1, 2. Bõe n kɩt tɩ d nong a Zeova?

YÃMB nonga Wẽnnaam bɩ? Yãmb sẽn dɩk y meng n kõ-a n deeg lisgã wilgdame tɩ y nong-a-la wʋsgo, la t’a yaa y zoa meng-menga. La nand meng tɩ y wa bãng a Zeova la y nong-a, a ra zoe n nonga yãmba. Biiblã yetame: “Tõnd tara nonglem, bãmb sẽn yɩ pipi n nong tõndã yĩnga.”—1 Zã 4:19, MN.

² Tags-y n ges-y bũmb nins fãa a Zeova sẽn maane, n wilg t’a nonga tõndã. Wala makre, a naana tẽngã tɩ yaa neere, la a kõ-d bũmb fãa sẽn na yɩl tɩ d vɩɩmã yɩ noogo. (Matiye 5:43-48; Vẽnegre 4:11) A ratame tɩ d yɩ a zoa. Rẽ n so t’a kɩt tɩ d tõe n bãng-a. D sã n karemd Biiblã, d kelgda a Zeova sẽn yet tõndã. La d sã n wa pʋʋsd-a, yaa yẽ n kelgd tõndo. (Yɩɩn-sõamyã 65:3) Ne a vʋʋsem sõngã maasem, a wilgda tõnd sor la a kengd-d raoodo. (Luk 11:13) A tʋma a Bi-nongrã meng tẽngã zugu, t’a wa fãag tõnd ne yel-wẽnã la kũumã.—Karm-y Zã 3:16; Rom dãmb 5:8, MN.

3. D maanda wãn tɩ d zoodã ne a Zeova kell n tall pãnga?

 ³ Zoa meng-meng yaa ned sẽn be ne-fo, noog la toog wakate. Yãmb sã n tara zoa a woto, y modgda wʋsg sẽn na yɩl tɩ y zoodã pãng paasdẽ. Woto me, d segd n modgame tɩ tõnd ne a Zeova zoodã pãng paasdẽ. Zood kae sẽn zem zood ning d sẽn tar ne-a wã ye. D tõeeme tɩ d zoodã ra tol n sãam ye. Biiblã sagenda tõnd tɩ d “kell n pa Wẽnnaam nonglmã pʋgẽ.” (Ziid 21, MN) Wãn to la d tõe n maan dẽ? Biiblã yetame: “Ad Wẽnnaam nonglmã sẽn dat n yɛɛlga: Yaa tɩ tõnd sak bãmb noyã, la bãmb noyã sakr yaool n pa toog ye.”—1 Zã 5:3, MN.

4, 5. a) Biiblã sẽn yeel tɩ “Wẽnnaam nonglmã” võor yaa bõe? b) Bõe n wa n kɩt tɩ yãmb nong a Zeova ne y sũur fãa?

⁴ Biiblã sẽn yeel tɩ “Wẽnnaam nonglmã” võor yaa bõe? Pa Wẽnnaam sẽn nong tõndã yell la b gomd ye. Yaa tõnd sẽn tog n nong-a wã yelle. Yãmb tẽra y sẽn wa n sɩng n bãngd a Zeova, tɩ y nonglmã ne-a paasdẽ wã bɩ?

⁵ Yãmb sẽn wa n bãng t’a Zeova ratame tɩ y wa vɩɩmd wakat sẽn kõn sa dũni-paalgã pʋgẽ wã, y sũur pa yɩ noog sɩda? Y zãmsa Biiblã n bãng bũmb nins fãa a sẽn maan sẽn na yɩl n pids a raabã. Y bãngame t’a sẽn tʋm a Biigã tẽngã zug tõnd yĩngã yaa kũun-kãseng a sẽn kõ-do. (Matiye 20:28; Zã 8:29; Rom dãmbã 5:12, 18) Yãmb sẽn bãng t’a Zeova sɩd nong-y-la wʋsgã, kɩtame tɩ yãmb me nong-a ne y sũur fãa.—Karm-y 1 Zã 4:9, 10, MN.

6. Y sã n nong neda, bõe la y segd n maane? Y sẽn nong a Zeova wã kɩtame tɩ y maan bõe?

 ⁶ Yãmb sã n yeel y zoa tɩ y nong-a lame, yaa sõma. La rẽ bal pa sek ye. Y sẽn nong-a wã segd n kɩtame tɩ y rat n maan bũmb nins sẽn noom-a. Yaa woto me ne a Zeova. Y sẽn nong-a wã yĩnga, y ratame tɩ y sẽn vɩ to-to wã ta a yam. Yãmb nonglmã ne-a wã sẽn wa n paasdẽ wã, y rɩka y meng n kõ-a. Woto rat n yeelame tɩ y pʋlmame tɩ y na n maana a raabã y yõor tɛka. (Karm-y Rom dãmb 14:7, 8, MN.) Y maanda wãn n tõog n pids y pʋlengã?

7. Tõnd sã n nong a Zeova, bõe la d na n maane? A Zeova noy kẽer la bʋse?

⁷ Tõnd sẽn nong a Zeova wã, d sakda a “noyã.” Bõe n wilgd rẽ? Yaa d sẽn tũud a sẽn yetã. D sẽn zãms Biiblã, d bãnga a Zeova sẽn dat tɩ d vɩɩmd to-to. Wala makre, a kisa rãam yũ tɩ looge, wagdem, ziri yagbo. A pa rat tɩ d kẽ ne ned sẽn pa d sɩd bɩ d paga, bɩ n bas yẽ n waoogd ned wall bõn-naandg ye.—1 Korẽnt rãmbã 5:11; 6:18; 10:14; Efɛɛz rãmbã 4:28; Kolos rãmbã 3:9.

8, 9. Yɛl kẽer taoore, noy takɩ sã n pa be, d maanda wãn n bãng a Zeova sẽn date? Rɩk-y makre.

⁸ D sã n dat n ta a Zeova yam, a noyã sakr bal pa sek ye. A pa kɩt tɩ b gʋls noy ka tɛka, tɩ sẽn yaa yell ning fãa wɛɛngẽ bɩ d tõe n yã noor sẽn wilgd d sẽn segd n maan ye. Dẽnd yɛl kẽer taoore, noy takɩ pa be ye. Sã n wa yaa woto, d maanda wãn n  yãk yam-sõngo? (Efɛɛz rãmbã 5:17) No-yẽg n be Biiblã pʋgẽ, n tõe n sõng tõnd tɩ d bãng a sẽn date. D sã n karemd Biiblã, d bãngda a Zeova sõma, a sẽn nong la a sẽn kisi, la a tagsg sẽn yaa a soab bũmb kẽer wɛɛngẽ.—Karm-y Yɩɩn-sõamyã 97:10; Yel-bũnã 6:16-19; ges-y Vẽnegr a 1.

⁹ Wala makre, d maanda wãn n bãng d sẽn tõe n ges bũmb ning tele wã bɩ ẽnternetã pʋgẽ tɩ pa sãam a Zeova sũuri? A Zeova pa wilg d sẽn segd n maanã takɩ ye. La a kõo noy la sagls sẽn tõe n sõng-do. Rũndã-rũndã, filim-dãmbã ne reem wʋsg wilgda nen-kɛglem tʋʋm la yoob yɛla. Biiblã pʋgẽ, a Zeova yeta tõnd tɩ yẽ “kisa sẽn maand-b taab pãngã,” la t’a na n “kaoa sẽn tʋmd-b raglem tʋʋmã ne yoaadbã bʋʋdo.” (Yɩɩn-sõamyã 11:5; Ebre-rãmbã 13:4, MN) Wãn to la sagl-kãensã tõe n sõng-do? Tõnd sã n bãng bũmb nins a Zeova sẽn kisã, tõnd me segd n kisga rẽ.

10, 11. Bõe yĩng tɩ d sakd n tũud a Zeova sẽn yetã?

¹⁰ Bõe yĩng tɩ d sakd n tũud a Zeova sẽn yetã? Pa sẽn na yɩl n põs sɩbgre, bɩ zu-loees nins kɩɩsgã sẽn wat ne wã bal ye. (Galat rãmbã 6:7) Yaa d sẽn nong-a wã yĩnga. Wa biig sẽn dat t’a ba sũur yɩ noog ne-a wã, tõnd me ratame tɩ d saasẽ Ba wã sũur yɩ noog ne-do. D sã n miẽ tɩ d tata a Zeova yam, d sũur noomame. Bũmb kae t’a yõodã ta rẽ ye.—Yɩɩn-sõamyã 5:13; Yel-bũnã 12:2; ges-y Vẽnegr a 2.

¹¹ Tõnd pa sakd a Zeova noog wakat bala, bɩ d  sẽn wat n pa tar d sẽn maand ye. D leb n pa yãkd d sẽn na n tũ noy ninsi, la d sẽn pa na n tũ b rãmb ye. (Tõodo 13:1) D sakda a Zeova zãng-zãnga. Yɩɩn-gʋlsdã yeelame: “Mam maanda sũ-noog ne yãmb noyã. Mam nong-b-la hal wʋsgo.” (Yɩɩn-sõamyã 119:47; Rom dãmbã 6:17) D ratame n dɩk a Nowe togs-n-taare. A wilgame t’a nonga a Zeova. Biiblã yeelame t’a “sɩd maana” bũmb nins fãa Wẽnnaam sẽn yeel-a t’a maanã. (Sɩngre 6:22) Yãmb pa rat t’a Zeova yeel tɩ yãmb me maana bũmb nins fãa a sẽn datã sɩda?

12. Bõe la d tõe n maan t’a Zeova sũur yɩ noogo?

¹² Tõnd sã n sakd a Zeova sẽn yetã, tõnd na n ‘nooga a sũuri.’ (Yel-bũnã 11:20; 27:11) Tags-y n ges-y! Tõnd tõe n nooga ãndũniyã fãa Naandã sũuri. Baasgo, a kõo ned kam fãa sor t’a tõe n yãk a sã n na n maana sẽn yaa tɩrga, bɩ sẽn yaa wẽnga. A Zeova ratame tɩ d yãk yam n maan sẽn yaa sõma, d sẽn nong-a wã yĩnga. Dẽ, d vɩɩmã na n talla barka.—Tõodo 30:15, 16, 19, 20; ges-y Vẽnegr a 3.

13, 14. Bõe yĩng tɩ d tõe n yeel tɩ Wẽnnaam noyã sakr pa toogo? Rɩk-y makre.

¹³ Tõe tɩ d wa tagsdẽ t’a Zeova noyã tũub yaa toogo, wall tɩ na n kɩtame tɩ d pa tõe n maan d sẽn dat ye. La Biiblã yeta vẽeneg yaa: “Bãmb noyã sakr yaool n pa toog ye.” (1 Zã 5:3, MN) Gɛrk gom-bil ning b sẽn lebg tɩ “toogã” võor yaa “zɩsgo.” Vɛrse- rãmb kẽer pʋgẽ, b ninga gom-bil-kãnga, sẽn na yɩl n bilg noy tũub sẽn pa nana, bɩ neb sẽn weoogd b taabã tɩ pa nana ye. (Matiye 23:4; Tʋʋma 20:29, 30) A Zeova noyã pa “zɩs” ye. B sakr pa toog ye. A sẽn kot tõnd bũmb ningã pa yɩɩd d pãng ye.

¹⁴ Wala makre, yãmb zoa n dat n toeem zaka, tɩ yãmb sõngd-a n wʋkd a teedã. A saga a teedã kartõ-rãmb pʋsẽ. Kẽer faasame, tɩ b rɩkr yaa nana. La sãnda zɩsame, tɩ nin-yend pa tõe n tebg ye. Rẽ yĩnga, y zoa wã na n kosa yãmb tɩ y wʋk kartõ-zɩsdã y yembr sɩda? Ayo. Bala a pa rat tɩ y koms ye. Woto me, a Zeova kõn tol n yeel tõnd tɩ d maan bũmb sẽn yɩɩd d pãng ye. (Tõodo 30:11-14) A Zeova miime tɩ ninsaal pãngã tara koaka. A ‘mii a sẽn tall bũmb ning n naan tõndo. A tẽrame tɩ tõnd yaa tẽng tom.’—Yɩɩn-sõamyã 103:14.

15. Bõe yĩng tɩ d tõe n kɩs sɩd t’a Zeova sẽn kõ-d noyã yaa tõnd neer yĩnga?

¹⁵ A Moyiiz ra yeela Israyɛll nebã t’a Zeova tõodã yaa sẽn na yɩl tɩ b “paam sũ-noog daar fãa,” la tɩ b sã n sak-ba, b na ‘kell n vɩɩmde.’ (Tõodo 5:28-33; 6:24) Yaa woto me rũndã-rũndã. Bũmb ning fãa a Zeova sẽn yet tɩ d maanã na n kɩtame tɩ d vɩɩmã tall barka. (Karm-y Ezayi 48:17.) A Zeova sẽn yaa d Ba wã mii sẽn yaa sõma ne tõndo. (Rom dãmbã 11:33) Biiblã yetame: “Wẽnnaam yaa nonglem.” (1 Zã 4:8, MN) Woto rat n yeelame t’a Zeova sẽn kõ tõnd a noyã, la bũmb nins fãa a sẽn maandã yaa a sẽn nong-dã yĩnga.

16. Baa d sẽn pa zems zãngã, n vɩ dũni-wẽng pʋgẽ wã, bõe n kɩt tɩ d miẽ tɩ d tõe n yɩɩ wẽn-sakdba?

 ¹⁶ Pa wakat fãa la Wẽnnaam noyã sakr yaa nana ye. D vɩɩ a Sʋɩtãan dũni-wẽngã pʋgẽ. A pirsda nebã tɩ b maand sẽn yaa wẽnga. (1 Zã 5:19) Sẽn paase, d sẽn pa zems zãngã, d sũurã tagsa wã la d tʋlsmã tõe n wa kɩtame tɩ d kɩɩs Wẽnnaam. (Rom dãmbã 7:21-25) La d sẽn nong-a wã yĩnga, kõta tõnd pãng tɩ d maand sẽn yaa tɩrga. A nee tõnd sẽn modgd n sakd a noyã. A na n kõo tõnd a vʋʋsem sõngã tɩ sõng-do. (1 Sãmwɛll 15:22, 23; Tʋʋma 5:32) Vʋʋsem sõngã na n sõnga tõnd tɩ d bɩɩs zʋg-sõma sẽn na n kɩt tɩ Wẽnnaam noyã sakr lebg nana.—Galat rãmbã 5:22, 23.

17, 18. a) Bõe la d na n bãng seb-kãngã pʋgẽ? b) Bõe la d na n yã sak ning sẽn pʋgdã pʋgẽ?

¹⁷ Seb-kãngã pʋgẽ, d na n yãa d sẽn tõe n vɩɩmd to-to tɩ ta a Zeova yam. D na n yãa d sẽn tõe n tũ Biiblã no-yẽgã to-to, la noy nins a sẽn lugl sõma la wẽngã wɛɛngẽ wã to-to. D tẽeg t’a Zeova pa modgd tõnd tɩ d sak-a ye. La d sã n sak-a, d vɩɩmã na n talla barka, d beoog me na n yɩɩ neere. La sẽn yɩɩda, d na n wilgame tɩ d nong-a lame.—Ges-y Vẽnegr a 4.

¹⁸ A Zeova kõo tõnd sũur-kaseto, sẽn na yɩl n sõng tõnd tɩ d bãng sẽn yaa sõma ne wẽng n bake. D sã n kibl d sũur-kasetã sõma, a na n sõnga tõnd tɩ d ‘sak a Zeova noyã.’ Sũur-kaset yaa bõe, la wãn to la d tõe n kibl-a? D na n yãa rẽ sak ning sẽn pʋgdã pʋgẽ.