A Zeova sẽn yaa zak-lugendã ratame tɩ roagdbã ges b kambã yelle. (Kolos rãmba 3:20) Y sã n yaa roagda, bãng-y tɩ yãmb n tog n wub y kambã, n sõng biig fãa t’a wa lebg beoog biiga, n nong a Zeova. (2 Tɩmote 1:5; 3:15) Yaa bi-ribl tɩ yaa bi-pugl me, y tog n bao n bãnga sẽn be a sũurẽ wã. Yãmb mak-sõngã tõe n sõnga wʋsgo. La yaa y sã n deng n modg t’a Zeova goamã be y sũyẽ wã la y na n tõog n zãms y kambã rẽ sõma.—Yɩɩl Sõamyã 40:9.

BIIBLÃ SẼN YETE: “Bɩ ned kam fãa wɩng ne kelgre, la a maag ne goama.” (Zak 1:19) Y sã n yaa roagda, y ratame tɩ biig sã n tar yell bɩ a sak n togs-yã. Segdame tɩ kambã miẽ tɩ b sã n kolg n na n gom ne-yã, y na n kelg-b lame. Modg-y tɩ laafɩ zĩnd zakã rãmb fãa sʋka. Rẽ, kambã sã n dat n gom ne-yã b pa na n yɛɛsdẽ ye. (Zak 3:18) B sã n tagsdẽ tɩ y yaa nin-toaaga, wall tɩ y nong n ningd-b-la taale, b pa na n pelg b pʋs n togs-y bũmb ye. Tall-y sũ-mar ne y kambã, la y tẽegd n yet-b tɩ y nong-b lame.—Matɩe 3:17; 1 Korẽnt dãmba 8:1.

Y SẼN TÕE N MAANE:

• Modg-y tɩ biig sã n wa rat n gom ne-y bɩ y yã sẽk n kelg-a.

• Minim-y n sõsd-y ne y kambã, tɩ ra yɩ b sẽn wat n tar yell bal ye.

BIIBLÃ SẼN YETE: “Ned tagsg yaa wa ko-zulumsi. La yam soab mii a sẽn na n maan to-to n tooge.” (Yelbũna 20:5) Wakat ninga, kãmbã goamã kelgr bal pa sek ye. Yaa tɩlae tɩ y tags neer n bãng b sẽn sɩd rat n yeelã. Kambã wae n zẽnda yɛlã, pa rẽ bɩ b yeel bũmb tɩ yaool n pa b sẽn tagsdã ye. “Ned sã n leok t’a nan ka wʋme, a yaa yalma.” (Yelbũna 18:13) Ra n yikd-y y sũur tao-tao ye.—Yelbũna 19:11.

Y SẼN TÕE N MAANE:

• Baa biig sã n yeel bũmb sẽn yikd y sũuri, bɩ y yõk y menga.

• Tags-y yãmb me sẽn da maand to-to y sẽn wa n yaa wa y biigã, la y sẽn da nong bũmb ninsã.

BIIBLÃ SẼN YETE: “M biiga, reeg f ba zãmsgo, la ra bas bũmb nins f ma sẽn wilg foomã ye.” (Yelbũna 1:8) A Zeova ratame tɩ ba wã ne ma wã sõng taab n wub kambã. Bãng-y tɩ yãmb n tog n zãms y kambã tɩ b sak yãmb la b waoog-yã. (Efɛɛz rãmba 6:1-3) Yãmb sã n pa noor a yembre, n pa tar “tagsg la yam a yembre,” y kambã tõe n bãngame. (1 Korẽnt dãmba 1:10) Y moorã sã n yõsg bɩ y modg tɩ y kambã ra bãng ye. Sã n pa rẽ, tõe n lebga toog ne-b tɩ b waoog-yã.

Y SẼN TÕE N MAANE:

• Yẽs-y ne taaba, n tõog n zems taab y sẽn na n kibl y kambã to-to.

• Y sã n pa wʋmd taab kambã wubrã wɛɛngẽ, bɩ y modg n yẽs n bãng y to wã tagsg sẽn yaa toorã võore.

BIIBLÃ SẼN YETE: “Zãms biig a manesem sẽn tog n yɩ to-to.” (Yelbũna 22:6) Y pa tõe n wub y kambã woto bal tɩ yãk neng ye. Yaa tɩlae tɩ y yãk y sẽn na n maan to-to wã, la y naag ne kiblgu. (Yɩɩl Sõamyã 127:4; Yelbũna 29:17) Kibl biig pa rat n yeel bal tɩ b sɩbg-a ye. Rat n yeelame tɩ b sõng-a t’a bãng bũmb ning sẽn kɩt tɩ b rat t’a tũ noyã. (Yelbũna 28:7) Sẽn paase, y tog n sõnga kambã tɩ b nong a Zeova Gomdã, la b bãng a noyã sõma. (Yɩɩl Sõamyã 1:2) Rẽ na n sõngame tɩ b sũyã pʋgẽ bɩ b mi sẽn yaa sõma ne wẽng n bake.—Hebre dãmba 5:14.

Y SẼN TÕE N MAANE:

• Modg-y tɩ kambã bãng tɩ Wẽnnaam sɩd beeme, la tɩ b tõe n teeg-a lame.

• Sõng-y kambã tɩ b tõe n bãng sẽn yaa wẽnga, la b sẽn tõe n gil rẽ to-to. Wala makre yel-yood nins sẽn be ẽntɛrnetã pʋgẽ wã. Wilg-y-b b sẽn tõe n maan to-to n zãag b mens ne sẽn tʋmd-b raglem ne kambã.