1. Bõe la d segd n maan n tõog n bãng d sẽn tũud a Zeova to-to wã sã n tata a yam, la bõe yĩnga?

A ZEEZI yeelame: ‘Wẽn-tũudb hakɩɩkã na n waooga Ba wã ne sɩɩga, la ne sɩda. Wakat kãng pʋd n taame. Sɩd me, yaa neb a woto la Ba wã baood tɩ b waoog bãmba.’ (Zã 4:23; 6:44, MN) Tõnd ned kam fãa tog n bao n bãnga “bũmb nins sẽn tat Zu-soabã yamã.” (Efɛɛz rãmbã 5:10, MN) La wakat ninga pa nana ye. Bala a Sʋɩtãan rat n belga tõnd tɩ d maan sẽn pa noom a Zeova.—Vẽnegre 12:9.

2. Togs-y bũmb ning sẽn maan Sinayi tãngã sɛɛga.

² Bõe la a Sʋɩtãan maand n belgd nebã? A kɩtdame tɩ b pa le mi sõma ne wẽng n bak ye. D ges bũmb ning sẽn paam Israyɛll nebã, b sẽn wa n tilg b sikã Sinayi tãngã sɛɛgã. A Moyiiz da rʋʋ tãngã zugu, tɩ nebã gũud a sigbu. B gũume n konge, n wa yeel a Aarõ t’a maan bõn-naandg n kõ bãmb t’a yɩ b wẽnnaam. A Aarõ sɩd rɩka sãnem n maan nag-bila, tɩ nebã maan kibs rẽ yĩnga. B ra saood n gilgda nag-bilã, la b wõgemded n waoogd-a. B ra tagsdame tɩ bãmb sẽn waoogd nag-bilã, yaa a Zeova la b waoogda. B pʋd n yeelame meng tɩ yaa ‘tigr a Zeova waoogr yĩnga.’ La ra pa noom  a Zeova ye. A Zeova nifẽ, b pʋʋsa bõn-naandgã. Neb wʋsg n ki rẽ yĩnga. (Yikri 32:1-6, 10, 28) Yam-bʋg la d tõe n dɩke? Biiblã yetame tɩ d ra ‘sɩɩs bũmb sẽn yaa rẽgd ye.’ D bas t’a Zeova zãms-do, tɩ d bãng sõma ne wẽng n bake.—Ezayi 52:11; Ezekɩyɛll 44:23; Galat rãmbã 5:9.

3, 4. Bõe yĩng tɩ d segd n bao n bãng kibs kẽer sẽn sɩng to-to?

³ A Zeezi sẽn wa n be tẽngã zugã, a sõnga a tʋm-tʋmdbã tɩ b bãng b sẽn tõe n tũ Wẽnnaam to-to tɩ ta a yam, tɩ yɩ mak-sõng neb a taabã yĩnga. A Zeezi kũumã poore, a tʋm-tʋmdbã kell n sõnga karen-bi-paalã tɩ b bãng a Zeova noyã. La tʋm-tʋmdbã kũum poore, ziri karen-saamb dãmb sɩngame n wat ne zãmsg sẽn pa sɩd tigingã pʋgẽ, la b maand kibs-rãmb la rogem-migs sẽn pa tik Biiblã zugu. B toeema kibs kẽer meng yʋya, tɩ lebg wa yaa kiris-nebã kibs-rãmba. (2 Tesalonik rãmbã 2:7, 10; 2 Zã 6, 7) Rũndã-rũndã, neb wʋsg n ket n maand kibs-kãense, tɩ kɩt tɩ b tẽed zãmsg sẽn pa tik Biiblã zugu, la b maand zĩn-dãmb yɛl menga. *—Vẽnegre 18:2-4, 23.

⁴ Rũndã-rũndã, kibs-rãmbã maaneg rɩta neb wʋsg sẽk la b ligdi. La yãmb sẽn zãms Biiblã, bilf-bilfã y bãnga a Zeova tagsg kibs kẽer wɛɛngẽ, tɩ sõng-y tɩ y bãng tɩ y tog n toeema y sẽn da tagsd to-to wã. Tõeeme n pa yɩ nana ye. La y tõe n kɩsa sɩd t’a Zeova na n sõng-y lame. Bɩ d ges kibs kẽer sẽn sɩng to-to. Rẽ na n sõng-d lame tɩ d bãng sã n tata a Zeova yam.

5. Kaset bʋg n wilgd t’a Zeezi pa rog yʋʋm-sar kiuug rasem 25?

⁵ Tẽns wʋsg pʋsẽ, neb wʋsg maanda Nowɛllã yʋʋm-sar kiuug rasem 25, n yetẽ tɩ yaa a Zeezi rogem daare. Biiblã yaool n pa togs a Zeezi rogmã daar bɩ kiuugã ye. La a togsda sẽn yaa yʋʋmdã wakat ninga. A Luk gʋlsame n yeel tɩ b sẽn wa n dog a Zeezi Betlehɛmmã, “pe-kɩɩmb n da tɩ be we-kɛɛng ne b rũmsi.” (Luk 2:8-11, MN) Betlehɛm tẽngã pʋgẽ, yʋʋm-sar kiuugã sã n ta, yaa waoodo, saagã niidame, tɩ nɛɛzã me rʋʋgdẽ. Dẽnd pe-kɩɩmb pa tõe n pa yĩng ne yʋng n gũ b rũms ye. Bõe la rẽ zãmsd tõndo? Wilgdame tɩ b sẽn wa n na n dog a Zeezi wã tɩ waoodã ra nan pa sɩng ye. Biiblã goamã n paas kʋdemdã yel-mitbã sẽn yetã wilgdame t’a Zeezi rogmã tog n yɩɩ bõn-bɩʋʋng kiuugã bɩ zĩ-likr kiuugã sasa.

6, 7. a) Yɛl kẽer b sẽn maand Nowɛllã sasa sɩnga wãn to? b) sã n na n kõ ned kũuni, tog n yɩɩ bõe yĩnga?

⁶ La Nowɛllã sɩnga wãn to? Nowɛllã yaa neb sẽn pa tũud Wẽnnaam kibsa. Yaa kibs ning b sẽn da boond tɩ Satirnaliya wã, Rom tẽngã neb sẽn da maand n waoogd b wẽnnaam a Satirn, n yetẽ tɩ yẽ la koobã wẽnnaamã. Sebr a ye (The Encyclopedia Americana) yetame: “Satirnaliya wã yaa Rom tẽngã neb kibs b sẽn maand yʋʋm-sar kiuugã pʋɩ-sʋk sasa. Nowɛllã yel-maandɩ wʋsg tika kibs kãngã zugu. Wala makre, Satirnaliya wã kibs sasa, nebã segenda rɩɩb buud toɛy-toɛya, n kõt taab kũuni, la b widgd buuzi-rãmba.” Sẽn paase, yʋʋm-sar kiuug rasem 25 wã daare, pɛrs-rãmbã ra maanda b wẽnnaam a Mitra rogem tẽegr kibsa, n yetẽ tɩ yẽ n so wĩntoogã.

 ⁷ La neb wʋsg sẽn maand Nowɛllã rũndã-rũndã wã pa tagsd a sẽn sɩng to-to wã ye. B yetame bal tɩ yaa kibs sẽn kɩtd tɩ b paam n naag b zakã rãmb n dɩ la b kõ taab kũuni. Yaa sɩd tɩ d nonga d zakã neb la d zo-rãmbã. Sẽn paase, a Zeova ratame t’a nin-buiidã yɩ kõatba. Yiib Korẽnt rãmb 9:7, MN yetame tɩ “Wẽnnaam nonga ned ning sẽn kõt ne sũ-noogo.” A Zeova pa rat tɩ d gũ kibs wakat bɩ wakat-zẽng n kõ taab kũun ye. Sɩd me, sẽn yaa yʋʋmdã wakat ning fãa,  a nebã kõta taab kũuni, n nong n tigimd ne b zo-rãmb la b zak rãmb n maand sũ-noogo. B sẽn maand taab neerã pa b sẽn dat tɩ neb a taabã maan-b neer n lebs ye. Yaa b sẽn nong taabã yĩnga.—Luk 14:12-14.

8. Ãds-gɛtbã sẽn na n kõ a Zeezi kũunã t’a ket n yaa bi-pɛɛlg bɩ? Wilg-y-yã a võore.

⁸ Neb wʋsg nong n yetame tɩ rap a tãab sẽn yaa yam dãmb n wa n kõ a Zeezi kũuni, a sẽn wa n dog n yaa bi-pɛɛlg n be rũmsã rɩɩb koglgã pʋgẽ wã, la tɩ yaa rẽ yĩng la bãmb me sẽn kõt taab kũun Nowɛll sasa wã. Yaa sɩd tɩ rap n tũ taab n wa ges a Zeezi, n kõ-a kũuni. Pĩnd wẽndẽ, b ra wae n kõta nin-kãsemsã kũuni. (1 Rĩm-dãmbã 10:1, 2, 10, 13) La rẽ yĩnga, yãmb miime tɩ Biiblã yetame tɩ rapã ra yaa neb sẽn get ãds n bʋgd bagre bɩ? Ra pa neb sẽn tũud a Zeova ye. Sẽn paase, b sẽn wa n na n ges a Zeezi wã t’a pa ket n yaa bi-pɛɛlg n gãe rũms rɩɩb koglg pʋg ye. Rẽ t’a lebga “biiga,” n be roog pʋgẽ.—Matiye 2:1, 2, 11, MN.

9. Ãnd dãmb rogem daar tẽegr kibs yell la Biiblã gomda?

⁹ Biig rogem daar yaa sũ-noog daare. (Yɩɩn-sõamyã 127:3) La pa rat n yeel tɩ d tog n maanda kibs n tẽegd rogem daar ye. Biiblã pʋgẽ, b gomda neb a yiib bal rogem daar tẽegr kibs yelle. Yaa Ezɩpt naab a Farawõ ne rĩm a Erood Ãntipaase. (Karm-y Sɩngr 40:20-22; Mark 6:21-29, MN.) B ned baa a ye ra pa tũud a Zeova ye. Biiblã zĩig baa a ye pʋd n pa wilgd tɩ ned sẽn tũud a Zeova n tẽeg a rogem daar n maan kibs ye.

10. Bõe yĩng tɩ pipi kiris-nebã ra pa maand rogem daar tẽegr kibsa?

 ¹⁰ Sebr a ye (The World Book Encyclopedia) yetame tɩ pipi kiris-nebã ra “getame tɩ rogem daar tẽegr kibsã yaa neb nins sẽn pa tũud Wẽnnaamã yel-maandɩ.” Yel-maandɩ kãens sẽn tik bũmb ning zugã pa sɩd ye. Wala makre, pĩnd wẽndẽ, gɛrk rãmbã ra tẽedame tɩ ned buud fãa tara malɛk sẽn kogend-a, la tɩ malɛkã zĩnda a soabã rogmẽ. B ra maanda a soabã rogem daar tẽegr kibsa, bala b ra tagsdame tɩ rẽ na n kɩtame tɩ b wẽnnaam-dãmbã kogl a soabã. Bũmb a to me la neb nins sẽn pa tũud Wẽnnaamã tẽeda. B yetame tɩ ãds-gɛtbã la horoskopã rãmb tõe n gesa ned rogem daar n togs a soabã vɩɩm sẽn na n yɩ to-to.

11. Tõnd sã n yaa kõatba, bõe yĩng t’a Zeova sũurã noome?

¹¹ Neb wʋsg yetame tɩ bãmb sẽn dog daar ningã yaa ra-kãsenga, la tɩ daar-n-kãnga, nebã tog n wilgame tɩ b nand-b lame, la tɩ b sũur nooma ne-ba. La d pa segd n yãk raare, n gũud baraar n na n wilg d zakã rãmb la d zo-rãmb tɩ d nong-b lame ye. Yaa daar fãa. A Zeova ratame tɩ d yɩ nin-sõamyã la kõatbã. (Karm-y Tʋʋm 20:35, MN.) D sũur nooma wʋsgo, a Zeova sẽn kõ-d vɩɩmã, tɩ d tog n pʋʋs-a bark daar fãa, pa d rogmã daar bal ye.—Yɩɩn-sõamyã 8:4, 5; 36:10.

12. Bõe yĩng tɩ ned kũum daar são a rogem daare?

¹² Koɛɛg soab 7:1 yetame: “Yʋ-sõng n são kaam sẽn tar yũ-noogo. La ned kũum daar n são a rogem daare.” Bõe yĩng tɩ ned kũum daar são a rogem daare? Biig sẽn nan dog nan pa maan bũmb sẽn yaa sõma bɩ wẽng ye. La ned sã n tũ a Zeova a  vɩɩmã tõre, la a maan a taabã neere, a paamda “yʋ-sõng” bɩ yʋ-noogo. La baa a soabã sã n maan kaalem, a Zeova na n tẽega a yelle. (Zoob 14:14, 15) A Zeova nebã pa maand bãmb mensã rogem daar tẽegr kibsa, b pa maand a Zeezi rogem daar tẽegr kibs me ye. A Zeezi ratame tɩ d tẽegd a kũumã yell bala. Rẽ la a yeel a karen-biisã tɩ b maane.—Luk 22:17-20; Ebre-rãmbã 1:3, 4.

13, 14. Pakã kibsã yel-maandɩ wã yita yɛ?

¹³ Neb wʋsg maanda Pakã n yetẽ tɩ yaa a Zeezi vʋʋgrã tẽegr kibsa. La sɩd-sɩdã, Pakã yaa kibs Ãnglo sagsõ rãmbã sẽn da maand tʋʋlg bɩ tʋʋl-nif kiuugu pʋgẽ, b wẽn-poak a Estre yĩnga. Sebr a ye (Le dictionnaire de la mythologie [angl.]) wilgame t’a Estre leb n da yaa rogmã wẽn-poaka. Yel-maandɩ kẽer b sẽn maand Pakã kibs sasa tika rẽ. Wala makre, Sebr a to (Encyclopedie britannique [angl.]) yeelame tɩ gɛlã makda rogem ne vʋʋgre. B paasame tɩ neb nins sẽn pʋʋsd wẽn-faadã nifẽ, soaamb makda rogem. Dẽnd yaa vẽeneg tɩ Pakã pa a Zeezi vʋʋgr tẽegr kibs ye.

¹⁴ Rẽ yĩnga, a Zeova sã n get nebã sẽn maand ziri tũudum yɛl n yetẽ tɩ b tẽegda yẽ Biigã vʋʋgrã, noom-a lame sɩda? Pa noom-a ye. (2 Korẽnt rãmbã 6:17, 18) A Zeova zɩ n yeel meng tɩ b maan kibs n tẽeg a Zeezi vʋʋgrã ye.

15. Sɩnga wãn tɩ nebã wa maand yʋʋm-paalgã kibsã?

¹⁵ Kibs a to neb wʋsg sẽn nong n maand yaa yʋʋm-paalgã kibsã. Kibs-kãngã sɩnga wãn to? Sebr a ye (The World Book Encyclopedia) yeelame: “Yaa yʋʋmd 46 sẽn deng a Zeezi rogmã la Rom tẽngã naab a Zill Sezaar yiis noore, n wilg tɩ yʋʋm-vẽkr kiuugã pipi daarã na n yɩɩ yʋʋm-paalgã pipi daare. Rom tẽngã neb yeelame tɩ daar-n-kãng yaa bãmb wẽnnaam a Zanus daare, bala yẽ la kʋɩlensã ne rig-noyã la sɩngr buud fãa wẽnnaam. Yaa b wẽnnaamã yʋʋrã la b rɩk n pʋd yʋʋm-vẽkr kiuugã, tɩ b boond  ne farend tɩ Janvier. A Zanus tara nens a yiibu. A ye n get taoore, t’a to wã get poorẽ.” Dũniyã zugu, nebã sẽn maand kibs-kãngã daar ningã, la b sẽn maand-a to-to wã pa a yembr ye. Tẽns wʋsg pʋsẽ, kibsã sasa yaa rã-tɩgr la tʋʋm-yoodo. Rom-dãmb 13:13, MN yaool n yetame tɩ d “kẽn sõma wa neb sẽn kẽnd wĩndga. D lak d mens ne reem-yood la rã-tɩgre, d zãag d mens ne yoob la nin-yoolem, la d lak d mens ne zab la sũ-kiiri.” *

16, 17. Kiris-ned sã n magd n na n kẽ kãadem, bõe yĩng t’a tog n tags a kãadem kibsã zug sõma?

¹⁶ Kãadem daar yaa sũ-noog daare. Dũniyã gill zugu, nebã sẽn maand kãadem kibs to-to wã pa yembr ye. Naoor wʋsgo, nebã pa sokd b mens kãadmã yel-maandɩ sẽn sɩng to-to ye. Dẽnd b pa mi tɩ yɛl kẽer sɩnga ne neb sẽn da pʋʋsd wẽn-faad ye. La kiris-neb a yiib sẽn magd n na n kẽ kãadem tog n bao n bãnga b sẽn na n maan b kãadem kibs to-to tɩ ta a Zeova yam. B sã n bao n bãng yel-maandɩ wã sẽn sɩng to-to, na n sõng-b lame tɩ b sẽn na n yãk yam ninsã yɩ sõma.—Mark 10:6-9.

¹⁷ Kãadem kibs sasa, nebã maanda bũmb kẽer n dat tɩ “zu-noog wẽndã” ning sẽn nan kẽ-b kãadmã barka. (Ezayi 65:11, Sebr Sõngo) Wala makre tẽns kẽer pʋsẽ, nebã fãeeda sẽn nan kẽ-b kãadmã mui-bɛɛl bɩ bũmb  a taaba. B tẽedame tɩ rẽ na n kɩtame tɩ b paam kamba, sũ-noogo, yõ-woko, la kogl-b tɩ wẽng ra paam-b ye. Kiris-nebã tog n zãaga b mens ne bũmb ning fãa sẽn naag ne ziri tũudum yɛla.—Karm-y 2 Korẽnt rãmb 6:14-18, MN.

18. Biiblã no-bʋs la kiris-ned segd n tũ, kãadem kibsã wɛɛngẽ?

¹⁸ Kiris-neb sẽn dat n kẽ kãadem ratame tɩ yɩ sõma, n kõ-b sũ-noogo, tɩ neb nins sẽn na n wa wã me sũy yɩ noogo. Sẽn na n wa-bã pa tog n gomd gom-yoodo, goam sẽn paoogd sẽn kẽ-b kãadmã la neb a taabã, bɩ n ningd-b yãnd ye. (Yel-bũnã 26:18, 19; Luk 6:31; 10:27) Kiris-ned pa tog n maan a kãadem kibs sẽn na yɩl n wilg a paoong ye. (1 Zã 2:16) Y tog n maana y kãadem kibsã tɩ yɩ sõma, tɩ y sã n wa lebg n tẽegdẽ, bɩ y sũur noomẽ. Ges-y Vẽnegr 28.

19, 20. Vɛɛr-dãmbã kogsg sɩnga wãn to?

¹⁹ Neb sã n mi n tigim taab kãadem kibs wall bũmb a to sasa, b nong n dɩkda b vɛɛr-dãmbã n kogsd taaba. Wakat kãnga, nin-yɛng n togsd gom-noog a sẽn saagd tɩ na n pidsame, tɩ neb a taabã zẽk b vɛɛr-dãmbã yĩngri. Kiris-ned tõe n naag n maana rẽ bɩ?

²⁰ Sebr a ye (Le Guide international des alcools et des cultures [ãngil.]) yeelame tɩ rɩk vɛɛr-dãmbã n kogs taabã sɩnga ne neb sẽn da pʋʋsd wẽn-faado. B kõta b wẽnnaam-dãmbã ko-sõngo, la b pʋʋsd n kot yõ-wok la yĩns laafɩ. Pĩnd wẽndẽ, nebã ra nong n zẽkda b bõn-yũudsã n kot b wẽnnaam-dãmbã tɩ b ning-b barka. La pa woto la d segd n maan n paam a Zeova barkã ye.—Zã 14:6; 16:23.

21. Kiris-nebã tog n zãaga b mens ne kibs-bʋse?

²¹ Yãmb sã n wa sokd y meng y sã n tog n naag n maana kibsa, bɩ y tags bũmb ning nebã sẽn maand kibsã sasa wã zug sõma. Wala makre, kibs kẽer sasa, nebã saooda sao-yoodo, n yũud rãam tɩ loogdẽ, la b maand yoobo. Wakat ning menga, b gomdame n pẽgd rap ne rap wall pagb ne pagb sẽn kẽed ne taabã, la b sagend nebã tɩ b nong b tẽngã hal tɩ looge. Tõnd sã n tɩ naag nin-kãensã n maan kibsa, rẽ yĩnga tõnd kisa bũmb nins a Zeova sẽn kis sɩda?—Yɩɩn-sõamyã 1:1, 2; 97:10; 119:37.

22. Bõe n tõe n sõng kiris-ned t’a bãng a sã n tog n naag n maana kibsa?

²² Kiris-nebã tog n gũusa wʋsgo, n da wa naag n maan kibs sẽn sãamd Wẽnnaam yʋʋr ye. Tʋm-tʋmd a Poll yeelame: “Woto yĩnga, yãmb sã n dɩtẽ wall y sã n yũuda, wall y sẽn maand bũmb ning fãa, bɩ y maan fãa Wẽnnaam waoogr yĩnga.” (1 Korẽnt rãmbã 10:31, MN; ges-y Vẽnegr 29.) La pa kibs rãmbã fãa n naag ne tʋʋm-yoodo, ziri tũudum yɛl wall tẽng-n-biilem yɛl ye. Kibs sã n pa kɩɩsd Biiblã noyã, tõnd n yãkd d sã n na n naagame bɩ d pa na n naage. La d tog n gũusame me tɩ d yam-yãkrã ra wa nams neb a taabã ye.

23, 24. Tõnd zakã neb sã n pa tũud a Zeova, bõe n na n sõng-d tɩ d wilg-b bũmb ning sẽn kɩt tɩ d pa le maand kibs kẽerã?

²³ Tõeeme tɩ y pa le naagd n maand kibs rãmb sẽn sãamd a Zeova yʋʋr ye. La y zakã neb sẽn pa tũud a Zeova tõe n tagsdame tɩ y sẽn pa le naagdã yaa y sẽn  pa nong-bã yĩnga. Ne bãmba, yaa kibs-rãmbã sasa bal la zakã nebã tõe n paam n tigim taaba. Sã n yaa rẽ, y maanda wãna? Bũmb wʋsg n be y sẽn tõe n maan n wilg-b tɩ y nong-b-la wʋsgo. (Yel-bũnã 11:25; Koɛɛg soaba 3:12, 13) Y tõe n mi n bool-b lame tɩ y naag taab n kok pemsem.

²⁴ Y roagdb sã n dat n bãng bũmb ning sẽn kɩt tɩ y pa le naagd n maand kibs kẽerã, y tõe n gesa tõnd sɛbã pʋsẽ la jw.org pʋgẽ, tɩ na n sõng-y lame tɩ y tõog n wilg-b tɩ b wʋm a võore. Da maan-y tɩ yaa wa y rat n wilgame tɩ yãmb n tar bʋʋm ye. Da modg-y-b me tɩ b sak n deeg yãmb sẽn yetã ye. Sõng-y-b tɩ b bãng tɩ yãmb vaeesame n bãng bũmb kẽere, la tɩ y yam-yãkrã tika rẽ zugu. Da zẽk-y y koɛɛg ye. “Bɩ y goamã tall yamleoog wakat fãa tɩ yaa wa b yugla yamsem.”—Kolos rãmbã 4:6, MN.

25, 26. Bõe la roagdbã tõe n maan n sõng b kambã tɩ b nong a Zeova noyã?

²⁵ Yaa tɩlɛ tɩ tõnd mengã bãng bũmb ning sẽn kɩt tɩ d pa maand kibs kẽerã, la d wʋm a võor sõma. (Ebre-rãmbã 5:14) D sẽn dat yaa d noog a Zeova sũuri. Y sã n yaa roagda, maag-y y yĩng n sõng y kambã tɩ b wʋm Biiblã noyã võore, la b nong-ba. B sã n bãng a Zeova sõma, na n kɩtame tɩ bãmb me rat n noog a sũuri.—Ezayi 48:17, 18; 1 Pɩyɛɛr 3:15.

²⁶ A Zeova sã n ne tɩ tõnd maanda d sẽn tõe fãa n na n tũ-a ne pʋ-peelem, noom-a-la wʋsgo. (Zã 4:23) La neb wʋsg tẽedame tɩ ned pa tõe n yɩ pʋ-peelem soab dũni-kãngã pʋgẽ ye. Yaa sɩd bɩ? D na n goma rẽ yell sak ning sẽn pʋgdã pʋgẽ.