1-3. a) Bõe la a Zeova kõ tõnd tɩ yaa kũun kãsenga? Bõe la d pa segd n maane? b) Bõe la d segd n maan ne kũun ning a Zeova sẽn kõ-dã?

RAO n da weef n kõ a bi-ribla. A sũur yaa noogo, a sẽn kõ a biigã kũun sẽn noom-a wã. La biigã pa zãad weefã sõma ye. A kẽnda yaar n pa gũusdẽ, hal n fão ned t’a pogle. Rẽ yĩnga, ba wã sũur na n yɩɩ noog sɩda?

² A Zeova n yaa “kũun sẽn yaa sõma buud fãa, la kũun sẽn zems zãng buud fãa” kõata. (Zak 1:17, MN) Wala makre, a kõo ninsaalbã tõog tɩ b tõe n gome. Kɩtdame tɩ d tõe n togs d tagsgo, n wilg d sũ-noog bɩ d sũ-sãanga. D tõe n gomame n keng neb a taaba, tɩ b sũur yɩ noogo. D goamã me tõe n sãama b sũyã, hal n nams-ba.

³ No-goam tara pãng wʋsgo. A Zeova wilga tõnd d sẽn tõe n maan tɩ d no-goamã yɩ sõma. A yeelame: “Bɩ gom-põosg baa a ye ra yi y noorẽ, sã n zʋʋg gomd sẽn yaa sõma raood kengr yĩnga, sẽn na yɩl tɩ naf neb nins sẽn kelgdã.” (Efɛɛz  rãmbã 4:29, MN) Sẽn mik tɩ yaa Wẽnnaam n kõ tõnd tõog tɩ d tõe n gomã, bɩ d ges d sẽn tõe n maan tɩ d no-goamã noog a sũuri, la keng neb a taabã raoodo.

4, 5. Yel-bũn sebrã sõngda tõnd tɩ d bãng bõe no-goamã wɛɛngẽ?

⁴ Tõnd no-goamã tõe n kenga neb a taabã raood bɩ n koms b raoodo. Dẽnd d segd n gũusa ne d goamã. Yel-bũn 15:4 yetame: “Gom-nood yaa wa vɩɩm tɩɩga, la gom-wẽns sãamda sũuri.” Gom-nood kengda neda, la kõt-a sũ-noogo. La gom-kãs sãamda sũuri, la komsd raoodo.—Yel-bũnã 18:21.

⁵ Yel-bũn 12:18 yeelame: “Gom-to-ned goam pogenda wa zabr sʋʋga.” Gom-kãs tõe n sãama sũur wʋsgo, la sãam zood menga. Tõe tɩ y tẽra ned sẽn gom goam tɩ sãam yãmb sũuri. La Yel-bũn sebrã paasame: “Yam soab goam wata ne maagre.” Ned sã n tags la a yaool n gome, tõe n belsa sũuri, hal n maneg zoodo, tɩ neb moor sẽn da yõsg lebg n zems taaba. (Karm-y Yel-bũn 16:24.) D sã n tẽegd wakat fãa tɩ d no-goamã tõe n komsa ned raoodo, na n kɩtame tɩ d gũusdẽ.

6. Bõe yĩng tɩ yaa toog tɩ d gũus ne d goamã?

⁶ Bũmb a to n kɩt tɩ d segd n gũus ne d goamã. Yaa tõnd sẽn yaa yel-wẽn-maandbã. “Ninsaal . . . tagsda wẽng maaneg bal a sũurẽ.” Naoor wʋsgo, d noorã goam wilgda bũmb ning sẽn be d sũurẽ wã. (Sɩngre 8:21; Luk 6:45) Tõe n yɩɩ toog ne-d tɩ d  tõog n gũus ne d goamã. (Karm-y Zak 3:2-4, MN.) La d tog n modgdame tɩ d no-goamã lebgd sõma n paasdẽ.

7, 8. Wãn to la ned no-goam tõe n sãam a zood ne a Zeova?

⁷ Bũmb a to me n kɩt tɩ d segd n gũus ne d goamã. A Zeova na n kaoa tõnd bʋʋdo, d sẽn yeel fãa wɛɛngẽ. Zak 1:26, MN yetame: “Ned sã n tagsdẽ t’a tũuda Wẽnnaam la a yaool n pa tõe a zɩlemde a belgda a menga, la a Wẽnnaamã tũub yaa zaalem.” D sã n pa gũusd ne d goamã, d tõe n sãama tõnd ne a Zeova zoodã zãng fasɩ.—Zak 3:8-10.

⁸ D yãame tɩ d segd n gũusa ne d goamã. D sã n dat n bãng d sẽn na n gom to-to tɩ ta a Zeova yam, d segd n bao n bãnga goam nins d sẽn pa tog n gome.

9, 10. a) Rũndã-rũndã, bõe la neb wʋsg nonga? b) Bõe yĩng tɩ d pa segd n gomd gom-yoodo?

⁹ Rũndã-rũndã, neb wʋsg nonga gom-yood la gom-põaasã. B tagsdame tɩ yaa b sã n wẽendẽ, bɩ n gomd gom-põaas la neb a taabã na n sak n deeg b sẽn yetã. Reem-dɛɛmdbã me mi n gomda gom-yood wall yoob yɛla, n maand laado. La tʋm-tʋmd a Poll yeelame: “Yãmb segd n zãaga y mens ne sũ-puugri, sũ-yikri, wẽnem, tʋya, la gom-dẽgd sẽn yit yãmb noorẽ.” (Kolos rãmbã 3:8, MN) A yeela kiris-nebã tɩ ‘kʋʋsem gom-yood me pa segd n zĩnd bãmb sʋk ye.’—Efɛɛz rãmbã 5:3, 4, MN.

¹⁰ Gom-yood pa noom a Zeova, pa noom neb nins sẽn nong-a wã me ye. Yaa rẽgd b nifẽ. Biiblã pʋgẽ, ‘rẽgdã’ naaga “yĩngã tʋʋma.” (Galat rãmbã 5:19-21, MN) Manesem buud fãa sẽn pa sõma yaa “rẽgdo.” Minim-wẽng tõe n waa ne minim-wẽng a to. Kiris-ned sã n nong n gomd gom-yoodo, n zãgs t’a kõn base, b yiisd-a-la tigingã pʋgẽ.—2 Korẽnt rãmbã 12:21; Efɛɛz rãmbã 4:19; ges-y Vẽnegr 23.

11, 12. a) Bõe yĩng tɩ wɩdg pa sõma? b) Bõe yĩng tɩ d segd n zãag d mens ne tẽn-kãnem?

¹¹ D segd n gũusa ne wɩdga. D nong n tagsda d taabã yell bɩ n sõsd ne-ba, n togsd-b bũmb kẽer d zo-rãmbã la d zakã rãmb zugu. Pipi kiris-nebã wakatẽ menga, saam-biisã ra baood n bãngda b tẽed-n-taasã sã n keemame, la b sẽn tõe n maan n sõng-ba. (Efɛɛz rãmbã 6:21, 22; Kolos rãmbã 4: 8, 9) La sõsg tõe n wa tiig n lebga wɩdga. D sã n dɩk d sẽn wʋmã n na n tɩ togs ned a to, d tõe n wa togsa goam sẽn pa sɩda, bɩ n yelg goam d sẽn da pa segd n togse. D sã n pa gũusi, d wat n dõda neda, bɩ n kãneg-a. Fariziẽ-rãmbã rõda a Zeezi t’a maana bũmb kẽer a sẽn pa tar sor n maane. Yɩɩ kãnegre. (Matiye 9:32-34; 12:22-24) B sã n kãneg neda, sãamda a yʋʋre, wata ne no-koɛɛma, la sãamd zoodo.—Yel-bũnã 26:20.

¹² A Zeova ratame tɩ d gomd goam sẽn sõngd neb a taabã, n kengd b raoodo. A pa rat tɩ d gom goam sẽn tõe n kɩt tɩ zo-rãmb lebg bɛɛb ye. A Zeova kisa “ned sẽn wat ne zab ba-biis ne taab sʋka.” (Yel-bũnã 6:16-19) Sẽn yɩ-a pipi n lebg tẽn-kãn-ned yaa a Sʋɩtãana. Bala a kãnega Wẽnnaam. (Vẽnegre 12:9, 10) Rũndã-rũndã, neb wʋsg nong n yagda b taab ziri. La pa segd n yɩ woto kiris-neb hakɩɩkã sʋk ye. (Galat rãmbã 5:19-21) Dẽnd d segd n gũusa ne d goamã. Wakat fãa, d tags n yaool n gome. Nand tɩ d rɩk ned gomd n tɩ togs ned a to, d sok d meng yaa: ‘M sẽn dat n togs bũmb ningã yaa sɩd bɩ? M sã n togse, yaa sõma bɩ? Kengda raood bɩ? M nongẽ lame tɩ m sẽn dat n gom ned ning yellã wʋm m sẽn na n yeelã bɩ? Sã n yaa mam yell la ned rɩk n togs ned a to tɩ m wʋme, m sũur na n yɩɩ noog bɩ?’—Karm-y 1 Tesalonik rãmb 4:11, MN.

13, 14. a) Bõe yĩng tɩ mo-beed yaa wẽng wʋsgo? b) Bõe yĩng tɩ tʋy yaa wẽnga? Bõe yĩng tɩ kiris-ned pa segd n tʋʋd a taaba?

¹³ Wakat-wakate, d tõe n yeela bũmb n wa  maand d bãngẽ. La d pa rat tɩ gom-põaas wall neb a taabã wɩdg wa lebg d minung ye. Kiris-ned pa segd n yɩ mo-be-ned ye. A Poll yeelame: “Lak-y y mens ne sũ-kẽk buud fãa, la sũ-puugri, ne sũ-yikri, la tãsga, ne tʋya, la ne wẽnem buud fãa.” (Efɛɛz rãmba 4:31, MN) Mo-be-ned paoogda a taabã, la a kɩtdẽ tɩ ned tagsdẽ t’a ka yõod ye. Sẽn yɩɩd fãa, yaa kambã n tõe n tags a woto faag-faaga. Rẽ n so tɩ d segd n gũus tɩ d goamã ra wa koms b raood ye.—Kolos rãmbã 3:21.

¹⁴ Biiblã keoogda tõnd ne bũmb a to sẽn yaa wẽng wʋsgo. Yaa tʋyã. Ned sẽn tʋʋd a to baood n sãama a sũurã. Ned sã n nong n tʋʋd a pag bɩ a sɩd wall a kamba, yaa kaeto. Ned sã n nong n tʋʋd a taaba, n zãgs t’a kõn base, b yiisd-a-la tigingã pʋga. (1 Korẽnt rãmbã 5:11-13; 6:9, 10) Wa d sẽn yã wã, ned sã n nong gom-yoodo, ziri-n-beed la gom-kãse, a sãamda yẽ ne a Zeova zoodã, la yẽ ne neb a taabã me zoodo.

15. Gom-bʋs buud n paasd zood pãnga?

¹⁵ D yãame tɩ d sẽn tõe n gomã yaa kũun sẽn yit a Zeova nengẽ. Bõe la d tõe n maan t’a sũur yɩ noogo? Yaa sɩd tɩ Biiblã pa wilgd tõnd sẽn segd n yeelã la d sẽn pa segd n yeelã kɛpɩ ye. La a yetame tɩ d sã n na n gom bɩ yɩ “gomd sẽn yaa sõma raood kengr yĩnga.” (Efɛɛz rãmbã 4:29, MN) Goam sẽn kengd ned raood yaa sõma, sɩda la maand a soab neere. A Zeova ratame tɩ d goamã  sõng nebã la keng b raoodo. Tõe n yɩɩ toogo. Gom-yood bɩ gom-kãs togsg pa toog ye. La gom-sõma togsg baooda modgre. (Tɩt 2:8) D ges d sẽn tõe n maan tɩ d goamã keng d taabã raoodo.

16, 17. a) Bõe yĩng tɩ d segd n pẽgd d taabã? b) Ãnd dãmb la d segd n pẽge?

¹⁶ A Zeova ne a Zeezi nong n pẽgda nebã. D rɩk b togs-n-taare. (Matiye 3:17; 25:19-23; Zã 1:47) Neb a taabã yell sã n pak tõndo, d na n tõog n pẽg-b lame tɩ sɩd keng b raoodo. Yel-bũn 15:23 yetame tɩ “gomd b sẽn leok sẽn zems a wakat kõta sũ-noogo.” Ned sã n pẽg tõnd ne pʋ-peelem d sẽn tʋmd wʋsgã yĩnga, bɩ a sã n wilg t’a sũur nooma ne bũmb ning d sẽn maandã, sɩd kengda d raoodo.—Karm-y Matiye 7:12, MN; ges-y Vẽnegr 27.

¹⁷ D sã n nong n get d taabã zʋg-sõma wã, d na n tõog n pẽgd-b-la faag-faaga. Wala makre, tõe tɩ y gũus n gesame tɩ saam-biig bɩ saam-bi-poak segenda a sõssã sõma, wall a modgdame n leokd tigissã sasa. Tõeeme tɩ yaa bi-bɩɩg n tall raoodo, n moon koɛɛgã lekollẽ wã, wall y gũus n gesame tɩ d tẽed-n-taag n yit koɛɛgã mooneg wakat fãa, baa a sẽn kʋʋlã. Y sã n pẽg-ba, na n maneg n kenga b raoodo. Rao me segd n pẽgda a paga, la a yet-a t’a nong-a lame. (Yel-bũnã 31:10, 28) Tɩɩg buud fãa rata koom la wĩndgã vẽenem. Woto me, ned fãa ratame tɩ b mi n pẽg-a, sẽn yɩɩd fãa kambã. D modg n pẽg-ba, b zʋg-sõma wã la b modgrã yĩnga.  Na n kenga b raoodo, tɩ b sũur noom ne b menga, la b modgd n maand sẽn yaa tɩrga, baa sã n wa yaa toogo.

18, 19. Bõe yĩng tɩ d tog n modg n keng d taabã la d bels-ba? Wãn to la d tõe n maan dẽ?

¹⁸ D sã n kengd neb a taabã la d belsd-ba, d rɩkda a Zeova togs-n-taare. Bala a belsda “ned ning sũur sẽn sãame,” la “sũ-pa-noaang soabã.” (Ezayi 57:15) A Zeova ratame tɩ d “ket n kengd taab raoodo,” la d “bels sũ-sãoong rãmbã.” (1 Tesalonik rãmbã 5:11, 14, MN) D sã n sɩd maan woto, a neeme, noom-a lame me.

 ¹⁹ Tõe tɩ y gũus n gesame tɩ tigingã ned sũur n sãame, bɩ a komsa raoodo. Bõe la d tõe n yeel tɩ sõng-a? Tõe tɩ y pa na n tõog n paam a zu-loɛɛgã tɩɩm ye. La y tõe n maana bũmb t’a bãng t’a yell pak-y lame. Wala makre, y tõe n baoo sẽk n tɩ sõs ne-a, n karem Biiblã vɛrse n keng a raoodo, la y naag-a meng n pʋʋse. (Yɩɩn-sõamyã 34:19; Matiye 10:29-31) Sõng-y-yã-a t’a bãng tɩ tigingã saam-biis la saam-bi-pogsã nong-a lame. (1 Korẽnt rãmbã 12:12-26; Zak 5:14, 15) Wilg-y ne y no-goamã tɩ y wʋmda a yellã võore, la tɩ y tẽeda a sẽn yetã.—Karm-y Yel-bũn 12:25.

20, 21. Bõe n kɩtd tɩ ned sak saglg nana-nana?

 ²⁰ D sã n wa sagend ned me, d segd n kenga a raoodo. D sẽn pa zems zãnga yĩnga, wakat ninga d rata saglse. Yel-bũn 19:20 yetame: “Kelg saglgo, la f sak remsgo, n tõog n paam yam.” Pa kãsem-dãmbã bal n tõe n sagl neb a taabã ye. Roagdbã tog n wilgda b kambã sore. (Efɛɛz rãmbã 6:4) Saam-bi-pogsã tõe n kõta taab saglse. (Tɩt 2:3-5) Tõnd sẽn nong d saam-biisã ne d saam-bi-pogsã, d ratame tɩ d sã n na n wa sagl-ba, bɩ d tall manesem sõngo, tɩ b sũur da sãam ye. Bõe n na n sõng-d rẽ wɛɛngẽ?

²¹ Tõe tɩ ned zoe n sagla yãmba, t’a sẽn tall manesem ningã kɩt tɩ y sak a saglgã nana-nana. Bõe yĩnga? Bala a sẽn sagl yãmb to-to wã wilgame tɩ y yell pak-a lame. Tõe me tɩ yaa a sẽn gom ne bʋgsem la ne nonglmã. (Kolos rãmbã 4:6) Sãmbg kae t’a saglgã ra tika Biiblã zugu. (2 Tɩmote 3:16) D saglgã yaa Biiblã goam kɛpɩ tɩ d lebs n dɩka ne d meng goam me, d segd n tika vɛrse zugu. Ned pa segd n modg a to t’a tũ yẽ sẽn dat ye. A pa segd me n wẽnemd Biiblã goam sẽn na yɩl n wilg t’a sẽn yetã yaa sɩd ye. D sã n tẽeg b sẽn zoe n sagl tõnd tɩ naf-do, na n sõng-d lame tɩ d tõog n sagl d taaba.

22. Bõe la d rat n maan ne kũun ning Wẽnnaam sẽn kõ-dã?

²² D sẽn tõe n gomã sɩd yaa kũun sẽn yit Wẽnnaam nengẽ. D sẽn nong Wẽnnaamã, d ratame tɩ d no-goamã yɩ-a noogo. D ra yĩm tɩ d no-goamã tõe n komsa ned raoodo, bɩ n keng-a. Woto yĩnga, d maan d sẽn tõe n keng d taabã raoodo, la d bels-ba.