Mam doga San Juan Chancalaito, sẽn yaa tẽn-bil sẽn be Chiapas, Megsik soolmẽ wã. Tõnd zakã rãmb yaa Chol buudã neba, n yaa Maya rãmbã yagense. Mam roagdbã ra tara kamb 12 tɩ mam yaa a nu soaba. Mam sẽn wa n yaa bi-bilfã, maam ne m yaopã la m kẽem-dãmbã zãmsa Biiblã ne a Zeova Kaset rãmba. Zu-bʋko, mam pa tũ Biiblã sagls m bi-bɩɩlmã wakat ye.

 Mam sẽn wa n tar yʋʋm 13 wã, m da yũuda dorg la m zuuda. Yaa wakat kãng la mam yi n bas m roagdbã zak n da saad n gilgdẽ. Mam sẽn wa n tar yʋʋm 16 mam sɩngame n tʋmd dorg b sẽn boond tɩ marizuana pʋʋgẽ. Mam tʋma be na maan yʋʋmde. La daar a yembr yʋng tõnd sẽn wa n wʋkd dorgã ne koom-kogl-bedrã, dorg koaadb a taab n wa ne bug-ra-bɛd n na n zab ne tõndo. Mam yɩkame n lʋɩ kʋɩlgã pʋgẽ n dug n zãag n ta kʋɩlgã rʋʋndã, sẽn na yɩl tɩ b bug-raadã ra paam maam ye. Rẽ poore, mam kẽnga Etazĩni.

 Mam sẽn ta Etazĩni wã mam kell n koosa dorgã, la mam paama zu-loees wʋsgo. Mam sẽn wa n tar yʋʋm 19, polɩɩs-rãmbã yõka maam n kẽes maam bãens roog wagdem yĩnga, la m sẽn bao n na n kʋ ned yĩnga. M sẽn ta bãensã roogẽ wã, m tɩ naaga bi-bees sull n tʋm nin-kɛglem tʋʋm a taaba. Rẽ kɩtame tɩ bãensã roog taoor dãmb yiis maam be n tɩ kẽes bãens roog sẽn be Lewisburg, Pɛnsilvani soolmẽ wã. Yaa bãens roog b sẽn gũud bi-beesã sõma.

 Mam maneg n lebga nin-wẽng wʋsg Lewisburg bãensã roogẽ. M sẽn da zoe n tar bi-bees sull bãnd m yĩngẽ wã, yɩɩ nana ne-m tɩ m naag sul-kãng neb bãensã roogẽ. Mam maneg n lebga wẽnem soaba, n da zabd zab wʋsgo. Daar a yembre, mam naaga bi-bees sull n zab zabr bãensã roogẽ. Tõnd talla rasab ne kut-rãmb n pãb taab sõma. Bãensã roog gũudbã kong n loba gaas-rãmb sẽn na yɩl n paas zabrã. Rẽ poore, bãensã roog taoor dãmb ninga maam zĩig sẽn yaa toore, m sẽn da yaa nin-toaag n pa tõe n zĩnd ne neb a taabã yĩnga. Mam da yaa sũ-tʋʋlem soaba, la m gomd gom-põaasa. Mam nug ra tʋʋla ne neb pãbre. Sɩd-sɩda, rẽ ra nooma maam wʋsgo. M da pa maand m bãngẽ m manesmã yĩng ye.

 Sẽn mik tɩ naoor wʋsgo, m da bee roog ning pʋgẽ b sẽn pag maamã, m sɩnga Biiblã kareng sẽn na yɩl n da zĩ zaalem ye. Kaoosg zugẽ, bãensã roog gũud a yembr n kõ maam sebr gom-zug sẽn yaa: Y Tõe n Vɩɩnda Wakat Sẽn-kõn-sa Tẽng zug Arzãnẽ. a Mam sẽn wa n karem seb-kãng b sẽn tar n zãmsd nebã Biiblã, mam tẽega bũmb wʋsg a Zeova Kaset rãmbã sẽn tall Biiblã n zãms maam m sẽn da yaa bi-bilfã. Rẽ poore, m tagsa m vɩɩmã sẽn sãam to-to m nin-kɛglmã yĩngã yelle. Mam tagsa m zakã rãmb yell me. Sẽn mik tɩ mam tãop a yiib n lebg a Zeova Kaset rãmbã, bũmb n wa mam yamẽ tɩ m yeele: ‘B na n wa vɩɩmda wakat sẽn kõn sa.’ Rẽ la m sok m meng yaa: ‘Bõe yĩng tɩ mam yẽ pa tõe n wa vɩɩmd wakat sẽn kõn sa?’ Yaa rẽ tɛk la mam yãk yam n na n toeeme.

 La m da miime tɩ sẽn na yɩl n toeeme, yaa tɩlɛ tɩ m paam sõngre. Rẽ n so tɩ m deng n pʋʋs Wẽnnaam a Zeova n kos-a t’a sõng-ma. Rẽ poore, m gʋlsa sebr n tool a Zeova Kaset rãmbã biru-kãsengã sẽn be Etazĩni wã n kos Biibl zãmsgo. Biru wã neb baoo tiging sẽn pẽ bãensã roogo, n kos tɩ b wa sõng maam. La wakat kãnga, b ra pa sakd tɩ ned sẽn pa mam zakã ned wa ges maam ye. Rẽ n kɩt t’a Zeova Kaset soab a yembr sẽn be tigin-kãng pʋgẽ sɩng n toond maam lɛta ne sɛb sẽn tik Biiblã sẽn na yɩl n keng m daoodo. Woto kɩtame tɩ m maneg n dat n toeeme.

 Bũmb a ye m sẽn maan tɩ sõng-m yaa m sẽn yãk yam n na n yi n bas bi-bees sull ning pʋgẽ m sẽn da be na maan yʋʋmã. Sullã taoor soab me ra bee roog sẽn yaa toor pʋgẽ. Daar a ye d sẽn yi n na n kok pemsem bilfã, m kolg-a lame n yeel-a tɩ m dat n lebga a Zeova Kaset soaba. A sẽn leok to-to wã linga maam. A yeelame: “Fo sẽn yetã sã n yaa sɩda, yell kae ye. Mam pa tõe n kẽes m toog Wẽnnaam yɛlẽ ye. La fo sã n datame n yi n bas sullã balã, fo mii bũmb ning sẽn na n paam foom.”

 Yʋʋm a yiib loogr poore, bãensã roog taoor dãmb gũus n gesame tɩ mam toeemdame. Rẽ kɩtame tɩ b maneg n bas b yam ne maam. Wala makre, b sã n da yiis-m bãensã roogẽ n na n tall-m tɩ m tɩ so, b ra pa le sogd mam nusã bãens ye. Bãensã roog gũud a ye meng n wa n keng mam raood n yeel tɩ m wɩng ne m toeengã. Bãensã roog taoor dãmb yiisa maam be n tɩ kẽes bãens roog b sẽn kɩt tɩ bi-beesã tar lohorem, la sẽn pẽ ne bãens ro-kãsengã, tɩ m zĩnd be yʋʋmde. Yʋʋmd 2004 tɩ mam sẽn zĩnd bãensã roogẽ yʋʋm piig la woto. B yiisa maam n dɩk-m ne bãensã roog biis n kẽng Megsiki.

 Mam sẽn ta Megsikã bala, m baoo a Zeova Kaset rãmbã Rĩungã roog zĩiga. M sẽn na n kẽng tigsgã pipi tɩ m da yera bãensã roog futu. Yaa fu-bãmb bal n da yaa fu-sõma m sẽn tare. Baa mam yalẽ wã sẽn da yaa to-to wã, a Zeova Kaset rãmbã reega maam neere. Mam sẽn yã b sẽn wilg to-to tɩ b yaa maan-neer dãmbã, mam bãngame tɩ m bee kiris-neb hakɩɩk sʋka. (Zã 13:35) Tigsg-kãng poore, kãsem-dãmbã yẽsa ne taab sẽn na yɩl tɩ ned wat n zãmsd maam Biiblã. Yʋʋmd loogr poore, rat n yeel tɩ yʋʋmd 2005 bõn-bɩʋʋng kiuug rasem a 3, mam deega lisg n lebg a Zeova Kaset soaba.

 Yʋʋmd 2007 yʋʋm-vẽkr kiuugã tɛka, mam lebga wakat fãa so-pakd n da moond lɛɛr 70 kiuug fãa, la m zãmsd nebã Biiblã. Yʋʋmd 2011 mam kẽnga Biiblã zãmsg lekoll rakõapã yĩnga. (B boonda lekoll-kãng masã tɩ Rĩungã koe-moondb lekolle.) Lekoll-kãng sõnga maam tɩ m tõog n tʋm tʋʋm nins b sẽn kõ maam tigingã pʋgẽ wã sõma.

 Yʋʋmd 2013, mam kẽe kãadem ne m pʋg-nongr a Pilar. A yeelame tɩ yaa toog ne-a t’a tẽ bũmb nins mam sẽn togs-a m pĩnd vɩɩmã wɛɛngẽ wã. M zɩ n dɩk m pĩnd manesmã a bada. Maam ne m pagã kɩsa sɩd tɩ mam sẽn yaa to-to rũndã-rũndã wã kõta kaset tɩ Biiblã tara pãng n tõe n toeem neda.—Rom-dãmbã 12:2.

 Mam yãame t’a Zeezi goam nins sẽn be Luk 19:10 pidsda mam zugu. Be, b yeelame: “[Mam] waame n na n bao la fãag bũmb nins sẽn dag n menemã.” Mam pa le tagsd tɩ m yaa ned sẽn menem ye. M pa le gilgd n maand neb wẽng ye. Biiblã maasem yĩnga, mam vɩɩmã tara bark wʋsgo, tɩ maam ne m taabã moor noome. La sẽn yɩɩda, m tara zood sõma ne a Zeova sẽn yaa m Naandã.