A Zeezi zĩnda Galɩle mogrã rʋʋnd n maan yel-solemd n dɩlg neb tusa, tɩ b sɩɩg taab noor n na n kɩt t’a lebg b rĩma, la a zoeeme. Baraar yʋngo, a kẽna ko-kãsengã sẽn da gudgdã zugu, la a fãag a Pɩyɛɛr sẽn mak n na n kẽn koomã zug t’a yamã yo t’a sɩng bõrbã. A leb n kɩtame tɩ sobgã yõke. Tõe tɩ yaa rẽ yĩng la a karen-biisã sẽn pa bõrã.

Masã, a Zeezi lebg n waa Kapɛrnawom sẽn be Galɩle mogrã rʋʋnd a to wã. Neb kʋʋngã a sẽn maan yel-solemd n dɩlgã yã-a lame n sok-a yaa: “Yãmb waa ka rabʋre?” A Zeezi zab-b lame, n yeel tɩ b sẽn baood yẽ wã yaa b sẽn dat t’a le rɩlg-bã. A yeel-b lame: “Da tʋm-y rɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga.” Rẽ la b sok a Zeezi yaa: “Bõe la tõnd na n maan n tʋm Wẽnnaam tʋʋmdã?”—Zã 6:25-28.

Tõe tɩ nebã ra tagsda a Moyiiz tõogã sẽn yet tɩ b maan bũmb ninsã yelle. La a Zeezi ra gomda bũmb yõod sẽn yɩɩd rẽ. A yeelame: “Wẽnnaam tʋʋmde, yaa tɩ yãmb tẽ a soab ning bãmb sẽn tʋmã.” La baa ne bũmb nins fãa a Zeezi sẽn da zoe n maanã, nebã pa tẽ-a ye. B kos-a lame meng t’a maan bãnde, tɩ b yã n tẽ-a. B sok-a-la woto: “Bõe tʋʋm la yãmb tʋmda? Tõnd ba-rãmbã dɩɩ man we-rasempʋɩɩgã pʋgẽ wa b sẽn gʋls n yeel tɩ: ‘A Moyiis kõo bãmb bur sẽn yit arzãn [“saasẽ,” MN] tɩ b wãbe.’ ”—Zã 6:29-31; Yɩɩn-sõamyã 78:24.

B sẽn kos bãndã, a Zeezi wilg-b-la sẽn yaa a soab n maand yel-solemd tɩ nebã paamd rɩɩbã. A yeelame: “Mam yeta yãmb sɩd-sɩd tɩ ka a Moyiis n kõ yãmb bur sẽn yi arzãnã ye, la yaa m ba n kõt yãmb bur sɩd-sɩd sẽn yi arzãnã. Bala, Wẽnnaam burã, yaa soab ning sẽn yit-a arzãn n sigda, n kõt dũni neb vɩɩmã.” B sẽn pa wʋm a Zeezi gomdã võorã, b yeelame: “Zu-soaba, kõt-y tõnd bur kãng daar fãa.” (Zã 6:32-34) La yaa bõe meng la a Zeezi sẽn bool tɩ “burã”?

A Zeezi meng yeela woto: “Maam la bur sẽn kõt vɩɩmã. Ned ning fãa sẽn wat-a mam nengẽ, kom kõn leb n yõk yẽnda ye, la ned ning fãa sẽn tẽed-a maam, ko-yũud kõn leb n yõk yẽnda abada. La mam yeela yãmb tɩ yãmb yãnda maam la y ka tẽed ye. . . . Mam sẽn yi arzãn n siga, ka tɩ maan m sẽn dat ye, la yaa tɩ maan sẽn tʋm-a maamã raabo. La sẽn tʋm-a maamã raab la woto: ‘Yaa tɩ m da bas ned baa a yembr bãmb sẽn kõ maamã tɩ menem ye, la mam na n vʋʋg-a-la yaoolem daarã.’ Sɩd me, ad m ba raabo: ‘Yaa tɩ ned ning fãa sẽn yã Bi-riblã n tẽ bãmb na paam vɩɩm sẽn kõn sa.’ ”—Zã 6:35-40.

Zʋɩf-rãmbã sũy yikame tɩ b sɩng n yẽgemdẽ, a Zeezi sẽn yeel tɩ yẽ yaa “bur sẽn yi arzãn n sigã” yĩnga. (Zã 6:41) Sã n yaa ne bãmba, a Zeezi yaa ninsaal wa bãmba, bala a roagdbã yita Nazarɛt sẽn be Galɩle soolmẽ wã. B soka woto: “Ka yẽnda la a Zeezi wɛɛ, a Zozɛf bi-riblã, tɩ tõnd mi a ba ne a ma wã la? La yaa a wãn t’a yetẽ tɩ yẽnda yii arzãn n sigi?”—Zã 6:42.

A Zeezi yeel-b lame yaa: “Da yẽgm-y ne taab ye. Ned baa a yembr ka tõe n wa mam nengẽ, tɩ sã n ka m ba, sẽn tʋm-a maamã n tak a soab n wa ne ye. La mam na n vʋʋg-a-la yaoolem daarã. A gʋlsa Wẽnnaam no-rɛɛsdbã sɛbẽ tɩ: ‘B fãa na n deega zãmsg Wẽnnaam nengẽ.’ Ned ning fãa sẽn wʋm m ba koɛɛg la a reeg bãmb zãmsgã wata mam nengẽ. Ka rat n yeel tɩ ned n zoe n yãnd d ba wã ye, sã n ka soab ning sẽn yi-a Wẽnnaam nengẽ wã. Soab-kãng yẽ yãnda d ba wã. Mam yeta yãmb sɩd-sɩd tɩ ned ning sẽn tẽedã tara vɩɩm sẽn kõn sa.”—Zã 6:43-47; Ezayi 54:13.

A Zeezi sẽn na n sõs ne a Nikodɛmmã, a goma vɩɩm sẽn kõn sa wã yelle, n yeel tɩ ned sã n dat n paam vɩ-kãnga, yaa tɩlɛ t’a tẽ ninsaal Biigã. A yeelame: “Ned ning fãa sẽn na tẽ [Wẽnnaam Bi-ribl-yendã] kõn sãam ye, la a na paam vɩɩm sẽn kõn sa.” (Zã 3:15, 16) La masã, a Zeezi wilga neb kʋʋngã tɩ yaa ne yẽ maasem bal la b tõe n paam vɩɩm sẽn kõn sa wã, la tɩ pa mannã, pa rẽ bɩ burã bãmb sẽn wãbd daar fãa wã n tõe n kɩt tɩ b paam vɩ-kãng ye. Dẽnd bõe la b tõe n maan n paam vɩɩm sẽn kõn sa wã? A Zeezi maneg n togs-b lame. A yeelame yaa: “Mam yaa bur sẽn kõt vɩɩm.”—Zã 6:48.

A Zeezi ra ket n gomda bur sẽn yit saasẽ wã yell ne kʋʋngã. A sẽn ta Kapɛrnawom karen-doogẽ wã n na n sõs ne nebã, a kell n goma rẽ yelle.