1. Tõnd sã n “kolg Wẽnnaam,” bõe la a na n maane?

 A ZEOVA nonga neb nins sẽn tũud-a wã. Yãmb sã n tũ a Zeova, a na n ning-y-la bark masã menga, la beoog sẽn wate. Biiblã yetame yaa: “Bɩ y kolg Wẽnnaam, tɩ yẽ me na n kolga yãmba.”—Zak 4:8.

2. Bõe la d tõe n maan n kolg Wẽnnaam, la d sã n maan dẽ, Wẽnnaam manesem na n yɩɩ wãn ne d pʋʋsgã?

² Y sã n dat n kolg Wẽnnaam, y segd n zãmsa a Gomdã la y tũ bũmb nins y sẽn zãmsdã. Yãmb sã n pʋʋsd a Zeova tɩ zemsd ne a raabã, a na n deega y pʋʋsgã. Tẽn-tʋmd a Zã yeelame: “Ad bas-m-yam ning tõnd sẽn tar ne Wẽnnaamã: Yaa tɩ sẽn wa n yaa bũmb ning fãa la d kos tɩ zems ne a raabã, a kelgda tõndo. La tõnd sã n miẽ t’a kelgda tõnd bũmb ning fãa tõnd sẽn kotã wɛɛngẽ, d miime me tɩ d na n paama bũmb nins d sẽn kotã, d sẽn kos bõn-kãensã yĩnga.”—1 Zã 5:14, 15.

3-7. D maanda wãn n paam yam ning Wẽnnaam sẽn kõtã, la wãn to la a tõe n naf tõndo?

³ Sẽn paase, y sã n kolg Wẽnnaam, a na n kõ-y-la yam tɩ y tõog n mao ne y zu-loeesã. Biiblã yetame yaa: “Ned sã n be yãmb sʋkã tɩ yam paoog-a bɩ a kell n kos Wẽnnaam.”—Zak 1:5.

⁴ Wãn to la yam ning Wẽnnaam sẽn kõtã tõe n sõng yãmba? Tõe n sõnga yãmb tɩ y bãng bũmb nins sẽn pa noom a Zeova wã. Y leb n tõe n bãnga bũmb ning sẽn kɩt tɩ bõn-kãens yaa wẽnsã, la y sẽn tõe n maan n lak y meng ne-bã. Bãngr a woto tõe n kɩtame tɩ y gil zu-loees wʋsg neb a taabã sẽn paamde. Wala makre, Wẽnnaam nin-buiidã sẽn tũud a sẽn sagend-b tɩ b zãag b mens ne yoobã, kɩtdame tɩ b gind pʋs rɩkr sẽn pa tũ ne b raabo, taoor bãase, la kãadem sẽn pa tar sũ-noog bɩ kãadem kaoobo.

⁵ Wãn to la yam ning Wẽnnaam sẽn kõtã le tõe n naf yãmba? Tõe n sõng-y lame tɩ y vɩɩmã tall barka. Tõe n sõng-y lame tɩ y bãng n yãk yam yɛl kẽer wɛɛngẽ, wala ligdã zãabo. Y na n bãng n yãka bũmb kẽer sẽn tar yõod y sẽn tõe n maane, la y zãag y meng ne bũmb kẽer yõod sẽn pa waooge.

⁶ Yam ning Wẽnnaam sẽn kõtã leb n tõe n sõngame tɩ yãmb ne neb a taabã zemsd taaba. Yãmb zakã rãmb tõe n paama sũ-noogo. Y tõe n paama zo-rãmb hakɩɩka, la y paam me tɩ baa neb nins sẽn pa tũud Wẽnnaamã nand-yã.

⁷ Sẽn paase, y sã n tar yam ning Wẽnnaam sẽn kõtã, y sẽn tagsd to-to vɩɩmã zugã na n yɩɩ sõma n paase. Yam-kãng na n sõng-y lame tɩ y mao ne zu-loeesã la sũ-sãamsã. Y na n talla tagsg sẽn zems beoog-daarã wɛɛngẽ me. Rẽ na n kɩtame tɩ y yamã gãand bãane, la paas y yĩnsã laafɩ.—Yel-bũnã 14:30; Ezayi 48:17.

8. Y sã n tũud Wẽnnaam, bõe la y pa na n zoe?

⁸ Yãmb sã n tũud Wẽnnaam sɩd-sɩdã, y pa na n yɛɛs bũmb nins sẽn kẽesd sẽn pa tũud-b Wẽnnaamã rabeemã ye. Wala makre, y sẽn mi tɩ sẽn ki-bã pa mi bũmbã, y pa na n zoe-b ye. Y sẽn kɩs sɩd tɩ Wẽnnaam  na n wa vʋʋga sẽn ki-bã, y pa zoet kũum ye. La y sẽn mi tɩ Wẽnnaam pãngã yɩɩda bũmb fãa wã, y pa zoet tɩt rãmb ye.—Zã 8:32.

9-11. Ãnd dãmb n na n vɩɩmd arzãnã pʋgẽ, la ãnd dãmb n pa na n vɩɩmd a pʋgẽ?

⁹ Yãmb sã n kolg Wẽnnaam, y pa na n maan rabeem beoog-daarã wɛɛngẽ ye. D zoe n yãame tɩ Biiblã pĩnd n goma yɛl nins d sẽn ne tẽngã zug rũndã-rũndã wã wʋsg yelle. A Zeova yeelame tɩ bõn-kãensã sẽn be wã yaa wakat bilf yĩnga. Wẽnnaam Rĩungã na n kɩtame tɩ tẽngã lebg arzãn ka la bilfu.—Luk 21:10, 11, 31; 23:43.

¹⁰ Yaa neb nins sẽn pẽnegd a Zeova la sẽn maand a raabã bal n na n vɩɩmd arzãnã pʋgẽ. Biiblã yetame yaa: “Keta bilf bala, tɩ nin-wẽnsã pa na n le beẽ ye. Fo na n gesa zĩig ning b sẽn da be wã, la fo pa na n yã-b ye. La sik-m-mens rãmbã na n sooga tẽngã. B na n paama sũ-noog wʋsgo, laafɩ wã sẽn na n yɩ wʋsgã yĩnga.”—Yɩɩn-sõamyã 37:10, 11.

¹¹ Neb nins sẽn tõdg fasɩ tɩ b kõn sak Wẽnnaam noyã sẽn yaa tɩrsã na n bõna b vɩɩmã wakat sẽn kõn sa yĩnga. (2 Tesalonik rãmbã 1:8, 9) B pa na n le beẽ ye. B na n naaga a Sʋɩtãan ne a zĩn-dãmbã n ki wakat fãa yĩnga. (Vẽnegre 20:10, 14) La neb nins sẽn baood n bãngd a Zeova la b maand a raabã na n paama sũ-noog tẽngã sẽn na n lebg arzãnã pʋgẽ.

12. Bõe la Biiblã yet beoog-daarã wɛɛngẽ?

¹² A Zeova pʋlma neb nins sẽn nong-a wã bũmb sẽn be yamleoog wʋsgo! Ad a Gomdã sẽn yet vɩɩmã sẽn na n yɩ to-to arzãnã pʋgẽ wã wɛɛngẽ:

•   Rɩɩb wʋsg na n zĩndame: “Kood [bɩ rɩɩb] wʋsg na n zĩnda tẽngã zugu. Tãensã zut na n pida ne koodo.”—Yɩɩn-sõamyã 72:16.

•   Rot sẽn yaa sõma: “Bãmb na n mee rot n zĩnd b pʋsẽ.”—Ezayi 65:21.

•   Tʋʋm sẽn be yamleoogo: ‘Mam sẽn yãk b rãmbã na n dɩɩ b nus-tʋʋmã yõod tɩ pidi. Bãmb pa na n tʋm n nams zaalem yĩng ye.’—Ezayi 65:22, 23.

•   Bãasã pa na n zĩnd ye: “Tẽngã ned baa a ye pa na n yeel t’a ka laafɩ ye.”—Ezayi 33:24.

•   Komslmã na n saame: “Wakat kãnga, zoens nin na n pukame, la wʋms tʋb na n yoosame. Wakat kãnga, põor na n yɩk n tĩimsa wa walga, la muk zɩlemd na n lakame n kaas ne sũ-noogo.”—Ezayi 35:5, 6.

•   Toogo, sũ-sãang la kũum pa na n zĩnd ye: “[Wẽnnaam] na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”—Vẽnegre 21:4.

•   Zabã na n saame: “[Wẽnnaam] kɩtdame tɩ zab sa dũniyã gill fãa.”—Yɩɩn-sõamyã 46:10.

•   Vɩɩm sẽn pa sate: “Nin-tɩrsã na n sooga tẽngã. B na n vɩɩmda a zug wakat sẽn kõn sa.”—Yɩɩn-sõamyã 37:29.

13. Ãnda bal n tõe n kɩt tɩ tẽngã lebg arzãna, la bõe yĩnga?

¹³ Ninsaal pa tol n tõe n maan bõn-kãensã ye. La a Zeova tara tõog n na n maan bũmb ning fãa a sẽn yeel t’a na n maaname. Bũmb pa tõe n gɩdg-a t’a pa maan a sẽn dat n maan ye. Biiblã yetame yaa: “Bũmb pa be Wẽnnaam sẽn pa tõe ye.”—Luk 1:37.

14. Wãn to la y tõe n dɩk vɩɩm sẽn pa satã sore?

¹⁴ A Zeova tũnugda ne a Kaset rãmbã n kɩtdẽ tɩ zĩig fãa neb tõe n “tũ rigno-sẽkã n kẽ,” la b kẽn sor ning sẽn tar n dabd vɩɩm sẽn pa sat zĩigẽ wã zugu. Wẽnd na kɩt tɩ y zĩnd neb nins sẽn sak boollã ne sũ-noogã sʋka. Wẽnd na kɩt tɩ y kẽ tũudum hakɩɩkã pʋgẽ, n wa paam a Zeova barkã wakat sẽn kõn sa yĩnga!—Matiye 7:13, 14.