Ned yãmb sẽn nong wʋsg zoe n maana kaalem bɩ? Sũ-sãang a woto wakate, y tõe n sokda y meng yaa: ‘Bõe n be ned kũum poore? D na n le wa yãa d neb nins sẽn maan kaalmã bɩ?’ Sag-kãngã ne sẽn pʋgd-a wã pʋgẽ, d na n yãa b sẽn leokd sogs-kãensã to-to Biiblã pʋgẽ, hal tɩ kengd raoodo.

1. Bõe n be ned kũum poore?

A Zeezi maka kũumã ne gõeem. Ned sã n gõe tamm, a pa le mi bũmb ning sẽn maandã ye. Bõe n kɩt tɩ kũum wõnd gõeem? Ned sã n ki, a pa le mi zabdem ye. Baa fʋɩ pa namsd-a ye. Biiblã pʋgẽ, b yetame: “Sẽn ki-bã ka leb n mi bũmb” ye.—Karm-y Koɛɛg soab 9:5.

2. D sã n mi sɩdã kũumã wɛɛngẽ, wãn to la nafd tõndo?

Neb wʋsg zoeta kũum, la b zoet sẽn ki-bã menga! La y sã n bãng bũmb ning b sẽn yet kũumã wɛɛngẽ Biiblã pʋgẽ wã, tõe n kenga y raoodo. A Zeezi yeelame: “Sɩdã na n yiisa yãmb yembdẽ.” (Zã 8:32) Tũudum kẽer yetame tɩ ninsaal tara sɩɩg sẽn pa kiidi. La pa woto la b yet Biiblã pʋgẽ ye. Dẽnd ned baa a ye pa namsd a kũum poor ye. Sẽn paase, sẽn ki-bã sẽn pa mi bũmbã yĩnga, b pa tõe n maan-d wẽng ye. D pa segd n waoog sẽn ki-bã, wall d maan bũmb sẽn na yɩl tɩ b sũur da yik ne-d ye. D pa segd n pʋʋs b yĩng me ye.

Neb kẽer yetame tɩ b tõe n goma ne sẽn ki-bã. La woto yaool n yaa bũmb sẽn pa tõe. Wa d sẽn zoe n yã wã, sẽn ki-bã “ka leb n mi bũmb” ye. Sɩd-sɩda, neb nins sẽn tagsd tɩ b gomda ne b neb sẽn maan kaalmã gomda ne zĩn-dãmb sẽn maand wa b yaa neb nins sẽn ki wã. Dẽnd d sã n mi sɩdã kũumã wɛɛngẽ, kogenda tõnd ne zĩn-dãmbã. A Zeova yeela tõnd tɩ d ra mak n gom ne sẽn ki-bã, bala a miime tɩ d sã n gom ne zĩn-dãmbã, pa na n yɩ sõma ne-d ye.—Karm-y Tõod 18:10-12.

3. B sẽn sɩd yet bũmb ning sẽn ki-bã wɛɛngẽ Biiblã pʋgẽ

Dũniyã gill zugu, nebã tẽeda bũmb toor-toor sẽn ki-bã wɛɛngẽ. Yaa vẽeneg tɩ b sẽn tẽed bũmb ninsã fãa pa tõe n yɩ sɩd ye.

• Yãmb babgẽ wã, bõe la nebã tẽed sẽn ki-bã wɛɛngẽ?

 4. D sã n bãng sɩdã kũumã wɛɛngẽ, na n naf-d lame

D sã n bãng sɩdã kũumã wɛɛngẽ, na n sõng-d lame tɩ d pa le zoet sẽn ki-bã ye. Karm-y Koɛɛg soab 9:10, tɩ rẽ poor bɩ y leok sokrã:

• Sẽn ki-bã tõe n maan-d-la wẽng bɩ?

D sã n kɩs sɩd ne b sẽn yet bũmb ning kũumã wɛɛngẽ Biiblã pʋgẽ wã, na n sõng-d lame tɩ d bãng tɩ b sẽn yet tɩ d segd n maana bũmb tɩ sẽn ki-bã sũur da yik ne-dã, wall tɩ d segd n waoog-b lame wã pa sɩd ye. Karm-y Ezayi 8:19 ne Vẽnegr 4:11, tɩ rẽ poor bɩ y leok sokrã:

• Sã n yaa ne yãmba, a Zeova tagsg yaa wãn ne ned sẽn waoogd ned sẽn ki, bɩ sẽn baood a sõngre?

5. D sã n bãng sɩdã kũumã wɛɛngẽ, belsda tõndo

B yeela neb wʋsg tɩ b sã n wa ki, b na n sɩbg-b lame, bõn-wẽns nins b sẽn da maanã yĩnga. La d sã n bãng tɩ ned baa a ye pa namsd a kũum poore, baa sẽn maan-b bõn-wẽns wʋsgã, kengda raoodo. Karm-y Rom dãmb 6:7, tɩ rẽ poor bɩ y leok sokrã:

• Sã n mik tɩ ned sẽn ki paamdame tɩ b bas a yel-wẽnã taal wa b sẽn togs Biiblã pʋgẽ wã, yãmb tagsdame tɩ ned sẽn ki namsda a yel-wẽn yĩng bɩ?

D sã n bãngd a Zeova n paasdẽ, d manegd n kɩsa sɩd t’a pa namsd sẽn ki-bã ye. Yaa bũmb a Zeova sẽn pa tol n tõe n maane. Karm-y Tõod 32:4 la 1 Zã 4:8, tɩ rẽ poor bɩ y leok sogsgã:

• Yãmb tagsdame tɩ Wẽnnaam ning yell b sẽn gomd vɛrse-kãensã pʋsẽ wã na n sakame tɩ b nams sẽn ki-bã sɩda?

• Yãmb tagsdame tɩ f sã n bãng sɩdã kũumã wɛɛngẽ, kengda raood bɩ? Bõe yĩnga?

 KƲMSGO

Ned sã n ki, a pa le mi baa fʋɩ ye. Sẽn ki-bã pa namsde, b pa tõe n maan sẽn vɩ-bã wẽng me ye.

Lebg-n-gese

• Ned sã n ki, a le mii bũmb bɩ?

• D sã n bãng sɩdã kũumã wɛɛngẽ, wãn to la nafd tõndo?

• D sã n bãng sɩdã kũumã wɛɛngẽ, wãn to la belsd tõndo?