A Zeezi sẽn bãng tɩ Fariizẽ-dãmbã ne a Erood poorẽ dãmbã yẽsda ne taab n baood n na n kʋ-a wã, yẽ ne a karen-biisã yii karen-doogẽ wã n kẽng Galɩle mogrẽ wã. La neb kʋʋng yii zĩis toor-toor n wa a Zeezi nengẽ. Yaa Galɩle la Tɩɩr tẽns nins sẽn pẽ mogrã, ne Sɩdõ la Zʋrdẽ kʋɩlgã rʋʋnde, ne Zeruzalɛm la Yidume. A Zeezi sãooga bãad-dãmb wʋsgo. Rẽ kɩtame tɩ sẽn da bẽed-b bã-kɛgemsã gũbg-a, n dɩdgd-a. B ra pa gũud t’a Zeezi wa sɩɩs-b ye. Bãmb mensã n wẽdgd n na n sɩɩs-a.—Mark 3:9, 10.

Nebã sẽn waoogã, a Zeezi yeela a karen-biisã tɩ b bao kogl-bil n wa t’a kẽ, n paam n zãag ne kʋɩl-koakã bilfu, tɩ kʋʋngã ra le rɩdg-a ye. Woto, a tõe n zĩnda be n zãms nebã, bɩ n kẽ n kẽng kʋɩlgã rʋʋnd a to n tɩ zãms neb a taaba.

Karen-biig a Matye yeelame t’a Zeezi sẽn maand bũmb ninsã fãa pidsda “bũmb ning Wẽnnaam no-rɛɛs a Ezayi sẽn yeelã.” (Matye 12:17) Bõe la Wẽnnaam da kɩt t’a Ezayi pĩnd n togse?

A yeelame: “Ad mam tʋmtʋmd mam sẽn yãke, mam nin-nongr sẽn ta m yam. Mam na n ninga m Sɩɩgã yẽnda zugu, la yẽnda na n moona bu-zẽmsã tɩrlem koɛɛga. Yẽnda kõn wẽ nokoeemde wall a zẽk a koɛɛg ye, la ned kõn wʋm yẽnda koɛɛg soay zut ye. Yẽnda kõn kaoog tãnwĩ-kaoong n baas ye, la yẽ kõn kiis fɩtl laong sẽn ket n nusdẽ ye, hal t’a wa kɩt tɩ tɩrlem paam tõogre. La buud toay-toayã na n teega yẽnda yʋʋrã.”—Matye 12:18-21; Ezayi 42:1-4.

A Zeezi sɩd yaa Wẽnnaam tʋm-tʋmd a sẽn yãke, la a sẽn nonge. Ziri tũudmã rãmb rog-n-migs ra kɩtame tɩ nebã pa mi tɩrlem hakɩɩk ye. La a Zeezi kɩtame tɩ nebã bãng tɩrlem hakɩɩkã. Fariizẽ-dãmbã ra teka Wẽnnaam noyã tɩ zems bãmb mensã tagsgo, hal n da pa sakd n sõng bãad vʋʋsg daar ye. A Zeezi wilga vẽeneg tɩ vʋʋsem sõngã bee ne yẽnda. A sõnga nebã tɩ b bãng Wẽnnaam tɩrlmã, la b paam b mens ne ziri tũudmã rog-n-migsã. Rẽ n so tɩ tũudmã taoor dãmb ra baood-a n na n kʋ. Kaeto!

La a Ezayi sẽn yeel t’a Zeezi kõn wẽ nokoeemd wall a zẽk a koɛɛga, la tɩ ned kõn wʋm a koɛɛg soay zutã võor yaa bõe? A Zeezi sã n da sãoog neda, a yeta a soabã t’a ra sak tɩ nebã bãng ye. A ra yeta zĩn-dãmbã me tɩ b ra ‘moon a yʋʋrã ye.’ (Mark 3:12) A ra pa rat tɩ ned sã n na n bãng yẽ bɩ tũ ne nebã sẽn yelgd goam ninsã, wall kibay b sẽn golem ye.

Sẽn paase, a Zeezi taasa a koɛɛgã neb sẽn wõnd tãnwĩig sẽn kaooge, rat n yeel tɩ neb sẽn nams hal tɩ b pãng rat n sa. Nin-kãensã yaa wa fɩtl laong sẽn nusd n dat n ki, bala b vɩɩmã pʋgẽ yaa wa sẽn maand le ka ye. A Zeezi pa kaoog tãnwĩigã n baase, wall a kiis fɩtlã laongã ye. A pʋd n wilga nonglem la nimbãan-zoeere, tɩ keng nin-kãensã raoodo. Hakɩɩka, yaa a Zeezi la buud toay-toayã neb tõe n teege!