N-ye. Sẽn yaa zĩig ning fãa la a Zeova Kaset rãmbã be, b modgdame n tʋmd wa misioneer-dãmba, n moond koɛɛgã n wilgd nebã b sẽn tẽede.—Matye 28:19, 20.

 Sẽn paase, a Zeova Kaset rãmb kẽer kẽnda zĩig koe-moondb sẽn pa waooge, n tɩ sõng nebã tɩ b wʋm Biiblã koe-noogã. Sãnda kẽnda tẽn-zẽmse, sẽn na yɩl n moon koɛɛgã n paase. B tʋmda ne yamleoog n sõngdẽ tɩ bãngr-gomd a Zeezi sẽn togs paamd pidsgu. A ra yeela woto: “Yãmb na n yɩɩ mam kaset dãmb . . . hal tɩ ta dũniyã tɛk fãa.”—Tʋʋmã 1:8.

 Yʋʋmd 1943 soabã pʋgẽ, d lugla lekoll n na n sõng tõnd misioneer-dãmb kẽer tɩ b paam minim. Sẽn sɩng wakat kãng tɛka, yaa sẽn yɩɩd a Zeova Kaset rãmb 8 000 n kẽng lekoll kãng b sẽn boond masã tɩ Gileyaad lekollã.