1, 2. a) Pastɛɛrã sẽn sok saam-biig a Russell n na n bãng Biiblã Zãmsdbã sẽn maand to-to n paamd ligdã, a leokame tɩ bõe? b) D na n goma bõe yell sag-kãngã pʋgẽ?

DAAR A YE, pastɛɛr (Église réformée) n sok saam-biig a Charles Russell n na n bãng Biiblã Zãmsdbã sẽn maand to-to n paamd ligd n tʋmd b tʋʋmã.

Saam-biig a Russell yeel-a lame tɩ “tõnd pa maand ligd lobr ye.”

Raoã sokame: “La yãmb maanda wãna?”

Saam-biig a Russell leokame: “M sã n togs foo, f pa na n tẽ ye. Nebã sã n wa tõnd tigissã, b mikdame tɩ d pa pɩʋʋgd ne lepr n kot ligd ye. La b sã n gese, b miime bal tɩ d yiisda ligd n maand bũmb kẽere. Rẽ kɩtame tɩ b sokd b mens woto: ‘Bõe la ma-me tõe n kõ n sõnge? Bala yɩl tɩ ro-kãngã yɩ woto, b yiisa ligd wʋsgo. . . ’”

Raoã sẽn ges a Russell to-to wã wilgame t’a pa tẽ ye.

A Russell paasame: “Sɩdã la m sẽn togs-fã. Nebã wat n sokda maam b sã n tõe n kõo ligd bilf n sõnge. Wẽnnaam sã n sõng ned t’a paam laogo, a na n dat n talla rẽ n pẽg Zu-soabã. La a sã n pa tare, bõe yĩng tɩ d na n modg-a?” *

² Saam-biig a Russell sẽn yeelã sɩd yaa sɩda. Hal baa pĩnd wẽndẽ wã, Wẽnnaam nin-buiidã sɩng n kõta kũun ne yamleoogo, n teend tũudum hakɩkã. Sag-kãngã pʋgẽ, d na n tẽega Biiblã kibay a wãn sẽn wilgd rẽ, la d gom a Zeova Kaset rãmbã me sẽn kõt kũun ne yamleoog n teend Rĩungã tʋʋmã. D na n goma d sẽn maand to-to rũndã-rũndã n paamd ligd n tʋmd d tʋʋmã. Yɩta sõma tɩ ned kam fãa sok a meng woto: ‘Wãn to la m tõe n wilg tɩ m teenda Rĩungã tʋʋmã?’

3, 4. a) A Zeova kɩsa sɩd tɩ neb nins sẽn tũud-a wã na n maana bõe? b) Bõe la Israyɛll nebã maan sɛk-roogã tilgr yĩnga?

³ A Zeova kɩsa wẽn-sakdb hakɩkã sɩda. A miime tɩ b sã n kõ-b sor tɩ b kõ kũun ne yamleoog n teel tũudmã,  b na n sɩd kõo ne sũ-noogo. Bɩ d tẽeg kibay a yiib sẽn zĩnd Israyɛll nebã wakate.

⁴ A Zeova sẽn yiis Israyɛll nebã yembd Eziptã poore, a yeelame tɩ b maan sɛk-roog n kẽed n pʋʋsd yẽ. Yaa fu-roog b sẽn tõe n sik n le tɩ tilg zĩig a to. B sẽn da na n tall teed nins n maan sɛk-roogã la b nags-a wã ra waoogame. A Zeova yeela a Moiiz t’a yeel nebã tɩ b tõe n kõo kũun n sõng tʋʋmdã. A yeel-b-la woto: “Bɩ ned ninga fãa sũur sẽn noom ne Zu-soabã wa ne kũun n wa kõ bãmba.” (Yik. 35:5) Sẽn pa kaoose, nin-buiidã ra yaa yembse, tɩ Ezipt rãmbã ra modgd-b tɩ b maand b tʋʋma fãa. (Yik. 1:14) Baa ne rẽ, b maana wãna? B kõo sãnem, wanzuri la teed a taaba, hal tɩ pa tõe n bãng n bilg ye. Wʋsgã fãa yaa Ezipt nebã sẽn kõ-ba. (Yik. 12:35, 36) Israyɛll nebã kõome tɩ yɩɩg b sẽn da ratã, tɩ b wa kong n ‘gɩdg nebã tɩ b ra le wa’ ne kũun ye.—Yik. 36:4-7.

5. A Davɩɩd sẽn yeel Israyɛll nebã tɩ b tõe n kõo kũun n sõng wẽnd-doogã meebã, b maana wãna?

⁵ Yʋʋm 475 loogr poore, a Davɩɩd yãka a meng arzɛk n kõ wẽnd-doogã meeb yĩnga. Yɩɩ pipi wẽnd-doog b sẽn me tũudum hakɩkã yĩnga. A kõo Israyɛll neb a taabã me sor tɩ b tõe n kõ kũun n sõnge. A sokame: “Ãnda rãmb n na n yãk bũmb nins b sẽn tarã ne yamleoog n kõ Zu-soabã?” B yeelame tɩ nin-buiidã sɩd “kõo Zu-soabã ne yamleoog la ne b sũyã fãa.” (1 Kib. 29:3-9) A Davɩɩd pʋʋsame, n yeel bũmb sẽn wilg t’a ra miime tɩ kũunã fãa yita a Zeova nengẽ. A yeelame: “Bũmba fãa yita yãmb nengẽ. La tõnd yãka bũmb nins yãmb sẽn kõ tõndã n lebs yãmba.”—1 Kib. 29:14.

6. Bõe n wilgd tɩ Rĩungã tʋʋm baooda ligdi, la sogs-bʋs la d na n leoke?

⁶ A Moiiz bɩ a Davɩɩd pa modg Wẽnnaam nin-buiidã tɩ b wa ne kũunã ye. Nebã pʋd n kõo ne sũ-noogo. La rũndã-rũndã yẽ? D fãa miime tɩ Wẽnnaam Rĩungã tʋʋmã baooda ligdi. Sɩd me, yɩl n yiis Biibl dãmb la sɛb sẽn wɛgsd a goamã baooda ligdi. Yɩl n me Rĩung roto, tigis-kãsems rot la siglgã rot a taabã, la b ges b yell yaa ligdi. Leb n yaa ligd la b sẽn yiisd n sõngd d saam-biis nins sabab-wẽnsã sẽn paamdã. La d maanda wãn n paamd ligd n tʋmd tʋʋm-kãensã? Yaa tɩlae tɩ b modg Rĩmã poorẽ dãmbã tɩ b kõ kũun bɩ?

7, 8. Bõe yĩng t’a Zeova Kaset rãmbã pa kot ligdi?

⁷ Saam-biig a Russell ne a tʋmd-n-taasã zãgsame tɩ b kõn tol n maan wa egiliiz rãmbã sẽn maand to-to n paamd ligdã ye. Gũusg Gasgã sẽn na n yi naoor a yiib soabã, a sõsg a ye gom-zug n da yet tɩ: “Yãmb data Gũusg Gasgã  bɩ?” Sõs-kãng pʋgẽ, a Russell yeelame: “D kɩsa sɩd tɩ sẽn yaa a ZEOVA n sõngd tɩ d yiisd Gũusg Gasgã, d pa na n tol n bõos wall d kos ninsaalbã teelg ye.” A paasame t’a “Zeova mengã yeela woto: ‘Wanzuri wã yaa maam n so, sãnema yaa maam n so.’ Dẽnd a sã n wa pa le sõngd-d tɩ d paamd ligd tʋʋmdã yĩnga, d na n bãngame tɩ yaa a sẽn dat tɩ d bas sebrã yiisgu.” (Aze 2:7-9) Sẽn yɩɩd yʋʋm 130 masã, b ket n yiisda Gũusg Gasgã, tɩ siglg ning sẽn yiisd-a wã me maneg n paamd pãnga!

⁸ A Zeova Kaset rãmbã pa bõosd ligd b tʋʋmã yĩng ye. B tigissã sasa b pa pɩʋʋgd ne lepr n kot ligd ye. B pa toond neb lɛta n bõosd ligdi, b pa met rot tɩ neb luwaasdẽ, b pa koosd teedo, bɩ n maand kɛrmes rãmb sẽn na yɩl n paam ligd ye. B ket n gãda bũmb ning b sẽn da yeel Gũusg Gasgã pʋgẽ hal sẽn kaoosã. B ra yeelame: “D zɩ n tags tɩ zemsame tɩ d bõos ligd Zu-soabã tʋʋm yĩng wa tũudum a taabã sẽn maandã ye. . . . D kɩsa sɩd tɩ nebã sẽn maand to-to n paamd ligd Zu-soabã yʋʋr yĩngã paoogd-a lame, leb n sãamda a sũuri. Nin-kãensã pa paamd a barka, a leb n pa ningd b sẽn maand bũmb nins ne ligdã bark ye.” *

9, 10. Wilg-y bʋʋm sẽn kɩt tɩ d kõt yamleoog kũunã.

⁹ Tõnd sẽn yaa Rĩungã poorẽ dãmbã, d pa baood tɩ b modg-d tɩ d yaool n kõ kũun ye. D pʋd n kõta d ligd la d paoong buud fãa ne yamleoogo, n teend Rĩungã tʋʋmã. Bõe yĩng tɩ d sakd n kõtẽ? D na n wilga bʋʋm a tãabo.

¹⁰ Pipi, d sẽn kõt kũun ne yamleoogã yaa d sẽn nong a Zeova, la d rat n maan ‘sẽn noom-a wã yĩnga.’ (1 Zã 3:22) Sɩd me, sẽn tũud-b a Zeova wã sã n kõt-a kũun ne b sũy fãa, noom-a lame. Bɩ d ges tʋm-tʋmd a Poll sẽn yeel bũmb ning kiris-nebã sẽn kõt kũunã to-to wa wɛɛngẽ. (Karm-y 2 Korẽnt dãmb 9:7.) Kiris-ned hakɩk pa kõt ne sũ-toog bɩ ne modgr ye. A sã n wa kõt kũuni, yaa “a sẽn da tags a sũur pʋgẽ.” * Woto rat n yeelame t’a reng n gũus n yãa sõngrã raabo, n yaool n tags n ges a sẽn tõe n kõ bũmb ning n sõngã. Ned sẽn maand woto tata a Zeova yam, bala Biiblã yeelame tɩ “Wẽnnaam nonga ned ninga sẽn kõt ne sũ-noogo.” Sebr Sõng pʋgẽ, b yeelame tɩ “sẽn kõt-a ne yamleoog la Wẽnnaam nonga.”

11. Bõe yĩng tɩ d rat ne d sũy fãa n kõ a Zeova d sẽn tõe tɛka?

¹¹ Yiib-n-soaba, kũunã d sẽn kõtã yaa sẽn na yɩl n pʋʋs a Zeova barka, bũmb nins fãa a sẽn maan n kõ-dã yĩnga.  D tẽeg a Moiiz tõogã noor a ye sẽn da sõngd Israyɛll ned fãa t’a tõe n tags n bãng a sẽn na n kõ. (Karm-y Tõod 16:16, 17.) Noorã yeelame tɩ rao sã n wat kibs a tãabã b sẽn da maand yʋʋmd fãa wã, a tog n zãa kũuni, “sẽn zems bark ninga Zu-soab a Wẽnnaam” sẽn kõ-a wã. Dẽnd nand tɩ rao fãa kẽng kibsã, a segd n tags n gesa a sẽn paam bark ninsã, n yaool masã n bʋgs n bãng a sẽn na n kõ bũmb ning tɩ yɩ sõma. Tõnd me sã n tags n ges bũmb nins fãa a Zeova sẽn maan n kõ-dã, kɩtdame tɩ d rat n kõ-a kũun wa d sẽn tõe tɛka. Bũmb nins fãa d sẽn kõt ne d sũy fãa wã, yaa teoog tɩ yaa ligdi, wilgda d sũur sẽn yaa noog to-to ne a Zeova sẽn maan n kõ-dã.—2 Kor. 8:12-15.

12, 13. Bõe yĩng tɩ d yetẽ tɩ d yamleoog kũunã wilgdame tɩ d nonga d Rĩmã? Ned fãa kõta wãna?

¹² Tãab-n-soaba, tõnd yamleoog kũunã wilgdame tɩ d nonga a Zezi Kirist sẽn yaa d Rĩmã. Bõe yĩng tɩ d yet woto? D tẽeg bũmb a Zezi sẽn yeel a karen-biisã yʋng ning  b sẽn yõk-a wã. (Karm-y Zã 14:23.) A yeela woto: “Ned sã n nong maam, a na n saka mam goamã.” A Zezi sẽn yeel tɩ d moon Rĩungã koe-noog dũniyã gill zugã me yaa a gomd d sẽn segd n sake. (Mat. 24:14; 28:19, 20) D sã n maand d sẽn tõe fãa, n kẽesd d sẽkã, d pãngã la d paoongã Rĩungã koe-noogã mooneg pʋgẽ, d sakda a Zezi gom-kãngã. Dẽnd wilgdame tɩ d nonga Mesi wã sẽn yaa d Rĩmã.

¹³ Hakɩka, tõnd sẽn yaa Rĩmã poorẽ dãmbã, d rata ne d sũy fãa n kõ ligd n teel Rĩungã tʋʋma. La ned kam fãa kõta wãna? Bee ne ned fãa. D fãa kõta sẽn zems d tõogo. Tõnd tẽed-n-taasã wʋsg nus pa zãad ye. (Mat. 19:23, 24; Zak 2:5) La b sã n tẽeg tɩ baa b kũunã pa waooge, b sẽn kõt ne yamleoogã yĩnga a Zeova ne a Biigã nandame, kengda b raoodo.—Mark 12:41-44.

14. Pĩndã, wãn to la a Zeova Kaset rãmbã ra maand sɛbã kũun wɛɛngẽ?

¹⁴ A Zeova Kaset rãmbã yiisda sɛb sẽn wɛgsd Biiblã goam n kõt nebã. Pĩndã, ned sã n da reeg sebre, a kõta ligd bilfu. B sẽn da maan woto wã yaa sẽn na yɩl tɩ neb nins nus sẽn pa zãadã me tõe n paam sɛbã. Ned sã n da rat sebr n karem n yaool pa tar ligdi, koe-moondbã pa get tɩ rẽ yaa yell ye. B sakd n basa sebrã ne-a. B sẽn dat ne b sũy fãa yaa pʋ-peelem dãmbã paam sɛbã n karem tɩ naf-ba.

15, 16. a) Yʋʋmd 1990 wã tɛka, bõe la siglgã rems sɛbã kũun wɛɛngẽ? b) Yɛ la d ningd yamleoog kũunã? (Ges-y zĩ-gũbrã sẽn yet tɩ “ B maanda bõe ne ligdã d sẽn kõtã?”)

¹⁵ Yʋʋmd 1990 wã tɛka, siglgã remsa yɛl kẽer sɛbã kũun wɛɛngẽ. Yʋʋm-kãnga, Etazĩni soolmẽ wã, b sɩngame n kõt nebã sɛbã, tɩ sẽn deeg-a fãa kõt a sẽn tare. B toola beenẽ tigimsã fãa lɛtr n yeele: “B na n kõta koe-moondbã la neb a taabã periodik rãmbã ne sɛbã fãa, n pa yetẽ tɩ b kõ ligd n yaool n deeg ye. . . . Ned ning sẽn dat n kõ bũmb n teel tʋʋmdã tõe n kõome. La baa ned pa kõ ligdi, a tõe n paama sɛba.” B sẽn maan woto wã yaa sẽn na yɩl tɩ nebã bãng vẽeneg tɩ yaa Wẽnnaam tʋʋmde, tɩ tõnd tʋmda ne yamleoogo, la tɩ d pa ‘rɩkd Wẽnnaam koɛɛgã n leebd n baood yõod ye.’ (2 Kor. 2:17) Tarẽ-n-tarẽ, b wa n kɩtame tɩ b na n maand woto dũniyã gill zugu.

¹⁶ Yɛ la d ningd yamleoog kũunã? A Zeova Kaset rãmbã Rĩung rotẽ, kogend n be be tɩ ned fãa tõe n ning ligdi. La ned sã n dat n tool ligd a toor tɩ kẽng a Zeova Kaset rãmbã biru bɩ Betɛllẽ, a tõeeme. Yʋʋmd fãa, b yiisda sõsg Gũusg Gasgã pʋgẽ, n wilg soay toɛy-toɛy nebã sẽn tõe n tũ n kõ b yamleoog kũunã.

17-19. Togs-y b sẽn maand bũmb ning ne ligdã d sẽn kõt a) koɛɛgã mooneg yĩngã, b) Rĩung rotã meeb yĩngã, d) tigingã depãens rãmb yĩngã.

¹⁷ D sẽn kõt koɛɛgã mooneg yĩngã: Yaa ligd-kãng la b tar n get bũmb nins fãa b sẽn maand koɛɛgã mooneg yĩng dũniyã gill zugã. Wala makre, sɛbã yiisg la b toolgo, ne Betɛll dãmbã la biru rãmbã meeb la b yell gesgo. Ligd-kãng me la b yãkd n sigind lekoll dãmbã, n get misioneer dãmbã yelle, n paas tigims sul yel-gɛtbã la zall so-pakdbã yelle. Leb n yaa be la b yãkd n sõngd d tẽed-n-taas nins sabab-wẽns sẽn paamã. *

¹⁸ D sẽn kõt Rĩung rotã meeb yĩngã: Ligd-kãng la b yãkd n kõt tigimsã, Rĩung rotã meeb wall b manegr yĩnga. D sẽn kõt ligd tʋʋm-kãng yĩngã kɩtame tɩ b tõe n sõng tigims a taaba. *

¹⁹ D sẽn kõt tigingã depãens rãmb yĩngã: Yaa ligd-kãng la tigingã tar n get Rĩungã roog depãens rãmb yelle. Kãsem-dãmbã tõe n yãka yam n na n yãkd ligd kogl-kãngã pʋgẽ n toond Betɛllã, dũni gill tʋʋmdã yĩnga. Wakat kãnga, b togsda ligdã b sẽn dat n yãkã sõore, tɩ tigingã neb sã n sak bɩ b yaool n toondẽ. Kiuug fãa, saam-biig ning sẽn zãad tigingã ligdã geenda ligd sẽn kẽ la sẽn yi, n karem nebã fãa taoore.

20. Bõe la yãmb tõe n maan n ‘waoog a Zeova ne y paoongã’?

²⁰ D sã n tags bũmb nins fãa b sẽn maand dũniyã gill zugu, sẽn na yɩl tɩ d tõog n moon Rĩungã koɛɛgã la d sõng neb tɩ b lebg Kiristã karen-biisã, d sɩd rata ne d sũy fãa n ‘waoog a Zeova ne d paoongã.’ (Yel. 3:9, 10) D pãngã, d bãngrã, d minimã, n paas d sẽn tõe n maan tũudmã pʋgẽ wã fãa yaa d paoongo. La d pa yĩmd me tɩ ligdã la teed nins d sẽn tarã yaa d paoong ye. D rata ne d sũy fãa n tall rẽ n teel Rĩungã tʋʋmã. Sẽn yaa wakat ning fãa, bɩ d ned kam fãa kõ a sẽn tõe. Tõnd yamleoog kũunã waoogda a Zeova, la wilgdẽ tɩ d teenda Mesi wã Rĩungã.