A Zeova pa na n bas tɩ nin-wẽnsã sãam Arzãnã ye. Ya a zo-rãmbã bal n na n vɩɩmd be. Bõe n na n paam nin-wẽnsã? Sẽn na yɩl n bãng a leoorã, bɩ y ges kɩba-sɩd ning sẽn tɩ loe ne a Nowe wã. A Nowe vɩɩmda yʋʋm tusa sẽn looge. A ra yaa nin-sõngo, la a ra modgda wakat fãa n maand a Zeova raabã. La neb a taabã sẽn da be tẽngã zugã ra maanda bõn-wẽnse. Rẽ n so t’a Zeova ra yeel a Nowe t’a na n waa ne sa-kãseng n sãam nin-wẽn-kãensa fãa. A yeela a Nowe t’a ka koom koglg tɩ yẽ ne a zakã rãmb kẽ be n da ki, Sa-kãsengã sã n wa wa ye.—Sɩngre 6:9-18.

A Nowe ne a zakã rãmb kaa koglgã. A Nowe keooga nebã tɩ Sa-kãseng n da na n wa, la b pa kelg-a ye. B kell n maana bõn-wẽnsã. Koglgã sẽn wa n ka n sa, a Nowe kẽesa rũmsã koglgã pʋgẽ, tɩ yẽ ne a zakã rãmb me kẽ. Rẽ poore, a Zeova waa ne sa-kẽenga. Saaga nii rasem 40 la yʋnd 40. Koomã lima tẽngã gilli.—Sɩngre 7:7-12.

 Nin-wẽnsã kiime, la a Nowe ne a zakã rãmb põsame. A Zeova kogl-b-la Sa-kãsengã pʋgẽ tɩ b põse, t’a kẽes-b tẽng sẽn ye pa tar wẽnem pʋgẽ. (Sɩngre 7:22, 23) Biiblã yetame tɩ wakat n ye wat t’a Zeova na n sãam neb nins sẽn zãgsd tɩrg maanegã. B pa na n sãam nin-sõma ye. B na n vɩɩmda wakat sẽn-kõn-sa tẽng zug Arzãnã pʋgẽ.—2 Pɩɛɛr 2:5, 6, 9.

Rũndã-rũndã, neb wʋsg n maand bõn-wẽnse. Dũniyã pida ne gudgri. A Zeova tʋmda a Kaset rãmbã n yɩlemd naoor wʋsg sẽn na yɩl n sagl nebã, la wʋsg sẽn yɩɩd pa rat n kelg a Zeova goamã ye. B pa rat n toeem b manesmã ye. B pa rat n sak Wẽnnaam sẽn yet sõma la wẽngã wɛɛngẽ wã ye. Bõe n na n paam nin-kãensã? B na n wa toeema daar ning bɩ? Wʋsg pa na n tol n toeem ye. Wakat n wat tɩ Wẽnnaam na n sãam nin-wẽnsã tɩ b ye pa tol n vɩɩmd ye.—Yɩɩl Sõamyã 92:8.

B pa na n sãam tẽngã ye. B na n toeem-a lame t’a lebg arzãna. Neb nins sẽn lebgd Wẽnnaam zo-rãmbã na n vɩɩmda wakat sẽn-kõn-sa tẽng zug Arzãnã pʋgẽ.—Yɩɩl Sõamyã 37:29.