Wẽnnaam datame tɩ yãmb yɩ a zoa. Yãmb zoe n tagsame tɩ y tõe n lebga ãndũniyã Nin-kãseng sẽn yɩɩdã zoa bɩ? B ra boonda a Abrahaam sẽn vɩɩmd hal sẽn kaoosã tɩ Wẽnnaam zoa. (Zak 2:23) Neb a taab Biiblã sẽn gom b yell yõga zood ne Wẽnnaam, n paam bark wʋsgo. Rũndã-rũndã, neb sẽn yit dũniyã zĩis fãa pʋsẽ lebga Wẽnnaam zo-rãmba. Yãmb me tõe n yɩɩ Wẽnnaam zoa.

F sẽn na n yaa Wẽnnaam zoa n são f sẽn na n yaa ninsaal zoa. Wẽnnaam zɩ n sãam a zo-rãmb nins sẽn tar kɩs-sɩdã sũy ye. (Yɩɩl Sõamyã 18:27) F sẽn na n yaa Wẽnnaam zoa n são f sẽn na n tar arzɛgse. Arzɛk soab sã n ki, a ligdã kẽeda neb a taab nusẽ. La neb nins sẽn tar zood ne Wẽnnaamã tara laog ned sẽn pa tõe n deege.—Matɩe 6:19.

Neb kẽer tõe n makame n dat n gɩdg-y tɩ y ra zãms n bãng Wẽnnaam ye. Baa y zo-rãmb bɩ y zak rãmb tõe n maana woto. (Matɩe 10:36, 37) Neb a taab sã n laad yãmb bɩ b rat n zab ne y bɩ y sʋk y menga: ‘Ãnd yam la m dat n ta, ninsaalbã bɩ, bɩ Wẽnnaam?’ Tags-y woto n gese: Ned sã n da yeel-y tɩ y bas rɩɩbo, y na kelg-a? Yaa vẽeneg tɩ yaa ayo! Yaa tɩlae tɩ y rɩ n vɩɩmde. La Wẽnnaam tõe n kɩtame tɩ y vɩɩmd wakat sẽn-kõn-sa! Woto, bɩ y ra bas ned ba a yembr t’a gɩdg-y tɩ y pa zãms n bãng y sẽn tõe n yɩ Wẽnnaam zoa to-to ye.—Zã 17:3.