SAK A 4
A Zeova kɩtame t’a yʋʋrã paam waoogre
1, 2. Wãn to la Traduction du monde nouveau wã sõng tɩ Wẽnnaam yʋʋrã paam waoogre?
YƲƲMD 1947 yʋʋm-sar kiuug rasem a 2 wã sẽn yɩ talaat daarã yibeoogo, kiris-neb sẽn paam vʋʋsem sõngã zaeeb sul-bil sẽn yit Burkilin Betɛllẽ wã sɩnga tʋʋm-kãsenga. Yaa Biiblã lebgre. Tʋʋmdã pa yɩ nana ye. La b kell n tʋma yʋʋm 12. Yʋʋmd 1960 tʋʋlg kiuug rasem 13 sẽn yɩ hatã daare, b saa tʋʋmdã. Kiis a tãab poore, rat n yeel tɩ sigr kiuug rasem 18 wã, tigis-kãseng n zĩnd Mansɛstɛɛr sẽn be Ãngeletɛɛrã. Tigsgã sasa, saam-biig a Nathan Knorr wilgame tɩ b yiisa Les Saintes Écritures — Traduction du monde nouveau wã n baase. Kɛlgdbã sũy yɩɩ noog wʋsgo. Sõsdã sẽn togs bũmb ning daarã bilgda sẽn da be kɛlgdbã fãa sũurẽ. A yeelame: ‘Rũndã yaa sũ-noog daare. A Zeova Kaset rãmbã sẽn be dũniyã gill zugã sũ-noog daare!’ Saam-biisã sũy sẽn da pʋd n noomẽ wã yaa Wẽnnaam yʋ-peellã sẽn be Biibl paallã pʋgẽ wã.
Yʋʋmd 1950 tigis-kãseng gom-zug sẽn yɩ “Accroissement de la théocratie.” B yiisa Les Écritures grecques chrétiennes — Traduction du monde nouveau wã (Goabgã: Yankee Stadiumã pʋgẽ, Niuyorke; Rɩtgã: Gãnã)
2 Biibl dãmb wʋsg pʋsẽ, b yãka Wẽnnaam yʋ-peellã. La neb nins sẽn paam vʋʋsem sõng zaeebã pa bas t’a Sʋɩtãan sɩlmã tõoge, tɩ nebã yĩm Wẽnnaam yʋʋrã ye. Biibl ning b sẽn yiis tigis-kãsengã daarã (Traduction du monde nouveau wã) sɩngr goam la woto: “Bũmb ning sẽn kɩt tɩ Biibl kãngã yaa toorã, yaa b sẽn lebs Wẽnnaam yʋʋrã zĩis nins fãa a sẽn tog n beẽ wã.” Sɩd me, yaa sẽn yɩɩd naoor 7000 la Wẽnnaam yʋ-peellã sẽn yaa Zeova wã be Biibl kãng pʋgẽ. Ad a sɩd waoogda a Zeova sẽn yaa tõnd Ba sẽn be saasẽ wã yʋʋre!
3. a) Bõe la d saam-biisã bãng Wẽnnaam yʋʋrã wɛɛngẽ? b) Yikr 3:13, 14 goamã võor yaa bõe? (Ges-y zĩ-gũbrã sẽn yet tɩ “ Wẽnnaam yʋʋrã sẽn dat n yɛɛlga.”)
3 Sɩngrẽ wã, Biiblã Zãmsdbã ra tẽedame tɩ Wẽnnaam yʋʋrã rat n yeelame tɩ “Maam la a Beẽ-n-Beẽ!” (Yik. 3:14, Sebr Sõngo) Rẽ n so tɩ yʋʋmd 1926 yʋʋm-vẽkr kiuug pipi daar Gũusg Gasgã yeel tɩ “yʋʋr ning sẽn yaa Zeova wã rat n yeelame . . . t’a soab ning sẽn ka tall sɩngr la sẽn ka tar saabo.” La saam-biisã sẽn wa n sɩng Traduction du monde nouveau wã lebgrã, a Zeova sõng-b lame tɩ b bãng tɩ yẽ yʋʋrã pa rat n yeel bal t’a ka tall sɩngr la a ka tar saab ye. Rat n yeelame t’a yaa Wẽnnaam sẽn tar raabo, la sẽn tʋmd a raabã pidsg yĩnga. Saam-biisã bãngame tɩ koɛɛg-koɛɛg bala, Zeova wã võor yaa: “A kɩtdame tɩ yɩ.” Sɩd me, a Zeova n kɩt tɩ bũmb fãa beẽ, la a kɩtdẽ me t’a raabã la a pʋlemsã fãa pidsdẽ. Bõe yĩng masã tɩ Wẽnnaam yʋʋrã segd n paam waoogre, la bõe la d tõe n maan n sõng n waoog a yʋʋrã?
D sẽn tog n maaneg n waoog Wẽnnaam yʋʋrã
4, 5. a) Tõnd sã n pʋʋsd n yetẽ tɩ bɩ ‘yãmb yʋʋr yɩ ne waoogre,’ bõe la d kota? b) Wãn to la Wẽnnaam na n kɩt t’a yʋʋrã paam waoogre, la na n yɩɩ wakat bʋgo?
4 A Zeova ratame t’a yʋʋrã paam waoogre. Rẽ n be taoore. Pʋʋsg ning a Zezi sẽn zãms a karen-biisã pʋgẽ, a reng n kosa woto: Bɩ “yãmb yʋʋr yɩ ne waoogre.” (Mat. 6:9) La pʋʋs n kos t’a Zeova yʋʋrã yɩ ne waoogr rat n yeelame tɩ bõe?
5 Seb-kãngã pipi sakã pʋgẽ, d yãame tɩ pʋʋsg ning a Zezi sẽn zãms a karen-biisã pʋgẽ, bũmb a tãab la a reng n kose. La fãa yaa a Zeova raabo. A reng n kosame t’a Zeova yʋʋrã yɩ ne waoogre, rẽ poore t’a soolmã wa, n yaool n kos t’a raabã maane. (Mat. 6:10) Wa tõnd sẽn kot t’a Zeova kɩt t’a Rĩungã wa, t’a raabã maan tẽngã zugã, d kotame t’a maan bũmb sẽn na yɩl t’a yʋʋrã paam waoogre. Woto rat n yeelame tɩ d kota a Zeova t’a maan bũmb n maneg a yʋʋrã b sẽn sãam Edɛn n tãag masã wã. Wãn to la a Zeova leokd pʋʋs-kãngã? Ad a sẽn yete: “Mam na n kɩtame tɩ bu-zẽms nins yãmb sẽn ning m yʋ-kãsengã yãnd b sʋkã bãng tɩ m yʋʋrã yaa sõngo.” (Eze. 36:23; 38:23) Armagedõ sasa, a Zeova sã n wa sãam nin-wẽnsã, ninsaalbã ne malɛgsã fãa na n bãngame t’a yʋʋrã yaa sõngo.
6. Bõe la d tõe n maan n wilg tɩ d waoogda Wẽnnaam yʋʋrã?
6 Hal pĩnd n tãag masã, a Zeova kõo a nebã sor tɩ b naag n waoog a yʋʋrã. Yaa sɩd tɩ tõnd pa tõe n kɩt tɩ Wẽnnaam yʋʋrã paam waoogre, bɩ n yɩ sõng n paas ye. A zoe n yaa sõngo. Sã n yaa rẽ, wãn to la d wilgd tɩ d waoogda a Zeova yʋʋrã? A Ezai yeela woto: ‘Yaa Saasẽ-pãng-soabã la yãmb tog n ges wa pʋ-peelem soaba.’ A Zeova goma a nin-buiidã yell n yeel woto: ‘Bãmb na n waooga mam yʋʋrã, . . . la b zoe Israyɛll Wẽnnaamã.’ (Ezai 8:13; 29:23) D sã n sak n deeg tɩ Wẽnnaam yʋʋrã yaa kãseng n yɩɩd yʋʋr buud fãa, n miẽ t’a võorã tagmame, la d sõngd neb a taabã me tɩ b waoogd-a, d wilgdame tɩ d waoogda Wẽnnaam yʋʋrã. La sẽn yɩɩd fãa, tõnd sã n sak n deeg t’a Zeova la tõnd Naaba, n sakd-a ne d sũur fãa, rẽ la d wilgd tɩ d sɩd waoogda a yʋʋrã.—Yel. 3:1; Wil. 4:11.
B segla b mens n na n waoog Wẽnnaam yʋʋrã
7, 8. a) Bõe yĩng tɩ kaoos t’a Zeova yaool n na n sak t’a nin-buiidã pʋd b mens t’a kaset rãmba? b) Bõe yell la d na n gom masã?
7 Yʋʋmd 1870 wã poore, Wẽnnaam nin-buiidã sɩngame n ningd a yʋʋrã sɛb nins b sẽn yiisdã pʋgẽ. Wala makre, La Tour de Garde de Sion sẽn yi yʋʋmd 1879 sa-sik kiuugã, ne yɩɩlã sebr Cantiques de l’Épouse sẽn yi yʋʋm-kãngã pʋgẽ, b pʋda yʋʋr ning sẽn yaa Zeova wã. La wõnda nand t’a Zeova sak t’a nin-buiidã pʋd b mens t’a Zeova Kaset rãmba, a sõng-b lame tɩ b lebg neb sẽn zems ne yʋ-kãngã. Bõe la a Zeova maan n sõng-ba?
8 D sã n lebg n tẽeg bũmb nins sẽn zĩnd yʋʋmd 1900 wã sẽn wa n kolgdẽ la rẽ poor bilfã, d bãngda a Zeova sẽn maan to-to, n sõng a nebã tɩ b wʋm bũmb wʋsg võor a yʋʋrã wɛɛngẽ. Bɩ d gom bũmb a tãab yelle.
9, 10. a) Bõe yĩng tɩ b ra gomd a Zezi yell wʋsg Gũusg Gasgã pʋgẽ? b) Bõe n toeem yʋʋmd 1919 wã tɛka, la rẽ yõod yɩɩ bõe? (Ges-y zĩ-gũbrã sẽn yet tɩ “ Gũusg Gasgã zẽkda Wẽnnaam yʋʋrã.”)
9 Pipi, a Zeova nin-buiidã wa n bãngame tɩ Wẽnnaam yʋʋrã la b segd n kils n yɩɩd bũmb fãa. Sɩngrẽ wã, Biiblã Zãmsdbã ra getame t’a Zezi sẽn ki tɩ yɩ rondã n tar yõod n yɩɩda. Yaa rẽ yĩng la b sẽn da gomd a Zezi yell wʋsg Gũusg Gasgã pʋgẽ wã. Wala makre, b sẽn wa n sɩng Gũusg Gasgã yiisgã, pipi yʋʋmdã, a Zezi yʋʋrã sẽn da be be yɩɩda a Zeova yʋʋrã naoor piiga. Sɩd me, yʋʋmd 1976 tʋʋlg kiuug rasem 15 Gũusg Gasgã goma Biiblã Zãmsdbã yelle, n yeel tɩ pĩndã, b ra waoogda a Zezi tɩ looge. La a Zeova wa n sõng-b lame tɩ b bãng tɩ Biiblã wilgdame tɩ Wẽnnaam meng yʋʋrã zẽkr n tar yõod n yɩɩd bũmb fãa. Rẽ poore, bõe la Biiblã Zãmsdbã maan-yã? Yʋʋmd 1976 Gũusg Gasgã yeelame tɩ yʋʋmd 1919 tɛka, “b sɩngame n pẽgd a Zeova sẽn yaa Mesi wã Ba sẽn be saasẽ wã n yɩɩda.” Sɩd me, yʋʋmd 1920 n tãag yʋʋmd 1929 wã, yaa sẽn yɩɩd naoor 6500 la b pʋd Wẽnnaam yʋʋrã Gũusg Gasgã pʋgẽ.
10 D saam-biisã zẽka a Zeova yʋʋrã, t’a paam ziir ning a sẽn tog ne wã, tɩ wilgdẽ tɩ b nonga Wẽnnaam yʋʋrã. Wa a Moiizi, b yãka yam n na n ‘moon a Zeova yʋʋrã.’ (Tõo. 32:3; Yɩɩl 34:4) La wa a Zeova meng sẽn pʋlem tɩ be Biiblã pʋgẽ wã, a ning-b-la barka, b sẽn wilg tɩ b nonga a yʋʋrã.—Yɩɩl 119:132; Heb. 6:10.
11, 12. a) Yʋʋmd 1919 poor bilfu, bõe yell la b gomd tõnd sɛbã pʋsẽ n yɩɩda? b) Bõe la a Zeova sõng a nin-buiidã tɩ b bãnge, la bõe yĩnga?
11 Yiib-n-soaba, kiris-neb hakɩkã bãnga tʋʋmd ning Wẽnnaam sẽn bobl-bã n welge. Yʋʋmd 1919 wã poor bala, taoor-lʋɩtbã sẽn da paam vʋʋsem sõng zaeebã maaga b yĩng n bao a Ezai bãngr-goamã võore. Rẽ poore, b sɩngame n gomd koɛɛgã mooneg yell n yɩɩd tõnd sɛbã pʋsẽ. Bõe yĩng tɩ d tõe n yeel tɩ remsgã zemsa a wakate?—Mat. 24:45.
12 Sẽn deng yʋʋmd 1919 wã, b ra pa gomd a Ezai sẽn yeel bũmb ningã yell Gũusg Gasgã pʋgẽ ye. A Ezai ra yeelame t’a Zeova yeela woto: “Yãmb yaa mam kaset dãmba, la mam tʋm-tʋmdb mam sẽn yãke.” (Karm-y Ezai 43:10-12.) La yʋʋmd 1919 wã poor bala, b sɩngame n gomd a Ezai sẽn da togs bũmb ningã yell tõnd sɛbã pʋsẽ, n sagl kiris-neb nins fãa sẽn paam vʋʋsem sõng zaeebã tɩ b kẽes b mens tʋʋmd ning a Zeova sẽn bobl-bã pʋgẽ, rat n yeel tɩ b kõ a Zeova kaseto. Sɩd me, yʋʋmd 1925 n tãag 1931 wã, Gũusg Gasg toor-toor bãmb 57 pʋsẽ la b gom Ezai sak 43 yelle. B fãa pʋsẽ, b wilgame tɩ yaa kiris-neb hakɩkã yell la a Ezai sẽn gomdã. Wakat kãnga, a Zeova kɩtame t’a nebã bãng tʋʋmd ning b sẽn da segd n tʋmã vẽenega. Bõe yĩnga? Yaa sẽn na n “deng n ges b sã n tũuda tɩrg tɩ rõdb kaẽ ye.” (1 Tɩm. 3:10) Dẽnd nand tɩ Biiblã Zãmsdbã paam t’a Zeova sak tɩ b pʋd b mens t’a kaset rãmba, b ra tog n wilga ne b tʋʋmã tɩ b sɩd zemsa ne yʋʋrã.—Luk 24:47, 48.
13. Wãn to la Biiblã sõng tɩ b bãng tɩ Wẽnnaam yʋʋrã sẽn sãam tɩ b tog n manegã n tar yõod n yɩɩd bũmb fãa?
13 Tãab-n-soaba, a Zeova nin-buiidã wa n bãngame tɩ Wẽnnaam yʋʋrã waoogr n tar yõod n yɩɩda. Yʋʋmd 1920 poore, b bãngame tɩ yaa Wẽnnaam yʋʋrã sẽn sãam tɩ b tog n manegã n tar yõod n yɩɩd bũmb fãa. Wãn to la Wẽnnaam Gomdã wilgd rẽ? D tẽeg bũmb a yiibu. Pipi, yaa bũmb ning sẽn kɩt tɩ Wẽnnaam fãag Israyɛll nebã, n yiis-b Eziptã. A Zeova meng yeela woto: Yaa “sẽn na yɩlga . . . tɩ mam yʋʋrã saag dũniyã tɛk fãa.” (Yik. 9:16) Yiib-n-soaba, yaa bũmb ning sẽn kɩt t’a Zeova zoe Israyɛll nebã nimbãanega, baa b sẽn kɩɩs-a wã. Wakat kãng me, a Zeova yeelame: “Yaa m yʋʋrã yĩnga, . . . t’a ra paam paoogr buud nins Israyɛll nebã sẽn da be bãmb sʋkã nengẽ ye.” (Eze. 20:8-10) Bõe la gom-kãensã, la Biiblã goam a taab sõng Biiblã Zãmsdbã tɩ b bãnge?
14. a) Yʋʋmd 1930 wã sẽn wa n kolgdẽ wã, bõe la Wẽnnaam nin-buiidã bãng-yã? b) Biiblã Zãmsdbã sẽn bãng bũmb ningã kɩtame tɩ b maan bõe koɛɛgã mooneg wɛɛngẽ? (Ges-y zĩ-gũbrã sẽn yet tɩ “ Bʋʋm sẽn kɩt tɩ d moond koɛɛgã.”)
14 Yʋʋmd 1930 wã sẽn wa n kolgdẽ, Wẽnnaam nin-buiidã wʋma a Ezai goam nins a sẽn da togs na maan yʋʋm 2700 wã võore. A goma a Zeova yell n yeele: ‘Yaa woto la yãmb yãag y nebã y yʋʋrã pẽgr yĩnga.’ (Ezai 63:14) Biiblã Zãmsdbã bãngame tɩ sẽn tar yõod n yɩɩdã pa ninsaalbã fãagr ye. Yaa Wẽnnaam yʋʋrã na paam waoogre. (Ezai 37:20; Eze. 38:23) Yʋʋmd 1929, sebr ning b sẽn da boond tɩ Prophétie wã kʋmsa rẽ n yeele: “A Zeova yʋʋrã sẽn sãam tɩ b tog n manegã n tar yõod n yɩɩd bũmb fãa.” A Zeova nin-buiidã sẽn wʋm woto võor sõma wã kɩtame tɩ b moon a yʋʋrã, n sõng nebã tɩ b bãng-a.
15. a) Yʋʋmd 1930 wã sẽnese, bõe la saam-biisã bãng-yã? b) Wakat ra taame t’a Zeova na n maan bõe?
15 Yʋʋmd 1930 wã sẽnese, d saam-bɩɩsã bãngame tɩ Wẽnnaam yʋʋrã la b segd n kils n yɩɩd bũmb fãa. B bãnga tʋʋmd ning Wẽnnaam sẽn bobl-bã n welge. B bãngame me n yɩɩd pĩndã, tɩ yaa Wẽnnaam yʋʋrã sẽn sãam tɩ b tog n manegã n tar yõod n yɩɩd bũmb fãa. Dẽnd wakat ra taame t’a Zeova na n sak t’a nin-buiidã pʋd b mens t’a kaset rãmba. D tẽeg yɛl a wãna, tɩ sõng-d tɩ d bãng sẽn yɩ to-to wakat kãnga.
A Zeova tũusa ‘neb a meng yʋʋrã yĩnga’
16. a) Wãn to la a Zeova kɩt t’a yʋʋrã paam waoogre? b) Ãnd dãmb n yɩ pipi n lebg nin-buiid a Zeova sẽn yãk a yʋʋrã yĩnga?
16 A Zeova sẽn tũus neb tẽngã zug n boond-b t’a kaset rãmbã, a waooga a yʋʋrã. Yʋʋmd 1513 sẽn deng a Zezi rogmã, Israyɛll buudã ra lebga a Zeova nin-buiid a sẽn yãk a yʋʋrã yĩnga. (Ezai 43:12) La b wa n sãama kaoolã b sẽn da maan ne Wẽnnaamã. Rẽ n so tɩ yʋʋmd 33 wã tɛka, b pa le yaa a Zeova nin-buiid ye. Rẽ poor bilfu, a Zeova ‘tũusa neb bu-zẽmsã sʋk a menga yʋʋrã yĩnga.’ (Tʋʋ. 15:14) B wa n boonda nin-kãens tɩ “Israyɛll sẽn yaa Wẽnnaam dẽnda.” Yaa kiris-neb sẽn paam vʋʋsem sõngã zaeebo, n yaa buud toor-toor neba.—Gal. 6:16.
17. Bõe la a Sʋɩtãan tõog n maane?
17 Yʋʋmd 44 sẽnese, Wẽnnaam kɩtame tɩ b sɩng n boond Kiristã karen-biisã tɩ “Kiris-neba.” (Tʋʋ. 11:26) Sɩngrẽ wã, ra yaa kiris-neb hakɩkã bal la b ra boond woto. (1 Pɩɛ. 4:16) La ki wã ne nadensã yel-bũndã pʋgẽ, a Zezi wilgame t’a Sʋɩtãan na n tõogame tɩ b boond sẽn maand-b wa b tũuda Kiristã me tɩ kiris-neba. Dẽnd na maan yʋʋm kobse, nebã ra pa tõe n bãng kiris-neb hakɩkã n bak ne kiris-neb ne yʋʋrã ye. La “tigsgã” sẽn sɩng yʋʋmd 1914, yɛlã toeemame. Bõe yĩnga? Bala malɛgsã sɩngame n welgd kiris-neb ne yʋʋrã ne kiris-neb hakɩkã.—Mat. 13:30, 39-41.
18. Bõe n sõng d saam-biisã tɩ b bãng tɩ yaa tɩlae tɩ b reeg yʋʋr a to?
18 Yʋʋmd 1919 wã, a Zeova sẽn yãk tʋm-tʋmd sẽn tũud sɩdã poore, a sõnga a nin-buiidã tɩ b bãng tʋʋmd ning a sẽn bobl-bã. Tao-tao bala, b yãame tɩ zak-zak moonegã kɩtame tɩ b yaa toor ne kiris-neb ne yʋʋrã. La pa yã n kaoos la b bãng tɩ b sẽn boond-b tɩ “Biiblã Zãmsdbã” pa sek nebã na bãng-b n bak ye. Bũmb ning sẽn tar yõod n yɩɩd b vɩɩmã pʋgẽ pa Biiblã zãmsg bal ye. Yaa b kõ Wẽnnaam kaset la b waoog a yʋʋrã. La yʋ-bʋg la b na n pʋd b mens tɩ zems ne tʋʋmd ning b sẽn tʋmdã? B paama sok-kãngã leoorã yʋʋmd 1931.
Yʋʋmd 1931 tigis-kãsengã sõssã na-kẽndre
19, 20. a) Yʋʋmd 1931 tigis-kãsengã sasa, no-sɩɩr bʋg la b rɩk-yã? b) Wãn-wãn la saam-biisã wilg b sũ-noogo?
19 Yʋʋmd 1931 sẽoog kiuugã, yaa sẽn ta Biiblã Zãmsdbã bãmb 15000 n zĩnd tigis-kãsengẽ Kolombis sẽn be Ohio, Etazĩni soolmẽ wã. Sõssã na-kẽndr sebr zugu, b gʋlsa gʋls-biis a yiib bɛd-bɛda: Yaa J ne W. Kɛlgdbã ra sokda b mens gʋls-bi-kãensã võore. La hatã daarã, rat n yeel tɩ sẽoog kiuugã rasem 26, saam-biig a Joseph Rutherford sõsa ne kɛlgdbã, n wilg tɩ b rɩka no-sɩɩre, n yeel woto: “Tõnd datame tɩ nebã fãa bãng tɩ d yaa a Zeova Kaset rãmba, la b boond tõnd ne yʋ-kãngã.” Yɩɩ wakat kãng la kɛlgdbã fãa bãng gʋls-biisã sẽn da rat n yɛɛlga. B bãngame tɩ gʋls-biis a yiibã rat n yeela ne ãngilind tɩ Jehovah’s Witnesses, sẽn dat n yeel t’a Zeova Kaset rãmba. Yʋ-kãngã bee Ezai 43:10.
20 Kɛlgdbã kaasa sũ-noogo, la b wẽ nug-pogs n wilg tɩ b saka no-sɩɩrã. Neb sẽn be tẽn-zãrsẽ n da kelgd tigis-kãsengã radio wã, n wʋmd saam-biisã sẽn kaasd sũ-noog la b wẽed nug-pogse. A Ernest ne a Naomi Barber sẽn da be Ostrali wã tẽega rẽ yell n yeel woto: “Saam-biisã sẽn da be Amerik n wẽed nug-pogsã sasa, Mɛlbʋrn saam-biisã me ra kɩdemda sũ-noog la b wẽed nug-pogse. Tõnd pa tol n tõe n yĩm rẽ ye.” *
Wẽnnaam yʋʋrã paamda waoogr dũniyã gill zugu
21. Bõe n wilgd tɩ yʋʋrã b sẽn deegã kɩtame tɩ koɛɛgã mooneg yãnge?
21 Wẽnnaam nin-buiidã sẽn paam tɩ b boond-b t’a Zeova Kaset rãmba, tɩ yʋʋrã be Biiblã pʋgẽ wã kɩtame tɩ b maneg n wɩng ne koɛɛgã moonego. A Edward ne a Jessie Grimes zĩnda yʋʋmd 1931 tigis-kãsengã sẽn zĩnd Kolombisã. B ra yaa so-pakdb Etazĩni. Ad b sẽn yeele: “Tõnd sẽn wa n yit yirã tɩ d yaa Biiblã Zãmsdba, la d sẽn wa n lebgdẽ wã tɩ d yaa a Zeova Kaset rãmba. D sũurã ra noomame, bala d paama yʋʋr sẽn na n sõng tɩ d zẽk d Wẽnnaamã yʋʋre.” Tigis-kãsengã poore, a Zeova Kaset rãmb kẽer baoo yam a to sẽn na yɩl n zẽk a Zeova yʋʋrã. Koe-moonegã sasa, b sã n ta zak noore, b wilgda a soabã seb-bila. Sebrã zugu, b gʋlsa woto: “A ZEOVA kaset soab n moond Wẽnnaam a ZEOVA Rĩungã koɛɛga.” Hakɩka, Wẽnnaam nin-buiidã getame tɩ b sẽn paam tɩ b boond-b t’a Zeova Kaset rãmbã yaa zu-zẽkre. B ra segla b mens me n na n moon zĩig fãa, n wilg yʋ-kãng võorã.—Ezai 12:4.
“Tõnd sẽn wa n yit yirã tɩ d yaa Biiblã Zãmsdba, la d sẽn wa n lebgdẽ wã tɩ d yaa a Zeova Kaset rãmba”
22. Bõe n wilgd t’a Zeova nin-buiidã welga toore?
22 Yʋʋm wʋsg la woto a Zeova sẽn sõng sẽn paam-b vʋʋsem sõng zaeebã tɩ b reeg yʋʋr ning sẽn kɩt tɩ b yaa toorã. La rẽ yĩnga yʋʋmd 1931 wã tɛka, a Sʋɩtãan tõogame tɩ nebã pa bãng Wẽnnaam nin-buiidã sẽn yaa b rãmb bɩ? A tõog n kɩtame tɩ nebã pa tõe n bãng tõnd n welg ne ziri tũudmã neb bɩ? Abada! Pʋd n lebga vẽeneg n yɩɩd pĩnda, tɩ tõnd yaa Wẽnnaam kaset rãmba. (Karm-y Miise 4:5; Malaki 3:18.) Sɩd me, nebã sẽn mi tõndã kɩtame tɩ b sã n wʋm ned sẽn pʋd Wẽnnaam yʋʋrã, tao-tao bala b tẽedame tɩ yaa a Zeova Kaset soaba. Dẽnd baa ziri tũudmã yaa wʋsgo, b pa tõe tɩ nebã pa bãng tũudum hakɩkã n bak ye. Tũudum hakɩkã pʋd n yaa wa tãnga, t’a ‘zãntlem yɩɩd tãensã fãa.’ (Ezai 2:2) Rũndã-rũndã, tũudum hakɩkã paamda zẽkre, t’a Zeova yʋ-sõngã me paamd waoogre.
23. Wa Yɩɩl Sõamyã 121:5 sẽn yetã, tõnd kɩsa sɩd t’a Zeova na n maana bõe, tɩ rẽ kengd tõnd raoodo?
23 D sẽn mi t’a Zeova na n kell n sõnga tõnd t’a Sʋɩtãan ra tol n tõog-dã sɩd kengda d raoodo. (Yɩɩl 121:5) Rẽ n so tɩ tõnd me rat n yeel wa yɩɩl-gʋlsdã. A yeelame: “Bark bee soolem ning zug [a Zeova, MN] sẽn yaa a nebã Wẽnnaam. Neb nins bãmb sẽn yãk tɩ yɩ bãmb pʋɩɩrã na n paama barka.”—Yɩɩl 33:12.
^ sull 20 Y sã n dat n bãng b sẽn da tʋmd ne radio wã to-to bɩ y ges sak a 7 wã, seb-neng 72-74.
