Mam doga Ugãnda, zĩig ning b sẽn boond tɩ Gomba wã. Tẽngã neb wʋsg ra yaa naong rãmba. Tẽngã ra pa tar kʋʋrã ye. Rẽ kɩtame tɩ yʋngo, d ra nong n yõgenda lamp-rãmba.

 Mam roagdbã sẽn da yaa ka-koaadbã yii Ugãnda n tɩ zĩnd Ruwãnda. B ra kooda kafe ne barende, n da tar barendã n maand rãam b sẽn boond tɩ waragi. M roagdbã ra gʋʋnda noose, bʋʋse, kurkuiimba, la niis me. Tõnd tẽngã minundã n paas b sẽn wub maam to-to wã kɩtame tɩ m da tẽed tɩ pag segd n sakda a sɩd wakat fãa, la t’a pa tar sor n na n togs a tagsg ye.

 M sẽn wa n tar yʋʋm 23, m yik n tɩ zĩnda Ruwãnda, n da kẽnd boat de nui-rãmbẽ ne m rog-taasã n saoodẽ. M da nong n kẽnda boat de nui a ye pʋgẽ wakat fãa, hal tɩ sẽn get-a zĩigã yellã wa kõ maam karte, tɩ m tõe n kẽed zaalem n pa le yaood ye. Sẽn paase, m da nonga filim-dãmb sẽn pid ne zab la nen-kɛglem tʋʋma. M sẽn da nong n be zĩig ningã, ne m sẽn da get bũmb ninsã kɩtame tɩ m wa lebg nen-kɛglem soaba, ra-yũud kãaga, la yoaada.

 Yʋʋmd 2000, m tɩ vɩɩmda ne pʋg-sad a ye yʋʋr sẽn boond t’a Skolastik Kabagwira. D wa n doga kamb a tãabo. La wa b sẽn da zãms maamã, mam da ratame t’a sã n wa na n pʋʋs-m bɩ n kos-m bũmb bɩ a yĩgimd m taoore. M da yetame me tɩ bũmb nins fãa d zakã rãmb sẽn tarã yaa maam n so, n tar n maand m sẽn date. M da wae n yita yʋng fãa, n lebgd n wat yibeoog wakat a tãabo, rẽ tɩ m suume. M sã n da wẽ kʋɩlengã t’a Skolastik pa wa pak tao-tao, m pãbd-a lame.

 Wakat kãng tɩ m da tʋmda ne tʋʋm-noor sẽn get yõ-koglgã yelle, n da yaa yel-gɛta, tɩ b ra yaood maam sõma. A Skolastik ra pẽdgda maam n dat tɩ m tũ-a n kẽng Pãntekot-rãmbã egiliizẽ, a sẽn da tagsd tɩ na n kɩtame tɩ m toeemã yĩnga. La m pa sak n tũ-a n kẽng ye. M pʋd n tɩ rɩka pag a to. M nen-kɛglem tʋʋmã la m yoobã yĩng kɩtame t’a Skolastik peeg d kamb a tãabã tɩ b zĩnd ne a roagdbã.

 M zoa sẽn kẽem maam goma ne maam m sẽn vɩ to-to wã wɛɛngẽ. A sagla maam tɩ m lebg n tɩ peeg m pag a Skolastik. A yeelame tɩ m tara kom-sõma, la tɩ pa segd tɩ b zãag ne maam ye. Rẽ n so tɩ yʋʋmd 2005 wã, m basa rãamã yũubu, n loog n bas pag a to wã, n tɩ peeg a Skolastik. Yʋʋmd 2006, d kẽe kãadem. La ne rẽ fãa, m da ket n mamsd-a lame.

 Yʋʋmd 2008 wã, a Zeova Kaset soab a ye yʋʋr sẽn boond t’a Zowɛll waa d zakẽ wã, la m kelg-a lame. Yẽ ne a Zeova Kaset soab a to yʋʋr sẽn boond t’a Bonavãnture ra wat n kaagda tõndo, tɩ d ra sõsd Biiblã zugu. B maana woto n kaoos kiisi. M sok-b-la sogsg wʋsgo, sẽn yɩɩd fãa Vẽnegr sebrã zugu. M da ratame bal n wilg-b tɩ b sẽn yetã pa sɩd ye. Wala makre, m sok-b lame n gese bõe yĩng tɩ b yetẽ tɩ “kʋʋn-kãseng” ning yell b sẽn gomd Vẽnegr 7:9 pʋgẽ wã na n vɩɩmda tẽngã zugu, tɩ b yaool n yeel vɛrse wã pʋgẽ tɩ b ‘yasa Wẽnnaam geerã taoor la Pe-bilã taoore,’ rat n yeel t’a Zeezi Kiristi? A Zowɛll talla sũ-mare, n leok m sogsgã. Wala makre, a wilga maam Ezayi 66:1 wã sẽn yet tɩ tẽngã yaa Wẽnnaam “nao-roagendgã.” Dẽnd rat n yeelame tɩ kʋʋn-kãsengã yasa tẽngã zugu, Wẽnnaam geerã taoore. Sẽn paase, m karma Yɩɩn-sõamyã 37:29 wã sẽn yet tɩ nin-tɩrsã na n vɩɩmda tẽngã zug wakat sẽn kõn sa wã.

 M wa n sakame tɩ b na n zãms-m Biiblã. A Bonavãnture sɩnga maam ne a Skolastik Biiblã zãmsgo. M sẽn da zãmsd Biiblã, m wa n dat n toeema bũmb wʋsg m vɩɩmã pʋgẽ. M bãnga m sẽn tõe n waoog m pagã to-to. M da pa le rat t’a sã n na n pʋʋs maam bɩ n kos-m bũmb bɩ a yĩgimd ye. Sẽn paase, m da pa le yet tɩ bũmb nins fãa d zakã rãmb sẽn tarã yaa maam n so ye. M basa filim-dãmb sẽn pid ne nen-kɛglmã gesgo. Yɩl n bas woto fãa yɩɩ toogo. Yɩɩ tɩlɛ tɩ m tall yõk-m-meng la sik-m-meng wʋsgo.

 Yʋʋm a wãn sẽn deng rẽ, m da talla m bi-kãseng a Kirisiyã n kẽng Ugãnda, t’a na n tɩ zĩnd ne m roagda. La m sẽn karem Tõod 6:4-7 wã, m bãngame tɩ Wẽnnaam nifẽ, yaa maam ne m pagã n segd n ges d kambã yelle, la d sõng-b tɩ b bãng Wẽnnaam noyã. D sẽn tɩ tall d biigã n wa wã, d fãa sũur yɩɩ noog wʋsgo!

 Mam bãngame t’a Zeova yaa Wẽnnaam sẽn yaa nimbãan-zoeta, la t’a kõo maam sugr m pĩnd yel-wẽnã yĩnga. M sũur nooma wʋsg a Skolastik sẽn naag maam n zãms Biiblã. D rɩka d mens n kõ a Zeova, la d reeg lisg yʋʋmd 2010, yʋʋm-sar kiuugã rasem a 4 daare. Masã maam ne m pagã kɩsa taab sɩda, la d tũud Biiblã saglsã ne sũ-noog d zakã pʋgẽ. M pagã sũur nooma wʋsg m sẽn wat zakẽ tʋʋmã sigb poor balã. M sẽn pa le namsd-a wã, m sẽn wilgd-a tɩ m nand-a lame wã, m sẽn yãk yam n bas rãamã yũubã, la m sẽn pa le yaa nen-kɛglem soabã me noom-a-la wʋsgo. Yʋʋmd 2015 wã, b yãka maam tɩ m lebg kãsem-soaba, n sõngd n get tigingã neb yelle. D kamb a nu wã sʋka, bãmb b tãab n deeg lisgu.

 M sẽn wa n sɩng Biiblã zãmsg ne a Zeova Kaset rãmbã, m pa sak n deeg b sẽn zãms maam bũmb ningã zond-yaar ye. La b sẽn da tikd Biiblã n leokd m sogsgã yɩ-m-la noogo. Maam ne a Skolastik wa n bãngame tɩ neb nins sẽn tũud Wẽnnaamã segd n modgame n tũud a noyã, n da maand bãmb mens sẽn dat ye. La bũmb sẽn noom maam n yɩɩda, yaa a Zeova sẽn tak maam n wa a nengẽ tɩ m be a nin-buiidã sʋk rũndã-rũndã wã. M sã n lebg n tẽeg m vɩɩmã sẽn da yaa to-to wã, m kɩsa sɩd tɩ ne Wẽnnaam sõngre, pʋ-peelem soab fãa tõe n toeemame n tõog n ta a yam.