रोमकर १:१-३२
१ ख्रिस्त येशूचा दास पौल, ज्याला प्रेषित होण्याकरता बोलावण्यात आले आणि देवाच्या आनंदाच्या संदेशाची घोषणा करण्याकरता निवडण्यात आले, त्याच्याकडून:
२ या आनंदाच्या संदेशाविषयी देवाने पवित्र शास्त्रवचनांत पूर्वीच आपल्या संदेष्ट्यांद्वारे वचन दिले होते,
३ अर्थात त्याच्या पुत्राविषयीचा आनंदाचा संदेश. तो शरीराने एक मनुष्य म्हणून दावीदच्या वंशातून* जन्माला आला,
४ पण मेलेल्यांतून पुनरुत्थान* झाल्यामुळे देवाच्या पवित्र आत्म्याच्या* सामर्थ्याने देवाचा पुत्र ठरला. हा पुत्र म्हणजेच येशू ख्रिस्त, आपला प्रभू.
५ त्याच्याचद्वारे आम्हाला देवाची अपार कृपा आणि प्रेषित म्हणून एक कामगिरी मिळाली आहे. हे यासाठी झाले की सर्व राष्ट्रांतील लोकांनी विश्‍वास ठेवण्याद्वारे व त्याच्या आज्ञांचे पालन करण्याद्वारे त्याच्या नावाचा गौरव करावा.
६ याच राष्ट्रांतून तुम्हालादेखील येशू ख्रिस्ताचे अनुयायी होण्याकरता बोलावण्यात आले आहे.
७ पवित्र जन होण्याकरता बोलावण्यात आलेल्या रोम शहरातील देवाच्या सर्व प्रियजनांना:
देव जो आपला पिता व प्रभू येशू ख्रिस्त यांच्याकडून तुम्हा सर्वांना अपार कृपा व शांती लाभो.
८ सगळ्यात आधी तर मी तुम्हा सर्वांविषयी येशू ख्रिस्ताद्वारे माझ्या देवाचे आभार मानतो, कारण सबंध जगात तुमच्या विश्‍वासाबद्दल चर्चा होत आहे.
९ ज्याच्या पुत्रासंबंधी आनंदाचा संदेश घोषित करण्याद्वारे मी अगदी मनापासून त्याची पवित्र सेवा करत आहे, तो देव स्वतः माझ्या वतीने ही साक्ष देऊ शकतो, की मी सतत माझ्या प्रार्थनांमध्ये तुमच्याविषयी उल्लेख करतो,
१० आणि अशी विनंती करतो की शक्य झाल्यास, देवाच्या इच्छेने आता तरी मला तुमच्याकडे येण्यात यश मिळावे.
११ कारण तुम्हाला भेटण्याची माझी फार इच्छा आहे; यासाठी, की तुम्हाला काही आध्यात्मिक देणगी देऊन मला तुमचा विश्‍वास मजबूत करता यावा.
१२ किंवा त्यापेक्षा, एकमेकांच्या विश्‍वासामुळे म्हणजेच माझ्या व तुमच्या विश्‍वासामुळे आपल्याला एकमेकांना प्रोत्साहन देता यावे.
१३ बांधवांनो, इतर राष्ट्रांप्रमाणेच तुमच्यामध्येही माझे प्रचार कार्य फलदायी व्हावे म्हणून मी कित्येकदा तुमच्याकडे येण्याचा प्रयत्न केला; पण, आजपर्यंत माझ्या मार्गात अडथळे आले. याविषयी तुम्ही अंधारात असावे अशी माझी इच्छा नाही.
१४ मी ग्रीक लोकांचा आणि विदेश्‍यांचा,* तसेच ज्ञानी व अज्ञानी लोकांचाही कर्जदार आहे;
१५ म्हणूनच, रोममध्ये असणाऱ्‍या तुम्हालादेखील आनंदाचा संदेश घोषित करायला मी उत्सुक आहे.
१६ कारण मला या आनंदाच्या संदेशाची लाज वाटत नाही; खरेतर, त्याद्वारेच विश्‍वास ठेवणाऱ्‍या सर्वांना, म्हणजे आधी यहुद्यांना आणि त्यांसोबत ग्रीक लोकांनाही देवाच्या सामर्थ्याने तारण मिळते.
१७ कारण या आनंदाच्या संदेशातून देवाचे नीतिमत्त्व विश्‍वासाद्वारे व विश्‍वासासाठी प्रकट होते; शास्त्रात असे लिहिलेदेखील आहे, की “नीतिमान जन त्याच्या विश्‍वासामुळे जिवंत राहील.”
१८ कारण अनीतिमान मार्गाने सत्य दडपून टाकणाऱ्‍या माणसांच्या सर्व अधार्मिकतेविरुद्ध व अनीतीविरुद्ध देवाचा क्रोध स्वर्गातून प्रकट होत आहे,
१९ कारण देवाबद्दल जे जाणून घेण्यासारखे आहे ते त्यांच्यामध्ये अगदी स्पष्टपणे दिसून येते, आणि देवानेच ते त्यांना दाखवून दिले आहे.
२० जगाच्या निर्मितीपासूनच त्याचे अदृश्‍य गुण, म्हणजे त्याचे सार्वकालिक सामर्थ्य आणि देवपण हे त्याने निर्माण केलेल्या गोष्टींवरून अगदी स्पष्टपणे दिसून येते आणि यामुळे खरेतर देवावर विश्‍वास न ठेवण्यासाठी ते कोणतेही निमित्त सांगू शकत नाहीत.
२१ कारण देवाबद्दल माहीत असूनही त्यांनी देव म्हणून त्याचा गौरव केला नाही किंवा त्याचे उपकार मानले नाहीत. तर, ते मूर्खांसारखे विचार करत राहिले आणि त्यांची अविचारी मने अंधकारमय झाली.
२२ ते स्वतःला ज्ञानी म्हणवत असले, तरी ते मूर्ख ठरले
२३ आणि त्यांनी अविनाशी देवाच्या गौरवाला नाश होणाऱ्‍या मानवांचे, पक्ष्यांचे, चार पायांच्या प्राण्यांचे व सरपटणाऱ्‍या जीवांचे रूप दिले.
२४ म्हणूनच, देवाने त्यांच्याच मनाच्या वासनांनुसार त्यांना अशुद्धपणाच्या स्वाधीन केले, यासाठी की, त्यांनी आपल्या शरीराचा अनादर करावा.
२५ त्यांनी देवाच्या सत्याऐवजी असत्याला पसंत केले आणि निर्माणकर्त्याऐवजी निर्माण केलेल्या गोष्टींची उपासना* व पवित्र सेवा केली. त्या निर्माणकर्त्याचा सर्वकाळ गौरव व्हावा. आमेन.
२६ देवाने याच कारणामुळे त्यांना त्यांच्या अनियंत्रित लैंगिक वासनेच्या अधीन केले, कारण त्यांच्यातील स्त्रियांनी नैसर्गिक नियमांच्या विरोधात जाऊन आपल्या शरीराचा वापर केला;
२७ तसेच, पुरुषांनीही स्त्रीचा नैसर्गिक उपभोग सोडून,* एकमेकांप्रती वासनेने पेटून, पुरुषांनी पुरुषांसोबत अश्‍लील कामे केली आणि त्यांच्या या गैरवर्तनाची योग्य शिक्षा त्यांना भोगावी लागली.*
२८ ज्या प्रकारे, देवाला मान्य करणे त्यांना योग्य वाटले नाही,* त्याच प्रकारे देवानेही त्यांना अनुचित कामे करण्यासाठी त्यांच्या घृणित विचारसरणीच्या स्वाधीन केले.
२९ ते सर्व प्रकारची अनीती, दुष्टपणा, लोभ,* वाईटपणा, मत्सर, खून, भांडणतंटे, फसवेगिरी, व द्वेष यांनी भरलेले, चहाड्या करणारे,*
३० लोकांच्या पाठीमागे त्यांची निंदा करणारे, देवाचा द्वेष करणारे, उद्धट, गर्विष्ठ, बढाई मारणारे, कटकारस्थाने करणारे,* आईवडिलांच्या आज्ञा मोडणारे,
३१ अविचारी, दिलेले वचन न पाळणारे, माया-ममता नसलेले आणि क्रूर असे होते.
३२ आणि अशा गोष्टी करणारे मरणदंडास पात्र आहेत, हा देवाचा न्याय्य निर्णय माहीत असूनही ते स्वतः तर अशी कामे करतच राहतात, शिवाय इतर जण ती कामे करतात, तेव्हा त्यांनाही ते संमती देतात.
तळटीपा
^ शब्दशः “बीजातून.”
^ शब्दार्थसूची पाहा.
^ किंवा “देवाच्या क्रियाशील शक्‍तीच्या.” शब्दार्थसूची पाहा.
^ किंवा “ग्रीक नसलेल्यांचा.”
^ किंवा “पूजा.”
^ किंवा “स्त्रियांशी नैसर्गिक संबंध सोडून.”
^ किंवा “गैरवर्तनाचा योग्य मोबलदा त्यांना मिळाला.”
^ किंवा “देवाबद्दल अचूक ज्ञान घेणे त्यांना मान्य नव्हते.”
^ किंवा “हाव.”
^ किंवा “इतरांविरुद्ध कुजबूज करणारे.”
^ किंवा “इतरांची हानी करण्याचे मार्ग शोधून काढणारे.”
