A Sʋɩtãan ne a zĩn dãmbã pa rat tɩ yãmb sõgen Wẽnnaam ye. B ratame tɩ neba fãa bas Wẽnnaam, la b maanda b sẽn tõe tɛk rẽ yĩnga. Wãn to la b modgd n maand woto? Manesem a yembr yaa ne ziri tũudmã maasem. (2 Korẽnt dãmba 11:13-15) Tũudum yaa ziri, a sã n pa zãmsd sɩdã sẽn be Biiblã pʋgẽ wã. Ziri tũudmã yaa wala ligd b sẽn togs n maane. A tõe n wõnda halaalã n yaool n pa tar yõod ye. A tõe n waa ne zu-loees n kõ-yã.

Zɩlem-beed tũudmã wɛɛngẽ pa tõe n tol n ta a Zeova sẽn yaa sɩd Wẽnnaamã yam ye. A Zezi sẽn da wa n be tẽng zugã, tũudum neb sull n da rat n kʋ-a. B ra tagsdame tɩ b sẽn da balemd to-to wã yaa sõma. B yeelame: “Tõnd tara ba a yembre sẽn yaa Wẽnnaam.” A Zezi saka woto bɩ? Ayo! A yeel-b lame: “Sʋɩtãana la yãmb ba.” (Zã 8:41, 44) Rũndã-rũndã, neb wʋsg tagsdame tɩ b balemda Wẽnnaam, la sɩd-sɩda b sõgenda a Sʋɩtãan ne a zĩn dãmbã!—1 Korẽnt dãmba 10:20.

 Wala tɩ-põos sẽn womd bi-wẽnsã, ziri tũudmã wata ne neb nins sẽn maand bõn-wẽnse. Dũniyã pida ne toogo, bõn-wẽns nins nebã sẽn maanda yĩnga. Yoobo, zaba, wagdem, weoogre, nin-kʋʋr la pagb yõgb beeme. Neb wʋsg sẽn maand bõn-wẽns kãensa wã tara tũudum, la b tũudmã pa tusd-b tɩ b maan sẽn yaa sõma ye. B pa tõe n yɩ Wẽnnaam zo-rãmb tɩ sã n pa b basa bõn-wẽnsã maaneg ye.—Matɩe 7:17, 18.

Ziri tũudmã zãmsda nebã tɩ b pʋʋs bõn-naandse. Wẽnnaam yeelame tɩ d ra pʋʋs bõn-naands ye. Rẽ zemsame. Yãmb sũur na yɩ noog ne ned sẽn zɩ n gom ne yãmba, n yaool n gomd ne yãmb fotã bala? Nin-kãng soabã tõe n yɩɩ yãmb zoa hakɩk bɩ? Ayo, a pa tõe ye. A Zeova ratame tɩ nebã gom ne-a, lakae pa bõn-naandg b sẽn pees bɩ imaaz sẽn pa vɩyã ye.—Yikri 20:4, 5.

Ziri tũudmã zãmsda nebã tɩ zemsame tɩ b kʋ neb a taabã zabr wakate. A Zezi yeelame tɩ Wẽnnaam zo-rãmbã na n nonga taaba. D pa kʋʋd neb d sẽn nong ye. (Zã 13:35) Yaa wẽng meng tɩ d kʋ nin-wẽnsã. A Zezi bɛɛbã sẽn da wa n na n yõk-a wã, a pa bas t’a karen-biisã zab n kogl-a ye.—Matɩe 26:51, 52.

Ziri tũudmã zãmsda nebã tɩ nin-wẽnsã na n namsa bugum yiri. La Biiblã yaool n zãmsda nebã tɩ yel-wẽnd wata ne kũum. (Rom dãmbã 6:23) A Zeova yaa nonglem Wẽnnaam. Nonglem Wẽnnaam na n namsa neb wakat sẽn-kõn-sa yĩng bɩ? Yaa vẽeneg tɩ ayo! Arzãnã pʋgẽ, yaa tũudum a yembrã, a soab ning sẽn tat a Zeova yamã bal n na n zĩndi. (Wilgri 15:4) Tũudum nins fãa sẽn yẽbg a Sʋɩtãan zɩlem-beedã zugã na n menemame.