Ayo. A Zeova Kaset rãmbã pa zãgsd bogb ye. Sã n yaa ne tõndo, yaa kiris-ned kam fãa n yãkd yam zĩ-kãng wɛɛngẽ. A Zeova Kaset rãmb wʋsg yãka yam n tɩ kɩt tɩ b vʋdg-ba.

 Tõnd baooda tɩbsg sẽn yaa sõma. D sẽn ne logtoɛɛmbã bãngr sẽn paasd bũmb wʋsg wɛɛngẽ tɩ b paamd tɩt sẽn tõe n kɩt tɩ d gil bã-kɛgems kɛɛrã, noom-d lame. D sũur nooma ne logtoɛɛmbã la neb a taab sẽn tʋmd wʋsg n get nebã laafɩ yellã, sẽn yɩɩd fãa, yɛlã sẽn wat n yaa toog sasa wã.

 A Zeova Kaset rãmbã teenda tẽngã taoor dãmb nins sẽn get nin-buiidã laafɩ yellã. Wala makre, koronavirisã bãagã sɩngr tɛka, tõnd yiisa sõss la video-rãmb tõnd sɩtã zug ne buud-goam kobse, n sagend nebã tɩ b tũ noy nins tẽngã taoor dãmb sẽn gãneg sẽn na yɩl tɩ d kogl d mens ne bãagã. Sõssã la video-rãmbã tẽegda nebã tɩ tara yõod tɩ b ra pẽnegd taab wʋsgo, tɩ b tũud noy nins tẽngã taoor dãmb sẽn yiis tigim-taabã wɛɛngẽ wã, pa yir rasem sõor takɩ wã, nusã pegbã, la no-limã ningr wɛɛngẽ wã, n paas bũmb nins fãa tẽngã taoor dãmb sẽn yet tɩ yaa tɩlɛ tɩ nebã maane, wall b sẽn sagend-b tɩ b maanã.—Rom dãmbã 13:1, 2.

 Hal na maan yʋʋm wʋsgo, a Zeova Kaset rãmbã sɛbã pʋsẽ, b tẽegda nebã sagls sẽn tar yõod wʋsgo. Ad kẽere:

•   Laafɩ wã baoob wɛɛngẽ, yaa ned kam fãa n segd n yãk yam a toore.—Galat-rãmbã 6:5.

   “[Seb-kãngã] pa sagend nebã tɩ b sak tɩɩm wall tɩbsg buk takɩ ye. A bõn-daabã yaa a wilg yɛlã sẽn yaa to-to wã, tɩ sõng karemdbã tɩ b tõog n tags sõma n yãk yam b toore.”—Réveillez-vous !, 8 février 1987.

   “Yãmb ne y kambã na sak tɩ b bog-y wall y kõn sakã wɛɛngẽ, yaa yãmb n yãkd y toore.”—Réveillez-vous !, 8 août 1993.

•   Tõnd baooda tɩbsg sẽn yaa sõma, bala d nanda vɩɩmã wʋsgo.—Tʋʋma 17:28.

   “A Zeova Kaset rãmbã sã n wa ka laafɩ, b kẽngda logtor yir sẽn na yɩl n paam tɩbsgo. B nonga vɩɩmã, n dat n maan bũmb ning fãa sẽn tõe la sẽn pa kɩɩsd Biiblã sẽn yetã sẽn na yɩl n kell n vɩɩmde.”—Gũusg Gasgã, yʋʋmd 1975 zĩ-likr kiuug pipi daare.

   “A Zeova Kaset rãmbã sakda logtoɛɛmbã tɩtã la b tɩbsgã ne yamleoogo. B rata laafɩ la yõ-woko. Sɩd-sɩda, a Zeova Kaset rãmb kẽer yaa logtoɛɛmb wa a Luk sẽn zĩnd pipi kiris-nebã wakatẽ wã. . . . Vẽenega, a Zeova Kaset rãmbã sũur nooma ne neb nins sẽn tʋmd wʋsg n get nebã laafɩ yellã. B sã n wa lʋɩ bãag tɩ nin-kãens sõngd-b sẽn na yɩl tɩ b paam yolsg me, b sũur noomame.”—Gũusg Gasgã, yʋʋmd 2011 wao-fugdg kiuug pipi daare.