Nebã sã n wʋm a Zeezi goamã, b manesmã yaa toor-toore. La bee ne ned fãa sũur sẽn yaa to-to. Bũmb n maan Galɩle ned a ye zakẽ, tɩ wilgd rẽ. Zakã soab yaa Fariizẽ. A yʋʋr la a Sɩmo. A boola a Zeezi t’a wa naag-b n dɩ. Tõe tɩ yaa a Zeezi sẽn maand yel-soalmã yĩng la a bool-a, n na n paam n bãng-a n paase. A Zeezi saka boollã. Wõnda yaa sẽn na yɩl n paam n taas sẽn be-b be wã koe-noogã. B ra zoe n bool-a-la zĩis a taab t’a sak n tɩ naag yõor-yaood dɛɛgdb la yel-wẽn-maandb n dɩ.

La so-kãngã wã, b pa reeg a Zeezi wa nebã sẽn da reegd sãan to-to wã ye. Wakat kãnga, Palɛstin soayã sẽn da yaa to-to wã kɩtame tɩ ned sã n da kẽn nao bɩ a naoã wɩnge, n puk ne tom. Rẽ n so tɩ b sã n da reeg sãana, b ra minim n waasda a naoã ne ko-maasga. La b pa waas a Zeezi naoã, b pa mok-a me wa nebã sẽn da minim n maandẽ wã ye. B ra maanda sãan neer n sõog a zoobdã kaam, tɩ wilgdẽ tɩ b reeg-a-la sõma. A Zeezi pa paam rẽ fãa ye. Dẽnd b sɩd pa reeg-a sõma ye.

B sẽn wa n sɩng rɩɩbo, pag a ye n soos n kẽ roogẽ wã. B yaool n pa bool-a ye. Tẽngã nebã miime t’a yaa “yel-wẽn maanda.” (Luk 7:37) Ãdem-biisã fãa maanda yel-wẽna, la ne wa pʋg-kãngã sẽn da vɩ to-to wã tolg n pa sõma ye. Tõe tɩ ra yaa pʋg-yoodre. Wõnda a wʋma a Zeezi sẽn zãms nebã bũmb ninsã, la a sẽn yeel tɩ neb nins fãa “sẽn yɛ, la sẽn tʋk zɩɩb sẽn yaa zɩsgã” wa yẽ nengẽ tɩ b na n paama yolsgã. (Matye 11:28, 29) Tog n yaa a Zeezi goamã la a tʋʋm-tʋmdɩ wã n yɩ-a noogo, t’a bao a zĩiga.

Pagã taa n yĩgimda a Zeezi karsẽ wã. A nintãmã rʋʋga a Zeezi naoã zugu, t’a yẽes ne a zoobdã. A maaga a yĩng n mok a Zeezi naoã, la a yiis kaam n walg a naoã. A Sɩmo sẽn yã rẽ, a sũur pa yɩ noog ye. A ra yeta a meng woto: “Rao-kãngã sã n dag n yaẽ Wẽnnaam no-rɛɛsa, b rag n na bãngẽ pag ning sẽn sɩɩsd bãmbã sẽn yaa ned ninga, la a sẽn yaa bũmb ninga: yel-wẽn maand bala.”—Luk 7:39.

A Zeezi bãnga a Sɩmo tagsgã, n yeel-a yaa: “Sɩmo, mam dat n yeela foom bũmbu,” t’a Sɩmo leoke: “Karen-saamba, togs-y-yã.” A Zeezi yeela yẽnda: “Ned a ye n dag n be tɩ neb a yiib tar yẽnda samde. A yembrã rag n tara deniye kobs-nu samde, t’a to wã tar pis-nu. La bãmb sẽn dag n ka tar n na yao wã yĩnga, yẽnda basa b yiibã fãa samã taale. Bãmb b yiibã sʋka, bʋg n na n nong yẽnda n yɩɩda?” A Sɩmo leokame, la tõe tɩ yɩɩ a wee n leoke. A yeelame: “Mam tagsdame tɩ yaa ned ning sẽn dag n tara sam-kẽeng tɩ b bas-a taalã.”—Luk 7:40-43.

A Zeezi yeel-a lame t’a bee bʋʋm. Rẽ poore, a Zeezi wẽnemd n gesa pagã n yeel a Sɩmo yaa: “Fo nee pʋg-kãngã? Mam kẽe fo zakẽ, la fo ka kõ maam koom tɩ m waas m nao ye. La yẽnda, a madga mam nao ne a nintãm, n yẽes-b ne a zoobdo. Fo ka mok maam ye, la hal mam sẽn kẽ wã tɛka, yẽ mogsda mam nao n ka basdẽ ye. Fo ka sõog mam zug kaam ye, la yẽnda, a waala mam nao ne tɩdare.” A Zeezi ra nee vẽeneg tɩ pagã sẽn maanã wilgdame t’a teka yam n kot sugri, a vɩɩmã sẽn da pa sõma wã yĩnga. Rẽ n so t’a yeel yaa: “Mam yeta foom tɩ yẽnda paama a yel-wẽnã sẽn yaa wʋsgã sugri. Bala, yẽnda wilga a nonglem kãsenga. La ned ning b sẽn kõt sugr bũmb bilf yĩng nonglem yaa bilfu.”—Luk 7:44-47.

A Zeezi sẽn maanã pa rat n yeel tɩ ned sã n vɩ vɩ-yooko, pa wẽng ye. Yaa sẽn na n wilg tɩ ned sẽn maan yel-wẽn-kãsems sã n tek yam n kot sugri, n baood yolsg yẽ nengẽ, a kʋmd-a lame. Ad a Zeezi sẽn yeel pagã bũmb ningã sɩd yols-a lame. A yeel-a-la woto: “Fo paama f yel-wẽnã sugri. . . . Fo tẽeb n fãag foom. Kẽng ne bãane.”—Luk 7:48, 50.