1, 2. Bõe la neb wʋsg tẽed sẽn ki-bã wɛɛngẽ?

 AFIRIK soolmã neb milyõ-rãmb tagsdame tɩ kũumã pa vɩɩmã tɛka, la tɩ yaa toeeng bal n na n kẽng dũni a to pʋgẽ. Neb wʋsg tagsdame tɩ b yaab-rãmbã sẽn ki wã yita dũni-kãngã pʋgẽ n kẽng sẽn vɩ-b tɩ ninsaalbã pa ne-bã nengẽ.

² B tẽedame tɩ yaab-rãmbã kɩɩms sɩd ket n sõngda b zagsã neb sẽn be tẽng zugã. Sã n yaa ne sẽn tẽed-b woto wã, yaab-rãmbã kɩɩms yaa zo-rãmb sẽn tar pãnga, n tõe n kɩt tɩ kood yɩ sõma, n sõng neb tɩ b vɩɩm yɩ neere, la b kogend-b ne wẽnga. B tẽedame tɩ b sã n pa ges b yelle, bɩ b sã n beeg-ba, b wata ne yel-beedo, wala bãase, naong la sabab-wẽnse.

3. Wãn to la neb kẽer waoogd b yaab-rãmbã sẽn ki wã?

³ Sẽn vɩ-bã tara yel-maandɩ b sẽn maand sẽn na yɩl n waoog yaab-rãmbã kɩɩmse, la b tall zems-n-taar ne-ba. Sẽn tɩ yɩɩd fãa, d yãta rẽ rog-n-mik yɛl nins b sẽn maand ned kʋʋrẽ la a mumbã sasa, wala makre zĩnd kʋ-yir tɩ beoog vẽegã sasa. B waoogda b yaab-rãmbã sẽn ki wã ne manesem a taab me. Wala makre, neb kẽer sã n na n yũ rãam, b rengd n kɩrga bilf tẽng yaab-rãmbã yĩnga. Sẽn paase, b sã n segl rɩɩb n sa, b kellda rɩɩbã rʋkã pʋgẽ tɩ yaab-rãmbã sã n wa bɩ b yã bũmb n dɩ.

4. Bõe la neb wʋsg tẽed sɩɩgã wɛɛngẽ?

⁴ Neb a taab tagsdame tɩ sẽn vɩ-bã tara sɩɩs sẽn pa kiidi, sẽn ket n vɩ yĩngã kũum poore. Ned sã n maana neer a vɩɩmã pʋgẽ, b yetame t’a sɩɩgã kẽngda arzãna, la a sã n maana wẽnga, b yetame t’a sɩɩgã kẽngda bugmẽ. Naoor wʋsgo, nebã rɩkda rẽ n kalem ne rog-n-mikã rãmb sẽn tẽed bũmb ninsã. Wala makre, b sã n na n togs radio pʋgẽ tɩ b na n maana mees kiid yĩnga, b mi n yetame me t’a soab “kẽnga dũni a to pʋgẽ” bɩ “a kẽnga a yaab-rãmbẽ.” Nebã tẽeda woto, b sẽn tagsd tɩ ninsaal tara sɩɩg sẽn ket n vɩ kũumã poorã yĩnga. La bõe la Biiblã yet rẽ wɛɛngẽ?

5, 6. Sã n yaa ne Biiblã, sɩɩg yaa bõe?

⁵ Biiblã wilgdame tɩ sɩɩg pa bũmb sẽn be ned pʋgẽ, la tɩ yaa nedã menga. Wala makre, Wẽnnaam sẽn wa n naan a Ãdmã, a “lebga nin-vɩɩga bɩ [sɩ-vɩɩga.]” (Sɩngre 2:7; ges-y vẽnegrã) A Ãdem pa paam sɩɩg ye, a ra yaa sɩɩga, ninsaan-tõr bũmb sẽn pa paoog ye.

⁶ Rẽ n kɩt tɩ Biibl-dãmb kẽer lebgd Ebre gom-bil ning sẽn yaa “sɩɩgã” n ningd “yõore,” “bõn-naandga,” wall “neda.” B boola kamb b sẽn dog tɩ sɩɩse. (Sɩngre  46:18) Sɩɩs tõe n dɩɩme. (Maan-kʋʋre 7:20) Sɩɩs tõe n loee noore. (Yɩɩn-sõamyã 35:13) Sɩɩs tõe n yãbame la b koms raoodo. (Zeremi 13:17; Zonas 2:7) B tõe n zuka sɩɩga, n dig-a, la b sog-a bãense. (Tõodo 24:7; Yɩɩn-sõamyã 7:5; 105:18) Biibl-dãmb kẽer lebga Ebre wã gom-bil tɩ “sɩɩg” vɛrse-kãensã pʋsẽ, tɩ Biibl-dãmb a taab yet tɩ “yõore,” “bõn-naandg” wall “neda.” Gom-bi-kãensã fãa võorã yaa yembre.

7. Biiblã vɛrse-bʋs n wilgd tɩ sɩɩg tõe n kiime?

⁷ Sẽn mik tɩ sɩɩgã yaa nedã mengã, ned sã n ki yaa sɩɩgã n ki. Biibl-dãmb kẽer pʋgẽ, Ezekɩyɛll 18:4 yetame yaa: “Sɩɩg ning sẽn maand yel-wẽna, yaa sɩ-kãng n na n ki.” Sẽn paase, Tʋʋm 3:23 yetame: “Ned ning fãa [bɩ sɩɩg ning fãa] sẽn pa na n kelg No-rɛɛs-kãnga, Wẽnnaam na n sãam-a-la zãng nin-buiidã sʋka.” Woto wilgdame tɩ sɩɩg pa bũmb sẽn vɩ yĩngã kũum poor ye.

8. Vɩɩm pãngã sẽn be ninsaalbã pʋgẽ wã yaa bõe?

⁸ Vɩɩm pãngã yaa toor ne sɩɩgã. Yaa vɩɩm pãngã n sõngd ninsaalbã tɩ b tʋmd b tʋʋmã. D tõe n dɩka vɩɩm pãngã n mak ne kuurã. Kuurã tõe n kɩtame tɩ vãntɩlatɛɛr wall firgo tʋme, la kuurã wã a yen-yen pa tõe n kõ pemsem bɩ a maag bũmb ye. Woto me, vɩɩm pãngã kɩtdame tɩ tõnd neẽ, n wʋmdẽ la d tagsdẽ. La a pa tõe n maan bõn-kãensã baa a yembr tɩ pa tũ ne ninã, tʋbã bɩ kalkõtã maasem ye. Yaa woto yĩng la Biiblã sẽn gom ninsaal yelle, n yeel yaa: “Ninsaal vʋʋsmã sã n wa yõke, a lebda tẽn-gãongẽ wã. Baraar bala, a tagsa wã satame.”—Yɩɩn-sõamyã 146:4.

9. Bõe la sɩɩgã la vɩɩm pãngã pa maande?

⁹ Rẽnd sã n yaa ne Biiblã, sɩɩgã, bɩ vɩɩm pãngã pa yit yĩngã kũumẽ wã n tɩ vɩ Wẽnnaam nengẽ bɩ zĩig a to ye.

10. Bõe la Biiblã yet sẽn ki-bã halhaal wɛɛngẽ?

¹⁰ Rẽ wã, sẽn ki-bã lebgda bõe? Sẽn mik tɩ yaa a Zeova n naan ninsaalbã, yẽ n mi bũmb ning sẽn maand tõndo, d sã n wa ki. A Gomdã wilgdame tɩ sẽn ki-bã pa vɩ, tɩ b pa tõe n wʋme, n yã, n gom bɩ b tags bũmb baa a yembr yell ye. Biiblã yetame:

•   “Sẽn ki-bã pa mi baa fʋɩ ye.”—Koɛɛg soaba 9:5.

•   “B nonglmã, b kisgrã la b sũ-kiirã zoe n saame.”—Koɛɛg soaba 9:6.

•   “Tʋʋmd bɩ magbo, wall bãngr bɩ yam pa be Yaoogẽ wã, zĩig ning fo sẽn dabdã ye.”—Koɛɛg soaba 9:10.

11. A Ãdem sẽn maan yel-wẽndã poore, bõe la a Zeova yeel-a?

¹¹ Tags-y bũmb ning Biiblã sẽn yet tõnd pipi yaab a Ãdem wɛɛngẽ wã. A Zeova naana a Ãdem ne “tẽngã tom.” (Sɩngre 2:7) A Ãdem sã n da sakẽ a Zeova noorã, a ra na n vɩɩmda wakat sẽn kõn sa ne sũ-noog tẽngã zugu. La a Ãdem kɩɩsa a Zeova noorã t’a sɩbgrã yɩ kũum. A sẽn ki wã, a kẽnga yɛ? Wẽnnaam yeel-a lame: ‘Fo . . . na n leba tẽngã tomẽ, sẽn yaa tẽngã tomẽ la b yiis foomã yĩnga. Bala fo yaa tom, la fo na n leba tomẽ wã.’—Sɩngre 3:19.

12. Bõe n paam a Ãdem a kũumẽ wã?

¹² A Ãdem da bee yɛ, a Zeova sẽn da wa n nan pa naan-a ne tẽngã tomã? A ra pa be zĩig baa a ye. A ra kae ye. Rẽnd a Zeova sẽn wa n yeel a Ãdem t’a na n ‘leba tẽngã tomẽ’ wã, a ra rat n yeelame t’a Ãdem na n yɩɩ wa tẽngã tom, n pa vɩ ye. A Ãdem pa tɩ vɩ ne sẽn be-b saasẽ tɩ ninsaalbã pa ne-bã ye. A pa ‘babs’ yaab-rãmb ye. A pa kẽng saasẽ, a pa kẽng bugmẽ. B sẽn wa n da pa naan a Ãdmã t’a ra kae ye. A sẽn wa n ki wã me, a ka le be yɛs ye.

13. Ninsaal bɩ rũng sã n ki, bõe n paamd-ba?

¹³ Yaa woto me ne ninsaalb a taabã bɩ? Yaa woto bal kɛpɩ. Biiblã yetame yaa: “[Ninsaalbã ne rũmsã fãa] rabda zĩ-yɛnga. B fãa yii tẽng tomẽ, la b fãa lebda tomẽ.”—Koɛɛg soaba 3:19, 20.

14. Bõe la Wẽnnaam pʋlem sẽn ki-bã wɛɛngẽ?

 ¹⁴ Biiblã pʋlmame tɩ Wẽnnaam na n wa vʋʋga sẽn ki-bã tɩ b vɩɩmd arzãn pʋgẽ, tẽngã zug ka. (Zã 5:28, 29; Tʋʋma 24:15) La rẽ yaa sẽn nan wate. Nananda, b kiime tɩ yaa wa b sẽn gõe. (Zã 11:11-14) D pa segd n zoe-ba, bɩ n waoog-ba, bala b pa tõe n sõng tõnd wall b maan-d wẽng ye.

15, 16. Wãn to la a Sʋɩtãan makd n na n kɩt tɩ nebã tẽ tɩ sẽn ki-bã ket n vɩɩme?

¹⁵ Nebã sẽn tẽed tɩ ninsaal sɩd pa kiidã yaa ziri a Sʋɩtãan Munaafɩɩkã sẽn yelge. Sẽn na yɩl tɩ nebã tẽ ziri-kãngã, yẽ ne a zĩn-dãmbã makdame n na n kɩt tɩ nebã tẽ tɩ yaa sẽn ki-bã kɩɩms n wat ne bãasã la zu-loees a taabã. Yaa sɩd tɩ yaa zĩn-dãmbã n wat ne zu-loees sãnda. La zu-loees kẽer pa yit zĩn-dãmbã nengẽ ye. Sã n yaa ne sẽn ki-bã yẽ, b pa tõe n maan tõnd wẽng ye.

¹⁶ La zĩn-dãmbã tũnugda ne bũmb a to n kɩtdẽ tɩ nebã tagsdẽ tɩ Biiblã sẽn yet bũmb ning kũumã wɛɛngẽ wã yaa ziri. B belgda nebã tɩ b tẽed tɩ b yãa neb sẽn ki bɩ b goma ne-ba. Zĩn-dãmbã tũnugda ne vẽnegr toor-toore, zãmsdo, bagb la manesem a taab n maand woto. La pa sẽn ki-bã la nebã sẽn gomd ne wã ye. Yaa ne zĩn-dãmb sẽn maand tɩ yaa wa bãmb la neb nins sẽn ki wã. Yaa woto yĩng la a Zeova sẽn kis bagbã la neb nins sẽn sogsd sẽn ki-bã.—Tõodo 18:10-12; Zakari 10:2.