Pipi Korẽnt dãmb 6:1-8 pʋgẽ, tʋm-tʋmd a Poll goma kiris-neb sẽn boond b tẽed-n-taas bʋʋd yelle. A wilgame t’a sũur sãamame, bala Korẽnt kiris-neb kẽer saka b na tall taab n kẽng “dũniyã rãmb nengẽ tɩ b bʋ.” (Vɛrse a 1) A Poll wilga bʋʋm ning sẽn kɩt tɩ kiris-nebã segd n welg b yɛlã tigingã pʋgẽ la b ra tall taab n kẽng dũniyã bʋ-kaoodb taoorã. Bɩ d ges bʋʋm nins sẽn kɩt tɩ b kõ sagl-kãngã wã, la d ges yɛl kẽer pʋsẽ sẽn pa tɩlae tɩ d tũ sagl-kãngã.

D sã n tar ligd yell ne d tẽed-n-taaga, d segd n deng n bao n bãnga d sẽn na n welg yellã to-to tɩ zems ne a Zeova raabã. (Yelbũna 14:12) A Zezi wilgame tɩ yɩta sõma tɩ d welg yel-bõonegã tao-tao tɩ ra wa lebg yel-kãsems ye. (Matɩe 5:23-26) Zu-bʋko, kiris-neb kẽer zabda taab hal n tall taab n kẽng dũniyã bʋ-kaoodb nengẽ. A Poll yeela woto: “Yãmb kongda wʋsgo yãmb sẽn boond taab bʋʋd dũniyã bʋ-kaoodbã nengẽ wã.” Bõe yĩng t’a yeel woto? Yaa tɩ sẽn yɩɩd fãa woto sãamda tigingã yʋʋre, la paoogd Wẽnnaam. Bɩ d tags sokr ning a Poll sẽn sokã zug neere. A sokame tɩ “yaa bõe tɩ yãmb ka sak tɩ b maan yãmb sẽn ka tɩrga?”—Vɛrse a 7.

A Poll yeelame me tɩ Wẽnnaam kõo tigingã sõngr tɩ b tõe n welg yɛl wʋsgo. Tigingã pʋgẽ kãsem dãmbã yaa neb sẽn tar yam b sẽn mi Wẽnnaam Gomdã sõma wã yĩnga. A Poll yeelame tɩ b tara yam n “tõe n kao yɛlã bʋʋd [b] ba-biis sʋka,” baa ne “vɩɩm kãngã yɛla.” (Vɛrse a 3-5) A Zezi wilgame tɩ sẽn na yɩl n welg yel-kãsems wala kãnegr la zãmbã, y tõe n maana bũmb a tãabo: Pipi, y segd n modg n welga yellã yãmb ne taab sʋka. Yiib-n-soaba, rẽ sã n pa yãk nenga y segd n baoa ned a ye bɩ a yiib tɩ b yɩ kaset rãmba. Tãab-n-soaba, rẽ  me sã n pa yãk nenga y segd n dɩka yellã n taas tigingã kãsem dãmba.—Matɩe 18:15-17.

D bãng tɩ kãsem dãmbã pa avoka rãmba, b leb n pa omdafɛɛr dãmb me ye. Rẽnd pa bãmb n na n wilg ligd bɩ samd sẽn segd n yao to-to takɩ ye. La b na n modgame n sõng neb nins sẽn tar yell ne taabã tɩ b tũ Biiblã noy n welg yellã ne nonglem. Yell welgr sã n wa yaa toog wʋsgo, b tõe n kosa tigims sull yel-gɛtã bɩ filiyallã yel-gɛtb saglse. La yɛl kẽer pʋsẽ, pa tɩlae tɩ d tũ a Poll saglgã ye. Yel-kãens kẽer la bʋse?

Yɛl kẽer pʋsẽ, tõe n yaa tɩlae tɩ y kẽng bʋ-kaoodbã nengẽ. Wala makre, tõe n yɩɩ tɩlae tɩ y kẽng bʋ-kaoodb taoor sẽn na yɩl n paam kãadem kaoob sebre, n paam sor n ges y kamb yell y kãadem kaoob poore, la y paam tɩ b yaood-y ligd sẽn na yɩl n ges y meng ne y kamb yelle, n paam tɩ y asirãns yao-yã, bɩ sẽn na yɩl n maneg yɛl a taaba. Wakat ning me tõe n yɩɩ tɩlae tɩ kiris-ned lebg n bool ned sẽn da zoe n bool-a bʋʋd bʋʋdo, sẽn na yɩl tɩ b sõng-a. *

Sã n mik tɩ pa f sẽn dat zabr yĩng n kɩt tɩ f baood bʋ-kaoodbã sõngrã, f pa kɩɩsd a Poll saglgã ye. * La sẽn segd n pak kiris-ned n yɩɩd yaa a Zeova yʋʋrã waoogre, la zems-n-taar ning sẽn be tigingã neb sʋkã koglgo. Sẽn yɩɩd fãa, yaa nonglmã n kɩtd tɩ b bãng a Zezi karen-biis hakɩkã n welge, la “nonglem . . . ka baood a meng sõngr bal ye.”—1 Korẽnt dãmba 13:4, 5; Zã 13:34, 35.