SAK 47
Yãmb segl n saame n tõe n deeg lisg bɩ?
Biiblã zãmsg sõnga yãmb tɩ y bãng bũmb wʋsg a Zeova zugu. Tõe tɩ y zoe n toeema bũmb kẽer sẽn na yɩl n tũ y sẽn bãng bũmb ninsã. La tõe tɩ bũmb n be n gɩdgd yãmb tɩ y pa rat n dɩk y meng n kõ a Zeova n deeg lisg ye. Sag-kãnga pʋgẽ, d na n yãa yɛl kẽer sẽn tõe n wa gɩdg-y tɩ y pa reeg lisgu, la y sẽn tõe n maan to-to n welg-ba.
1. Hal sẽn ta zĩ-bʋg la y segd n bãng Biiblã sẽn yetã, n yaool n deeg lisgu?
Sẽn na yɩl n deeg lisgu, y segd n paama “bãngr hakɩɩk sɩdã zugu.” (1 Tɩmote 2:4) La rẽ pa rat n yeel tɩ y segd n bãnga sogsg nins fãa nebã sẽn sokd yãmb Biiblã zugã leoore, n yaool n deeg lisg ye. Baa kiris-neb nins sẽn deeg lisg hal sẽn kaoosã ket n zãmsda Biiblã n bãngd n paasdẽ. (Kolos rãmbã 1:9, 10) La bũmb kẽer la y segd n bãng Biiblã pʋgẽ tɩlɛ n yaool n wa tõog n deeg lisgu. Tigingã kãsem-dãmb na n sõng-y lame tɩ y bãng y sẽn zoe mi bũmb ninsã sã n seka y na reeg lisgu.
2. Bõe la y segd n deng n maan n yaool n wa tõog n deeg lisgu?
Nand tɩ y wa reeg lisgu, y segd n ‘teka yam n kos sugri, la y toeeme.’ (Karm-y Tʋʋm 3:19) Woto rat n yeelame tɩ y sũur segd n sãama wʋsg ne yel-wẽnd ning fãa y sẽn maane, la y kos a Zeova t’a kõ-y sugri. Y segd n yãka yam ne y sũur fãa me n na n zãag y meng ne wẽnga, la y vɩɩmd tɩ zems ne Wẽnnaam daabã. Sẽn paase, y segd n kẽnda tigissã, la y lebg koe-moond sẽn pa reeg lisgu, n naagd tigingã neb n moond koɛɛgã.
3. Bõe yĩng tɩ y pa segd n bas tɩ rabeemã gɩdg-yã?
Kẽer yɛɛsda b pa na n wa tõog n pids b sẽn pʋlem a Zeova bũmb ningã. Togs sɩdã, y na n mi n kongame, wa pĩnd wẽndẽ pagb la rap sẽn da tũud a Zeova tɩ Biiblã gomd b yellã. La a Zeova pa baood tɩ neb nins sẽn tũud-a wã maand tɩ zemsd zãng wakat fãa ye. (Karm-y Yɩɩn-sõamyã 103:13, 14.) Y sã n maand y sẽn tõe fãa, a sũur noomame! A na n sõng-y lame. Sɩd me, a Zeova yeelame tɩ d bas d yam tɩ baa fʋɩ ‘pa na n tõog n welg tõnd ne yẽ nonglmã ye.’—Karm-y Rom dãmb 8:38, 39.
D BAO N BÃNG N PAASE
Y sã n bao n bãng a Zeova sõma n paase, la y sak t’a sõng-yã, y na n tõog n welga yell ning fãa sẽn tõe n gɩdg-y tɩ y pa reeg lisgã. Bɩ d gom rẽ yelle.
4. Bao-y n bãng-y a Zeova sõma n paase
Hal sẽn ta zĩ-bʋg la y segd n bãng a Zeova n yaool n deeg lisgu? Y segd n bãng-a-la sõma, hal tɩ sek y na nong-a la y rat n ta a yam. Ges-y VIDEO wã, tɩ y na n yãa Biibl karen-biis sẽn be dũniyã gill zug sẽn maan dẽ to-to. Rẽ poor bɩ y leok sogsgã.
-
Biiblã pʋgẽ, yaa bõe n sõng neb kẽer tɩ b segl b mens n wa tõog n deeg lisgu?
Karm-y Rom dãmb 12:2, tɩ rẽ poor bɩ y leok sogsgã:
-
Yãmb maanda sãmbs ne Biiblã goamã, wall a Zeova Kaset rãmbã sã n sɩd zãmsda nebã sɩdã bɩ?
-
Sã n yaa woto, bõe la y tõe n maane?
5. Y sẽn tõe n maan to-to n welg yɛl nins sẽn tõe n wa gɩdg-y tɩ y pa reeg lisgã
D sã n wa yãk yam n na n dɩk d meng n kõ a Zeova n deeg lisgu, d segda zu-loeese. Y sã n dat n yã makr a yembre, bɩ y ges VIDEO wã, tɩ rẽ poor bɩ y leok sogsgã.
-
Video wã pʋgẽ, zu-loe-bʋs la a Narangerel ra segd n deng n welge, n paam n tũ a Zeova?
-
Wãn to la a sẽn nong a Zeova wã sõng-a t’a tõog n welg zu-loe-kãense?
Karm-y Yel-bũn 29:25 la 2 Tɩmote 1:7, tɩ rẽ poor bɩ y leok sokrã:
-
Bõe n kõt tõnd raoodo, tɩ d tõogd n maood ne zu-loeesã.
6. Teeg-y a Zeova t’a sõng-yã
A Zeova na n sõng-y lame tɩ y ta a yam. Ges-y VIDEO wã, tɩ rẽ poor bɩ y leok sogsgã.
-
Video wã pʋgẽ, yaa bõe n kɩt tɩ Biibl karen-biigã ra yɛɛsd n pa rat n deeg lisgu?
-
Bõe la a bãng-yã, tɩ sõng-a t’a maneg n teeg a Zeova?
Karm-y Ezayi 41:10, 13, tɩ rẽ poor bɩ y leok sokrã:
-
Bõe yĩng tɩ y tõe n kɩs sɩd tɩ y na n tõog n pidsa y sẽn pʋlem a Zeova bũmb ningã, y sẽn wa n dɩk y meng n kõ-a wã?
7. Maneg-y n wilg-y tɩ y sũur nooma ne a Zeova sẽn nong-yã
Y sã n maneg n tags n ges a Zeova sẽn nong-y to-to wã, y sũur na n maneg n yɩɩ noog ne-a, tɩ y maneg n dat ne y sũur fãa me n tũ-a wakat sẽn kõn sa yĩnga. Karm-y Yɩɩn-sõamyã 40:6, tɩ rẽ poor bɩ y leok sokrã:
-
A Zeova bark-bʋs n noom yãmb n tɩ yɩɩda?
No-rɛɛs a Zeremi ra nonga a Zeova la a nong a goamã, t’a sũur me ra noom hal wʋsgo, a sẽn da paam n gomd a Zeova yʋʋr yĩngã. A yeelame: “Saasẽ-Pãng-Soab a Wẽnnaam, yaa yãmb n so maam, la y goamã kõo maam sũ-noog n kɩt tɩ m kɩdemdẽ.” (Zeremi 15:16) Leok-y sogsgã:
-
Bõe yĩng tɩ yɩ a Zeova Kaset soab yaa zu-zẽkr meng-menga?
-
Yãmb datame n deeg lisg n lebg a Zeova Kaset soab bɩ?
-
Bũmb n be n gɩdgd yãmb tɩ y pa rat n maan woto bɩ?
-
Bõe la y tagsd tɩ y segd n maaname, n wa tõog n deeg lisgu?
NEB KẼER SẼN YETE: “M pa tagsd tɩ m na n tõog n pidsa bũmb nins m sẽn segd n maan m sã n wa reeg lisgã ye.”
-
Yãmb me tagsda woto bɩ?
KƲMSGO
Ne a Zeova sõngre, y tõogd n welga yell ning fãa sẽn tõe n gɩdg-y tɩ y pa reeg lisgã.
Lebg-n-gese
-
Hal sẽn ta zĩ-bʋg la y segd n bãng Biiblã sẽn yetã, n wa tõog n deeg lisgu?
-
Bõe la y segd n deng n toeeme, n yaool n wa tõog n deeg lisgu?
-
Bõe yĩng tɩ y pa segd n bas tɩ rabeemã kɩt tɩ y pa rat n deeg lisgu?
BŨMB A TAABA
Bõe n segd n kɩt tɩ y yãk yam n na n deeg lisgu.
“Yãmb segl n saame n tõe n deeg lisg bɩ?” (Yʋʋmd 2020 tʋʋlg kiuug Gũusg Gasgã)
Y sẽn tõe n maane, n tõog bũmb nins sẽn tõe n gɩdg-y tɩ y pa reeg lisgã.
“Bõe n gɩdg maam ne koom lisgu?” (Yʋʋmd 2019 tʋʋlg kiuug Gũusg Gasgã)
Rao a ye sẽn maan to-to n tõog n welg yel-kãsems sẽn da gɩdgd-a t’a pa rat n deeg lisgu.
Sɩngrẽ wã, a Ataa ra yɛɛsdame n pa rat n deeg lisg ye. Bõe n wa n kɩt t’a sak n na n deeg lisgu?
Découvrez aussi…
Sogsg nebã sẽn wae n sokdẽ
Zãms ned Biiblã rat n yeelame tɩ bõe?
Bao-y n bãng-y sogsg kẽer leoor nebã sẽn sokd tõnd sẽn zãmsd nebã Biiblã to-to wã zugu.
