SAK 11
B gʋlsa sɛb n togs a Zezi sẽn maan bũmb ninsã
Fo nee rapã sẽn be fotã zugã bɩ?— Yaa a Matɩe, a Mark, a Luk, a Zã, a Pɩɛɛr, a Zak, a Ziid, la a Polle. B fãa zĩnda wakat ning a Zezi sẽn wa n be tẽngã zugã. B gʋlsa sɛb n togs a Zezi sẽn maan bũmb ninsã. D gom b yell bilfu.
Ãnd dãmb la woto?
B fãa sʋka, neb a tãab n da yaa a Zezi tʋm-tʋmdba, n tũud-a n moond koɛɛgã. Fo mii b yʋy bɩ?— Yaa a Matɩe, a Zã ne a Pɩɛɛre. A Matɩe ne a Zã ra mii a Zezi sõma. B yiibã fãa gʋlsa sebr n togs a Zezi vɩɩmã sẽn yɩ to-to. Tʋm-tʋmd a Zã leb n gʋlsa sɛb a naas n paase. Yaa Wilgr sebrã, Zã sebr pipi soabã, yiib-n-soabã la tãab-n-soabã. Tʋm-tʋmd a Pɩɛɛr me gʋlsa sɛb a yiibu. Yaa pipi Pɩɛɛr ne yiib-n-Pɩɛɛre. A togsa a sebr a yiib-n-soabã pʋgẽ tɩ daar a ye, a Zeova zĩnda saasẽ n gom a Zezi yelle. Nebã wʋma a Zeova sẽn yeel yaa: ‘Ada yaa mam Biiga, mam nonga yẽ. M sũurã nooma ne-a.’
La rap a taabã yẽ? Bãmb me sẽn gʋls sɛb ninsã sõngda tõnd tɩ d bãng a Zezi sõma. Wala makre, a Mark ne a Luk. B sẽn wa n na n yõk a Zezi wã, wõnda a Mark zĩnda be, n yã bũmb ning fãa sẽn maanã. A Luk ra yaa logtore. Tog n yaa a Zezi kũumã poor la a lebg kiris-neda.
Neb a yiib n be fotã zug n yaa a Zezi yaopa. Fo mii b yʋy bɩ?— Yaa a Zak ne a Ziid. Sɩngrẽ wã, b ra pa tẽed a Zezi ye. B ra tagsdame meng t’a zugã ka be ye. La b wa n sak n lebga kiris-neba.
D gom a Poll yell masã. Yẽ me gʋlsa sɛb tɩ be Biiblã pʋgẽ. A sẽn wa n da pa kiris-nedã, a yʋʋr da yaa a Soll. A ra kisa kiris-nebã, n da namsd-b wʋsgo. Fo mii bũmb ning sẽn maan t’a sak n lebg kiris-nedã bɩ?— Daar a ye, a Poll da rabda tẽng a to, n wa wʋm ned sẽn be saasẽ n gomd ne-a. Ra yaa a Zezi. A soka a Poll yaa: ‘Bõe yĩng tɩ fo namsd neb nins sẽn tẽed maamã?’ Rẽ tɛka, a Poll toeemame n sak n lebg kiris-neda. A gʋlsa sɛb 14. Yaa Rom dãmb sebrã n tãag Hebre dãmb sebrã.
Tõnd karemda Biiblã daar fãa, pa sɩda?— D sẽn karemd Biiblã, d bãngda bũmb wʋsg a Zezi zugu. Fo rat n bãnga a Zezi sõma bɩ?—
