ZÃMSG 10
D sẽn na n yã sɩd tũudmã to-to
Y sã n dat n yɩ Wẽnnaam zoa, y segd n tũu tũudum ning sẽn tat Wẽnnaam yamã. A Zezi yeelame tɩ “balemdb hakɩkã” ra na n balma Wẽnnaam tɩ zems ne “sɩda.” (Zã 4:23, 24, NW ) Manesem a yembr sẽn zems bal n be d sẽn tõe n balem Wẽnnaam. (Efɛɛz rãmba 4:4-6) Sɩd tũudmã tar n debda vɩɩm sẽn-kõn-sa zĩigẽ, tɩ ziri tũudmã tar n debd sãoong zĩigẽ.—Matɩe 7:13, 14.
Yãmb tõe n bãnga sɩd tũudmã, y sã n ges neb nins sẽn tũud-a wã. A Zeova sẽn yaa nin-sõngã yĩnga, neb nins sẽn ya a balemdb hakɩkã segd n yɩɩ nin-sõma. Wala orãnz tɩ-sõng sẽn womd orãnz sõma wã, sɩd tũudmã kɩtdame t’a tũudbã yaa nin-sõma.—Matɩe 7:15-20.
A Zeova zo-rãmbã tara waoogr wʋsg ne Biiblã. B miime tɩ Biiblã yita Wẽnnaam nengẽ. B basdame t’a sẽn yet bũmb ningã wilg b sor vɩɩmã pʋgẽ, n yidg b zu-loeesã la a sõng-b tɩ b bãng Wẽnnaam. (2 Tɩmote 3:16) B modgdame n na n tũ b sẽn moond bũmb ningã.
A Zeova zo-rãmbã tara nonglem ne taaba. A Zezi talla nonglem ne nebã n zãms-b Wẽnnaam wɛɛngẽ, n sãoog neb nins sẽn da yaa bãad dãmba. Neb nins sẽn tũud sɩd tũudmã tara nonglem ne neb a taabã me. Wala a Zezi, b pa paoogd neb nins sẽn yaa naong rãmba, bɩ sẽn yaa buud a taab nebã ye. A Zezi yeelame tɩ nebã ra na n bãnga a karen-biisã, nonglem ning b sẽn tar ne taabã yĩnga.—Zã 13:35.
Wẽnnaam zo-rãmbã waoogda Wẽnnaam yʋʋrã sẽn ya a Zeova wã. Ned sã n zãgs t’a kõn pʋd yãmb yʋʋrã, nin-kãng tõe n yɩɩ y zo-nongr bɩ? Ayo! Tõnd sã n tar zoa, d pʋta a yʋʋrã la d gomd zoa kãng yell neer ne neb a taabã. Woto, neb nins sẽn dat n yɩ Wẽnnaam zo-rãmbã segd n pʋda a yʋʋrã la b gom a yell ne neb a taabã. A Zeova ratame tɩ tõnd maan woto.—Matɩe 6:9; Rom dãmbã 10:13, 14, NW.
Wala a Zezi, Wẽnnaam zo-rãmbã zãmsda neb a taabã Wẽnnaam Rĩungã wɛɛngẽ. Wẽnnaam Rĩungã yaa saasẽ goosneemã sẽn na n kɩt tɩ tẽngã lebg arzãna. Wẽnnaam zo-rãmbã togsda neb a taabã koe-no-kãngã Wẽnnaam Rĩungã wɛɛngẽ.—Matɩe 24:14.
A Zeova Kaset rãmbã maoodame n na n yɩ Wẽnnaam zo-rãmba. B waoogda Biiblã la b tar nonglem ne taaba. B pʋta Wẽnnaam yʋʋrã me la b waoogd yʋ-kãnga, la b zãmsd neb a taabã Wẽnnaam Rĩungã wɛɛngẽ. A Zeova Kaset rãmbã tũuda sɩd tũudmã tẽngã zug rũndã-rũndã.
Découvrez aussi…
BIIBLÃ ZÃMSG SẼN TAR YÕOD WƲSGO
Wẽnnaam tara yʋʋr bɩ?
Wẽnnaam tara naam yʋy wʋsgo. Wala makre Sẽn-tõe-a-fãa, Naandã la Zu-soaba. La a yʋ-peellã bee sẽn ta naoor 7 000 pĩnd wẽndẽ Biibl-dãmbã pʋsẽ.
BIIBLÃ ZÃMSG SẼN TAR YÕOD WƲSGO
Ãnd n so Biiblã?
Sẽn yaa neb n gʋls Biiblã, segdame tɩ b bool-a tɩ Wẽnnaam goam sɩda? Ãnd goam n be Biiblã pʋgẽ?
BIIBLÃ ZÃMSG SẼN TAR YÕOD WƲSGO
Bõe n wilgd tɩ Biiblã yaa Wẽnnaam sebre?
Biiblã sã n yaa Wẽnnaam sebre, dẽnd a pa wa sɛb a taabã ye.
