Zeova ye. A Zeezi mengã yeelame yaa: “Ba wã yaa kãseng n yɩɩd maam.”—Zã 14:28.
10. Nand t’a Zeezi wa tẽngã zugu, a ra bee yɛ?
10 Biiblã wilgdame tɩ nand t’a Zeezi wa tẽngã zugu, a ra bee saasẽ n yaa malɛk sẽn tar pãnga. Wa a Zeova sẽn naan a Ãdem ne a Awa tẽng zugã, a naana malɛgs me saasẽ. A Zeezi n yɩ pipi malɛk a Zeova sẽn naane.—Zã 17:5; Kolos rãmbã 1:15.
11. Yɩɩ wãn to tɩ b rog a Zeezi tẽngã zugu?
11 Sẽn zems yʋʋm 2 000 sẽn looge, a Zeova rɩka malɛg-kãngã vɩɩmã n ning pa-kuil a ye pʋgẽ, t’a yʋʋr boondẽ t’a Maari. Malɛk a Gabriyɛll yeela a Maari yaa: “Fo na n dɩka pʋg n dog bi-ribla. La fo segd n pʋda a yʋʋr t’a Zeezi. A na n yɩɩ Rĩma, . . . la yẽ Rĩungã pa na n tol n tall tɛk ye.”—Luk 1:31, 33. a
12. Pipi bũmb sẽn kɩt t’a Zeezi wa tẽngã zug la bʋgo?
12 Woto, a Zeezi rogame, n bɩ n leb kãsma, n zãms nebã tɩ b bãng a Zeova la a raabã. A yeela Rom naab a ye yaa: “Ad bũmb ning yĩng mam sẽn doge, la bũmb ning yĩng mam sẽn wa dũniyã zugã: Yaa sẽn na yɩl n kõ kaset sɩdã zugu.” (Zã 18:37) D sã n vaees a Zeezi sẽn zãms nebã bũmb ningã, d tõe n bãnga sɩdã Wẽnnaam daabã rũndã la beoog-daarã wɛɛngẽ, la d bãng d sẽn na n maan to-to n ta Wẽnnaam yam.
13. Bũmb a yiib-n-soab sẽn kɩt t’a Zeezi wa tẽngã zug la bʋgo?
13 Bũmb a yiib-n-soab sẽn kɩt t’a Zeezi wa tẽngã zug yaa sẽn na yɩl n lebg ninsaal n kõ a vɩɩmã tɩ yɩ maoong ãdem-biisã yĩnga. (Matiye 20:28) A maana woto sẽn na yɩl tɩ d paam d mens ne yel-wẽnã d yaab a Ãdem sẽn taas tõndã. Rẽ me tõe n kɩtame tɩ d wa paam vɩɩm sẽn pa sate. Tẽn-tʋmd a Zã yeelame yaa: “Wẽnnaam nonga dũniyã hal wʋsgo, n kõ a Bi-ribl-yendã sẽn na yɩl tɩ ned ning fãa sẽn tẽed yẽ ra sãame, la a wa paam vɩɩm sẽn ka sɛtã.”—Zã 3:16.
14. a) A Zeezi sẽn ki wã poore, a le lebga bõe? b) A Zeezi maanda bõe saasẽ masã?
14 A Zeezi sẽn ki wã poore, a vʋʋgame n kẽng saasẽ n le lebg malɛk sẽn tar pãng wʋsgo. (Tʋʋma 2:32, 33) Kaoosg zugẽ, a Zeova kõ-a-la “naam, ziir la rĩungu, tɩ buud toɛy-toɛyã sẽn be tẽns toɛy-toɛyã, la sẽn gomd buud-goam toɛy-toɛyã fãa segd n sak-a.” (Dãniyɛll 7:13, 14) Wẽnnaam kɩtame t’a Zeezi lebg Rĩm sẽn tar pãnga. A yaa a Zeova saasẽ goosneema wã Rĩma. Ka la bilfu, a na n wilga a pãngã tẽngã gill zugu.
Malɛgsã yaa Wẽnnaam tʋm-tʋmdba
15. Yɛ la b naan malɛgsã, la yɩɩ wakat bʋgo?
15 Pa a Zeova ne a Zeezi bal n vɩ tɩ ninsaalbã pa ne-b ye. A Zeova naana bõn-naands a taab ninsaal nin sẽn pa tõe n yã: Yaa malɛgsã. Gabriyɛll ning sẽn gom ne a Maari wã yaa bãmb nin-yende. Malɛgsã vɩɩm pa sɩng tẽngã zug wa ninsaalbã ye. Wẽnnaam naan-b-la saasẽ tɩ kaoos wʋsg t’a yaool n wa naan ninsaalbã tẽng zugu. (Zoob 38:4-7) Malɛgsã sõor yaa tus ka tɛka.—Dãniyɛll 7:10.
Malɛgs nins sẽn yaa sakdbã pa sakd tɩ nebã waoog-b wa b sẽn waoogd Wẽnnaam to-to wã ye
16. Bõe yĩng tɩ ninsaalbã pa segd n waoog malɛgsã wa d sẽn waoogd Wẽnnaam to-to wã?
16 Malɛgs nins sẽn maand sɩd ne Wẽnnaamã pa rat tɩ d waoog-b wa d sẽn waoogd Wẽnnaam to-to wã ye. Hal naoor a yiibu, tẽn-tʋmd a Zã ra rat n waooga malɛgs wa d sẽn waoogd Wẽnnaam to-to wã, la b keoog-a lame n yeel-a yaa: “Gũusi! Ra maan woto ye! . . . Waoog Wẽnnaam!”—Vẽnegre 19:10; 22:8, 9.
17. Bõe n wilgd tɩ malɛgsã tõe n kogla Wẽnnaam nin-buiidã, la bõe yĩng tɩ woto kengd tõnd pelse?
17 Malɛgsã pa le vẽnegd b mens tẽng zug tɩ Wẽnnaam nin-buiidã tõe n yã-ba, wa b sẽn da maane, b sẽn yiis a Zeezi tẽn-tʋmdbã bãens roogẽ wã ye. (Tʋʋma 5:18, 19) Baasgo, d sã n waoogd a Zeova tɩ zems ne a Gomdã sẽn yaa Biiblã, d tõe n kɩsa sɩd tɩ Wẽnnaam malɛgsã sẽn tar pãngã na n kogla tõndo, baa ne d sẽn pa ne-bã. Biiblã yetame: “A Zeova malɛkã kogenda neb nins sẽn zoet-a wã, n fãagd-ba.” (Yɩɩn-sõamyã 34:7; 91:11) Bõe yĩng tɩ woto segd n keng tõnd pelse? Bala malɛg-wẽns n be n yaa tõnd bɛɛba, n dat n sãam tõndo!
A Sʋɩtãan yaa Wẽnnaam bɛ
18. a) Bõe yĩng tɩ malɛk a ye kɩɩs Wẽnnaam? b) B boola malɛg-kãng tɩ bõe?
18 Pa malɛgsã fãa n kell n maan sɩd ne Wẽnnaam ye. Kẽer kɩɩs-a lame. B lebga Wẽnnaam bɛɛba, la nebã sẽn be tẽng zugã bɛɛba. Sɩnga wãn tɩ wa yaa woto? Malɛgsã fãa a Zeova sẽn naanã ra yaa tɩrs la sõma. La Wẽnnaam kom-dibli-kãens sẽn yaa malɛgs sẽn zems zãngã sʋka, a yembr n wa n yik n dat tɩ nebã waoog-a wa b sẽn waoogd Wẽnnaam to-to wã, la a maana a sẽn tõe fãa n pids tʋls-wẽn-kãngã. B boola malɛg-kãng t’a Sʋɩtãana, sẽn dat n yeel tɩ “[Wẽnnaam] Kɩɩsda.” B boond-a lame tɩ Munaafɩɩk me, sẽn dat n yeel tɩ “Tẽn-kãn-neda,” bala a yagda ziri a Zeova zugu.
19. Bõe yĩng t’a Sʋɩtãan nams a Zoobe, la wãn to la a nams-a?
19 A Sʋɩtãan pirsda ninsaalbã n dat tɩ b naag-a n kɩɩs Wẽnnaam. Ges-y a sẽn maan a Zoob sẽn da maand sɩd ne Wẽnnaamã bũmb ningã. A Zoob ra tara arzɛk wʋsgo. A ra tara piis 7000, yʋgma 3000, niis 1000, la bõn-yãans 500. A ra tara kamb piig la tʋm-tʋmdb wʋsg me. Pipi, a Sʋɩtãan kʋʋ a Zoob rũmsã la a tʋm-tʋmdbã. A kɩtame me tɩ “seb-kãseng” lub roog n kʋ a Zoob kambã fãa. Rẽ poore, a Sʋɩtãan namsa a Zoob ne “nod-tãoodse, sẽn sɩng ne a na-sɩlpamã n tãag a zugã tẽn-sʋka.”—Zoob 1:3-19; 2:7.
20. a) Wãn to la Wẽnnaam keo a Zoob a sẽn maan sɩdã yĩnga? b) Baa ne a Zoob sẽn kell n maan sɩd ne Wẽnnaamã, bõe la a Sʋɩtãan tõog tɩ neb wʋsg maane?
20 Baa ne mak-toaagã, a Zoob kell n maana sɩd ne Wẽnnaam. Rẽ n so t’a Zeova maag a Zoobe, n ‘kõ-a a sẽn da tar pĩndã naoor a yiibu.’ (Zoob 42:10) A Sʋɩtãan pa tõog t’a Zoob bas a Wẽnnaamã sakr ye. La a tõog n kɩtame tɩ neb wʋsg bas Wẽnnaam tũubu. Biiblã yetame tɩ “dũniyã tõr bee wẽng soabã nugẽ.”—1 Zã 5:19
21. a) Wãn to la a Sʋɩtãan wilg t’a tʋllame tɩ d waoog-a wa d sẽn waoogd Wẽnnaam to-to wã? b) Bõe yĩng t’a Zeezi zãgs t’a kõn waoog a Sʋɩtãan wa a sẽn waoogd Wẽnnaam to-to wã?
21 A Sʋɩtãan datame tɩ d bas Wẽnnaam n waoog yẽ wa d sẽn waoogd Wẽnnaam to-to wã. A sẽn mak a Zeezi to-to sẽn dat n ta yʋʋm 2000 masã wã wilgda rẽ vẽenega. Biiblã yetame: “Sʋɩtãanã le tall-a lame [a Zeezi] n kẽng tãn-lug-lug zugu, n wilg-a dũniyã soolem toɛy-toɛyã fãa ne b ziirã, la a yeel-a yaa: “Fo sã n wõgemd n waoog maam vugr bala, m na n kõ-f-la bõn-kãensã fãa.” T’a Zeezi leok-a yaa: “Sʋɩtãana, looge! Bala b gʋlsame: ‘Yaa yãmb Wẽnnaam a Zeova la y segd n waooge, la yaa yẽ a ye bal la y segd n sak ne y sũur fãa.’”” (Matiye 4:8-10) A Zeezi ra mii a Zeova noorã vẽenega, tɩ kɩt t’a pa maan a Sʋɩtãan sẽn da rat bũmb ningã ye.
Zĩn-dãmbã yaa malɛg-wẽnse
22. Bõe la zĩn-dãmbã maan ninsaalbã?
22 Malɛgs a taab n naag a Sʋɩtãan n kɩɩs Wẽnnaam. Malɛg-kãens sẽn lebg zĩn-dãmbã yaa ninsaalbã sẽn be tẽng zugã bɛɛba. B fãa yaa wẽnse. Pĩnd wẽndẽ, b kɩtame tɩ neb kẽer lebg mugs la zoense. (Matiye 9:32, 33; 12:22) B loba neb kẽer bãas wall gãeemdo. (Matiye 17:15, 18; Mark 5:2-5) B namsa kamb menga.—Luk 9:42.
23. a) Yaa bõe la malɛg-wẽnsã rat ninsaalbã nengẽ? b) A Sʋɩtãan ne zĩn-dãmbã tudgda nebã tɩ b maand bõe?
23 Wa a Sʋɩtãana, malɛg-wẽn-kãensã me ratame tɩ d waoog-b wa d sẽn waoogd Wẽnnaam to-to wã. B pa zãgsd tɩ ninsaalbã waoog-b wa Wẽnnaam, tɩ wilgdẽ tɩ b pa sak n deeg tɩ yaa a Zeova bal la d segd n waoog ye. B pʋd n nonga waoogr a woto buudã wʋsgo, n baood rẽ, la b maandẽ tɩ b waoogd-b wa Wẽnnaam. A Sʋɩtãan ne zĩn-dãmbã tũnugda ne zãmbo, ziri yagb la rabeem n kɩtdẽ tɩ nebã waoogd-b wa Wẽnnaam. Yaa sɩd tɩ neb wʋsg pa mi tɩ b waoogda a Sʋɩtãan la a zĩn-dãmbã ye. Kẽer sã n wa bãng tɩ b tũudmã waoogda a Sʋɩtãana, lingd-b lame. Biiblã yetame yaa: “Maand nins bõn-naands pʋʋsdbã sẽn maandã, pa Wẽnnaam la b kõt ye. Yaa zĩn-dãmbã la b kõta.”—1 Korẽnt rãmbã 10:20.
24. Sɩlem-bʋg la a Sʋɩtãan tũnugd ne n belgd nebã?
24 Manesem a yembr a Sʋɩtãan ne a zĩn-dãmbã sẽn tũnugd ne n kɩtdẽ tɩ b waoogd-b yaa b sẽn yelgd ziri sẽn ki-bã wɛɛngẽ wã. Bɩ d ges Biiblã sẽn yet bũmb ning sẽn ki-bã wɛɛngẽ.
a Alkʋrãanã gomda a Zeezi rogmã sẽn yɩ yel-solemdã yelle, Surat 19 wã pʋgẽ (Maari). Surat-kãng yetame: “D tʋma d malɛkã a Maari nengẽ, malɛk sẽn tedg n lebg rao sẽn bɩ n ta. La a Maari sẽn yã-a wã a yeelame: ‘Bɩ Nimbãan-zoeer soabã fãag-m fo nugẽ! Fo sã n zoet Soaalã, bɩ f loog n bas-ma.’ La malɛkã leokame: ‘Mam yaa fo Soaalã koe-taasda, la m waame n na n kõ-f bi-ribl-sõngo.’ A Maari yeelame yaa: ‘Mam na n yɩɩ wãn n paam biiga, tɩ m pa mi raoa?’ Malɛkã leokame yaa: ‘Fo Soaalã raab la woto. Rẽ pa toog ne-a ye. Soaalã yeelame: “Bi-riblã na n yɩɩ bãnd n kõ ãdem-biisã, la a yɩ bark sẽn yit Tõnd nengẽ. Yaa Tõnd sẽn yãk noor ning la woto.”’”
