Kũum yaa lebend ne vɩɩm. Kũum wõnda gõe-kãsenga. (Zã 11:11-14) Sẽn ki-bã pa tõe n wʋme, n yã, n gome, bɩ n tags bũmb yell ye. (Koɛɛg Soaba 9:5, 10) Ziri tũudmã zãmsda nebã tɩ sẽn ki-bã rebda kɩɩm-kulg n tɩ vɩɩmd ne b yaab rãmbã. Pa woto la Biiblã zãmsd ye.

Neb nins sẽn ki wã pa tõe n sõng tõnd ye, la b pa tõe n maan tõnd wẽng ye. Nebã nong n kʋʋda maand la maand yɛl a taab n tagsdẽ tɩ rẽ na n nooga sẽn ki-bã sũyã. Rẽ pa noom Wẽnnaam ye, bala woto yẽbga a Sʋɩtãan zɩlem-beed a yembr zugu. Rẽ pa tõe n yɩ sẽn ki-bã noog me ye, bala b pa vɩ ye. D pa segd n zoe sẽn ki-bã rabeem bɩ d balem-b ye. Yaa Wẽnnaam bal la d segd n balem.—Matɩe 4:10.

Sẽn ki-bã na n leb n vɩɩmdame. A Zeova na n vʋʋga sẽn ki-bã tẽng zug arzãn pʋgẽ. La wakat kãng ket n watame. (Zã 5:28, 29; Tʋʋma 24:15) Wẽnnaam tõe n vʋʋga neb nins sẽn ki wã wala yãmb sẽn tõe n nek ned sẽn gõeyã.—Mark 5:22, 23, 41, 42.

Tagsg ning sẽn yet tɩ d pa kiidã yaa zɩlem-beed a Sʋɩtãan Munaafɩɩk sẽn yelge. A Sʋɩtãan ne a zĩn dãmbã kɩtdame tɩ nebã tagsdẽ tɩ sẽn ki-bã tara sɩɩs sẽn ket n vɩya, n wat ne bãas la zu-loees a taaba. A Sʋɩtãan tudgda nebã, wakat kẽere yaa ne zãmsd la yãab maasem. A Zeova Wẽnnaam ninga neb nins sẽn makd n na n gom ne sẽn ki-bã taale.—Tõodo 18:10-12.