SAK 17

A Zeezi yaa nin-bʋg buudu?

ÉCOUTER EN

D sã n bao n bãng bũmb nins a Zeezi sẽn yeele, la a maan a sẽn wa n be tẽngã zugã, d bãngda a sẽn yaa ned ning buudu, tɩ rẽ sõng-d tɩ d pẽneg yẽnda ne a Ba a Zeova n paase. A Zeezi zʋg-sõma kẽer sẽn be yamleoog la bʋse? La wãn to la d tõe n dɩk a togs-n-taar d vɩɩmã pʋgẽ?

1. Bõe yĩng tɩ d tõe n yeel t’a Zeezi yaa wa a Ba wã?

A Zeezi zĩnda ne a Ba wã saasẽ na maan yʋʋm milyaar-dãmba, n da get a sẽn maan bũmb ninsã, n dɩk yam a nengẽ. Rẽ kɩtame t’a rɩkd a Ba wã togs-n-taar kɛpɩ, a sẽn tagsd to-to la a sẽn maand fãa pʋgẽ. (Karm-y Zã 5:19.) Sɩd me, a Zeezi tolg n dɩkda a Ba wã togs-n-taare. Rẽ n so t’a yeel yaa: “Ned ning sẽn yã maam, a yãa Ba wã me.” (Zã 14:9) Y sã n bao n bãng a Zeezi sẽn da yaa ned ning buudã sõma, y paamd n bãnga a Zeova me sõma. Wala makre, a Zeezi sẽn da kʋmd nebã nimbãaneg to-to wã wilgda a Zeova sẽn kʋmd yãmb me nimbãaneg to-to wã.

2. Wãn to la a Zeezi wilg t’a nonga a Zeova?

A Zeezi yeelame yaa: “Sẽn na yɩl tɩ dũniyã bãng tɩ mam nonga Ba wã, mam maanda wa Ba wã sẽn yeel maam tɩ m maanã bala.” (Zã 14:31) A Zeezi sẽn wa n be tẽngã zugã, a wilgame t’a nonga a Ba wã ne a sũur fãa, n da sakd-a baa sã n wa pa nana. A Zeezi sẽn nong a Ba wã me kɩtame t’a ra nong n gomd a yelle, la a sõngd neb a taabã sẽn na yɩl tɩ b paam zood ne-a.—Zã 14:23.

3. Wãn to la a Zeezi wilg t’a nonga nebã?

Biiblã pʋgẽ, b yetame t’a Zeezi nonga ninsaalbã hal wʋsgo. (Yel-bũnã 8:31) A sẽn da kengd nebã raoodo, la a mongd a meng n sõngd-bã wilgdame t’a sɩd nonga ninsaalbã. A maana yel-soalem sẽn wilg t’a tara tõogo, la sẽn wilg me t’a kʋmda nebã nimbãanega. (Mark 1:40-42) A ra maanda nebã fãa neere, n ka bakdẽ ye. A goamã ra belsda sũ-tɩrs rãmbã fãa sẽn da kelgd-a wã, la sõngd-b tɩ b saagd manegre. A Zeezi sẽn nong ninsaalbã fãa wã kɩtame t’a sak n na n namse, la a ki b yĩnga. La yaa neb nins sẽn tũud bũmb nins a sẽn zãms-bã la a nong n tɩ yɩɩda.—Karm-y Zã 15:13, 14.

D BAO N BÃNG N PAASE

D bao n bãng a Zeezi sẽn yaa ned ning buudã n paase, la d ges d sẽn tõe n dɩk a togs-n-taar to-to nonglmã wɛɛngẽ, la d yɩ kõatba.

4. A Zeezi nonga a Ba wã

A Zeezi mak-sõngã sõngda tõnd tɩ d bãng d sẽn tõe n wilg tɩ d nonga Wẽnnaam to-to. Karm-y Luk 6:12 la Zã 15:10; 17:26. Vɛrse fãa kareng poor bɩ y leok sokrã:

Wãn to la d tõe n dɩk a Zeezi togs-n-taare, n wilg tɩ d nonga a Zeova?

A Zeezi wilgame t’a nonga a saasẽ Ba wã, n da wae n pʋʋsd-a

5. A Zeezi kʋmda neb nins sẽn dat sõngrã nimbãanega

A Zeezi ra lʋɩɩsda neb a taabã raab taoore. Baa a sã n da yɛ, a ra rɩkda a sẽkã la a pãngã n sõngd nebã. Karm-y Mark 6:30-44, tɩ rẽ poor bɩ y leok sogsgã:

Kiba-kãngã pʋgẽ, bõe la a Zeezi maan tɩ wilgdẽ t’a taabã yell pak-a lame?—Ges-y vɛrse 31, 34, 41, la 42.
Bõe n kɩt t’a Zeezi ra sõngd nebã?—Ges-y vɛrse 34.
Sẽn mik t’a Zeezi rɩkda a Zeova togs-n-taarã, bõe la woto fãa sõngd tõnd tɩ d bãng a Zeova zugu?
Togs-y bũmb kẽer d sẽn tõe n dɩk a Zeezi togs-n-taar n maane, n wilg tɩ d taabã yell pak-d lame?

6. A Zeezi yaa kõata

A Zeezi ra yaa kõata, baa ne a sẽn da pa tar bũmb wʋsgã. A sagla tõnd me tɩ d yɩ kõatba. Karm-y Tʋʋm 20:35, tɩ rẽ poor bɩ y leok sokrã:

A Zeezi yeelame tɩ bõe n tõe n kɩt tɩ d paam sũ-noogo?

Ges-y VIDEO wã, tɩ rẽ poor bɩ y leok sokrã.

VIDEO: “Kũun wata ne sũ-noogo”—B sẽn kʋrge (4:00)

Togs-y bũmb kẽer d sẽn tõe n maan n wilg tɩ d yaa kõatba, baa d nugã pa zãade.

Yãmb mime bɩ?

Biiblã pʋgẽ, b yetame tɩ d segd n pʋʋsda a Zeova, a Zeezi yʋʋrã maasem yĩnga. (Karm-y Zã 16:23, 24.) D sã n maand woto, d wilgdame tɩ d sũur nooma ne a Zeezi sẽn maan bũmb ning sẽn na yɩl n sõng-d tɩ d lebg a Zeova zo-rãmbã.

NEB KẼER SẼN YETE: “Wẽnnaam toog kae ne tõnd sẽn namsdã ye.”

Sẽn mik t’a Zeezi rɩkda a Ba wã togs-n-taarã, wãn to la a sẽn maand bũmb ninsã wilgd tɩ tõnd yell paka a Zeova?

KƲMSGO

A Zeezi nonga a Zeova la a nong ninsaalbã. Sẽn mik t’a Zeezi yaa wa a Ba wã, d sã n bao n bãng a Zeezi sõma, na n sõng-d lame tɩ d bãng a Zeova me sõma.