Yãmb sã n tar zoa y sẽn pẽgd wʋsg la y waoogdẽ, y modgdame n na n yɩ wa yẽ. “A Zeova yaa nin-sõng la nin-tɩrga,” woto la Biiblã yeta. (Yɩɩl Sõamyã 25:8, NW ) Sẽn na yɩl n yɩ Wẽnnaam zoa, rɩllame tɩ d yɩ nin-sõng la nin-tɩrga. Biiblã yetame: “Bɩ yãmb yɩ Wẽnnaam togs-n-taas wa kom-nongdse, la [y] kẽn ne nonglem.” (Efɛɛz rãmba 5:1, 2) Ad manesem a wãn d sẽn tõe n tũnug ne n maan woto:

Sõng-y neb a taabã. “Bɩ d maan neba fãa yel-sõmde.”—Galat dãmba 6:10.

Yɩ-y tʋm-tʋmda. “Ned ninga sẽn da zuuda, bɩ a ra le zu ye, bɩ a maan nug tʋʋmd sẽn yaa sõama.”—Efɛɛz rãmba 4:28.

Pa-y yɩlemd yĩngã la vɩɩm manesmã wɛɛngẽ. “Bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.”—2 Korẽnt dãmba 7:1.

 Tall-y nonglem la waoogr manesem ne y zaka rãmba. “Bɩ yãmb ned kam fãa nong a pag wa a menga, la bɩ pag waoog a sɩda [sõma-sõma, NW ]. Kamba, . . . bɩ y sak y ba rãmba ne y ma rãmba.”—Efɛɛz rãmba 5:33-6:1.

Wilg-y y nonglem ne neb a taabã. “Tɩ d nong taaba, tɩ bõe, nonglem yita Wẽnnaam nengẽ.”—1 Zã 4:7.

Sak-y tẽngã noyã. “Bɩ ned kam fãa sak [goosneema wã] noyã . . . Bɩ y kõ neba fãa sẽn zems bãmba, bɩ y kõ yõor yaood deegdba yõor yaoodo.”—Rom dãmbã 13:1, 7.