A Zeezi wilgame tɩ yaa neb bilf bal n na n paam n kẽ saasẽ soolmẽ wã. B boond-b lame tɩ “wubr pa zemb bũmbu,” bɩ bãg-bila. (Luk 12:32, Sebr Sõngo) Neb nins sẽn paam tɩ Wẽnnaam yãk-bã pa segd n ges rẽ wa bõn-yaalg ye. A Zeezi pʋd n wilgame tɩ tara yõod wʋsg tɩ nin-kãensã tall yel-manesem sõngo.

Rẽ n so t’a Zeezi keoog a karen-biisã tɩ b segl b mens n gũ yẽ waoongã. A yeelame: “Bɩ y sẽb y sees sẽbdse, la y yõgen y fɩtl-dãmba, la y yɩ wa neb sẽn gũud tɩ b zu-soab yi pʋg-peegr tigr n lebg n wa, t’a sã n ta bal n wẽ bɩ b pak t’a kẽ. Bark bee tʋmtʋmd kãens zutu, b zu-soabã sẽn na n wa n ta n mik tɩ b neeme.”—Luk 12:35-37.

A Zeezi sẽn dɩk makrã, sõnga karen-biisã tɩ b bãng b sẽn segd n maane. Makrã pʋgẽ, a yeelame tɩ sẽn da gũud-b tɩ b zu-soab yi tigr n wa wã ra segl n saame. A Zeezi paasa woto: “Yẽnda [zu-soabã] wat yʋn-sʋk tɩ yaa no-kɛlenga, a sã n wa n mik tɩ b ka gõe, b sũur na yɩ noogo.”—Luk 12:38.

A Zeezi sẽn togs woto wã pa sẽn na n sagl a karen-biisã tɩ b yɩ tʋm-tʋmdb sẽn tʋmd wʋsg bal ye. Makrã pʋgẽ, a wilga rẽ vẽenega, n yeel a karen-biisã yaa: “Bɩ yãmb me segl n sɛ. Bala, Ninsaal Bi-riblã na n waa wakat ning yãmb sẽn ka tagsd tɩ b na n waame wã.” (Luk 12:40) Dẽnd a Zeezi sẽn yaa Ninsaal Bi-riblã sã n looge, a na n lebg n waame. A ratame t’a sã n wa wa bɩ mik t’a karen-biisã segla b mens n gũud yẽ. Sẽn yɩɩd fãa “bãg-bilã” nebã.

A Pɩyɛɛr baoome n na n wʋm a Zeezi gomdã võor sõma. Rẽ n so t’a sok-a yaa: “Zu-soaba, yaa tõnd bal la yãmb wẽ yel-bũn kãngã bɩ, bɩ yaa nebã fãa?” A Zeezi pa yɩ tao-tao n leok ye. A leb n dɩka makr a to, n sok woto: “Ãndã n yaa tʋmtʋmd sẽn maand sɩda la a tar yam, t’a zu-soabã yeel-a t’a ges a tʋmtʋmdbã yelle, n kõt-b rɩɩb wakat fãa sẽn zemse? Tʋmtʋmd-kãng zu-soabã sã n wa n mik t’a maanda a woto, tʋmtʋmdã sũur na yɩ noogo. Mam yeta yãmb sɩd-sɩd t’a zu-soabã na n kɩtame tɩ yẽnda ges a arzegsã fãa yelle.”—Luk 12:41-44.

Pipi makrã pʋgẽ, “zu-soabã” yaa a Zeezi, Ninsaal Biigã. Woto wilgdame tɩ “tʋmtʋmd sẽn maand sɩdã” yaa rap a wãn bal sẽn naag “bãg-bilã” neb sẽn na n wa kẽng saasẽ wã. (Luk 12:32) Dẽnd a Zeezi ratame tɩ b bãng tɩ bãg-bilã neb kẽer la Wẽnnaam na n yãk tɩ b “ges a tʋmtʋmdbã yelle, n kõt-b rɩɩb wakat fãa sẽn zemse.” A gomdã sõnga a Pɩyɛɛr la karen-biis a taabã sẽn paam t’a Zeezi zãmsd-b bũmb wʋsgã. Kɩtame tɩ b tõe n tags n bãng tɩ wakat n wat tɩ Ninsaal biigã na n lebg n wa. Wilgdame me tɩ wakat kãng sã n ta, bũmb la Wẽnnaam na n maan tɩ zu-soabã “tʋmtʋmdbã,” rat n yeel tɩ sẽn tũud-b a Zeezi wã paam n wʋm Wẽnnaam goamã võor sõma.

Gomd a to la a Zeezi togs-yã, n na n wilg bũmb ning sẽn kɩt t’a karen-biisã segd n gũ, la b gũusd ne b yel-manesmã. Kẽer tõe n wa sɩngame n maand sẽn pa sõma, hal n namsd b tẽed-n-taasã menga. Ad a Zeezi sẽn yeele: “La tʋmtʋmd-kãng sã n yeel a sũurẽ t’a zu-soabã kaoosda waoongo, n sɩng n pãbd tʋmtʋmd daopã la tʋmtʋmd-pogsã, n dɩtẽ la a yũud n gãeemdẽ, tʋmtʋmd-kãng zu-soabã na n waa daar ning yẽnda sẽn ka gũud-a, la wakat ning a sẽn ka mi. A zu-soabã na n sɩbga yẽnda sõama, n kɩt tɩ bũmb nins sẽn paamd neb nins sẽn ka maand sɩdã paam yẽnda me.”—Luk 12:45, 46.

A Zeezi yeelame t’a waame n na n “lob bugum dũni zugu.” A sɩd maana woto. A goma bũmb kẽer yell hal tɩ wa ne no-koɛɛma, la kɩt me tɩ nebã bas minund la zãmsg sẽn pa sɩdã, tɩ yaa wa bugum sẽn dɩ bũmbu. Kɩtame meng tɩ neb sẽn kĩ ne taab welg taaba. A Zeezi yeelame: “Ba na n welga ne a bi-ribla, tɩ bi-ribl welg ne a ba. Ma na n welga ne a bi-pugla, tɩ bi-pugl welg ne a ma. Sɩd-ma na n welga ne a bi-paga, tɩ bi-pag welg ne a sɩd-ma.”—Luk 12:49, 53.

A Zeezi sẽn togs gom-kãensã wã yaa a karen-biisã yĩnga. La masã, a Zeezi gomda ne kʋʋngã. Baa ne kaset wʋsg sẽn wilgd tɩ yẽ la Mesi wã, wʋsg kenga b sũy n pa rat n sak n deeg ye. A yeel-b lame yaa: “Yãmb sã n yãnd sawadg sẽn yikd nin-taoore, tao-tao bala, yãmb yetame tɩ saagã na n niime, la a yɩta a woto. La yãmb sã n yãnd tɩ sobg yita wĩndg goabga, yãmb yetame tɩ zĩigã na n yɩɩ tʋʋlgo, la a yɩta a woto. Zãmb-dãmba, yãmb mii tẽng yɛla, la yĩngr yɛl sẽn yaa to-to. Bõe tɩ yãmb ka mi moasã wakatã yɛl n welge?” (Luk 12:54-56) Gom-kãensa wilgdame tɩ nin-kãensã pa segl n sa, n gũud Mesi wã ye.