१ थेस्सलनीकाकर १:१-१०
१ पौल, सिल्वान* व तीमथ्य यांच्याकडून, देव जो पिता आणि प्रभू येशू ख्रिस्त यांच्यासोबत ऐक्यात असलेल्या थेस्सलनीकाकरांच्या मंडळीला:
तुम्हाला अपार कृपा व शांती मिळो.
२ आम्ही आमच्या प्रार्थनांमध्ये तुम्हा सर्वांचा उल्लेख करून नेहमी देवाचे आभार मानतो,
३ कारण तुम्ही विश्‍वासूपणे जे कार्य केले आणि प्रेमळपणे जे परिश्रम घेतले; तसेच, आपल्या प्रभू येशू ख्रिस्तामध्ये असलेल्या तुमच्या आशेमुळे तुम्ही जो धीर धरला, त्याची आम्ही सतत आपला देव व पिता याच्यासमोर आठवण करतो.
४ देवाला प्रिय असलेल्या आमच्या बांधवांनो, त्याने तुम्हाला निवडले आहे हे आम्हाला माहीत आहे,
५ कारण आम्ही घोषित करत असलेला आनंदाचा संदेश हा तुम्हाला केवळ शब्दांनीच देण्यात आला नाही, तर सामर्थ्याने व पवित्र आत्म्याने* आणि पूर्ण खातरीसहित देण्यात आला; आणि तुमच्यामध्ये असताना आम्ही तुमच्यासाठी कशा प्रकारे काम केले हे तर तुम्हाला माहीतच आहे.
६ आणि तुम्ही आमचे व प्रभूचे अनुकरण करणारे झाला, कारण बऱ्‍याच संकटांत असतानाही तुम्ही पवित्र आत्म्याद्वारे* मिळणाऱ्‍या आनंदाने वचन स्वीकारले
७ आणि असे केल्यामुळे तुम्ही मासेदोनिया व अखया इथे विश्‍वास ठेवणाऱ्‍या सर्वांसाठी उदाहरण बनला.
८ खरेतर, तुमच्यामुळे सबंध मासेदोनिया व अखयात लोकांना यहोवाचे* वचन ऐकायला मिळाले; पण त्यासोबतच तुमच्या विश्‍वासाविषयी सर्व ठिकाणी चर्चा होत आहे, आणि यामुळे आम्ही काही वेगळे सांगायची गरज नाही.
९ कारण तिथले लोक स्वतःच हे सांगतात, की कशा प्रकारे आम्ही तुम्हाला पहिल्यांदा भेटलो आणि कशा प्रकारे तुम्ही आपल्या मूर्तींना सोडून देवाकडे वळला, यासाठी की तुम्ही एका जिवंत व खऱ्‍या देवाची सेवा करावी;
१० आणि त्याचा पुत्र, अर्थात येशू, ज्याला त्याने मेलेल्यांतून उठवले आणि जो येणाऱ्‍या क्रोधापासून आपल्याला वाचवेल, तो स्वर्गातून येण्याची वाट पाहावी.
तळटीपा
^ ज्याला सीला असेही म्हणतात.
^ किंवा “देवाच्या क्रियाशील शक्‍तीने.” शब्दार्थसूची पाहा.
^ किंवा “देवाच्या क्रियाशील शक्‍तीद्वारे.” शब्दार्थसूची पाहा.
^ शब्दार्थसूची पाहा.
