Wẽnnaam bɛ-kãseng sẽn yɩɩd fãa wã ya a Sʋɩtãan Munaafɩɩka. A yaa malɛk sẽn kɩɩs a Zeova. A Sʋɩtãan ket n zabda ne Wẽnnaam la a wat ne tood wʋsg ninsaalbã zutu. A Sʋɩtãan yaa wẽnga. A yaa ziri yagd la nin-kʋʋda.—Zã 8:44.

Bõn-naands a taab sẽn da yaa malɛgs n bʋʋg a Sʋɩtãan tɩ b kɩɩsd Wẽnnaam. Biiblã boond-b lame tɩ zĩn dãmba. Wala a Sʋɩtãana, zĩn dãmbã yaa ninsaalbã bɛɛba. B nong n maanda neba wẽngã. (Matɩe 9:32, 33; 12:22) A Zeova na n sãama a Sʋɩtãan la a zĩn dãmbã wakat fãa yĩnga. Yaa wakat bilf bal la b tar n na n nams ninsaalbã.—Wilgri 12:12.

Y sã n dat n yɩ Wẽnnaam zoa, y pa segd n maan a Sʋɩtãan sẽn dat tɩ y maanã ye. A Sʋɩtãan ne a zĩn dãmbã kisa a Zeova. B yaa Wẽnnaam bɛɛba, n dat tɩ yãmb me yɩ Wẽnnaam bɛ. Rɩlla y yãk y sẽn dat n noog a soab sũuri: a Sʋɩtãan bɩ a Zeova. Y sã n dat vɩɩm sẽn-kõn-sa, y segd n yãka Wẽnnaam daabã maanego. A Sʋɩtãan tara sɩlem wʋsg la manesem wʋsg n na n belg nebã. A belga neb wʋsg sẽn yɩɩde.—Wilgri 12:9.