मत्तय १:१-२५
१ अब्राहामचा वंशज दावीद, दावीदचा वंशज येशू ख्रिस्त* याच्या जीवनाचा अहवाल:*
२ अब्राहामला इसहाक झाला;इसहाकला याकोब;याकोबला यहूदा आणि त्याचे भाऊ झाले;
३ यहूदाला तामारपासून पेरेस व जेरह झाले;
पेरेसला हेस्रोन;हेस्रोनला अराम झाला;
४ अरामला अम्मीनादाब झाला;अम्मीनादाबला नहशोन;नहशोनला सल्मोन झाला;
५ सल्मोनला राहाबपासून बवाज झाला;बवाजला रूथपासून ओबेद;ओबेदला इशाय झाला;
६ इशायला दावीद राजा झाला.दावीदला, जी पूर्वी उरीयाची बायको होती तिच्यापासून शलमोन झाला;
७ शलमोनला रहबाम झाला;रहबामला अबीया;अबीयाला आसा झाला;
८ आसाला यहोशाफाट झाला;यहोशाफाटला योराम;योरामला उज्जीया झाला;
९ उज्जीयाला योथाम झाला;योथामला आहाज;आहाजला हिज्कीया झाला;
१० हिज्कीयाला मनश्‍शे झाला;मनश्‍शेला आमोन;आमोनला योशीया झाला;
११ यहुद्यांना बाबेलच्या बंदिवासात नेण्यात आले त्या काळात योशीयाला यखन्या आणि त्याचे भाऊ झाले.
१२ बाबेलच्या बंदिवासात गेल्यानंतर यखन्याला शल्तीएल झाला;शल्तीएलला जरूब्बाबेल झाला;
१३ जरूब्बाबेलला अबीहूद झाला;अबीहूदला एल्याकीम;एल्याकीमला अज्जुर झाला;
१४ अज्जुरला सादोक झाला;सादोकला याखीम;याखीमला एलीहूद झाला;
१५ एलीहूदला एलाजार;एलाजारला मत्तान;मत्तानला याकोब झाला;
१६ याकोबला योसेफ झाला, जो मरीयाचा पती होता. मरीयाच्या पोटी ख्रिस्त म्हटलेल्या येशूचा जन्म झाला.
१७ अशा प्रकारे अब्राहामपासून दावीदपर्यंत चौदा पिढ्या; दावीदपासून यहुद्यांच्या बाबेलमधील बंदिवासापर्यंत चौदा पिढ्या; बाबेलमधील बंदिवासापासून ख्रिस्तापर्यंत चौदा पिढ्या झाल्या.
१८ येशू ख्रिस्ताचा जन्म अशा प्रकारे झाला: त्याची आई मरीया हिची योसेफशी मागणी झाली होती. पण, त्यांचे लग्न होण्याआधीच ती पवित्र आत्म्याच्या* सामर्थ्याने गरोदर राहिली.
१९ तिचा पती, योसेफ हा नीतिमान असल्यामुळे त्याला चारचौघांत तिची बदनामी होऊ द्यायची नव्हती. त्यामुळे त्याने तिला गुपचूप घटस्फोट* देण्याचे ठरवले.
२० पण, त्याने या सर्व गोष्टींचा विचार केल्यानंतर, पाहा! यहोवाच्या* दूताने स्वप्नात त्याला दर्शन देऊन म्हटले: “हे योसेफ, दावीदच्या पुत्रा, मरीयाशी लग्न करायला* घाबरू नकोस, कारण तिच्या पोटी असलेला गर्भ पवित्र आत्म्यामुळे* आहे.
२१ तिला पुत्र होईल आणि तू त्याचं नाव येशू* ठेव, कारण तो आपल्या लोकांची त्यांच्या पापांपासून सुटका करेल.”*
२२ हे सर्व खरोखरच घडले, अशासाठी की यहोवाने* आपल्या संदेष्ट्याद्वारे सांगितलेले वचन पूर्ण व्हावे. ते असे:
२३ “पाहा! कुमारी गर्भवती होईल व एका पुत्राला जन्म देईल आणि ते त्याचं नाव इम्मानुएल ठेवतील, ज्याचा अर्थ “देव आपल्यासोबत आहे” असा होतो.
२४ मग योसेफ झोपेतून जागा झाला आणि यहोवाच्या* दूताने सांगितल्याप्रमाणे त्याने केले व आपल्या बायकोला घरी आणले.
२५ पण, तिने मुलाला जन्म देईपर्यंत त्याने तिच्याशी संबंध ठेवला नाही आणि त्याने मुलाचे नाव येशू असे ठेवले.
तळटीपा
^ किंवा “मसीहा; देवाचा अभिषिक्‍त.”
^ किंवा “याची वंशावळ.”
^ किंवा “देवाच्या क्रियाशील शक्‍तीच्या.” शब्दार्थसूची पाहा.
^ यहुदी परंपरेनुसार, मागणी तोडण्यासाठी घटस्फोट द्यावा लागायचा.
^ या भाषांतरात ‘यहोवा’ हे देवाचे नाव ज्या २३७ ठिकाणी आढळते त्यांपैकी हे पहिले आहे. शब्दार्थसूची पाहा.
^ शब्दशः “आपली बायको मरीया हिला घरी आणायला.”
^ किंवा “देवाच्या क्रियाशील शक्‍तीमुळे.” शब्दार्थसूची पाहा.
^ हे नाव येशूवा किंवा यहोशवा या हिब्रू नावाचे रूप आहे, ज्याचा अर्थ “यहोवा तारण करतो” असा होतो.
^ शब्दशः “आपल्या लोकांचे तारण करेल.”
^ शब्दार्थसूची पाहा.
^ शब्दार्थसूची पाहा.
