१ तीमथ्य ४:१-१६
४ पण, प्रेरित वचन* स्पष्टपणे सांगते की भविष्यात अशी वेळ येईल, जेव्हा काही जण दिशाभूल करणाऱ्‍या प्रेरित संदेशांकडे* आणि दुरात्म्यांच्या शिकवणींकडे लक्ष देऊन विश्‍वास सोडून देतील.
२ कारण ते खोटे बोलणाऱ्‍या माणसांच्या ढोंगीपणाला बळी पडतील, ज्यांचा विवेक जणू तापलेल्या लोखंडाने डाग दिल्याप्रमाणे सुन्‍न झाला आहे.
३ ते लग्न करण्याची मनाई करतात आणि अशा खाद्यपदार्थांपासून दूर राहण्याची आज्ञा देतात, जे विश्‍वास ठेवणाऱ्‍यांनी व सत्याचे अचूक ज्ञान असलेल्यांनी उपकारस्तुती करून खावेत म्हणून देवाने निर्माण केले आहेत.
४ कारण उपकारस्तुती करून स्वीकारल्यास, देवाने निर्माण केलेली प्रत्येक गोष्ट ही चांगलीच आहे, त्यामुळे कोणतीही गोष्ट नाकारली जाऊ नये.
५ कारण देवाच्या वचनाने आणि तिच्यावर केलेल्या प्रार्थनेने ती पवित्र होते.
६ बांधवांना हा सल्ला दिल्यास, तू ख्रिस्त येशूचा एक चांगला सेवक ठरशील. असा सेवक, ज्याचे विश्‍वासाच्या वचनांनी आणि तू काटेकोरपणे पाळत असलेल्या उत्तम शिकवणीने पोषण झाले आहे.
७ पण, म्हाताऱ्‍या बायका सांगतात तशा काल्पनिक, आणि देवाचा अनादर करणाऱ्‍या कथा कहाण्यांपासून दूर राहा. उलट, सुभक्‍तीचे ध्येय ठेवून त्यानुसार स्वतःला प्रशिक्षित कर.
८ शारीरिक प्रशिक्षण* हे थोड्यासाठी उपयोगी आहे, पण सुभक्‍ती तर सर्व गोष्टींसाठी फायदेकारक आहे, कारण ती आताच्या जीवनाचे आणि येणाऱ्‍या जीवनाचेही अभिवचन देते.
९ हे वाक्य विश्‍वसनीय आणि पूर्णपणे स्वीकारण्यालायक आहे.
१० म्हणूनच आपण मेहनत व परिश्रम करतो, कारण आपण एका जिवंत देवावर आशा ठेवली आहे, जो सर्व प्रकारच्या लोकांचा, आणि विशेषतः विश्‍वासू जनांचा तारणकर्ता आहे.
११ त्यांना या आज्ञा देऊन शिकवत राहा.
१२ तुझ्या तरुण वयामुळे कोणीही तुला तुच्छ लेखणार नाही याची काळजी घे. त्याऐवजी, बोलण्यात व वागण्यात, तसेच प्रेम, विश्‍वास व शुद्धता या बाबतींत विश्‍वासू जनांसाठी एक चांगले उदाहरण हो.
१३ मी येईपर्यंत, सार्वजनिक वाचन, मार्गदर्शन* देणे व शिकवणे यांत स्वतःला वाहून घे.
१४ वडीलवर्गाने तुझ्यावर हात ठेवले, तेव्हा एका भविष्यवाणीद्वारे जे कृपादान तुला देण्यात आले, त्याकडे दुर्लक्ष करू नको.
१५ या गोष्टींवर सखोल विचार* करत राहा; त्यांत अगदी गढून जा, म्हणजे तुझी प्रगती सर्वांना स्पष्टपणे दिसून येईल.
१६ स्वतःकडे आणि तू देत असलेल्या शिक्षणाकडे सतत लक्ष दे. या गोष्टींमध्ये टिकून राहा, कारण असे केल्याने तू स्वतःला आणि जे तुझे ऐकतात त्यांनाही वाचवशील.*
तळटीपा
^ शब्दशः “आत्मा.”
^ शब्दशः “दिशाभूल करणाऱ्‍या आत्म्यांकडे.”
^ किंवा “व्यायाम.”
^ किंवा “प्रोत्साहन.”
^ किंवा “मनन.”
^ किंवा “तारण मिळेल.”
