A Zeezi sẽn zĩnd a Sɩmo zakẽ wã n gom sugrã kũun yellã poore, pa kaoos la a sɩng n na n gilg Galɩle soolmã naoor a yiib-n-soab n moon koɛɛgã ye. A sẽn sɩng koɛɛgã moonegã yɩɩda yʋʋmd masã. La a pa na n gilg a yembr ye. A tʋm-tʋmdb 12 tũud-a lame, n paas pagb zĩn-dãmb sẽn da tare, la sẽn da bẽed t’a sãoog-ba. (Luk 8:2) Yaa a Maari sẽn yit Magdala, a Suzan, n paas a Erood Ãntipaas ligd gɛtã pag a Zan la pagb a taaba.

A Zeezi koe-moonegã kibar sẽn da tar piuugrã, no-koɛɛmã me ra lebgda wʋsgo. Ad kibar sẽn wilgd rẽ. Daar a ye b talla rao sẽn yaa zoang la muka, tɩ zĩn-dãmb le tar-a, n wa a Zeezi nengẽ, la a sãoog-a lame. Raoã paama a menga, n neẽ la a tõe n gome. A Zeezi sẽn maanã linga nebã wʋsgo, tɩ b ra sokd woto: “Dao-kãngã ka na n yɩ a Davɩɩd biigã sɩda?”—Matye 12:23.

Nebã wa n gũbga zak ning a Zeezi sẽn da beẽ wã. B ra yaa wʋsg hal tɩ yẽ ne a karen-biisã pa tõe n paam n dɩ meng ye. Yaool n pa b fãa n sak n deeg t’a Zeezi la a “Davɩɩd biigã” b sẽn da pĩnd n togs t’a watame wã ye. Tõog karen-sãam-dãmb ne Fariizẽ-rãmb n yi hal Zeruzalɛm n wa. Pa sẽn na n kelg a Zeezi, bɩ n gom n teel-a ye. B ra yeta nebã woto: “Belzebull n so bãmba.” Sẽn dat n yeel t’a Zeezi tʋmda ne ‘zĩn-dãmbã naaba.’ (Mark 3:22) A Zeezi roagdbã sẽn wʋm no-koeemdã kibarã, b waame n na n peeg-a n looge. Bõe yĩnga?

Bala hal n tãag masã, a Zeezi ma-biisã pa tẽed t’a yaa Wẽnnaam Biig ye. (Zã 7:5) Sã n yaa ne b sẽn wʋmã, wõnda yaa a Zeezi n wa ne no-koeemdã. Rẽ kɩtame tɩ pa le wõnd yaa Zeezi ning sẽn zĩnd ne-b Nazarɛt hal n tãag a bɩʋʋngã ye. Rẽ n so tɩ b tags t’a “zʋbsdame,” rat n yeel t’a zugã lebgame.—Mark 3:21.

La a Zeezi sẽn maan bũmb ningã wilga bõe? Yaa rao zĩn-dãmb sẽn da tar la a Zeezi sãoog-yã, t’a neẽ la a tõe n gome. Ned da pa tõe n kɩɩs rẽ ye. Dẽnd b sẽn baood bal yaa b sãam a Zeezi yʋʋre. B yeela woto: “Dao-kãngã ka rigd zĩn-dãmbã tɩ sã n ka ne zĩn-dãmbã naab a Belzebull pãng ye.”—Matye 12:24.

A Zeezi ra mii sẽn be b yamẽ. Rẽ n so t’a yeel-b woto: “Soolem ning fãa neb sẽn welg n gõdg n zabd ne taaba, a na n wãame. La tẽng ning fãa bɩ yir ning fãa neb sẽn welg n gõdg n zabd ne taab kõn tõog n yals ye. Sã n yaa t’a Sʋtãan digda a Sʋtãana, a welgame n gõdg n zabd ne a menga. Dẽ, yẽnda soolem na n yɩɩ a wãn n yalse?”—Matye 12:25, 26.

A Zeezi gomdã yaa gõaag zugu! Fariizẽ-rãmbã miime tɩ zʋɩf-rãmb kẽer rigda zĩn-dãmba. (Tʋʋmã 19:13) Rẽ kɩtame t’a Zeezi sok woto: “Mam sã n digda zĩn-dãmbã ne a Belzebull pãnga, yãmb kambã rigd-b-la ne ãnda pãnga?” A sokrã wilgdame tɩ yẽ sã n tʋmda ne a Belzebull pãnga, bãmb kambã me maanda woto. Rẽ masã la a Zeezi yeel-b yaa: “La sã n yaa ne Wẽnnaam Sɩɩgã pãng la mam digd zĩn-dãmbã, dẽ, Wẽnnaam soolem taa yãmb sʋka.”—Matye 12:27, 28.

A Zeezi rɩka makr n wilg-b tɩ yẽ sẽn digd zĩn-dãmbã yaa kaset t’a pãngã yɩɩda a Sʋɩtãana. A yeela woto: “Ned na n yɩɩ a wãn n kẽ pãng soab roogẽ n wʋk a teedo, t’a ka reng n sẽb-a? A sã n sẽb-a, a na yaool n tõog n wʋk a roogã teedã. Ned ning sẽn ka be mam poorẽ kisa maam, la ned ning sẽn ka naagd maam n tigsdẽ, a sãeegdame.” (Matye 12:29-30) Fariizẽ-rãmbã sɩd ra kisa a Zeezi, tɩ rẽ wilgdẽ tɩ b yaa a Sʋɩtãan poorẽ dãmba. B manesmã kɩtame tɩ d tõe n yeel tɩ b sãeegda neb nins sẽn dat n tũ Wẽnnaam Biigã sẽn tʋmd ne Wẽnnaam pãngã.

A Zeezi keooga nin-kãensã sẽn yaa wẽnem dãmbã woto: “Mam yeta yãmb sɩd tɩ ninsaalbã yel-wẽnã fãa b sẽn maandã, la paoogr nins fãa b sẽn paoogdã tõe n paama sugri. La ned sã n paoog Siig-sõngo, a ka tõe n paam sugr abada. Yel-wẽn-kãng paada ne-a wakat sẽn kõn sa.” (Mark 3:28, 29) A Zeezi yel-soalmã ra yaa ne vʋʋsem sõngã maasem, tɩ bãmb baas n yetẽ tɩ yaa ne a Sʋɩtãan pãnga. Dẽnd yaa yell la sẽn da yɛgd-bã.