1, 2. Neb sã n segd zu-loees b kãadem pʋgẽ, rat n yeelame tɩ tɩɩm le kae bɩ? Wilg-y-yã a võore.

KÃADEM yaa a Zeova kũuni. Tõe n kɩtame tɩ ned vɩɩm yɩ noogo. La kãadem kae n pa tar zu-loees ye. Wakat ning menga, wõnda zu-loeesã pa na n tol n sa ye. Rẽ tõe n kɩtame tɩ rao ne a pag zems-n-taar pa le yɩ wa pĩndã ye.

² Zu-loeesã sẽn mi n be kãadem pʋgẽ wã pa tog n ling tõnd ye. La pa rat n yeel tɩ tɩɩm le kae ye. Bala neb sẽn da segd zu-loe-kãsems b kãadem pʋgẽ tõogame n maneg b zems-n-taarã, tɩ b kãadmã le paam pãnga. B maana wãna?

3, 4. Zu-loe-bʋg n tõe n wa zĩnd kãadem pʋga?

³ Neb a yiibã sẽn kẽ kãadmã manesem pa wõnd taaba, b sẽn nong bũmb ninsã yaa toor-toore, b tagsa wã la b sẽn maand to-to wã me pa a yembr ye. Sẽn paase, raoã ne pagã tõeeme n pa yit zĩig a ye, tɩ b minundã me yaa toor-toore. Dẽnd sẽn na yɩl n tõog n bãng taab sõma, baooda sẽk wʋsgo.

 ⁴ La tarẽ-n-tarẽ, rao wã bɩ pagã tõeeme n wa lʋɩɩsd a meng raabã taoor n yɩɩd a to wã rẽnda, hal tɩ wa sɩng n sãamd b zoodã ne taaba. Sã n wa lebg woto, ned fãa vɩɩ a vɩɩm t’a toog kae ne a to ye. Bõe n tõe n sõng-b tɩ b zems-n-taarã le paam pãnga?

5. a) Bõe n tõe n sõng kiris-neb sẽn kẽ kãadem tɩ b zems-n-taarã le paam pãnga? b) Bõe la Ebre-rãmb 13:4 sagend tõndo?

⁵ A Zeova kõo sẽn kẽ-b kãadmã saglg t’a sõmblmã ka to ye. Tõe n sõng-b lame tɩ b zems-n-taarã le paam pãnga. (Yɩɩn-sõamyã 25:4; Ezayi 48:17, 18) A yeelame: “Bɩ kãadem zĩnd waoogr nebã fãa sʋka.” (Ebre-rãmbã 13:4, MN) Ned sã n nand bũmbu, a getame tɩ bõn-kãng tara yõod wʋsgo. A pa na n maand a toog kae ne bõn-kãng ye.  A na n gesa a yell sõma. Kãadmã wɛɛngẽ me, yaa woto la a Zeova rat tɩ d maane.

6. Bõe la Matiye 19:4-6 yet tɩ sõngd tõnd tɩ d bãng a Zeova sẽn dat tɩ kãadem yɩ to-to?

⁶ A Zeova n lugl pipi kãadmã. A Biig a Zeezi yeelame: “Yãmb nan pa karem tɩ sẽn naan-a bãmb hal sɩngrẽ wã naan-b-la rao la paga, la tɩ b yeelame: ‘Yaa rẽ n kɩt tɩ rao na n bas a ba ne a ma n zĩnd ne a paga, la b yiibã na n yɩɩ yĩng a yembr’ la? Dẽnd bãmb pa le yaa yiib yɛs ye. B lebga yĩng a yembre. Woto wã, bũmb nins Wẽnnaam sẽn lagem taabã, bɩ ned ra welg-b ye.” (Matiye 19:4-6, MN) Hal sɩngrẽ, a Zeova raab yaa kãadem na kaoose. A ratame tɩ zems-n-taar zĩnd zagsã pʋsẽ, tɩ b vɩɩmã noome.

7. Bõe n tõe n sõng sẽn kẽ-b kãadmã?

⁷ Rũndã-rũndã, sẽn kẽ-b kãadmã paamda zu-loees n yɩɩd pĩndã. Wakat ninga yaa zu-loe-kɛgemse, hal tɩ b tagsdẽ tɩ tɩɩm le kae sã n pa b kao kãadmã. La d sã n bãng a Zeova tagsg sẽn yaa a soab kãadmã wɛɛngẽ, tõe n sõng-d lame.—1 Zã 5:3.

8, 9. a) Wakat bʋg la d segd n tũ a Zeova sẽn yet kãadmã wɛɛngẽ? b) Bõe la d tõe n maan n wilg tɩ d waoogda kãadmã?

⁸ A Zeova sẽn yet tõndã fãa yaa d neer yĩnga. Wa d sẽn zoe n yã wã, a yeelame yaa: “Bɩ kãadem zĩnd waoogr nebã fãa sʋka.” (Ebre-rãmbã 13:4, MN; Koɛɛg soaba 5:3) D sã n tũ a Zeova sẽn yetã, baa sã n yaa toogo, na n naf-d lame.—1 Tesalonik rãmbã 1:3; Ebre-rãmbã 6:10.

 ⁹ Kiris-nebã sẽn waoogd kãadmã yĩnga, b pa na n yeel bɩ n maan bũmb sẽn na n sãam-a ye. B ned fãa sẽn dat yaa yẽ ne a sɩdã wall a pagã zood paam pãnga. Bõe la b tõe n maan tɩ sõng-ba?

10, 11. a) Zu-loe-kãseng la neb kẽer tar b kãadmã pʋgẽ. Yaa bʋgo? b) Bõe yĩng tɩ sẽn kẽ-b kãadmã tog n gũus ne b goamã?

¹⁰ Bũmb toor-toor la ned tõe n maan n sãam a pag bɩ a sɩd sũuri. D miime tɩ kiris-ned pa tog n pãb a pag bɩ a sɩda, bɩ n maan bũmb sẽn na n pogl-a ye. La d tõe n pogla d to wã ne d no-goamã. No-goam tõe n lebga zab-teedo. Pag a ye yeelame: “Mam sɩdã tʋʋda maam. A pa pãbd-m tɩ m pogendẽ ye. La a nong n yeta maam tɩ m yaa zɩɩbo, la tɩ m ka võore, tɩ sãamd m sũur wʋsgo.” Rao a ye yeelame t’a pagã gomdame n paoogd yẽ wakat fãa, la tɩ gom-kãens n lebg yẽ yʋʋre. A paasame: “M pa tõe n togs a sẽn yet maamã neb a taab taoor ye. Rẽ n so tɩ m pa tõe n sõs ne-a ye. Tʋʋmã sã n sigi, m paada be n kaoose. Rẽ n são m sẽn kuiisi.” Rũndã-rũndã, neb wʋsg nonga gom-põaasa, yaalg goama, la goam sẽn sãamd sũur hal wʋsgo.

¹¹ Rao ne a pag sã n gomd taab gom-põaas n sãamd taab sũyã, tõe n kaoosame tɩ b sũ-sãoongã ketẽ. Vẽenega, pa woto la a Zeova rat tɩ sẽn kẽ-b kãadmã maan ye. La wakat ninga, rao bɩ pag tõe n sãama a to wã sũur n pa bãng ye. A tõe n tagsame  meng t’a maana a to wã neere, tɩ yaool n sãam a sũuri. Y sã n yeel bũmb tɩ sãam y pagã bɩ y sɩdã sũuri, y sakd n teka y noorã bɩ?—Galat rãmbã 5:15; karm-y Efɛɛz rãmb 4:31, MN.

12. Bõe n tõe n wa sãam kiris-ned zood ne a Zeova?

¹² Ned sẽn gomd ne a sɩd wall a pag to-to wã tara yõod a Zeova nifẽ, yaa neb a taab taoor tɩ yaa b sẽn wat n be ne taabã. (Karm-y 1 Pɩyɛɛr 3:7, MN.) Zak 1:26, MN yeta tõnd yaa: “Ned sã n tagsdẽ t’a tũuda Wẽnnaam la a yaool n pa tõe a zɩlemde a belgda a menga, la a Wẽnnaamã tũub yaa zaalem.”

13. Bõe la ned sẽn kẽ kãadem tõe n maan tɩ nams a to wã?

 ¹³ Bũmb a taab la ned sẽn kẽ kãadem tõe n maan tɩ nams a to wã. Wala makre, b nin-yend sã n nong n sõsd ne ned hal tɩ rɩkd a sẽkã wʋsgo, a pagã bɩ a sɩdã manesem na n yɩɩ wãna? Tõeeme t’a moonda koɛɛgã wʋsg ne nin-kãnga, wall a sõngd-a-la ne a zu-loɛɛga, pa rẽ bɩ b naagda taab n maand bũmb a to. Baa pa wẽnga, tõe n sãama a pagã bɩ a sɩdã sũuri. Pag sẽn yaa kiris-ned yeelame: “M sã n ne tɩ m sɩdã sõsda ne tigingã saam-bi-poak wʋsgo, t’a yell pak-a, namsda maam. Kɩtdame tɩ m tagsdẽ tɩ m pa ta m taabã ye.”

14. a) Bõe la Sɩngr 2:24 tẽegd tõndo? b) Sok-bʋg la d segd n sok d mense?

¹⁴ Tõnd sẽn yaa kiris-nebã, bũmb kẽer la d segd n maan d roagdbã yĩnga, tigingã saam-biis la saam-bi-pogsã me yĩnga. La d sã n kẽe kãadem, yaa d pagã bɩ d sɩdã raab la d tog n lʋɩɩs taoore. A Zeova yeelame tɩ rao segd n “loe a meng ne a paga.” (Sɩngre 2:24) Rao bɩ pag segd n bao n bãnga a to wã tagsg wakat fãa. Sok-y y meng yaa: ‘Rẽ yĩnga, m baooda sẽk m sɩdã bɩ m pagã yĩnga, n wilgd-a tɩ m nong-a lame la t’a yell pak-m lame bɩ?’

15. Bõe yĩng tɩ kiris-ned sẽn kẽ kãadem pa tog n yõg zood sẽn tar pãng ne ned a to sẽn pa a pagã bɩ a sɩdã?

¹⁵ Kiris-ned sẽn kẽ kãadem sã n wa yõg zood sẽn tar pãng ne ned a to sẽn pa a pagã bɩ a sɩdã, tõe n waa ne zu-loees a kãadmã pʋgẽ. Sẽn paase, tõe n wa kɩtame t’a yam kẽ nin-kãnga, t’a nong-a. (Matiye 5:28) Nonglem kãng tõe n paama pãnga, n kɩt t’a soabã maan bũmb sẽn pa waoogd a kãadmã.

16. No-bʋg la Biiblã kõt kãadmã wɛɛngẽ?

¹⁶ Biiblã pʋgẽ b sẽn yeel tɩ “kãadem zĩnd waoogr nebã fãa sʋkã” poore, b paasame: “Bɩ kãadem gãag ra rẽgem ye. Bala Wẽnnaam na n kaoa sẽn tʋmd-b raglem tʋʋmã ne yoaadbã bʋʋdo.” (Ebre-rãmbã 13:4, MN) Vɛrse wã sẽn yeel tɩ ‘bɩ kãadem gãag ra rẽgmã’ makda pag ne rao lagengã. (Yel-bũnã 5:18) Bõe la ned tõe n maan n wilg t’a waoogda kãadem gãaga?

17. a) Neb wʋsg tagsg yaa wãn ne ned sẽn zãmbd a pag bɩ a sɩda? b) Kiris-nebã tagsg yaa wãn ne yoobo?

¹⁷ Rũndã-rũndã, neb kẽer tagsdame tɩ b sã n zãmb b pag bɩ b sɩda, pa wẽng ye. Tõnd pa segd n tags wa nin-kãensã ye. A Zeova wilga vẽeneg t’a kisa yoobo. (Karm-y Rom dãmb 12:9, MN; Ebre-rãmbã 10:31; 12:29) Kiris-ned sã n kẽ ne ned sẽn pa a pag bɩ a sɩda, a rẽgma a kãadmã. A wilgdame t’a pa nand a Zeova noyã, la a sãamda a zoodã ne-a. Dẽnd d segd n gũusa ne bũmb ning fãa sẽn tõe n wa kɩt tɩ d yo wã. Wala makre, d pa segd n tall tags-yood ye.—Zoob 31:1.

18. a) Bõe yĩng tɩ yoob ne wẽn-naands pʋʋsg fãa yaa a ye? b) Pĩnd wẽndẽ, a Zeova tagsg ra yaa bõe ne yoobo?

¹⁸ Pĩnd wẽndẽ, Israyɛll nebã ra miime tɩ tõogã Wẽnnaam sẽn kõ a Moyiizã ra wilgdame tɩ ned sẽn yo, ne ned sẽn pʋʋsd wẽn-naands fãa yaa a ye. B ra segd n kʋʋ b yiibã fãa. (Maan-kʋʋre 20:2, 10) Bõe yĩng tɩ yoob la wẽn-naands pʋʋsg fãa yaa a ye? Israyɛll ned sã n da pʋʋs bõn-naandse, a sãama  pʋleng ning a sẽn maan a Zeova n yeel t’a na n sak-a lame wã. Ned sã n da yo me, a sãama pʋleng ning a sẽn maan a pagã bɩ a sɩdã. (Yikri 19:5, 6; Tõodo 5:9; karm-y Malasɩ 2:14.) Dẽnd pĩnd wẽndẽ, a Zeova ra getame tɩ ned sã n yo, a maana yel-wẽn-kãsenga.

19. Bõe n na n sõng-d tɩ d ra yo?

¹⁹ La rũndã-rũndã yẽ? Baa tõnd sẽn pa le tũud a Moyiiz tõogã, a Zeova sẽn tagsd to-to yoobã wɛɛngẽ wã pa toeem ye. D pa tol n dat n pʋʋs wẽn-naands ye. Woto me, d pa tog n zãmb d pag bɩ d sɩd ye. (Yɩɩn-sõamyã 51:3, 6; Kolos rãmbã 3:5) Sã n pa rẽ, d na n paooga d kãadmã, la d paoog a Zeova sẽn yaa d Wẽnnaamã.—Ges-y Vẽnegr 26.

20. Wãn to la yam tõe n sõng kãadem pʋgẽ?

²⁰ Bõe la y tõe n maan tɩ y kãadmã pãng paasdẽ? Wẽnnaam Gomdã yetame: “Yam n met yiri, la yaa ne bãngr la yirã yalsd kãenkãe.” (Yel-bũnã 24:3) Zak rãmb vɩɩm tõeeme n pa tar yamleoog baa bilfu, wa a sẽn tõe n tar yamleoogo, hal tɩ ned fãa sũur noome. Yaa woto me ne kãadmã. Ned sẽn tar yam na n maana a sẽn tõe t’a kãadmã tall yamleoogo, tɩ yẽ ne a pagã bɩ a sɩdã tar sũ-noogo.

21. Wãn to la bãngr tõe n sõng tɩ kãadem pãng paase?

²¹ Biiblã sẽn gom yirã meeb yellã poore, a paasame: “Yaa ne bãngre, la a ro-pʋsã fãa pit ne te-sõama buud toor-toor sẽn tar yõodo.” (Yel-bũnã 24:4) Bũmb ning y sẽn zãmsd Wẽnnaam Gomdã pʋgẽ wã tõe n manega y kãadmã. (Rom dãmbã  12:2; Filip rãmbã 1:9) Yãmb ne y pagã bɩ y sɩdã sã n wa naag taab n karemd Biiblã la siglgã sɛbã, bao-y n bãng-y y sẽn tõe n tũ bũmb ning y sẽn zãmsã to-to. Ges-y y sẽn tõe n maan n wilg y to wã tɩ y nong-a lame, n waoogd-a la y tagsd a yelle. Kos-y-yã a Zeova t’a sõng-y tɩ y bɩɩs zʋg-sõma sẽn na n kɩt tɩ y maneg n nong y to wã, tɩ y kãadmã pãng paase.—Yel-bũnã 15:16, 17; 1 Pɩyɛɛr 1:7.

22. Bõe yĩng tɩ kiris-ned tog n nong a pagã bɩ a sɩdã, n nand-a la a waoogd-a?

²² Kiris-ned tog n maana a sẽn tõe n nong a pagã bɩ a sɩdã, n nand-a la a waoogd-a. Rẽ, a kãadmã na n paama pãnga, la tall yamleoogo. La sẽn yɩɩda, na n nooga a Zeova sũuri.—Yɩɩn-sõamyã 147:11; Rom dãmbã 12:10.