६ मे २०२४ | अपडेट: ११ जुलै २०२४
रशिया

अपडेट—तुरुंगवासाची शिक्षा | “सगळ्या गोष्टी यहोवाच्या नियंत्रणात आहेत”

प्ले

१० जुलै २०२४ ला प्रिमॉरी क्षेत्रातल्या खोरोलस्की जिल्हा न्यायालयाने ब्रदर बॉरिस अँड्रिये, ब्रदर ॲनाटोली ली आणि सिस्टर नतालिया शारापोवा यांना शिक्षा सुनावली. ब्रदर बॉरिसला सहा वर्षांची, ब्रदर ॲनाटोलीला साडे सहा वर्षांची आणि सिस्टर नतालियाला तीन वर्षांची तुरुंगवासाची शिक्षा सुनावण्यात आली. त्यांना शिक्षा सुनावण्याआधीपासूनच ते तिघंही तुरुंगात होते आणि पुढेही त्यांना तुरुंगात राहावं लागेल.

थोडक्यात माहिती

बॉरिस अँड्रिये

जन्म: १९५१ (मोनास्टीरेश्‍ये, प्रिमॉरी क्षेत्र)

परिचय: आपत्कालीन सेवेत काम करायचे

त्यांच्या सगळ्या प्रश्‍नांची उत्तरं थेट बायबलमधून मिळाल्यामुळे त्यांना सत्य मिळाल्याची खातरी झाली. २००४ ला त्यांनी बाप्तिस्मा घेतला

२०२० मध्ये ॲलेक्सँड्राशी त्यांचं लग्न झालं

बॉरिस यांच्या पत्नी ॲलेक्सँड्रा यांचं व्यक्‍तिगत मत a

या कठीण काळात टिकून राहायला तुमच्या पतीने तुम्हाला कशी मदत केली?

बॉरिसला पोलिसांनी ताब्यात घेतल्यानंतर खासकरून एक दिवस माझ्यासाठी खूप कठीण होता. मी इतकी खचून गेले होते, की रडायलाच लागले. मला कसं वाटतंय याबद्दल मी त्यांना पत्र लिहून कळवलं. त्यांनी मला पत्र लिहून खूप सांत्वन दिलं आणि त्यांना माझा त्रास कळतोय हे सांगितलं. पण सगळ्यात महत्त्वाचं म्हणजे यहोवाने आधी आम्हाला कठीण परिस्थितीचा सामना करायला कशी मदत केली होती, याची त्यांनी मला आठवण करून दिली. त्या वेळी मला नेमकी त्याचीच गरज होती. त्यांच्या पत्रामुळे मला याची खातरी पटली की यहोवा आम्हाला कधीच सोडून देणार नाही.

ॲनाटोली ली

जन्म: १९८५ (उझ्बेकिस्तान)

परिचय: वेगवेगळ्या चर्चमध्ये जाऊनसुद्धा त्यांना त्यांच्या प्रश्‍नांची उत्तरं मिळाली नाहीत. त्यामुळे त्यांनी साक्षीदारांसोबत बायबल अभ्यास सुरू केला आणि बायबलमधून सत्य शिकून घेतल्यामुळे त्यांना खूप आनंद झाला. २०१० साली त्यांनी बाप्तिस्मा घेतला

२०११ मध्ये रायसाशी त्यांचं लग्न झालं

ॲनाटोली यांच्या पत्नी रायसा यांचं व्यक्‍तिगत मत b

यहोवाने तुम्हाला आणि तुमच्या पतीला कशी मदत केली?

ॲनाटोलीला खटल्याची सुनावणी होईपर्यंत तुरुंगात टाकून काहीच दिवस झाले होते. तेव्हा त्यांनी मला सांगितलं, की माझ्या एकटीचं कसं होईल याची त्यांना खूप चिंता वाटते. त्यांना अटक होण्याआधी आम्ही सोबत मिळून रोज बायबल वाचायचो आणि प्रार्थना करायचो. पण यहोवा भाऊबहिणींद्वारे कशा प्रकारे माझ्या गरजा पुरवतोय हे समजल्यावर त्यांची चिंता कमी झाली. यहोवाने आमची कशी काळजी घेतली हे आम्ही दोघांनीही पाहिलंय. आणि आम्हाला खातरी आहे की तो आम्हाला कधीच सोडणार नाही.

नतालिया शारापोवा

जन्म: १९७२ (कझाकस्तान)

परिचय: १९९५ ला साक्षीदारांसोबत त्यांची भेट झाली आणि त्यांचा बायबल अभ्यास सुरू झाला. बायबल हे देवाचं वचन आहे याची त्यांना खातरी पटली. आणि २०१२ मध्ये त्यांचा बाप्तिस्मा झाला

नतालिया यांची आई नीना यांचं व्यक्‍तिगत मत c

सुनावणी आधी तुरुंगात असताना कोणत्या गोष्टीमुळे नतालियाला निराशेचा सामना करायला मदत होत आहे?

माझ्या मुलीला तुरुंगात वेगवेगळ्या समस्यांचा सामना करावा लागतोय. तिथे खूप गारठा असतो. तिला बऱ्‍याचदा डोकेदुखीचा त्रास होतो. हे खरंय, की ती कधीकधी निराश होते. पण तिला या गोष्टीची खातरी आहे की सगळ्या गोष्टी यहोवाच्या नियंत्रणात आहेत. तिने सांगितलं: “मला माहीत आहे की मी एक न एक दिवस इथून बाहेर निघेल. यहोवा मला धीर धरायला मदत करतोय आणि मी वाट पाहायला तयार आहे.” समस्यांमुळे नतालियाला यहोवाच्या आणखी जवळ जायला मदत झाली आहे; जणू काय ती यहोवाच्या कुशीतच आहे.

यहोवाने बॉरिस, ॲनाटोली आणि नतालिया यांच्या प्रार्थनांचं उत्तर दिलं. त्याच प्रकारे, आपणही खातरी बाळगू शकतो, की कठीण काळात तो आपल्याही प्रार्थनांचं उत्तरं देईल आणि आपल्याला परीक्षेत टिकून राहायचं बळ देईल.—स्तोत्र २०:१.

घटनाक्रम

२८ जुलै २०२२

गुन्ह्याचा खटला दाखल करण्यात आला
६ ऑक्टोबर २०२२

यारोस्लावस्कीमधल्या एका गावात १२ घरांची झडती घेण्यात आली. बॉरिस आणि नतालिया यांना काही काळासाठी जेलमध्ये टाकण्यात आलं
७ ऑक्टोबर २०२२

बॉरिस आणि नतालिया यांना खटल्याची सुनावणी होईपर्यंत तुरुंगात टाकण्यात आलं
१२ ऑक्टोबर २०२२

ॲनाटोलीला काही काळासाठी जेलमध्ये टाकण्यात आलं
१३ ऑक्टोबर २०२२

ॲनाटोलीला खटल्याची सुनावणी होईपर्यंत तुरुंगात टाकण्यात आलं
५ ऑक्टोबर २०२३

खटला सुरू झाला

a b c हा लेख तयार करत असताना, ब्रदर बॉरिस अँड्रिये, ब्रदर ॲनाटोली ली आणि सिस्टर नतालिया शारापोवा हे सगळे खटल्याची सुनावणी होईपर्यंत तुरुंगात होते. म्हणून त्यांचं व्यक्‍तिगत मत घेता आलं नाही.

बातम्या