इब्री लोकांना ७:१-२८
७ राजांना लढाईत हरवून अब्राहाम परत येत असताना हा शालेमचा राजा आणि सर्वोच्च देवाचा याजक असलेला मलकीसदेक त्याला भेटला, आणि त्याने अब्राहामला आशीर्वाद दिला;
२ अब्राहामने त्याला सर्व गोष्टींतला दहावा हिस्सा दिला.* सर्वात आधी, मलकीसदेकच्या नावाचा अर्थ “नीतिमत्त्वाचा राजा,” असा आहे, तसेच, तो शालेमचा राजा म्हणजेच, “शांतीचा राजा” आहे.
३ त्याला आईवडील किंवा वंशावळ नाही; तसेच, त्याच्या दिवसांची सुरुवात नाही आणि त्याच्या जीवनाचा अंतही नाही, तर त्याला देवाच्या पुत्रासारखे करण्यात आल्यामुळे तो सर्वकाळासाठी* याजक राहतो.
४ कुटुंबप्रमुख* असलेल्या अब्राहामने ज्याला लुटीतल्या सर्वात उत्तम गोष्टींचा दहावा हिस्सा दिला, तो माणूस किती महान होता याचा विचार करा.
५ नियमशास्त्रानुसार, लेवीच्या पुत्रांपैकी ज्यांना याजकपद मिळते त्यांना लोकांकडून, अर्थात अब्राहामचेच वंशज असलेल्या* त्यांच्या भावांकडून, दशांश गोळा करण्याची आज्ञा दिली जाते.
६ पण हा माणूस जो त्यांच्या वंशावळीतला नव्हता, त्याने अब्राहामकडून दशांश घेतला आणि ज्याला अभिवचने देण्यात आली होती, त्याला त्याने आशीर्वाद दिला.
७ जो लहान असतो त्याला आपल्यापेक्षा मोठ्या व्यक्‍तीकडून आशीर्वाद मिळतो, यात शंकाच नाही.
८ एकीकडे, ज्यांना दशांश मिळतो, ती मरण पावणारी माणसे आहेत; पण दुसरीकडे ज्या मनुष्याला दशांश मिळाला, त्याच्याविषयी अशी साक्ष देण्यात आली आहे, की तो जिवंत राहतो.
९ आणि दशांश घेणाऱ्‍या लेवीने स्वतःसुद्धा अब्राहामच्या द्वारे दशांश दिले असे म्हणता येईल,
१० कारण ज्या वेळी मलकीसदेक अब्राहामला भेटला, त्या वेळी लेवी त्याच्या या पूर्वजाचा, म्हणजेच अब्राहामचा भावी वंशज होता.*
११ तर मग, लेव्यांच्या याजकपणामुळे (कारण लोकांना देण्यात आलेल्या नियमशास्त्राचाच हा एक भाग होता) जर परिपूर्णता मिळणे शक्य असते, तर अहरोनसारखा नसून मलकीसदेकसारखा असलेला दुसरा एक याजक येण्याची काय गरज होती?
१२ कारण याजकपण बदलले जात असल्यामुळे, नियमांत बदल करणेही गरजेचे आहे.
१३ कारण ज्या मनुष्याबद्दल या गोष्टी सांगितल्या आहेत, तो दुसऱ्‍या एका वंशातून आला आणि त्या वंशातल्या कोणीही वेदीजवळ सेवा केली नाही.
१४ कारण आपला प्रभू यहूदाच्या वंशातून आला हे तर स्पष्टच आहे, पण, त्या वंशातून याजक येण्याविषयी मोशेने काहीही सांगितले नाही.
१५ आणि जेव्हा मलकीसदेकसारखा दुसरा एक याजक येतो, तेव्हा ही गोष्ट आणखीनच स्पष्ट होते.
१६ तो नियमानुसार शारीरिक वंशावळीच्या आधारावर याजक झाला नाही, तर अविनाशी जीवनाच्या सामर्थ्याने झाला आहे.
१७ कारण त्याच्याविषयी अशी साक्ष देण्यात आली आहे: “तू मलकीसदेकसारखा याजक आहेस आणि तू सर्वकाळासाठी याजक राहशील.”
१८ तर मग, पूर्वीची आज्ञा कमजोर आणि निरुपयोगी ठरल्यामुळे ती रद्द करण्यात आली.
१९ कारण नियमशास्त्राने कोणत्याही गोष्टीला परिपूर्ण केले नाही, पण जेव्हा अधिक चांगली अशी आशा देण्यात आली, तेव्हा परिपूर्णता शक्य झाली, आणि त्याच आशेद्वारे आपण देवाच्या जवळ येत आहोत.
२० ही आशा शपथ घेतल्याशिवाय देण्यात आली नाही.
२१ (कारण, काही माणसे शपथेशिवाय याजक बनली आहेत हे खरे असले, तरी या याजकाला मात्र देवाने शपथ घेऊन याजक नेमले आणि त्याच्याविषयी असे म्हटले: “यहोवाने* शपथ घेतली आहे आणि तो आपला विचार बदलणार नाही,* ‘तू सर्वकाळासाठी याजक राहशील.’”)
२२ त्यामुळे, येशू हा एका अधिक चांगल्या कराराची हमी देणारा* झाला आहे.
२३ शिवाय, पूर्वी एकापाठोपाठ एक बऱ्‍याच जणांना याजक बनावे लागायचे, कारण मृत्यूमुळे त्यांना याजक म्हणून कायम सेवा करत राहणे शक्य नव्हते.
२४ पण हा याजक सदासर्वकाळ जिवंत असल्यामुळे, त्याच्या याजकपदाला वारसदारांची गरज नाही.
२५ आणि म्हणूनच, त्याच्याद्वारे देवाजवळ येणाऱ्‍यांचे पूर्णपणे तारण करणेही* त्याला शक्य आहे, कारण त्यांच्याकरता याचना करण्यासाठी तो सर्वदा जिवंत आहे.
२६ आपल्यासाठी असा एक महायाजक असणे योग्यच आहे, जो एकनिष्ठ, निर्दोष, निष्कलंक, पापी लोकांपेक्षा वेगळा आणि स्वर्गाहून उंच केलेला असा आहे.
२७ दुसऱ्‍या महायाजकांप्रमाणे त्याला आधी स्वतःच्या पापांसाठी आणि मग लोकांच्या पापांसाठी, रोजच्या रोज बलिदाने अर्पण करण्याची गरज नाही; कारण त्याने स्वतःला अर्पण केले, तेव्हा त्याने एकदाच सर्वकाळासाठी असे केले.
२८ कारण नियमशास्त्र तर अशा माणसांना महायाजक म्हणून नेमते, ज्यांच्यामध्ये दुर्बलता आहेत; पण, नियमशास्त्रानंतर शपथ घेऊन दिलेल्या वचनाद्वारे एका पुत्राला नेमण्यात आले, ज्याला सर्वकाळासाठी परिपूर्ण करण्यात आले आहे.
तळटीपा
^ शब्दशः “वाटून दिला.”
^ किंवा “कायम.”
^ किंवा “कुलप्रमुख.”
^ किंवा “अब्राहामच्या पोटी जन्मलेल्या.”
^ किंवा “अब्राहामच्या पोटी होता.”
^ शब्दार्थसूची पाहा.
^ किंवा “त्याला खेद होणार नाही.”
^ किंवा “जामीन म्हणून दिलेला.”
^ किंवा “वाचवणेही.”
