A Zeezi keta Fariizẽ wã zakẽ. Yaa be la a sãoog rao ning bã-motmã sẽn da tarã. A yãame tɩ neb nins b sẽn bool tɩ b wa rɩ wã sã n ta, b baooda naam zĩisi. A bẽda rẽ n na n sagl nebã sik-m-mengã wɛɛngẽ.

A Zeezi yeela woto: “Ned sã n bool foom yi-kãadem tigrẽ, bɩ f ra tɩ zĩnd naam zĩndg zĩigẽ ye. Bala, tõeeme t’a boola ned sẽn yɩɩd foom. Sã n yɩ a woto, sẽn bool-a foom ne yẽnda wã na n waa n yeela foom tɩ f yik n bas zĩig n kõ-a, fo na n yaool n tɩ zĩnda poorẽ zaoogã zugu, la f na n yãnda yãnde.”—Luk 14:8, 9.

A Zeezi le paasa woto: “B sã n bool foom, kẽng n tɩ zĩnd poorẽ zaoogã zugu, tɩ ned ning sẽn bool-a foomã sã n wa bɩ a yeel foom yaa: ‘M zoa, wa taoor ka!’ Woto na n yɩɩ fo waoogr neb nins fãa sẽn zĩ ne foom n dɩtẽ wã taoore.” A Zeezi sẽn yeel woto wã, pa waoog taabã yell bal la a ra rat n gom ye. A yeelame: “B na n sika ned ning fãa sẽn zẽkd a menga, la b na n zẽka ned ning fãa sẽn sikd a menga.” (Luk 14:10, 11) A ratame t’a kɛlgdbã bãng tɩ b tog n yɩɩ sik-m-mens rãmba.

Rẽ poore, a Zeezi goma ne Fariizẽ ning sẽn bool yẽ t’a wa rɩ wã, n wilg-a a sẽn tõe n maan n sɩd paam Wẽnnaam barka. A yeel-a lame: “Fo sã n na n bool neb tɩ b wa n dɩ ne foom, tɩ yaa wĩntoog bɩ yʋngo, da bool f zo-rãmba, wall f ba-biisi, wall f buudu, wall f yags nins sẽn yaa arzegs rãmbã, tɩ bãmb me da wa n bool foom ye. Rẽ na n yɩɩ lebsgo. Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense, la fo na n paama sũ-noogo, b sẽn ka tar n na n kõ foom n lebsã yĩnga.”—Luk 14:12-14.

A Zeezi pa yeel tɩ ned sã n segl rɩɩb n bool a zo-rãmb bɩ a roagdb wall a yagse, yaa wẽng ye. La a wilgame tɩ f sã n bool sẽn ka tar-bã, rat n yeel tɩ naong rãmba, koms-rãmb bɩ zoensã, f paamda Wẽnnaam barka. A yeela sẽn bool-a yẽ wã yaa: “Nin-tɩrsã vʋʋgr wakate, fo na n paama keoore.” Ned a ye n zĩnd be n yeel yaa: “Bark bee ned ning sẽn na n naag-a n dɩ Wẽnnaam soolmẽ wã zugu!” (Luk 14:15) Nin-kãngã bãngame tɩ woto sɩd yaa zu-zẽkr tɛkẽ. A Zeezi rɩka makr n wilg tɩ pa nebã fãa n nand rẽ ye.

A Zeezi yeela woto: “Dao a yembr n dag n segl rɩɩb n bool neb wʋsg tɩ b wa rɩ. . . . A tʋma a tʋmtʋmd t’a tɩ yeel neb nins a sẽn boolã tɩ b wa tɩ bũmba fãa zoe n segl n saame. La bãmb ned kam fãa sɩng n padmame. Pipi soabã yeelame tɩ yẽnda raa pʋʋgo, la yaa tɩlɛ tɩ yẽnda kẽng n tɩ gese, la a kotame tɩ b bas-a taale. A to yeelame tɩ yẽnda raa nag-koods piiga, la yẽnda na n mak-b lame n gese, la a kotame tɩ b bas-a taale. Ned a to yeelame tɩ yẽnda nan peega a pʋg-paala, la rẽ n kɩt tɩ yẽnda ka na n tõog n wa ye.”—Luk 14:16-20.

Ad sɩd yaa pademse! Bala, ned sã n dat n da pʋʋg wall rũnga, a rengd n tɩ gesame n yaool n da. A sã n da n sa, gesgã pa le yaa yãgb ye. Rao ning sẽn nan peega pagã me, pa kãadem la a segend ye. Dẽnd a ka bʋʋm n na n zãgs boollã ye. Tʋm-tʋmdã sẽn wa n togs a soaalã nebã pademsã, a sũurã yikame.

A yeela a tʋm-tʋmdã yaa: “Kẽng raasẽ wã, la tẽngã soayã zut tao-tao, n wa ne naong rãmba, la koms-rãmba, la zoense, la wobsã.” Tʋm-tʋmdã sɩd maana woto, la vɩʋʋgã ra ketame. Soaalã yeela tʋm-tʋmdã yaa: “Rɩk soayã, la f yeg yãgã n modg nebã tɩ b wa kẽ hal tɩ mam yirã pid ne nebã. Bala, mam yeta yãmb tɩ neb nins mam sẽn dag n boolã, bãmb ned baa a yembr kõn lemb mam dɩɩbã ye.”—Luk 14:21-24.

Makr ning a Zeezi sẽn dɩkã wilgdame tɩ Wẽnnaam a Zeova tʋma a Zeezi Kiris t’a na n bool neb tɩ b na n paam n kẽ saasẽ soolmã pʋgẽ. Zʋɩf-rãmbã la a bool pipi, sẽn yɩɩd fãa tũudmã taoor dãmba. Yɩɩ ne koe-moonegã maasem, la b wʋsgã pa sak ye. La boollã pa tek bãmb ye. A Zeezi wilgame tɩ booll a yiib-n-soab la b na n taase. B na n boola zʋɩf buudã nin-talse, n paas neb sẽn tuub n sak zʋɩf-rãmbã tũudmã. Booll a tãab-n-soab me la b na n taase. Yaa yaoolem boolle. Rẽ na n yɩɩ neb nins zʋɩf-rãmbã sẽn get wa neb sẽn pa tar Wẽnnaam barkã la b na n boole.—Tʋʋmã 10:28-48.

A Zeezi goamã wilgdame tɩ raoã sẽn zĩnd nebã sʋk n yeel bũmb ningã yaa sɩd kɛpɩ. Raoã ra yeela woto: “Bark bee ned ning sẽn na n naag-a n dɩ Wẽnnaam soolmẽ wã zugu!”