Zoa paoong baooda modgre, tɩ zoa tallg baood modgre. Y sẽn modgd n na n yɩ Wẽnnaam zoa la y kell n pa n yɩ a zoa wã na n talla bark wʋsgo. A Zezi yeela neb nins sẽn tẽ-a wã woto: “Sɩdã na n kõo yãmb paam-m-menga.” (Zã 8:32, NW ) Woto rat n yeelame tɩ bõe?

Y tõe n paama paam-m-meng masã. Y tõe n paama y meng ne ziri zãmsg la zɩlem-beed nins a Sʋɩtãan sẽn yelgã. Y tõe n paama y meng ne saagr kaalem ning sẽn pid neb milyõ rãmb sẽn pa mi a Zeova wã vɩɩmã. (Rom dãmbã 8:22) Wẽnnaam zo-rãmbã paamda b mens ne ‘kũum zoeese.’—Hebre dãmba 2:14, 15.

Y tõe n paama paam-m-meng Wẽnnaam dũni paalgã pʋgẽ. Ad sɩd yaa paam-m-meng kãseng la y tõe n paam beoog-daare! Tẽng zug Arzãnã pʋgẽ, d na n paama d mens ne zabã, bãasã la bi-beerã. La d paam d mens ne naongã la komã. N paam d mens ne kʋʋlmã la kũumã. La d paam d mens ne rabeemã, weoogrã la wẽgbã. Biiblã yeta Wẽnnaam wɛɛngẽ woto: “Yãmb pukda y nugu, la bõn-vɩɩs fãa paamda bark tɩ seke.”—Yɩɩl Sõamyã 145:16.

 Wẽnnaam zo-rãmbã na n vɩɩmda wakat sẽn pa sate. Vɩɩm sẽn pa satã yaa kũun sẽn tar yõod wʋsg Wẽnnaam sẽn na n kõ neb nins sẽn baood a zoodã. (Rom dãmbã 6:23) Yãmb wee n tags n ges vɩɩm sẽn pa satã võor sẽn na n yɩ a soab ne yãmba!

Y na n paama sẽk n maan yɛl wʋsgo. Tõe tɩ y nongẽ lame n zãms n deem ne mizik teoogo. Bɩ tõe tɩ y rat n zãmsa bõn-yood gʋlb wall raad wãabo. Tõe tɩ y rat n zãms n bãnga rũmsã bɩ tɩɩsã sõma. Bɩ tõe tɩ y rat n toga sor n bãng tẽns la neb buud toor-toore. Y sã n tar vɩɩm sẽn pa satã, bõn-kãensa fãa tõe n yɩɩme!

Y na n paama sẽk n yõg zood ne neb wʋsgo. Vɩɩm sẽn pa satã na n kõ-y-la sor tɩ y paam n bãng neb a taab wʋsg sẽn lebg Wẽnnaam zo-rãmba. Y na n tõog n bãnga b sẽn tarẽ minim zĩis ninsã la b zʋg-sõma wã, la b na n yɩɩ yãmb me zo-rãmba. Y na n nong-b lame tɩ bãmb me na n nong yãmba. (1 Korẽnt dãmba 13:8) Y sẽn tar vɩɩm sẽn pa satã na n kõ-y-la sẽk tɩ y yõg zood ne neba fãa sẽn be dũniyã zugã! Sẽn yɩɩd fãa, y zoodã ne a Zeova na n talla paasg ne yʋʋm kob-gĩnã sẽn tar loogrã. Bɩ y yɩ Wẽnnaam zoa wakat sẽn pa sate!