1, 2. a) Togs-y bõn-kãseng sẽn maane, hal tɩ pak dũniyã gill neb fãa. b) Bõe yĩng tɩ ninsaal baa a ye sẽn pa yã bũmb ning sẽn maanã pa lingri?

MAMS-Y wa yãmb sẽn na n karemd sebr sẽn gomd yell sẽn zĩnd pĩnda, hal n kɩt tɩ ninsaalbã vɩɩm toeem wʋsgo, wala makre, naab sikri, tɩ y yamẽ wã bɩ y tagsd y sã n da paam n yãẽ yel-kãngã. La bãng-y tɩ baa y sã n da zĩndẽ be, tõeeme tɩ y pa paam n yã bũmb nins fãa sẽn maanã ye. Sɩd me, yel-kãsems sẽn maan pĩnd wẽndẽ wã, tɩ b gʋls tɩ be kʋdemdã sɛb pʋsẽ maaname tɩ neb wʋsg sẽn da vɩ wakat kãnga pa yã ye. Baa yellã sã n da paka neb ka tɛka, tõe tɩ yaa sẽn da be-b na-zagsẽ wã bal n yã.

² La rẽ yĩnga, yãmb miime tɩ bũmb n maane, hal tɩ pak dũniyã gill neb fãa? Yaa bũmb sẽn toeem neb milyõ rãmb vɩɩm. A buud ra zɩ n maan ye. Ninsaal baa a ye pa yã bũmb ning sẽn maanã ye. Yaa bõe? Yaa Wẽnnaam Rĩungã luglg saasẽ wã. Hal daar zãra, Wẽnnaam da pʋlmame t’a na n kɩtame tɩ Mesi wã reeg naam, la a sãam dũni-wẽng kãngã. (Karm-y Daniɛll 2:34, 35, 44, 45.) La sẽn mik tɩ ninsaal baa a ye pa yã Rĩungã luglgã, rat n yeelame tɩ Wẽnnaam pa sõng a nin-buiidã tɩ b segl b mens rẽ yĩng bɩ? Bɩ d ges sẽn yɩ to-to.

3-5. a) Malaki 3:1 pʋgẽ, yaa ãnd la b sẽn bool tɩ ‘kaoolã koɛɛg soabã?’ b) Nand tɩ ‘kaoolã koɛɛg soabã’ wa, bõe n da na n maane?

³ Hal pĩnd wẽndẽ, a Zeova reng n togsame t’a na n sõnga a nin-buiidã tɩ b segl b mens Mesi wã Rĩung luglg yĩnga. Malaki 3:1 yetame: “Gese, mam na n tʋma m tʋm-tʋmd t’a reng taoor n maneg sor mam yĩnga. La yãmb sẽn baood Zu-soab ningã na n waa bãmb doogã pʋgẽ tao-tao. Gese, kaoolã koɛɛg soab yãmb sẽn datã watame.”

⁴ Yɩɩ wakat bʋg la a Zeova sẽn yaa ‘Zu-soabã’ wa a roogẽ wã, n na n ges sẽn be-b be wã sã n tũuda yẽ ne b sũy fãa? Bãngr-gomdã yetame t’a Zeova ne “kaoolã koɛɛg soab” na n tũu taab n wa. Yaa ãnd la kaoolã koɛɛg soabã? Yaa a Zezi  Kirist sẽn yaa Rĩungã Rĩmã. (Luk 1:68-73) A Zezi sẽn deeg naam paalem, a wa n gesa Wẽnnaam nin-buiidã sẽn be tẽngã zugã, la a yɩlg-ba.—1 Pɩɛ. 4:7.

⁵ La Malaki 3:1 gomda “tʋm-tʋmd” yelle. Yaa ãnd la tʋm-tʋm-kãngã? Tʋm-tʋmdã ra tog n deng n waame tɩ Wẽnnaam Rĩungã Rĩmã yaool n wa. La rẽ yĩnga, yʋʋm nins sẽn deng yʋʋmd 1914, b ‘manega sor’ Rĩungã Rĩm yĩng bɩ?

6. Yaa ãnd la “tʋm-tʋmd” ning sẽn na n deng taoor n sõng Wẽnnaam nin-buiidã tɩ b segl b mens yɛl nins sẽn da watã yĩngã?

⁶ Seb-kãngã pʋgẽ, d na n goma a Zeova rũndã-rũndã nin-buiidã yelle, tɩ rẽ sõng-d tɩ d paam sogs-kãensã leoore. Sẽn deng yʋʋmd 1900 wã, sul-bil n welg n bas kiris-neb ne yʋʋrã. Ra lebga bãmb bal la kiris-neb hakɩkã. B wa n boond-b lame tɩ Biiblã Zãmsdbã. A Charles Russell ne a tʋmd-n-taasã n da yaa sullã taoor-lʋɩtba. Yɩɩ bãmb la “tʋm-tʋmd” ning yell a Malaki sẽn gomã. B sõnga Wẽnnaam nin-buiidã tɩ b paam bũmb nins sẽn yaa tɩlae b tẽebã kengr yĩngã, la b sõng-b tɩ b segl b mens yɛl sẽn da wat yĩnga. Bɩ d ges bũmb a naas “tʋm-tʋmdã” sẽn maane, Wẽnnaam nin-buiidã sõngr yĩnga.

7, 8. a) Yʋʋmd 1800 wã poore, ãnd dãmb n da wilgd tɩ “sɩɩg pa kiidã” pa sɩda? b) Togs-y bũmb kẽer a Russell ne a tʋmd-n-taasã sẽn sõng nebã tɩ b bãng tɩ yaa ziri.

⁷ Biiblã Zãmsdbã ra yãkda gom-zugu, n pʋʋs Wẽnnaam, n naag taab n bao a võorã Biiblã pʋgẽ, tɩ b sã n wʋm a võorã sõma bɩ b gʋls n wa yiis sɛb pʋsẽ neb a taabã yĩnga. Wẽnnaam tũubã wɛɛngẽ, kiris-neb ne yʋʋrã ra bee lik pʋgẽ na maan yʋʋm kobse. Bũmb wʋsg b sẽn da zãmsd nebã ra yita pĩnd wẽndẽ ziri tũudum toɛy-toɛyã pʋsẽ. Wala makre, b ra zãmsda nebã tɩ ninsaal tara sɩɩg sẽn pa kiidi. La yʋʋmd 1850 wã sẽnese, neb sẽn sɩd ra rat n wʋm Biiblã goam võor maaga b yĩng n zãms-a, n bãng tɩ Wẽnnaam Gomdã pa yet tɩ ninsaal tara sɩɩg sẽn pa kiid ye. A Henry Grew, a George Stetson la a George Storrs yiisa sɛb n wilg vẽeneg tɩ “sɩɩg pa kiidã” yaa zãmsg Sʋɩtãanã sẽn wa ne. * Nin-kãensã sɛbã sõnga a Russell ne a tʋmd-n-taasã tɩ b maneg n wʋm Biiblã goamã võore.

⁸ A Charles Russell ne a tʋmd-n-taasã sẽn da zãmsd Biiblã leb n bãngame tɩ “sɩɩg pa kiidã” sã n yaa ziri, dẽnd kiris-neb ne yʋʋrã sẽn da yet tɩ nin-sõmã wã rabda saasẽ, la tɩ Wẽnnaam namsda nin-wẽnsã sɩɩs bugum yirã me yaa ziri. Bala zãmsg kãensã fãa ra tũuda taaba. A Russell ne a tʋmd-n-taasã yiisa sɛb la seb-vãado, la b gʋls zʋrno rãmb pʋsẽ n wilg vẽeneg tɩ b sẽn zãmsd nebã bũmb ningã yaa ziri.

9. Bõe la b yeel Gũusg Gasgã pʋgẽ, tɩ wilg vẽeneg tɩ Tãablmã yaa ziri?

⁹ Sẽn paase, b wilgame tɩ nebã sẽn tẽed tɩ Ba la Biig la vʋʋsem sõngã naaga taab n yaa Wẽndã yaa ziri. Yʋʋmd 1887 wã, Gũusg Gasgã * yeela woto: “Gʋlsg Sõamyã wilgda  vẽeneg t’a Zeova ne tõnd Zu-soab a Zezi pa nin-yɛnga, la t’a Zeova yɩɩda a Zezi.” Sebrã paasame: “Dũniyã gill zugu, kiris-neb ne yʋʋrã yaool n tẽedame tɩ Ba la Biig la vʋʋsem sõngã naaga taab n yaa Wẽnde. Sɩd yaa lingr menga. La woto fãa wilgdame tɩ Wẽnnaam tũubã wɛɛngẽ, kiris-neb ne yʋʋrã taoor dãmbã pa maan gũusgu, hal tɩ bɛ wã tudg-b fasɩ.”

10. Wãn to la Gũusg Gasgã wilg tɩ bõn-kãseng n da na n maan yʋʋmd 1914?

¹⁰ Gũusg Gasgã yʋʋr sẽn da yaa to-to wã ra wilgdame t’a yiisdbã ra baooda ne b sũy fãa n na n wʋm bãngr-goam nins sẽn da gomd Kirist waoongã yellã võore. Nin-kãensã ra yaa kiris-neb sẽn paam vʋʋsem sõngã zaeebo. B bãngame t’a Daniɛll sẽn da reng n gom “wakat a yopoe” wã yellã ne wakat ning Wẽnnaam sẽn da na n lugl a Rĩungã saasẽ wã yaa wakat yɛnga. Rẽ kɩtame tɩ hal yʋʋmd 1876, b wilga vẽeneg tɩ wakat a yopoe wã na n saa yʋʋmd 1914. (Dan. 4:25; Luk 21:24) Wakat kãnga, saam-biisã ra pa mi bũmb nins fãa sẽn na n maan yʋʋm-kãngã ye. Baasgo, b moona  b sẽn da mi bũmb ningã zĩig fãa, hal tɩ d ne a yõodã rũndã menga.

11, 12. a) Yaa ãnd dãmb la saam-biig a Russell pẽg-yã? b) A Russell ne a tʋmd-n-taasã sẽn tʋm tʋʋmd ning sẽn deng yʋʋmd 1914 yõod taa zĩ-bʋgo?

¹¹ Baa ne saam-biig a Russell ne a tʋmd-n-taasã sẽn tõog n maan vaeesg n wʋm yel-kãensã võorã, b zɩ n pẽg b mens ye. A Russell pẽga sẽn deng-b yẽ wã. La sẽn yɩɩda, a pẽga Wẽnnaam a Zeova, bala yaa yẽ n sõngd a nin-buiidã tɩ b bãngd bũmb nins b sẽn segd n bãngã, wakat sẽn zemse. Yaa vẽeneg t’a Russell ne a tʋmd-n-taasã sẽn modg n na n bãng sɩdã n welg ne ziri wã, a Zeova ninga b modgrã barka.

¹² Nand tɩ yʋʋmd 1914 ta wã, tʋʋmd ning nin-kãensã sẽn tʋm sẽn na yɩl n puk sɩdã yɩɩ tʋʋm-kẽeng menga. Yʋʋmd 1917 sɩpaolg kiuug pipi daar Gũusg Gasgã pʋgẽ, b yetame: “Rũndã-rũndã, neb milyõ rãmb paama b mens ne zãmsg buud toor-toor sẽn pa sɩda, la sẽn da kẽesd rabeem, wala makre bugum yirã . . . Na maan yʋʋm pis-naase, sɩdã tara pukri, la a na n kell n pukame hal n ta dũniyã gilli. Tõe tɩ sɩdã bɛɛb na n makame n gɩdg sɩdã t’a ra ta dũniyã gill zug ye. La b kõn tol n tõog ye. Bala yaa wa ned sẽn dɩk roog-saag n dat n gɩdg ko-kãsengã ko-pɛm.”

13, 14. a) Wãn to la ‘tʋm-tʋmdã’ reng taoor n maneg sor Rĩungã Rĩm yĩnga? b) Mak-sõng bʋg la saam-biis nins sẽn zĩnd na maan yʋʋm koabg masã wã kõ tõndo?

¹³ Tags-y n ges-y: Neb nins sẽn segl b mens Rĩungã luglg yĩngã sã n da pa mi t’a Zeova ne a Zezi pa nin-yende, b ra na n tõog n segla b mens sɩda? Yaa vẽeneg tɩ b ra pa na n tõog ye. Sã n da mikame me tɩ b ra tẽedame tɩ vɩ n pa kiidẽ wã yaa bũmb ned buud fãa sẽn dog ne, la tɩ pa kũun b sẽn kõt neb sẽn tũud a Zezi, b ra pa na n tõog n segl b mens ye. B sã n da tẽed me tɩ Wẽnnaam ningda nebã bugmẽ, tɩ b be be n namsdẽ n pa na n tol n paam fãagre, ra na n yɩɩ toog tɩ b tõog n segl b mense. Dẽnd sãmbg sẽn kae, “tʋm-tʋmdã” renga taoor n maneg sorã Mesi wã Rĩungã Rĩm yĩnga.

¹⁴ La yam bʋg la d tõe n dɩk saam-biisã sẽn vɩɩmd na maan yʋʋm koabg masã wã mak-sõngã pʋgẽ? Tõnd me segd n yɩɩ neb sẽn nong Wẽnnaam Gomdã kareng la a bʋgsgo. (Zã 17:3) Wẽnnaam tũubã wɛɛngẽ, dũni-kãngã nebã tara poorẽ lebr bala. Bɩ d ra maan wa bãmb ye. D modg tɩ d sẽn nong Wẽnnaam Gomdã to-to wã ket n paasdẽ.—Karm-y 1 Tɩmote 4:15.

15. Bilf-bilfã, bõe la Biiblã Zãmsdbã wa n bãnge? (Ges-y vẽnegrã me.)

¹⁵ Biiblã Zãmsdbã wilgame tɩ yaa tɩlae tɩ b lak n bas kiris-neb ne yʋʋrã. Yʋʋmd 1879, Gũusg Gasgã goma “Babilon tũudum” yelle. Yaa pap rãmbã yell la a sẽn da gomdã bɩ, bɩ yaa katolik tũudmã? Na maan yʋʋm kobse, portɛstã-rãmbã ra yetame tɩ yaa katolik tũudmã la b  sẽn boond Biiblã pʋgẽ tɩ Babilonnã. La bilf-bilfu, Biiblã Zãmsdb wa n bãngame tɩ kiris-neb ne yʋʋrã fãa naaga “Babilon.” Bõe yĩnga? Bala, wa d sẽn yã yĩngrã, b fãa sẽn zãmsd nebã bũmb ninsã yaa ziri. * La tõnd sɛbã pʋsẽ, d wa n wilgda sũ-tɩrs rãmbã sẽn da ket Babilon pʋgẽ wã b sẽn segd n maanegã vẽenega.

16, 17. a) Bõe la b yeel L’Aurore du Millénium Volume III wã ne Gũusg Gasgã pʋgẽ, sẽn na yɩl tɩ nebã bãng tɩ b tog n laka b mens fasɩ ne ziri tũudmã? b) Bõe n kɩt tɩ saglgã pa tall pãng wʋsg sɩngrẽ wã? (Ges-y vẽnegrã.)

¹⁶ Wala makre, yʋʋmd 1891, L’Aurore du Millénium Volume III sebrã wilgame tɩ Wẽnnaam ka be ne rũndã-rũndã Babilonnã ye. B yeelame tɩ “Wẽnnaam basa kiris-neb ne yʋʋrã la b egiliiz rãmbã fãa.” Sebrã paasame tɩ neb nins fãa “sũy sẽn pa noom ne rũndã-rũndã Babilonnã zãmsgã sẽn yaa ziri wã la a tʋʋm-tʋmdɩ wã tog n yi n bas-a-la masã menga.”

¹⁷ Yʋʋmd 1900 yʋʋm-vẽkr kiuugã, Gũusg Gasgã sagla neb nins sẽn da nan ka yẽes b yʋyã kiris-neb ne yʋʋrã sɛbã pʋsẽ wã. Nin-kãens ra yetame tɩ b sakda sɩdã, la tɩ yaa wakat-wakat bal la b kẽnd tũudum a taabã tigissã. Sebrã soka woto: “Rẽ yĩnga zemsame tɩ ned karg a ye be Babilon t’a karg a to be yɩnga? Wẽnnaam sakr yaa woto sɩda? . . . A sẽn maandã nooma Wẽnnaam la tat a yam bɩ? Ayo. Ned sã n wilg vẽeneg t’a bee tũudum pʋgẽ, a maana kaool ne tũudum kãnga. A tog n saka noy nins kaoolã sẽn gãnegã wakat fãa, n tãag a sẽn na n le wa . . . wilg vẽeneg t’a pa rat n le yɩ tũudum kãng ned ye.” La tarẽ-n-tarẽ, saglgã tũub wa n lebga tɩlae. * Neb nins fãa sẽn tũud a Zeova wã tog n laka b mens fasɩ ne ziri tũudmã.

18. Bõe yĩng tɩ ra yaa tɩlae tɩ nebã yi n bas ‘Babilon-kãsengã?’

¹⁸ B sã n da pa keoogd nebã n yɩlemdẽ tɩ b yi n bas “Babilon kãsengã,” rẽ yĩnga Kirist sẽn da reeg naam paalmã ra na n paama neb tẽngã zugu, sẽn paam vʋʋsem sõngã zaeeb sɩda? Ayo. Bala yaa kiris-neb nins sẽn yi n bas Babilonnã bal n da tõe n waoog a Zeova “ne b sɩɩse la ne sɩda.” (Zã 4:24) Rẽ yĩnga, tõnd me yãka yam n na n kell n zãag d mens fasɩ ne ziri tũudmã bɩ? Bɩ d sak saglg ning a Zeova sẽn kõ-dã. A yeelame: “Mam neba, bɩ y yi yẽ pʋgẽ.”—Karm-y Wilgr 18:4.

19, 20. Bõe la b yeel Gũusg Gasgã pʋgẽ, n na n sagl Wẽnnaam nin-buiidã tɩ b tigimd taab n waoogd a Zeova?

¹⁹ Biiblã Zãmsdbã ra yetame tɩ saam-biisã sã n tõe fãa, bɩ b tigimd taab n waoogd a Zeova. Kiris-neb hakɩkã ra getame tɩ yi n bas ziri tũudmã bal pa sek ye. Ra yaa tɩlae tɩ b kẽes b mens zãng tũudum hakɩkã yɛlẽ. B sẽn sɩng n yiisd Gũusg Gasgã tɛka, b sagenda karemdbã tɩ b tigimd taab n waoogd a Zeova. Wala makre, yʋʋmd 1880 sẽoog kiuugã, saam-biig a Russell goma a sẽn da gilgd n kaagd saam-biisã  yelle, n wilg tɩ tigissã sɩd kengda raoodo. A yeela Gũusg Gasgã karemdbã tɩ b toond lɛta tɩ b bãng modgr nins fãa b sẽn maandã, tɩ b na n yiisa lɛta kẽer Gũusg Gasgã pʋgẽ. Bõe yĩnga? A yeelame: “D fãa ratame n bãng . . . Zu-soabã sẽn ningd yãmb bark to-to, la d bãng y sã n ket n tigimda ne neb nins sẽn tar tẽeb wa yãmbã.”

²⁰ Yʋʋmd 1882 wã, Gũusg Gasgã sõsg a ye gom-zug n da yaa: “Tigimd-y taaba.” B sagla kiris-nebã tɩ b tigimd taaba, n paam n “tẽeg taab yelle, n keng taab tẽeb la b keng taab raoodo.” B paasame: “Ned kam fãa sã n wat tigissã, bɩ a zã a meng Biibli, sebr la gʋls-moogo, n paas sɛb buud fãa sẽn tõe n sõng-a t’a wʋm Biiblã goam võore, baa a tagsd t’a pa karem n zãage. Yãk-y y sẽn na n sõs bũmb ning zugã. Pʋʋs-y Wẽnnaam n kos a vʋʋsem sõngã sor-wilgri, n paam n wʋm a võore. Rẽ poor bɩ y karem Biiblã ne sɛb a taabã, n bʋgse, la y ges yãmb sẽn wʋmd vɛrse rãmbã võorã sã n zemsa ne vɛrse rãmb a taaba. Y sã n maan woto, y na bãng sɩdã.”

21. Tigissã kẽnd la saam-biisã kaagr wɛɛngẽ, wãn to la Alezeni tigingã neb kõ mak-sõngo?

 ²¹ Biiblã Zãmsdbã biru-kãsengã ra bee Alezeni, Pɛnsilvani, Etazĩni soolmẽ wã. Be, saam-biisã ra kõta mak-sõngo, n tigimd taab wa Hebre dãmb 10:24, 25 sẽn sagend kiris-nebã. (Karm-y.) Yʋʋm wʋsg loogr poore, saam-biig a Charles Capen sẽn da kʋʋlã tẽega a sẽn da kẽnd tigissã. Rẽ t’a yaa biiga. A yeelame: “M ket n tẽra vɛrse a ye b sẽn da gʋls tigis-kãsengã lalg zugu. Vɛrse wã yeta woto: ‘Yãmb karen-saamb yaa a ye bala, la yãmb fãa yaa ba-biisi.’ Vɛrse kãngã kell n paa mam yamẽ wã. A Zeova Kaset rãmbã taoor dãmb pa tar waoogr yʋy ye.” (Mat. 23:8) Saam-biig a Capen ra tẽra zãmsgã sẽn da kẽed bãmb to-to wã me, sẽn da kengd b raoodã, n paas saam-biig a Russell sẽn da get tigingã ned fãa yell wa pe-kɩɩm sẽn get a piis yellã.

22. B sẽn sagl Wẽnnaam nin-buiidã tɩ b tigimd taabã, b manesem yɩɩ wãna, la yam bʋg la d tõe n dɩke?

²² Wẽn-sakdbã tũu mak-sõngã la sagls nins b sẽn kõ-bã. Rẽ kɩtame tɩ b tõog n lugl tigims zĩis wʋsgo. Wala makre Ohio, Misigãn, Amerikdinoor zĩis wʋsgo, la tẽns a taaba. Wẽn-sakdbã sã n da pa paam sõngr n tõog n tigimd taab n waoogd a Zeova, rẽ yĩnga b ra na n tõog n segla b mens Wẽnnaam Rĩungã luglg yĩng sɩda? Ayo. Yam bʋg la d tõe n dɩke? Tõnd me tog n yãka yam n kẽnd tigissã n pa vaandẽ, la d bao segb buud fãa n tigimd taab n waoogd a Zeova la d kengd taab raoodo.

23. Bõe la b yeel Gũusg Gasgã pʋgẽ, tɩ wilg vẽeneg tɩ neb nins fãa sẽn paam vʋʋsem sõngã zaeeb segd n moona koɛɛgã?

²³ Biiblã Zãmsdbã wilgame tɩ neb nins fãa sẽn paam vʋʋsem sõngã zaeebã tog n moona koɛɛgã. Yʋʋmd 1885 wã, b yeela Gũusg Gasgã pʋgẽ woto: “D pa tog n yĩm tɩ Wẽnnaam sã n zae neda, yaa sẽn na yɩl t’a moon koɛɛgã. (Ezai 61:1) B zae-a-la tʋʋm-kãng yĩnga.” Yʋʋmd 1888 wã, b yeela Gũusg Gasg pʋgẽ yaa: “D mii b sẽn bobl tõnd tʋʋmd ningã . . . D sã n bao padems n pa maan-a, d wilgdame tɩ d yaa kʋɩɩmba, n pa le tog n naag sẽn zae-bã ye.”

24, 25. a) Mak-sõng bʋg la saam-biig a Russell ne a tʋmd-n-taasã kõ koɛɛgã mooneg wɛɛngẽ? b) So-pakd a ye yeelame tɩ yẽ ra maanda wãn n moond koɛɛgã?

²⁴ La saam-biig a Russell ne a tʋmd-n-taasã pa yeel b taabã bal tɩ b moon ye. B sɩngame n yiisd seb-vãad b sẽn da boond tɩ Tracts des Étudiants de la Bible. Kaoosg zugẽ, b wa n boondame tɩ Cahiers trimestriels de théologie ancienne. B ra kõta Gũusg Gasgã karemdbã tɩ b pʋɩt nebã zaalem.

²⁵ B ra boonda ned sẽn kẽes a meng zãng-zãng koɛɛgã mooneg pʋgẽ tɩ colporteur (so-pakda). A Charles Capen ra yaa so-pakda. A yeelame: “Etazĩni goosneemã ra maanda kart rãmba. Kart rãmbã zugu, b ra ninga soayã fãa, tɩ f ra tõe n get rẽ n paam n ta babg fãa ne nao. Sõnga maam tɩ m tõog n moon koɛɛgã Pɛnsilvani tẽngã pʋgẽ. Wakat ninga, m sã n kẽn nao rasem a tã n gilg n bãng neb nins sẽn dat Études des Écritures sɛbã, m luwaasda wed-moaag sarɛte, n zɩlg sɛbã n tɩ kõ-ba. M mii n paa weoogẽ wã ne ka-kaoodbã n gãand n vẽeg beoogo. Wakat kãng tɩ mobila wã ra yaa kar-kare.”

26. a) Bõe yĩng tɩ ra yaa tɩlae tɩ Wẽnnaam nin-buiidã bãng tɩ koɛɛgã mooneg tara yõodo? b) Bõe la ned kam fãa tog n sok a menga?

²⁶ Yaa vẽeneg tɩ woto fãa ra baooda raood la yẽesem. B sã n da pa sõng kiris-neb hakɩkã tɩ b bãng tɩ koɛɛgã mooneg tara yõodo, rẽ yĩnga b ra na n tõog n segla b mens Wẽnnaam Rĩungã luglg yĩng sɩda? Ayo. D ra yĩm tɩ koɛɛgã mooneg n pʋd n da na n wa wilg tɩ Kirist rɩta naam ye. (Mat. 24:14) Dẽnd ra yaa tɩlae tɩ b sõng Wẽnnaam nin-buiidã tɩ b tõog tɩ b vɩɩmã pʋgẽ bɩ yaa tʋʋm-kãngã sẽn fãagd yõyã n tar yõod n yɩɩda. Yɩta sõma tɩ d sok d mens woto: ‘Rẽ yĩnga, yaa koɛɛgã mooneg la m lʋɩɩsd taoor bɩ? M mongda m meng bũmb kẽer sẽn na yɩl n kẽes m meng sõma koɛɛgã mooneg pʋgẽ bɩ?’

27, 28. Bõe la Wẽnnaam vẽneg tʋm-tʋmd a Zã t’a yã? A Sʋɩtãan ne a zĩn-dãmbã manesem yɩɩ wãna, Wẽnnaam sẽn wa n lugl Rĩungã?

²⁷ Tarẽ-n-tarẽ, yʋʋmd 1914 b sẽn da gũudã wa n taame. Wa d sẽn yeel sakã sɩngrẽ wã, ninsaal baa a ye pa maan kaset ne bũmb nins sẽn maan saasẽ wã ye. La Wẽnnaam da pĩnd n tũnuga ne bõn-makre, n bilg tʋm-tʋmd a Zã yɛlã sẽn na n yɩ to-to wã. A Zã yãa bõn-kãseng sẽn maan saasẽ. Wẽnnaam “pagã,” rat n yeel tɩ malɛg-sõma wã sẽn naag  taabã, tʋtame. A wa n doga bi-ribla, sẽn na n “soog soolmã fãa ne kut da-saare.” Pagã rogem poor bala, b ‘zẽka biigã n kẽng Wẽnnaam nengẽ la bãmb geerẽ wã.’ La koe-kãseng zĩnda saasẽ n yeele: “Masã, fãagr ne pãng la tõnd Wẽnnaam soolem ne bãmb Kirist pãngã waame.”—Wil. 12:1, 5, 10.

²⁸ A Zã sẽn yã bũmb ningã ra bilgda Mesi wã Rĩungã luglgu. Rĩungã luglgã yɩɩ bõn-kãsengã. La pa nebã fãa sũy n da noom ye. A Sʋɩtãan ne a zĩn-dãmbã tɩ zaba ne malɛg-sõma wã sẽn sakd b taoor soabã sẽn yaa a Misɛll bɩ Kiristã. Zabrã baasa wãna? Biiblã yeela woto: ‘B riga dargõ kãsengã sẽn yaa wag-kʋdre sẽn boond tɩ diable la Sʋɩtãanã sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk rãmbã me tɩ b tũ yẽnda.’—Wil. 12:7, 9.

29, 30. Mesi wã Rĩungã luglg poore, bõe n toeeme, a) tẽngã zugu? b) la saasẽ?

²⁹ Yʋʋm wʋsg nand tɩ 1914 ta, Biiblã Zãmsdbã ra togsame tɩ tood n na n sɩng yʋʋmd 1914 tɛka. La b ra pa mi sẽn da na n yɩ to-to wã takɩ ye. A Zã sẽn yã bũmb ningã wilgdame t’a Sʋɩtãan na n maneg n namsa ninsaalbã. Ad a Zã sẽn yeele: “Toog bee ne neb nins sẽn be dũniyã zug la ko-kãsengã pʋgẽ wã. Tɩ bõe, Sʋɩtãanã sigame n wa yãmb nengẽ, la a sũ-puugrã yaa kãsenga, a sẽn bãng t’a wakat yaa bilfã yĩnga.” (Wil. 12:12) Yʋʋmd 1914, dũni gill pipi zabrã yikame. Rẽ tɛk la bãnd ning sẽn wilgd tɩ Kirist reega a naamã sɩng pukri. Dũni-kãngã ‘yaoolem wakatã’ sɩnga yʋʋm-kãnga.—2 Tɩm. 3:1.

³⁰ La sũ-noog ra bee saasẽ. B riga a Sʋɩtãan ne a zĩn-dãmbã tɩ b pa le tol n tõe n leb be ye. A Zã yeela woto: “Woto yĩnga [saasẽ, MN] la yãmb dãmb sẽn be be, bɩ y maan sũ-noogo.” (Wil. 12:12) A Zezi sẽn lebg Rĩma, la a rig kɩɩsdbã saasẽ wã, Mesi wã Rĩungã na n sɩngame masã n tʋmd Wẽnnaam nin-buiidã sẽn be tẽngã zugã neer yĩnga. Bõe la a Zezi na n deng n maane? Wa d sẽn yã sag-kãngã sɩngrẽ wã, ‘kaoolã koɛɛg soab’ na n deng n yɩlga Wẽnnaam nebã sẽn be tẽngã zugã. Woto rat n yeelame tɩ bõe?

31. Bõe la a Malaki reng n togs Wẽnnaam nebã yɩlgr wɛɛngẽ, la wãn to la rẽ sɩng pidsgu? (Ges-y vẽnegrã me.)

³¹ A Malaki da reng n togsame tɩ yɩlgr wakat n wate, la tɩ pa na n yɩ nana ye. Ad a sẽn yeele: “La bãmb sã n wa, yaa ãnda n tõe n kaoose? Ãnda n tõe n yalse? Tɩ bõe, bãmb na n yɩɩ wa boaag bugum la sãnfãnde.” (Mal. 3:2, 3) Gom-kãensã sɩd pidsame. Yʋʋmd 1914 tɛka, yɛl buud toor-toor n mak Wẽnnaam nin-buiidã tẽebã. Dũni gill pipi zabrã sasa, Biiblã Zãmsdbã wʋsg la b nams ne toom la b kẽes bãens rotẽ. *

32. Zu-loe-bʋs n nams Wẽnnaam nin-buiidã yʋʋmd 1916 poore?

³² Wẽnnaam nin-buiidã sʋk menga zu-loees zĩndame.  Yʋʋmd 1916, saam-biig a Russell maana kaalem t’a tar yʋʋm 64 bala. Wẽnnaam nin-buiidã sũy sãama wʋsgo. A kũumã poore, b bãngame tɩ kẽer ra waoogd-a lame tɩ loog noore. Neb kẽer ra maandame tɩ yaa wa yẽ la b tũuda. Saam-biig a Russell yaool n da pa rat woto ye. Neb wʋsg tagsame t’a sẽn ki wã, b ra pa na n le paam n wʋm Wẽnnaam goamã võor ye. Kẽer meng ra maanda b sẽn tõe n na n gɩdg siglgã tʋʋma. Manesem kãngã n kɩt tɩ sɩdã kɩɩsg kell n sɩnge, hal tɩ welg saam-biisã.

33. Wẽnnaam nin-buiidã sẽn da tẽed bũmb kẽer tɩ pa pidsã waa ne yel-bʋgo?

³³ La yell a to me n da be. Bũmb kẽer la b ra tẽeda, tɩ rẽ sẽn pa pidsã yɩ makre. Yaa sɩd tɩ b ra wilga vẽeneg Gũusg Gasgã pʋgẽ tɩ bu-zẽmsã wakat na n taa a tɛk yʋʋmd 1914. La saam-biisã ra nan pa mi bũmb nins sẽn na n maan yʋʋm-kãngã ye. (Luk 21:24) B ra tẽedame tɩ Kirist na n wa peega sẽn zae-bã n loog saasẽ, tɩ b tɩ rɩ naam ne yẽ. La pa yɩ woto ye. Yʋʋmd 1917 wã baasgẽ, Gũusg Gasg a ye pʋgẽ, b yeelame tɩ tigsg sẽn da na n kaoos yʋʋm 40 n sɩnge, la t’a na n saa yʋʋmd 1918 sɩngrẽ. Koɛɛgã mooneg yaool n pa yals yʋʋm-kãng ye. Rẽ n so tɩ b wilg Gũusg Gasgã pʋgẽ tɩ tigsgã tʋʋmd sɩd saame, la tɩ sẽn da ket yaa koodã yiisgu. Ne rẽ fãa neb wʋsg sũy sãamame, hal tɩ b bas a Zeova.

34. Mak-bʋg sẽn yɩ toaag n zĩnd yʋʋmd 1918 wã? Bõe yĩng tɩ kiris-neb ne yʋʋrã ra tẽed tɩ b pa na n le wʋm tɩ b gomd Wẽnnaam nin-buiidã yelle?

³⁴ La makr sẽn yɩ toaag n zĩnd yʋʋmd 1918. Saam-biig a Joseph Rutherford n da ledg saam-biig a Russell. B yõka yẽ ne saam-biis a yopoe. B rõd-b lame, n kẽes-b bãens roog Atlãnta sẽn be Zorzi, Etazĩni soolmẽ wã. Ra wõnda Wẽnnaam nin-buiidã tʋʋmd yalsame. Kiris-neb ne yʋʋrã taoor dãmb wʋsg sũy ra noomame. B ra tẽedame tɩ b sẽn yõg siglgã “taoor-lʋɩtbã” n page, tɩ biru-kãsengã sẽn be Burkilinã me page, tɩ koɛɛgã mooneg lebg yell Amerik la Erop tẽnsã pʋsẽ wã, b ra pa na le wʋm tɩ b gomd Biiblã Zãmsdbã yell abada. (Wil. 11:3, 7-10) Ad-b sɩd tudga wʋsgo!

35. Bõe yĩng t’a Zezi bas tɩ tood paam a nebã, la bõe la a maan n sõng-ba?

³⁵ Sɩdã bɛɛb ra pa mi tɩ yaa a Zeova sẽn dat n maan wa “ned sẽn ning wanzuri boaag pʋgẽ” wã yĩng la a Zezi sẽn bas tɩ woto fãa paam a nin-buiidã ye. (Mal. 3:3) A Zeova ne a Biigã ra kɩsa sɩd tɩ wẽn-sakdbã na n tõog n yii yel-kãensã sẽn mak b tẽebã pʋgẽ, n yɩ neb sẽn yɩlge, neb sẽn paam manegre, n na n tõog n tʋm Rĩmã tʋʋm n yɩɩd pĩndã. Yʋʋmd 1919 tɛka, lebga vẽeneg tɩ Wẽnnaam sẽn kɩt t’a vʋʋsem sõngã maanã yaa bũmb bɛɛbã sẽn da tagsd tɩ ra pa tõe n yɩ ye. A nin-buiidã le paama pãnga. (Wil. 11:11) Wakat kãnga, Kiristã maana bũmb b sẽn da wilg tɩ naaga yaoolem dayã bãnde. A yãka “tʋm-tʋmd sẽn tũud sɩd la sẽn tar  yamã.” Yaa rap sẽn paam vʋʋsem sõngã zaeeb sul-bila, sẽn lʋɩt taoor n sõngd a nin-buiidã tɩ b paamd bũmb nins sẽn yaa tɩlae b tẽebã kengr yĩngã, tɩ zemsd a wakate.—Mat. 24:45-47.

36. Bõe n wilgd tɩ Wẽnnaam nin-buiidã tẽeb ra ket n vɩɩme?

³⁶ Saam-biig a Rutherford ne a tʋmd-n-taasã yii bãensã roog yʋʋmd 1919, tʋʋlg kiuug rasem 26. Tao-tao bala, b sigla tigis-kãseng bõn-bɩʋʋng kiuugã. B leb n yãka yam n na n yiis sebr a to b sẽn da boond tɩ L’Âge d’Or. B ra yiisda seb-kãngã ne Gũusg Gasgã koɛɛgã mooneg yĩnga. Yʋʋm-kãnga, b yiisa sebr b sẽn da boond tɩ Bulletin. B boonda seb-kãng masã tɩ Rĩungã Tʋʋmde. B sẽn yiisd-a wã tɛka, a sõngdame tɩ koɛɛgã mooneg kẽngd taoore. Sãmbg kae tɩ yʋʋmd 1919 wã tɛka, zak-zak moonegã n lebg tʋʋmd ning sẽn tar yõod n yɩɩdã.

37. Yʋʋmd 1919 wã poore, bõe la kẽer maan tɩ ra wilgdẽ tɩ b pa sak Wẽnnaam?

³⁷ Koɛɛgã mooneg ra kɩtdame tɩ b bãng sẽn sɩd yaa-b Kiristã tʋm-tʋmdbã n bake. Bala wuk-m-mens rãmbã ne tɩtaam dãmbã ra pa sakd n moon koɛɛgã ye. Neb nins sẽn  da pa sakdã loogame. Yʋʋm nins sẽn pʋgl yʋʋmd 1919 wã, kẽer sũy yikame tɩ b yiis sɛb n kãneg wẽn-sakdbã, hal n tɩ naag neb nins sẽn da namsd-bã.

38. Kiris-neb hakɩkã sẽn paam tõogrã wilgda tõnd bõe?

³⁸ Baa ne zu-loe-kãensã, Kiristã tʋm-tʋmdbã sẽn be tẽngã zugã tẽebã kell n paama pãnga. Rẽ tɛkã, b sẽn tõog n maan bũmb ninsã fãa yaa kaset tɩ Wẽnnaam Rĩungã Rĩm rɩta naam. Wẽnnaam tũnuga ne a Biigã sẽn yaa Rĩungã Rĩmã, n kõ a nin-buiidã sõngr buud toor-toore, la a ning-b barka. Yaa rẽ n kɩt tɩ nin-kãensã sõor sẽn pa waooge, la b yaa neb sẽn pa zems zãngã paam tõogr a Sʋɩtãanã ne a dũni-wẽngã zugu.—Karm-y Ezai 54:17.

39, 40. a) Wilg-y bũmb kẽer sẽn be sebrã pʋgẽ. b) Wãn to la seb-kãngã zãmsg na n naf yãmba?

³⁹ B sẽn lugl Wẽnnaam Rĩungã saasẽ wã taa yʋʋm koabg masã. Sags nins sẽn pʋgdã pʋgẽ, d na n bao n bãnga bũmb nins Wẽnnaam Rĩungã sẽn maan tẽngã zug a luglgã tɛkã. Sebrã babg fãa na n goma bũmb Rĩungã sẽn maan tẽngã zugu. Sak fãa pʋgẽ, b paasa zĩ-gũbr sẽn na n sõng tõnd ned kam fãa t’a bãng tɩ Rĩungã sɩd luglame. Sebrã baasgẽ wã, b na n wilga bark nins d na n paam ka la bilfu, Rĩungã sã n wa sãam nin-wẽnsã, la a kɩt tɩ tẽngã lebg arzãna. La seb-kãngã zãmsg yõod na n yɩɩ bõe ne yãmb ned kam fãa?

⁴⁰ A Sʋɩtãan ratame tɩ d ra tẽ Wẽnnaam Rĩungã ye. La a Zeova ratame n keng d tẽebã, tɩ kogl-do, la kõ-d pãnga. (Ef. 6:16) Rẽ n so tɩ d rat tɩ y maag y yĩng n zãms seb-kãngã. Bɩ y mi n sok y meng woto: ‘Mam kɩsa sɩd tɩ Wẽnnaam Rĩungã sɩd beeme bɩ?’ Yaa yãmb sã n kɩs sɩd zãng-zãng tɩ Rĩungã beeme la y na n tõog n kell n yɩ wẽn-sakda, n teel Rĩungã n tãag wakat ning ned buud fãa sẽn na n yã tɩ Wẽnnaam Rĩungã sɩd beeme, la t’a Rĩmã rɩta naam!