A Zeezi sẽn maan rasem 40 rasempʋɩɩgẽ wã poore, a yãka yam n na n lebg n kẽng Galɩle. La a reng n kẽnga a Zã sẽn lis-a wã nengẽ. A Zã sẽn wa n ne a Zeezi t’a watẽ wã, a tees-a-la ne a nugu, n yeel neb nins sẽn da be ne yẽ wã yaa: “Ad Wẽnnaam pe-bilã, sẽn yiisd-a dũni yel-wẽnã. Yaa bãmb yell la mam dag n gom ne yãmb n yeel tɩ dao n pʋgend maam, la b yɩɩda maam, bala, b renga maam n beẽ wã.” (Zã 1:29, 30) A Zã ra yɩɩda a Zeezi ne kiis a wãn bala. La a ra miime t’a Zeezi ra sɩng n yaa malɛk n be saasẽ.

A Zeezi sẽn da wa n kẽng Zʋrdẽ kʋɩlgẽ wã n na n kos a Zã t’a lis-a wã, a Zã ra nan pa kɩs sɩd zãng tɩ yaa yẽ la Mesi wã ye. A Zã meng wilga rẽnda. A yeela woto: “Mam dag n ka mi bãmb ye.” A paasame tɩ yẽ sẽn da lisd nebã koomẽ wã yaa sẽn na yɩl t’a Zeezi “vẽneg b meng ne Israyɛll nebã.”—Zã 1:31.

A Zãmbatiis kell n togsa neb nins sẽn da kelgd-a wã bũmb ning sẽn maan a Zeezi lisgã sasa wã. A yeel-b-la woto: “Mam yãnda Sɩɩg-sõng sẽn yi arzãn [“saasẽ,” MN] n sig wa wall n pa bãmb zugu. La mam dag n ka mi bãmb ye. La sẽn tʋm-a maam tɩ m wa n lis nebã koomẽ wã yeela maam yaa: ‘Fo sẽn na n yãnd ned ning tɩ Sɩɩg-sõng sig n pa a soab zugã, bɩ f bãng tɩ yaa yẽnda n lisd nebã Sɩɩg-sõng pʋgẽ.’ Maam, mam yãame, la mam kɩsa kaset tɩ yaa bãmb la Wẽnnaam Bi-riblã.”—Zã 1:32-34.

Vẽkembeoogã, a Zãmbatiis ra bee ne a karen-biis a yiibu, n wa nee a Zeezi sẽn wate, t’a yeel yaa: “Ad Wẽnnaam pe-bilã.” (Zã 1:36) A karen-biis a yiibã sẽn wʋm woto, b pʋgla a Zeezi. A ye yʋʋr la a Ãndere. Wõnda karen-biig a to wã yaa sẽn gʋls-a kiba-kãngã wã. Yẽ me yʋʋr la a Zã. Zã kãng yaa a Salome ne a Zebede biiga. A Salome tog n da yaa a Maari ma-biiga. Sã n yaa rẽ, a Zã yaa a Zeezi yagen-taaga.

A Zeezi sẽn wẽnemd n yã a Ãndere ne a Zã sẽn pʋgd-a wã, a sok-b lame: “Yãmb baooda bõe?”

B soka a Zeezi yaa: “Rabbi, . . . yãmb yir yaa yɛ?”

La a Zeezi yeel-b-la woto: “Wa-y tɩ y na yã.”—Zã 1:37-39.

Ra zemsa zaabr wakat a naase. A Ãndere ne a Zã kell n paa ne a Zeezi baraarã. A Ãndere sũurã ra noomame, hal t’a tɩ togs a ba-biig a Sɩmo, b sẽn boond me t’a Pɩyɛɛrã. A yeel-a lame yaa: “Tõnd yãnda Mesi wã.” (Zã 1:41) A talla a Pɩyɛɛr n kẽng a Zeezi nengẽ. Wõnda a Zã me kẽng n tɩ talla a ba-biig a Zak n wa a Zeezi nengẽ. La a pa togs rẽ n welg a sebrã pʋgẽ ye.

Vẽkembeoogã, a Zeezi yãa a Filip. Yẽ yita Betsayɩda sẽn be Galɩle mogrã rɩtgã. A Ãndere ne a Pɩyɛɛr me yita be. A Zeezi yeela a Filip t’a wa tũ yẽnda.—Zã 1:43.

Rẽ zugẽ, a Filip tɩ yãa a Natanayɛll b sẽn boond me t’a Bartelemi wã, n yeel-a woto: “Dao ning a Moyiis tõogã ne Wẽnnaam no-rɛɛsdbã sẽn gom a yellã, tõnd yãnd-a lame. Yaa Nazarɛt dao a Zeezi, a Zozɛf bi-riblã.” A Natanayɛll pa tẽ ye. A soka a Filip yaa: “Dẽ yĩnga, bõn-sõng tõe n yii Nazarɛt sɩda?”

La a Filip yeel-a lame t’a wa gese. B sẽn wa n kolgdẽ t’a Zeezi yã a Natanayɛllã, a yeela woto: “Ad Israyɛll ned sɩd-sɩda, zãmb sẽn ka be a pʋgẽ ye.”

La a Natanayɛll soka a Zeezi yaa: “Yãmb bãnga maam yɛɛnẽ?”

A Zeezi leokame: “Sẽn deng a Filip sẽn na n bool foomã, fo sẽn dag n be kankangã tẽngrã, mam yãnda foom.”

Linga a Natanayɛll wʋsgo, t’a yeele: “Karen-saamba, yãmb la Wẽnnaam Bi-riblã! Yãmb la Israyɛll Rĩmã!”

A Zeezi sok-a lame yaa: “Mam sẽn yeel tɩ mam yãnda foom kankangã tẽngrã yĩnga, fo tẽedame. La fo na n yãnda bõn-kãsems sẽn yɩɩd a woto. Sɩd-sɩda, mam yeta yãmb tɩ yãmb na n yãnda arzãn sẽn pake, la Wẽnnaam malɛgs sẽn dʋʋd la b sigd ninsaal Bi-riblã zugẽ.”—Zã 1:45-51.

Rẽ poore, a Zeezi ne a pipi karen-biisã yii Zʋrdẽ kʋɩlgã sẽnes n dɩk Galɩle sore.