N-ye! A Zeova Kaset rãmbã sõngda neb nins sabab-wẽns sẽn paamã. Tõnd tũuda saglg ning sẽn be Galat-rãmb 6:10 pʋgẽ wã n sõngd d tẽed-n-taasã, la neb nins sẽn pa a Zeova Kaset rãmbã. Be b yeta woto: “Bɩ d maan nebã fãa neere, la sẽn yɩɩd fãa yaa tẽeb pʋgẽ ba-biisã.” D leb kʋmda sabab-wẽns sẽn paam-b rãmbã, la d sõng-b tɩ b paamd bũmb kẽer sẽn yaa tɩlɛ ne-b Wẽnnaam tũubã pʋgẽ.—2 Korẽnt-rãmbã 1:3, 4.

 Sabab-wẽng poore, tigims nins sẽn be babgẽ be wã kãsem-dãmb modgdame n paam b tigingã neb kibaya, n bãng b sã n data sõngre, la b sẽn tõe n sõng-b to-to. Rẽ poore, kãsem-dãmbã gʋlsda rapoor n tool a Zeova Kaset rãmbã filiyall ning sẽn get b tẽngã koe-mooneg yellã, n togs-b saam-biisã kibay la sõngr ning b sẽn zoe n paame.

 Nebã raab sã n yɩɩd tigimsã pãnga, a Zeova Kaset rãmbã Siglgã taoor lʋɩtb Sullã neb getame tɩ b paam sõngre. Yaa woto la pipi kiris-nebã me maan n sõng b tẽed-n-taasã kom wakate. (1 Korẽnt-rãmbã 16:1-4) Filiyallã yãkda neb sẽn na n ges tɩ sõngrã ta neb nins sẽn be raab pʋgẽ wã. A Zeova Kaset rãmb sẽn be zĩis a taab me kẽesda b sẽka, la b tarem n sõngdẽ.—Yel-bũnã 18:24.

 D rɩkda ligdã nebã sẽn toond a Zeova Kaset rãmbã filiyallã n sõngd sabab-wẽns sẽn paam-b rãmbã. (Tʋʋmã 11:27-30; 2 Korẽnt-rãmbã 8:13-15) Sẽn mik tɩ nebã tʋmda ne yamleoog n pa reegd yaoodã, d tara ligdã d sẽn paamdã n sõngd sabab-wẽns sẽn paam-b rãmbã bala. D geta ligdã d sẽn paamdã yell neere.—2 Korẽnt-rãmbã 8:20.