1, 2. Wãn to la a Zeova vẽneg n togs a sẽn dat n maan bũmb ning ãdem-biisã yĩngã?

ROAGDB kẽer sã n dat n welg yell sẽn pak zakã rãmb fãa, b mi n basame tɩ biig fãa togs a sẽn tagsde. La b gũusdame. Pa bũmb fãa la b togsd kambã ye. Yaa bũmb ning b sẽn tagsd tɩ kambã tõe n wʋma a võorã bal la b togsd-ba.

² A Zeova me maana woto. Yɩɩ bilf-bilf la a vẽneg n togs a sẽn dat n maan bũmb ning ãdem-biisã yĩngã. La a sã n dat n vẽneg bũmb me, a getame tɩ zems a wakate. Bɩ d ges a sẽn maan to-to n togs bũmb kẽer Rĩungã wɛɛngẽ bilf-bilfu.

3, 4. A Zeova reng n pʋlmame tɩ ninsaalbã na n kɩɩsa yẽ bɩ? Wilg-y y leoorã võore.

³ Sɩngrẽ wã, a Zeova ra pa yãk yam n na n lugl Rĩung ye. Bõe yĩng tɩ d yet woto? Bala a Zeova pa reng n pʋlem tɩ ninsaalbã na n kɩɩsa yẽ ye. A naan-b lame tɩ b tõe n yãk yam b toore. A togsa a Ãdem ne a Hawa a sẽn naan-bã võore, n yeel woto: ‘Bɩ y rog kamb n pid dũniyã la y tõog-a.’ (Sɩng. 1:28) A Zeova yeel-b lame me tɩ b sak yẽ noyã sẽn wilgd sõma ne wẽng n bakã. (Sɩng. 2:16, 17) A Ãdem ne a Hawa ra tõe n yãka yam n kell n sak a Zeova. Bãmb ne b yagensã sã n da yɩ sakdba, Wẽnnaam da pa na n wa lugl Rĩungã, n kɩt tɩ Kiristã yɩ Rĩm sẽn na yɩl n pids a raabã ye. Hal n tãag rũndã, dũniyã ra na n pida ne neb sẽn zems zãnga, n waoogd a Zeova.

⁴ A Sʋɩtãan ne a Ãdem la a Hawa kɩɩsgã pa kɩt t’a Zeova sẽn da rat tɩ dũniyã pid ne neb sẽn zems zãngã viig ye. A pʋd n yãka a sẽn na n maan to-to t’a raabã pidi. A Zeova pa wa ned sẽn kẽ mobill n dɩk sore, n tɩ mik tɩ b kɛɛ tɩɩs n yẽd sorã t’a pa le tar a sẽn na n maan n ta a sẽn datẽ wã ye. A sã n yeel t’a na n maana bũmbu, baa fʋɩ pa tõe t’a raabã pa pid ye. (Karm-y Ezai 55:11.) A Zeova tara soay ka tɛk n tõe n pids a raabã, hal tɩ bũmb pa  gɩdg-a ye. * (Yik. 3:14, 15) A sã n ges tɩ yaa sõma tɩ neb nins sẽn tũud yẽ wã bãng a sẽn na n maan to-to n pids a raabã, a togsd-b lame.

5. Bõe la a Zeova maan sẽn na yɩl n welg yell ning sẽn zĩnd Edɛnnã?

⁵ Sẽn na yɩl n welg yell ning sẽn zĩnd Edɛnnã, a Zeova yãka yam n na n lugl Rĩungã. (Mat. 25:34) Kɩɩsgã poor bala, a togsa a sẽn na n tũ ne bũmb ning n kɩt tɩ ninsaalbã le paam b sẽn bõnã, t’a Sʋɩtãan sẽn tʋlg naamã tɩ wa ne namsg ningã fãa me sa. (Sɩng. 3:14-19) Baasgo, pa yɩ zĩig pʋgẽ la a Zeova vẽneg fãa n togs ye.

6. Bõe la a Zeova pʋlem-yã, la bõe la a pa vẽneg n togse?

⁶ Biiblã pipi bãngr-gomdã pʋgẽ, a Zeova pʋlmame tɩ “yageng” n na n wa beds waafã. (Karm-y Sɩngr 3:15.) La pa yɩ wakat kãng la a vẽneg n togs yagengã la waafã yageng sẽn na n yɩ-b rãmb ye. Yaa sẽn zems yʋʋm 2000 loogr poor la a Zeova vẽneg n togse. *

7. Bõe yĩng t’a Zeova yãk a Abrahaam, la bõe la rẽ zãmsd tõndo?

⁷ Tarẽ-n-tarẽ, a Zeova wa n yeelame tɩ yageng ning sẽn na n wa wã na n yɩɩ a Abrahaam doogã neda. A Zeova yãka a Abrahaam, bala a saka yẽ noorã. (Sɩng. 22:18) Bõe la woto zãmsd tõndo? Wilgdame tɩ yaa neb nins sẽn sakd a Zeova ne b sũur fãa wã bal la a vẽnegd a raabã n togse.—Karm-y Yɩɩl Sõamyã 25:14.

8, 9. Yageng ning yell a Zeova sẽn da gomã wɛɛngẽ, bõe la a vẽneg n togs a Abrahaam ne a Zakoobe?

⁸ Pipi bũmb a Zeova sẽn vẽneg n togs yaa tɩ yagengã na n yɩɩ ninsaala. Yaa a sẽn wa n kɩt tɩ malɛkã gom ne a Abrahaamã la a togs rẽ. (Sɩng. 22:15-17; Zak 2:23) La wãn to la yagengã na n beds waafã? Waafã makda ãnda? Kaoosg zugẽ, a Zeova vẽneg n togsa yɛl sẽn sõngd tɩ d paam sogs-kãensã leoore.

⁹ A Zeova wa n yeelame tɩ na n tũu ne a Abrahaam yageng a Zakoob tɩ yageng ning yẽ sẽn pʋlmã wa. A Zakoob yɩɩ ned tẽeb sẽn tar pãnga. (Sɩng. 28:13-22) A Zeova vẽnega a Zakoob t’a togs tɩ yageng ning yẽ sẽn pʋlmã na n yɩɩ a biig a Zida roogã neda. Sɩd me, a Zakoob reng n togsame tɩ b na n wa kõo a Zida yagengã “naam dasaare,” la tɩ yaa yẽ la ‘nebã na n sake.’ (Sɩng. 49:1, 10) Yaa a Zeova gom-kãensã n vẽneg nebã tɩ b bãng tɩ yagengã a sẽn pʋlmã na n lebga rĩma.

10, 11. Bõe yĩng t’a Zeova vẽneg a raabã n togs a Davɩɩd ne a Daniɛlle?

¹⁰ Sẽn zems yʋʋm 650 loogr poore, a Zeova vẽnega rĩm a Davɩɩd sẽn yaa a Zida yagengã t’a bãng bũmb a taaba. A Zeova ra goma a Davɩɩd yell n yeel t’a yaa ‘rao sẽn ta yẽ yam.’ (1 Sãm. 13:14; 17:12; Tʋʋ. 13:22) A Davɩɩd sẽn yɩ wẽn-sakdã yĩnga, a Zeova maana kaool ne-a, n pʋlm-a t’a yageng a ye n na n wa rɩ naam wakat sẽn kõn sa.—2 Sãm. 7:8, 12-16.

 ¹¹ Yʋʋm 500 poore, a Zeova tũnuga ne no-rɛɛs a Daniɛll n wilg sẽn yaa yʋʋmd ning takɩ la b na n bãng sẽn paam-a zaeebã b sẽn boond me tɩ Mesi wã. (Dan. 9:25) A Zeova ra nonga a Daniɛll wʋsgo. Bõe yĩnga? Bala a Daniɛll ra waoogd-a-la ne a sũur fãa, la a tũud-a wakat fãa.—Dan. 6:16; 9:22, 23.

12. B yeela a Daniɛll t’a maan bõe, la bõe yĩnga?

¹² Yaa sɩd t’a Zeova tũnuga ne wẽn-sakdb wa a Daniɛll, n kɩt tɩ b reng n gʋls bũmb wʋsg yagengã bɩ Mesi wã zugu. La neb nins sẽn da tũud-a wã ra pa wʋmd a sẽn vẽneg tɩ b gʋlsã võor zãnga, bala wakat ning a Zeova sẽn yãk n na n vẽneg-bã ra nan pa ta ye. Wala makre, a Zeova sẽn vẽneg a Daniɛll t’a yã Rĩungã sẽn na n wa lugl saasẽ wã poore, a yeel-a lame t’a pag sebrã hal tɩ ta wakat ning yẽ sẽn yãkã. Wakat kãng sã n ta, bãngr hakɩkã “na n paasa wʋsgo.”—Dan. 12:4.

13. a) Ãnd la yageng ning b sẽn da togs t’a watame wã? b) Bõe la a Zezi vẽneg n togs Sɩngr 3:15 bãngr-gomdã zugu?

¹³ A Zeova wilga vẽeneg tɩ yaa a Zezi la yageng ning a sẽn da pʋlmã, a Davɩɩd yageng ning sẽn da na n wa lebg rĩmã. (Luk 1:30-33; 3:21, 22) A Zezi sẽn wa n sɩng koɛɛgã moonegã, vẽenem pukame tɩ nebã bãng bũmb wʋsg Wẽnnaam raabã wɛɛngẽ. (Mat. 4:13-17) Wala makre, a Zezi wilga vẽeneg tɩ “waaf” ning yell b sẽn gomd Sɩngr 3:14, 15 pʋgẽ wã yaa a Sʋɩtãan sẽn yaa “nin-kʋʋd” la “ziri ba” wã. (Zã 8:44) A Zezi sẽn vẽneg a Zã t’a yã bũmb ningã pʋgẽ, a wilgame tɩ yaa ‘wag-kʋdrã’ la b ‘sẽn boond tɩ diable la Sʋɩtãanã.’ * (Karm-y Wilgr 1:1; 12:9.) A Zezi leb n wilgame tɩ yẽ yaa yageng ning b sẽn pʋlmã, la t’a na n wa pidsa bãngr-gomd ning Wẽnnaam sẽn togs Edɛnnã, n sãam Sʋɩtãanã.—Wil. 20:7-10.

14-16. Pipi kiris-nebã ra wʋmda a Zezi sẽn vẽneg n togs bũmb ninsã võor sõma bɩ? Wilg-y y leoorã võore.

¹⁴ Wa d sẽn yã sak a ye wã pʋgã, yaa Wẽnnaam Rĩungã yell la a Zezi ra gomd n yɩɩda. La a pa togs a karen-biisã bũmb nins fãa b sẽn da rat n bãngã ye. Yaa sɩd t’a vẽnega yɛl kẽer n togse, la yaa kaoosg zugẽ la kiris-nebã wa n wʋm b zu-soabã goamã võor sõma. Bɩ d gom bũmb a wãn yelle.

¹⁵ Yʋʋmd 33 wã, a Zezi wilga vẽeneg tɩ yẽ na-rɩt-n-taasã na n yɩɩ neb Wẽnnaam sẽn tũus tẽngã zugu, la tɩ b na n lebga wa malɛgse, n tɩ vɩɩmd saasẽ. La zĩig pʋgẽ wã, a karen-biisã pa wʋm a gomdã võor ye. (Dan. 7:18; Zã 14:2-5) Yʋʋm-kãng me, a Zezi wẽe yel-bũnd n wilg t’a sã n leb saasẽ, na n kaoosame tɩ Wẽnnaam yaool n lugl Rĩungã. (Mat. 25:14, 19; Luk 19:11, 12) Yel-bũndã sẽn wilgd bũmb ningã tara yõod wʋsgo, la a karen-biisã pa wʋm a võor ye. Rẽ n so tɩ b sok-a woto a vʋʋgrã poore: “Yãmb na n deega  Israyɛll soolmã n kõ-b masã bɩ?” La a Zezi pa bao n na n wɛgs fãa n togs-b wakat kãng ye. (Tʋʋ. 1:6, 7) A ra leb n wilgame t’a na n wa paama “piis a taaba.” Bãmb pa naag neb nins a sẽn boond tɩ “wubr pa zemb bũmbu,” sẽn na n wa rɩ naam ne yẽ wã ye. (Zã 10:16; Luk 12:32, Sebr Sõngo) Kiris-nebã ra pa mi sul-kãensã b yiibã n bak ye. Rĩungã sẽn lugl yʋʋmd 1914 poore, kaoosame tɩ b yaool n na n wʋm gom-kãensã võore.

¹⁶ A Zezi sẽn wa n be tẽngã zugã, bũmb wʋsg la a bas n pa togs a karen-biisã, a sẽn da mi tɩ b nan pa tõe n wʋm b võorã yĩnga. (Zã 16:12) La yɩɩ pipi kiris-nebã wakat la a vẽneg n togs bũmb wʋsg Wẽnnaam Rĩungã zugu. Baasgo, wakat ning bãngrã sẽn da na n paas wʋsgã ra nan pa ta ye.

17. Bõe la d tog n maan n bãng Rĩungã sẽn yaa bũmb ningã sõma, la bõe me n yaa tɩlae?

¹⁷ A Zeova pʋlma a Daniɛll tɩ “sɛɛbã wakate,” neb wʋsg na n “kẽnga ka la ka, la bãngr” na n paasa wʋsg Wẽnnaam daabã wɛɛngẽ. (Dan. 12:4) Sẽn dat-b bãngrã tog n modga wʋsg n yaool n paam-a. Sebr a yembr yeelame tɩ gomd ning sẽn yaa “kẽnga ka la ka” wã bilgda ned sẽn maag a meng n karemd sebr la a bʋgsd n na n wʋm a võor sõma. Baa d sã n maag d yĩng n karem Biiblã tõre, sã n pa tũ ne a Zeova sõngre, d pa tõe n wʋm Rĩungã võor sõma ye.—Karm-y Matɩe 13:11.

18. Wãn to la sẽn da sakd-b a Zeova wã wilg tɩ b tara tẽeb la sik-m-menga?

¹⁸ Wa a Zeova sẽn sɩng n vẽnegd bũmb kẽer a Rĩungã zug bilf-bilf nand tɩ yʋʋmd 1914 ta wã, a ket n maanda woto saabã wakat me. Seb-kãngã sak a 4 ne a 5 wã pʋgẽ, d na n yãame tɩ yʋʋm 100 sẽn loogã, wakat ninga, yɩɩ tɩlae tɩ Wẽnnaam nin-buiidã rems b sẽn da wʋmd yɛl  sãnda võor to-to wã. La woto rat n yeelame tɩ b ra pa paamd a Zeova sõngr bɩ? Ayo. Yaa vẽeneg t’a sõng-b lame. Bõe yĩng t’a sõng-ba? Bala neb nins sẽn da sakd a Zeova wã talla tẽeb la sik-m-menga. A Zeova yaool n nonga rẽ. (Heb. 11:6; Zak 4:6) Sɩd me, sẽn tũud-b a Zeova wã tara tẽeb t’a sẽn pʋlem bũmb nins tɩ be a Gomdã pʋgẽ wã fãa na n pidsame. B sik-m-mengã me kɩtame tɩ b sã n wa bãng tɩ b sẽn da tagsd tɩ goam kẽer na n pidsa to-to wã pa zemse, b sakd n deegame tɩ b tudgame. Yʋʋmd 1925 tʋʋlg kiuug pipi daar Gũusg Gasgã pʋgẽ, b sẽn yeel bũmb ningã sɩd wilgdame tɩ b yaa sik-m-mens rãmba. B yeela be woto: “D miime tɩ Zu-soabã bilgda a Gomdã a toore. Dẽnd a na n bilga a nin-buiidã a goamã wa a sẽn dat to-to, la wakat ning a sẽn yãkã.”

19. Rũndã-rũndã, bõe la a Zeova sõng tõnd tɩ d bãnge, la bõe yĩnga?

¹⁹ Wẽnnaam sẽn wa n lugund Rĩungã yʋʋmd 1914, rẽ t’a nin-buiidã ra pa mi b sẽn deng n togs bũmb nins Rĩungã zugã sẽn na n pids to-to wã fãa ye. (1 Kor. 13:9, 10, 12) D sẽn yãgd n dat tɩ Wẽnnaam pʋlemsã pidsã mi n kɩtame tɩ d sẽn wʋmd yɛlã võor to-to wã pa zems ye. Tarẽ-n-tarẽ, wa n lebga vẽeneg tɩ bũmb a to me b sẽn togs yʋʋmd 1925 tʋʋlg kiuug pipi daar Gũusg Gasgã pʋgẽ yaa sɩda. B yeela woto: “Yɩta sõma tɩ d sak n deeg tɩ d pa tõe n wʋm bãngr-gomd võore, tɩ sã n pa a wa n pidsame, wall a bee a pidsg zug ye.” Masã, saabã wakatã sẽn ta n sa wã, bũmb wʋsg b sẽn deng n togs Rĩungã zug zoe n pidsame, tɩ kẽer me be b pidsg zugu. Wẽnnaam nin-buiidã sẽn yaa sik-m-mens rãmb n sakd remsgã yĩnga, a sõng-b lame tɩ b wʋm a raabã võor n paase. Bãngr hakɩkã sɩd paasa wʋsgo.

20, 21. Wilg-y pipi kiris-nebã manesem sẽn yɩ to-to, b sẽn wa n dems yɛl kẽerã.

²⁰ A Zeova sã n dems tõnd sẽn wʋmd Biiblã goam võor to-to wã, kɩtdame tɩ b bãng sẽn be ned fãa sũurẽ. D na n talla tẽeb la sik-m-menga, n sak remsgã bɩ? Pipi kiris-nebã wakate, b remsa b sẽn da wʋm yɛl kẽer võor to-to wã, tɩ ned fãa ra segd n wilg a sã n na n sakame. Mams-y y yamẽ tɩ yãmb ra vɩɩ wakat kãnga, n yaa zʋɩf sẽn tuub n lebg kiris-neda. Y tũuda a Moiiz tõogã ne y sũur fãa, n getẽ tɩ y sẽn yaa Israyɛll buudã nedã yaa zu-zẽkre. La tʋm-tʋmd a Poll wa n toola yãmb tigingã lɛta Wẽnnaam sẽn vẽneg-a t’a gʋlse. A yeela lɛta wã pʋgẽ tɩ y pa tog n le tũ a Moiiz tõogã ye. A paasame t’a Zeova tõdgame tɩ Israyɛll buudã kõn le yɩ a nin-buiidu, la t’a tigimda Israyɛll sẽn yaa yẽ rẽnda, sẽn yaa bu-zẽms neb la zʋɩf rãmba. (Rom 10:12; 11:17-24; Gal. 6:15, 16; Kol. 2:13, 14) Y ra na n maana wãna?

²¹ Kiris-neb nins sẽn tall sik-m-mengã saka bũmb ning a Zeova sẽn vẽneg a Poll t’a gʋlsã, t’a Zeova ning-b barka. (Tʋʋ. 13:48) La kẽer pa sak remsgã ye. B sẽn da sɩng n wʋmd yɛlã to-to wã bal la b gãd-yã. (Gal. 5:7-12) B sã n da kell n pa sake, b pa na n le paam n yɩ Kirist na-rɩt-n-taas ye.—2 Pɩɛ. 2:1.

22. Yãmb manesem yaa wãna, a Zeova sẽn dems yɛl kẽer rũndã-rũndã wã?

²² Rũndã-rũndã, a Zeova vẽnega tõnd tɩ d bãng tɩ d sẽn da wʋmd Rĩungã yɛl kẽer võor to-to wã pa zemse, la a remse. Wala makre, a sõng-d lame tɩ d bãng wakat ning a sẽn na n wa welg yẽ nebã a sẽn mak ne piisã, ne kɩɩsdbã a sẽn mak ne bʋʋsã. A wilg-d-la sẽn yaa sasa ning me la neb 144000 sõor na n pidi. A leb n sõng-d lame tɩ d wʋm yel-bũn nins a Zezi sẽn wẽ n gom Rĩungã yellã võore, la a sõng-d tɩ d bãng wakat ning sẽn paam-b zaeebã yaoolem dãmbã sẽn na n vʋʋg n kẽng saasẽ wã. * Yãmb manesem yaa wãn ne remsgã? Kenga yãmb tẽebã bɩ? Y geta remsgã wa kaset sẽn wilgd t’a Zeova ket n zãmsda a nin-buiidã sẽn yaa sik-m-mens rãmbã bɩ? Seb-kãngã na n sõng-y lame tɩ y maneg n kɩs sɩd t’a Zeova ket n vẽnegda a raabã bilf-bilf n togsd neb nins sẽn zoet-a wã.