SAK 13
A Tɩmote ra nonga nebã sõngre
A Tɩmote ra yaa bi-bɩɩg sẽn dat ne a sũur fãa n sõng nebã. A toga sor n kẽng tẽns wʋsgo, sẽn na yɩl n paam n sõng neb a taabã. Rẽ kɩtame t’a vɩɩmã yɩ noogo. Fo rat n bãnga bũmb kẽer a sẽn maan bɩ?—
A Tɩmote ma wã ne a yaab-poakã ra gomda a Zeova yell ne-a
A Tɩmote ne a zakã rãmb ra bee Listre. Hal a sẽn wa n yaa kɩdgã, a yaab-poak a Loyiis ne a ma a Eniis ra gomda a Zeova yell ne-a. Rẽ kɩtame t’a Tɩmote sẽn wa n bɩtẽ wã, a ra ratame n sõng neb a taabã me tɩ b bãng a Zeova.
A Tɩmote sẽn wa n lebg bi-bɩɩga, a Poll yeel-a lame t’a ratame t’a wa tũ yẽ tɩ b tɩ moon koɛɛgã tẽns a taaba. A Tɩmote yeelame tɩ yell ka ye. A sakame n na n tũ a Poll n tɩ sõng neb a taabã.
A Tɩmote sɩd tũu a Poll n kẽng Masedoan tẽng a ye sẽn boond tɩ Tesalonik. Zĩigã ra zãrame. B kẽna nao, b kẽe batayo me. B sẽn ta wã, b sõnga neb wʋsg tɩ b bãng a Zeova. La tẽngã neb kẽer sũy yikame, hal tɩ b ra rat n pãb a Poll dãmba. Rẽ kɩtame t’a Poll ne a Tɩmote zoe n looge. B kẽnga tẽns a taab n tɩ moon koɛɛgã.
A Tɩmote vɩɩmã yɩɩ noogo
Kiis a wãn poore, a Poll yeela a Tɩmote t’a lebg n kẽng Tesalonik n tɩ ges saam-biisã sã n keemame. A Tɩmote talla raoodo, n sɩd leb Tesalonik, zĩig ning b sẽn da rat n pãb-bã. Yaa a sẽn nong saam-biisã yĩng la a sẽn sak n kẽngã. A lebg n waa ne koe-noogo. A wa n yeela a Poll tɩ Tesalonik saam-biisã fãa keemame.
A Tɩmote tũu a Poll yʋʋm wʋsg tɩ b moon koɛɛgã. A Poll yeela a sebr a yembr pʋgẽ tɩ yaa a Tɩmote la yẽ tõe n tʋm t’a sõng tigimsã sõma. A Tɩmote ra nonga a Zeova la a nong nebã me.
Fo nonga nebã, n dat n sõng-b tɩ b bãng a Zeova bɩ?— Fo sã n maan woto, fo vɩɩmã na n yɩɩ noog wa a Tɩmote.
